Author: ذولقرنین حیدر

اسلام آباد ایئرپورٹ پر اے این ایف کی کارروائی‘ 13 کروڑ روپے مالیت کی منشیات برآمد

اسلام آباد: اسلام آباد ایئرپورٹ پر اے این ایف نے کارروائی کرتے ہوئے خاتون کو گرفتار کرکے کروڑوں روپے مالیت کی منشیات برآمد کرلی۔

تفصیلات کے مطابق اسلام آباد ایئرپورٹ پراے این ایف نے کارروائی کرتے ہوئے خاتون کو گرفتار کرکے کروڑوں روپے مالیت کی منشیات برآمد کرلی۔

اے این ایف حکام کے مطابق برطانوی شہریت یافتہ خاتون کوثریونس سے 13کروڑ روپے مالیت کی منشیات برآمد ہوئی، خاتون نے3 مختلف بیگزمیں 13 کلو ہیروئن چھپائی تھی۔

اے این ایف حکام کا کہنا ہے کہ خاتون کو ایئرپورٹ لاؤنج سے حراست میں لیا گیا۔

یاد رہے کہ گزشتہ ماہ اسلام آباد ایئرپورٹ پر اے این ایف نے کارروائی کرتے ہوئے بحرین جانے والے مسافر سے آئس ہیروئن برآمد کی تھی۔

اے این ایف کے مطابق ہیروئن بیگ کے خفیہ خانوں میں چھپائی گئی تھی، ملزم نجی ایئرلائن کی پرواز سے بحرین جا رہا تھا۔

اسلام آباد ایئرپورٹ پر اے این ایف کی کارروائی‘ 2 ملزمان گرفتار

واضح رہے کہ 31 جنوری کو اسلام آباد ایئرپورٹ پر اے این ایف نے کارروائی کرتے ہوئے بیرون ملک منشیات سپلائی کرنے والے نیٹ ورک کے 2 افراد گرفتارکیے تھے۔

اے این ایف حکام کا کہنا تھا کہ ملزمان سے کروڑوں مالیت کی ایک کلو سے زائد منشیات برآمد ہوئی ہے، ملزمان قطرایئرلائن کی پروازکیو آر633 اے سے دوحا جا رہے تھے۔

مارچ 24, 2019
سعودی ولی عہد اور عمران خان مسلم امہ کے لیے ایک ویژن رکھتے ہیں، شہریار آفریدی

اسلام آباد: وزیرمملکت داخلہ شہریارآفریدی کا کہنا ہے کہ پرنس محمدبن سلمان اور وزیراعظم کامسلم امہ کیلئے وژن ایک ہے، ولی عہد نے دورہ بھارت، ایشیا کے دوران پاکستان کا مقدمہ لڑا، پاکستانی قوم ولی عہدکی شکرگزار ہے، سعودی سفیر کا کہنا تھا کہ پاکستان سےدل کی گہرائیوں سےمحبت کرتاہوں۔

تفصیلات کے مطابق سعودی عرب کے سفیر نواف بن سعید المالکی نے وزارت داخلہ کا دورہ کیا اور وزیر داخلہ شہریارخان آفریدی سے ملاقات کی ، ملاقات میں سعودی عرب میں پاکستانی زائرین اور ورکرز کی سہولت کےاقدامات پر بریفنگ دی گئی۔

شہریار آفریدی کا کہنا تھا کہ سعودی ولی عہد محمد بن سلمان کی پاکستان آمد پاکستان، سعودی عرب تعلقات کی تاریخ میں ایک نئے باب کا اضافہ ہے، شہزادہ محمد بن سلمان کی جانب سے پاکستان میں بیس ارب ڈالرز کی انویسٹمنٹ کا اعلان سعودی عرب اور پاکستان کے تعلقات کی مضبوطی میں ایک سنگ میل ثابت ہوگا۔

