Author: ذولقرنین حیدر

اسلام آباد: وفاقی دارالحکومت کی پولیس کے انسپیکٹر جنرل نے اعلان کیا ہے کہ کل تمام افسران و اہلکار تھلیسیمیا کے مریضوں کو خون کے عطیات دیں گے۔

ملک بھر میں ہونے والے لاک ڈاؤن کی وجہ سے تھلیسیمیا کے مریضوں کو خون کی کمی کا سامنا ہے اور اسی وجہ سے بلڈ کے عطیات میں بھی واضح کمی دیکھنے میں آئی ہے۔

آئی جی اسلام آباد نے صورت حال کے پیش نظر تھیلیسیما کے مریضوں کے لیے بڑا اعلان کیا۔

نمائندہ اے آر وائی نیوز کے مطابق آئی جی کے احکامات کے مطابق اسلام آباد پولیس کے تمام افسران اور اہلکار مریضوں کے لیے خون کے عطیات دیں گے۔

یاد رہے کہ شہر قائد میں لاک ڈاؤن کی وجہ سے تھلیسیمیا کے مریض بچوں کے لیے خون کے عطیات کی فراہمی متاثر ہونے کے بعد سیاسی رہنما میدان میں آئے اور انہوں نے عطیات دینے کی ایپل کی تھی۔

مزید پڑھیں: کراچی میں سیاسی اور مذہبی رہنماؤں کی تھلیسیمیا بچوں کے لیے خون کی اپیل

گورنر سندھ عمران اسماعیل نے اکتیس مارچ کو تھلیسیمیا کے مریض بچوں کے لیے ایک بوتل خون کا عطیہ دیا۔ گورنر سندھ کا اس موقع پر کہنا تھا کہ لاک ڈاؤن کے سبب بلڈ بینکس میں خون کی کمی قابل تشویش ہے، اس صورت حال کے باعث خون کی بیماریوں مبتلا بچوں اور افراد کو مشکلات کا سامنا ہے۔

اسلام آباد: جاپان کی حکومت نے کرونا وائرس سے نبردآزما پاکستان  کو 21 لاکھ 60 ہزار ڈالر دینے کا اعلان کردیا۔

وفاقی دارالحکومت میں قائم جاپانی سفارت خانے کی جانب سے جاری ہونے والے اعلامیے کے مطابق جاپان کی جانب سے پاکستان کو 2.16 ملین ڈالر کی امداد دی جائے گی۔

سفارت خانے کے مطابق پاکستان کو امداد اقوام متحدہ، آئی او ایم کے ذریعےفراہم  کی جائے گی جس کا مقصد کرونا وائرس سے نمٹنے کے لیے اقدامات کرنا ہے۔

مزید پڑھیں: سعودی عرب پاکستان کی مدد کے لیے میدان میں آگیا

جاپانی سفارت خانے نے اس امید کا اظہار کیا کہ رقم سے پاکستان کی صلاحیتوں میں مزید اضافہ ہواگا اور مزید اقدامات بھی کیے جائیں گے۔ علاوہ ازیں آلات اور دیگر سامان فراہم بھی کیا جائے گا۔

جاپانی سفیر کا کہنا تھا کہ کرونا کے خلاف پاکستان کی کاوشیں اور اقدامات قابلِ تعریف ہیں، جاپان ہمیشہ پاکستان کے ساتھ کھڑا ہوتا ہے، پولیوکےخاتمےکے حوالے سے بھی جاپان نے بھرپور تعاون کیا۔

اسلام آباد: وفاقی دارالحکومت اسلام آباد میں کورونا وائرس کے پیش نظر شاپنگ مالز اور ریسٹورنٹس بند کرنے کا فیصلہ کیا گیا ہے۔

تفصیلات کے مطابق سندھ، پنجاب، بلوچستان، خیبرپختونخوا اور آزاد کشمیر کے بعد وفاقی دارالحکومت اسلام آباد میں بھی شاپنگ مالز اور ریسٹورنٹس بند کرنے کا حکم جاری کردیا گیا ہے۔

شاپنگ مالز اور ریسٹورنٹس ایک ہفتے کے لیے بند کیے جائیں گے اور اس متعلق چیف کمشنر نےڈپٹی کمشنر کو احکامات جاری کرنےکی ہدایت دے دی ہے۔

کورونا وائرس کے پھیلاؤ کو روکنے کے لیے احتیاطی تدابیر کے تحت پہلے ہی تفریحی مقامات تاحکم ثانی بند کردیے گئے ہیں، کاروباری سرگرمیاں معطل ہیں اور شہریوں کی آمد و رفت محدود کرنے کے لیے مختلف اقدامات کیے گئے ہیں۔

شہر اقتدار سے پردیسی اپنے آبائی علاقوں میں لوٹ رہے ہیں اور شہر میں گہما گہمی ماند پڑ گئی ہے، مارکیٹیں اور کاروباری مراکز کی بندش سے بعض علاقے ویران ہیں۔

واضح رہے کہ چاروں صوبوں میں پہلے ہی شاپنگ مالز، سنیما گھر، تفریحی مقامات، بچت بازار بند کر دیے گئے ہیں، سندھ میں آج شب 12 بجے سے مکمل لاک ڈاؤن کر کے شہریوں کو گھروں میں رہنے کی ہدایت کی گئی ہے۔