Author: ذولقرنین حیدر

اسلام آباد: وفاقی دارالحکومت میں اسامہ قتل کیس کی تفتیش کرنے والی جے آئی ٹی نے ملزمان اور مقتول اسامہ کے فون کا ڈیٹا طلب کرلیا۔

اے آر وائی نیوز کی رپورٹ کے مطابق اسلام آباد میں نوجوان اسامہ قتل کیس کی جے آئی ٹی کا پہلا اجلاس ہوا جس میں تمام ملزمان کے بیانات قلمبند کرلیے گئے۔

ملزمان نے جے آئی ٹی کو بتایا کہ ڈکیتی کی کال پر کارروائی عمل میں لائی گئی جس پر جے آئی ٹی نے ملزمان اور مقتول اسامہ کے فون کا ڈیٹا طلب کرلیا۔

ذرائع کا کہنا ہے کہ جائے وقوعہ سے ملے گولیوں کے خول بھی فرانزک کے لیے بھجوادئیے گئے ہیں، فرانزک رپورٹ جمعے کے روز موصول ہونے کا امکان ہے جبکہ جے آئی ٹی کا آئندہ اجلاس بھی جمعے کو ہوگا۔

جے آئی ٹی نے مدعی کو گواہ پیش کرنے کی ہدایت کرتے ہوئے سیف سٹی کیمروں کی فوٹیج اور وائرس لیس کال کا ڈیٹا بھی طلب کرلیا۔

واضح رہے کہ دو روز قبل دارالحکومت اسلام آباد میں 21 سالہ کار سوار اسامہ اے ٹی ایس اہلکاروں کی فائرنگ سے جاں بحق ہو گیا تھا۔

مزید پڑھیں: پولیس کی فائرنگ سے جاں بحق اسامہ کے والد نے کئی سوالات اٹھا دیے

ترجمان پولیس کا کہنا تھا کہ پولیس نے متعدد بار جی 10 تک گاڑی کا تعاقب کیا اور نہ رکنے پر گاڑی کے ٹائروں پر فائر کیے گئے، 2 گولیاں گاڑی کے ڈرائیور کو لگیں جس سے ڈرائیور موقع پر ہی دم توڑ گیا۔

دوسری جانب مقتول اسامہ کے والد ندیم ستی کا کہنا تھا کہ پولیس کا یہ دعویٰ کہ اسامہ روکنے پر رکا نہیں لغو معلوم ہوتا ہے، اگر انہیں روکنا تھا تو وہ ٹائر پر گولی مارتے، گاڑی کی ونڈ اسکرین پر 6 گولیوں کے نشانات ہیں جس سے یوں لگتا ہے کہ گاڑی روک کر بہت اطمینان سے فائرنگ کی گئی اور اس بات کو یقینی بنایا گیا کہ اسامہ زندہ نہ رہے۔

ندیم ستی کا کہنا تھا کہ تمام حکومتی افراد نے انہیں شفاف تحقیقات کا یقین دلایا ہے اور وہ وقتی طور پر مطمئن ہیں، تاہم ان کے نقصان کا ازالہ کسی طور پر بھی ممکن نہیں ہے۔

اسلام آباد: شہر اقتدار میں اے ٹی ایس کی فائرنگ سے جاں بحق ہونے والے نوجوان کے واقعے کی شفاف تحقیقات کے لیے جوڈیشل انکوائری کا نوٹی فکیشن جاری کردیا گیا۔

اے آر وائی نیوز کی رپورٹ کے مطابق اسلام آباد میں پولیس اہلکاروں کی فائرنگ سے اسامہ ندیم ستی نامی نوجوان کی ہلاکت کی تحقیقات کے لیے جوڈیشل انکوائری کرانے کا فیصلہ کیا گیا ہے۔

اس ضمن میں جوڈیشل انکوائری کمیٹی تشکیل دی گئی ہے جو واقعے سے متعلق تمام شواہد اکھٹے کرے گی اور ذمہ داران کا تعین کرے گی۔چیف کمشنر عامر علی احمد کی جانب سے جوڈیشل انکوائری کا نوٹی فکیشن جاری کیا گیا۔

واضح رہے کہ اسلام آباد کے علاقے جی 10 میں اے ٹی ایس اہلکاروں کی فائرنگ سے کار سوار جاں بحق ہوا، پولیس نے واقعے کو مقابلے کا رنگ دینے کی کوشش کی مگر بعد میں یہ مقابلہ جعلی نکلا، کیونکہ گاڑی یا مقتول سے کوئی اسلحہ برآمد نہیں ہوا۔

پولیس حکام کے مطابق گزشتہ شب ہیلپ لائن پر کال موصول ہوئی کہ کار میں سوار مسلح افراد شمس کالونی میں ڈکیتی کی کوشش کررہے ہیں۔ گشت پر مامور پولیس نے مشکوک گاڑی کا تعاقب کیا اور کالے شیشے والی گاڑی کو روکنے کا اشارہ دیا ڈرائیور نے گاڑی نہ روکی جس پر اہلکاروں نے فائرنگ کردی۔

مزید پڑھیں: نوجوان کی ہلاکت : گاڑی پر فائرنگ کرنے والے 5 اے ٹی ایس اہلکار گرفتار

ترجمان پولیس کا کہنا تھا کہ اہلکاروں نےجی 10تک گاڑی کا تعاقب کیا اور اُسے متعدد بار رکنے کی ہدایت کی، نہ رکنے پرگاڑی کے ٹائروں پرفائر کئےگئے، بدقسمتی سے 2 فائرگاڑی ڈرائیور کو لگ گئے جس سےاس کی موت ہوگئی۔

پولیس ذرائع کے مطابق گاڑی پرفائرنگ کرنے والے5اےٹی ایس اہلکاروں گرفتار کرکے تھانہ رمنامیں منتقل کردیا گیا ہے جبکہ فائرنگ سےجاں بحق شخص کا پوسٹ مارٹم مکمل کرلیا گیا ہے۔

والد کے مطابق بیٹے کو کو 17 گولیاں لگی تھیں۔ اہل خانہ نے بتایا کہ اُن کا بیٹا اوبر گاڑی چلا رہا تھا، پولیس نے بے وجہ فائرنگ کر کے اُن کے جگر گوشے کو قتل کردیا۔

آئی جی اسلام آباد نے واقعہ کی فوری تحقیقات کاحکم دیا، جس کے بعد ڈی آئی جی سربراہی میں ٹیم تشکیل دے دی گئی ہے۔ پولیس کا کہنا ہے کہ اہلخانہ کی جانب سےدرخواست کے بعد مقدمے کا اندراج کیا جائے گا۔