شہریار آفریدی کا کہنا تھا کہ خوشی ہے کہ شہزادہ محمد بن سلمان اور وزیر اعظم عمران خان کا مسلم امہ کیلئے ویژن ایک ہے، شہزادہ محمد بن سلمان اور وزیر اعظم عمران خان کا کرپشن اور غربت کے خاتمہ جیسے بنیادی مسائل پر ویژن ایک جیسا ہے۔

وزیرمملکت برائے داخلہ کا کہنا تھا سعودی حکومت کاپاک، بھارت کشیدگی ختم کرنےمیں کردار ہے، سعودی وزیرخارجہ کادورہ پاکستان خوش آئندہے۔

انھوں نے کہا کہ پرنس محمد بن سلمان کا حرم شریف میں توسیع کا پراجیکٹ زائرین اور حاجیوں کیلئے عبادات میں سہولت اور آسانیاں پیدا کرنےکا باعث بنے گا۔ شہزادہ محمد بن سلمان نے دورہ بھارت اور ایشیا کے دوران پاکستان کا مقدمہ لڑا۔ پاکستانی قوم ولی عہد کی شکرگزار ہے

اس موقع پر سعودی سفیر نواف بن سعید المالکی کا کہنا تھا پاکستان سےدل کی گہرائیوں سےمحبت کرتاہوں، پاکستان میں جوعزت اور محبت ملی بیان نہیں کرسکتا۔

مزید پڑھیں : سعودی وزیرخارجہ عادل الجبیر آج پاکستان پہنچ رہے ہیں

خیال رہے سعودی وزیرخارجہ عادل الجبیر سعودی ولی عہدکاپیغام لے آج پاکستان پہنچ رہے ہیں ، سعودی وزیرخارجہ کا ایجنڈا بھارت کی جانب سے پیدا کردہ کشیدگی ختم کرانا ہے۔

دورے کے دوران سعودی وزیرخارجہ وزیراعظم عمران خان اور وزیر خارجہ شاہ محمود قریشی سے ملاقاتیں کریں گے ، جس میں پاک بھارت کشیدہ صورتحال اور خطے میں امن و استحکام سے متعلق بات چیت کی جائے گی۔

مارچ 7, 2019
حکومت نے کالعدم تنظیموں کے زیر انتظام مساجد و مدارس کا کنٹرول سنبھال لیا

اسلام آباد : وفاقی دارالحکومت کی انتظامیہ نے کالعدم تنظیموں کے زیر انتظام مساجد و مدارس کا کنٹرول سنبھال لیا ہے جبکہ قانون نافذ کرنے والے اداروں نے متعدد افراد کو بھی حراست میں لیا ہے۔

تفصیلات کے مطابق حکومت نے مبینہ طورپرکالعدم تنظیموں کے زیرانتظام مساجد و مدارس کا کنٹرول سنبھال لیا، مساجد و مدارس اسلام آبادکےمختلف علاقوں میں واقع ہیں۔

ذرائع کا کہنا ہے کہ جن مساجد اور مدارس کا کنٹرول سنبھالا، اس میں مسجد قبا، مدنی مسجد، علی اصغر مسجد، مدرسہ خالد بن ولی اور مدرسہ ضیاء القرآن شامل ہیں، ان مساجد و مدارس کو نیشنل ایکشن پلان پر عملدرآمد کے سلسلے میں تحویل میں لیا گیا ہے۔

ذرائع کے مطابق محکمہ اوقاف نے مساجد کے نئے امام اور خطیب مقرر کردیے، مولانا یاسین کو مسجد قبا سے ہٹا کر مولانا عبدالحفیظ کو خطیب جب کہ مدنی مسجد سے مولانا اظہر عباسی کو ہٹا کر مولانا عمر فاروق کو خطیب مقرر کیا گیا ہے۔

ذرائع کے مطابق مسجد علی اصغر سے خطیب یار محمد کو ہٹا کر قاری محمد صدیق کو مقرر کردیا گیا ہے جب کہ قانون نافذ کرنے والے اداروں نے متعدد افراد کو بھی حراست میں لیا ہے۔

