Author: ذولقرنین حیدر

اسلام آباد: بھارت کی پاکستان اور اور کشمیر دشمنی پر مبنی ایک اور سازش بے نقاب ہوگئی۔

اے آر وائی نیوز کی رپورٹ کے مطابق بھارت نے آزاد کشمیر، گلگت بلتستان کو موسمی نقشہ جات کا حصہ ظاہر کردیا، بھارتی موسمیاتی پیش گوئیوں میں بھی گلگت بلتستان اور مظفر آباد کو شامل کرلیا گیا۔

بھارتی محکمہ موسمیات نے آج سے موسمی صورتحال جاری کرنا شروع کی جس میں گلگت بلتستان، مظفرآباد کو شمال، مغربی ذیلی ڈویژن کا حصہ ظاہر کیا۔

واضح رہے کہ بھارت نے 2019 میں بھی آزاد کشمیر، گلگت بلتستان کو نئے نقشوں میں اپنا ظاہر کیا تھا، پاکستان نے بھارت کے ان گمراہ کن سیاسی نقشوں کو مسترد کردیا۔

بھارت سلامتی کونسل کی قراردادوں کی خلاف ورزی کررہا ہے،ترجمان دفتر خارجہ

ترجمان دفتر خارجہ کا کہنا ہے کہ بھارت کے نام نہاد سیاسی نقشے کی طرح یہ اقدام بھی قانونی طور پر کالعدم ہے، بھارت سلامتی کونسل کی قراردادوں کی خلاف ورزی کررہا ہے۔

ترجمان دفتر خارجہ کے مطابق بھارت کے غیرقانونی اقدام سے مقبوضہ کشمیر کی متنازع حیثیت کو ختم نہیں کیا جاسکتا۔

عائشہ فاروقی کا کہنا ہے کہ بھارتی حکومت کی حرکتیں کشمیریوں کو حق خود ارادیت سے ہٹا نہیں سکتیں، بھارت بے بنیاد دعوؤں کے ذریعے عالمی برادری کو گمراہ کرنے سے باز رہے۔

اسلام آباد: پاکستان نے مقبوضہ کشمیر کے ڈھانچے کو غیر قانونی طور پر تبدیل کرنے کی مسلسل بھارتی کوششوں کی شدید مذمت کر دی ہے۔

اے آر وائی نیوز کے مطابق ترجمان دفتر خارجہ نے کہا ہے کہ بھارت کی جانب سے ڈومیسائل قوانین میں تبدیلی ایک اور غیر قانونی اقدام ہے، جو بین الاقوامی قوانین کی واضح خلاف ورزی ہے، پاکستان اس کی شدید مذمت کرتا ہے۔

ترجمان کا کہنا تھا کہ یہ اقدام 5 اگست 2019 کے اقدامات کا تسلسل ہے، مقبوضہ کشمیر کے عوام نے نئے قانون کو ناقابل قبول قرار دے کر مسترد کر دیا ہے، کشمیری عوام اپنے بنیادی حقوق، آبادی اور الگ شناخت کو تبدیل کرنے کی کوششوں کو قبول نہیں کریں گے۔

انھوں نے کہا کہ عالمی سطح پر صحت کے بحران کی صورت حال میں بھارت نے تازہ ترین کارروائی کی ہے جو قابل مذمت ہے، بی جے پی ہندوتوا ایجنڈے کو آگے بڑھانا چاہتی ہے، اقوام متحدہ اور بین الاقوامی برادری کو بھارت کی نئی کارروائی کا نوٹس لینا چاہیے، اور مسلسل خلاف ورزیوں پر بھارت سے جواب طلب کرنا چاہیے۔

ترجمان دفتر خارجہ نے کہا کہ پاکستان مقبوضہ کشمیر میں بھارتی ریاستی دہشت گردی کو اجاگر کرتا رہے گا، پاکستان کا مؤقف ہے کہ بھارت کبھی بھی کشمیری عوام کی مرضی کو نہیں توڑ سکے گا۔

خیال رہے کہ 5 اگست 2019 کو بھارت نے جموں و کشمیر کی خصوصی اور الگ حیثیت کا خاتمہ کرکے اسے بھارت کا غیر قانونی طور پر حصہ بنا لیا تھا، جس کی مذمت ساری دنیا میں کی گئی، تب سے اب تک مقبوضہ کشمیر میں لاک ڈاؤن ہے اور مظلوم کشمیریوں پر بد ترین مظالم ڈھائے جا رہے ہیں۔