مزید پڑھیں : کالعدم تنظیموں کے خلاف کریک ڈاؤن، 44 افراد زیرِ حراست

وزیرمملکت برائے داخلہ شہریار آفریدی نے سماجی رابطے کی ویب سائٹ ٹوئٹر پر اپنے بیان میں کہنا ہے کہ نیشنل ایکشن پلان2014کے مطابق آپریشن جاری رہےگا، کالعدم تنظیموں کیخلاف آپریشن مقاصد کے حصول تک جاری رہے گا، نیشنل ایکشن پلان پرعملدرآمد میں تیزی کی کوششیں کی جارہی ہیں۔

گذشتہ روز وزیرِ مملکت برائے داخلہ شہریار آفریدی اور سیکریٹری داخلہ نے پریس کانفرنس کرتے ہوئے کہاتھا کہ وزارتِ داخلہ نے کالعدم تنظیموں کے خلاف ایکشن کا آغاز کر دیا ہے، کالعدم تنظیموں کے 44 ارکان حراست میں لیے لیا گیا ہے۔

وزارت داخلہ نے جماعت الدعوة اور فلاح انسانیت فاؤنڈیشن پر پابندی لگا دی تھی اور نوٹی فکیشن جاری کردیا تھا ، وزارت داخلہ کے مطابق پابندی انسداد دہشت گردی ایکٹ انیس سو ستانوے کے تحت عائد کی گئی، دونوں تنظیموں کو انسداد دہشت گردی ایکٹ کے شیڈول ون میں شامل کر دیا گیا ہے۔

مارچ 6, 2019
کسی جماعت سے تعلق نہیں، ہر قسم کی صوبائیت کی مذمت کرتے ہیں، نیب اعلامیہ

اسلام آباد : ترجمان قومی احتساب بیورو نے کہا ہے کہ نیب کا کسی جماعت، فرد یا گروہ سے کوئی تعلق نہیں ہے، ہر قسم کی صوبائیت کی پرزور مذمت کرتے ہیں۔

یہ بات ترجمان نے میڈیا پر نشر ہونے والے نیب کی سندھ کے سیاست دانوں کی گرفتاری کے لئے سندھ سے افسر لانے سے متعلق بیان کی تردید کرتے ہوئے اپنے اعلامیہ میں کہی۔

نیب اعلامیہ میں کہا گیا ہے کہ نیب ملک بھر میں کرپٹ عناصر کے خلاف بلا امتیاز کارروائیاں کررہا ہے، کرپشن کے خلاف کارروائیوں پر کسی صوبے کو استثنیٰ حاصل نہیں۔

قومی احتساب بیورو کا کسی جماعت، گروہ یا کسی شخصیت سے کوئی تعلق نہیں ہے اور نیب ہر قسم کی صوبائیت کی پرزور مذمت کرتا ہے۔

اعلامیہ میں مزید کہا گیا ہے کہ نیب کراچی نے ملزم آغاسراج درانی کو آمدنی سے زائد اثاثہ جات کیس میں گرفتار کیا، ملزم کو اسلام آباد سے گرفتار کیا گیا ہے۔

مزید پڑھیں: غیرقانونی اثاثہ جات کیس ، اسپیکرسندھ اسمبلی آغاسراج درانی 3 روزہ راہداری ریمانڈ پر نیب کےحوالے

واضح رہے کہ سابق صدر آصف علی زرداری نے سندھ اسمبلی کے اسپیکر آغا سراج درانی کی گرفتاری پر تبصرہ کرتے ہوئے کہا تھا کہ گرفتاری کیلئے سندھ سے کسی منگی کو لایا گیا ہے۔

ان کا کہنا تھا کہ ایسا ہر دور میں ہوتا رہا ہے اور ہمیشہ اپنوں نے ہی ہمیں دغا دی ہے، میں اس گرفتاری کی مذمت کرتا ہوں۔

فروری 20, 2019
آمدن سے زائد اثاثہ جات کیس: نیب نے اسپیکرسندھ اسمبلی آغاسراج درانی کو گرفتار کرلیا

کراچی : نیب کراچی نےآمدن سےزائد اثاثہ جات کیس میں اسپیکرسندھ اسمبلی آغاسراج درانی کوگرفتارکرلیا ہے،آغاسراج درانی پر سندھ سیکریٹریٹ کےفنڈزمیں خوردبرد کابھی الزام ہے۔

تفصیلات کے مطابق نیب کراچی نے اسپیکرسندھ اسمبلی آغاسراج درانی کوگرفتارکرلیا ہے، نیب ٹیم نے آغا سراج درانی کو آمدن سے زائد اثاثہ جات کیس میں اسلام آباد سے گرفتار کیا، ان پر سندھ سیکریٹریٹ کے فنڈزمیں خوردبرد کا بھی الزام ہے۔

آغاسراج درانی کو نجی ہوٹل سےگرفتار کرکے نیب راولپنڈی دفتر منتقل کر دیاگیا ہے ، نیب کی جانب سے راہداری ریمانڈحاصل کرنے بعد انھیں کراچی منتقل کیا جائے گا۔

چیئرمین نیب نے آغاسراج درانی کی گرفتاری کے وارنٹ پر دستخط کیے تھے۔

آغاسراج درانی کوکل احتساب عدالت میں پیش کیاجائےگا، نیب اعلامیہ

نیب اعلامیہ میں اسپیکرسندھ اسمبلی آغاسراج درانی کی گرفتاری کی تصدیق کرتے ہوئے کہا گیا ہے کہ نیب راولپنڈی اورنیب ہیڈکوارٹرز انٹیلی جنس ونگ کی معاونت سےگرفتارکیاگیا، آغاسراج درانی کو آج ہی احتساب عدالت میں پیش کیاجائےگا، ملزم پرآمدن سے زائد اثاثے بنانے کا الزام ہے۔

ذرائع کا کہنا ہے کہ نیب کراچی نےآغاسراج کوکئی مرتبہ طلب کیالیکن وہ پیش نہیں ہوئے، جس کے بعد نیب ٹیم نےآغاسراج درانی کی گرفتاری کیلئےچیئرمین نیب سے ہدایت لی تھی۔

مزید پڑھیں : چیئرمین نیب کا آغا سراج درانی کے خلاف تحقیقات کا حکم

یاد رہے اپریل 2018 میں چیئرمین نیب جسٹس (ر) جاوید اقبال نے اسپیکر سندھ اسمبلی آغا سراج کے خلاف تحقیقات کا حکم دیتے ہوئے کہا تھا کہ آغا سراج درانی کے خلاف آمدن سے زائد اثاثوں کی چھان بین ہوگی۔

سابق اسپیکر سندھ اسمبلی آغا سراج درانی کے خلاف تین انکوائریز کا حکم دیا گیا تھا، جن میں آمدن سے زائد اثاثوں، غیر قانونی بھرتیوں اور ایم پی اے ہاسٹل، سندھ اسمبلی بلڈنگ کی تعمیر میں کرپشن شامل ہیں۔

اس سے قبل 6 فروری کو نیب لاہور نے آمدن سے زائد اثاثہ جات کیس میں پنجاب کے سینئر وزیرعبدالعلیم خان کو گرفتار کرلیا تھا، ذرائع کے مطابق علیم خان نیب کی تحقیقاتی کمیٹی کو مطمئن نہ کرسکے۔

فروری 20, 2019
ایل این جی اسکینڈل، سابق وزیر اعظم شاہد خاقان عباسی سے تفتیش شروع

راولپنڈی: ایل این جی اسکینڈل میں نیب کمبائنڈانویسٹی گیشن ٹیم نے سابق وزیراعظم شاہدخاقان سے تفتیش شروع کردی ہے، شاہد خاقان عباسی پر فراڈ، دھوکہ بازی، بددیانتی، اختیارات کا غلط استعمال اور قومی خزانے کو نقصان پہنچانے کا الزام ہے۔

تفصیلات کے مطابق سابق وزیراعظم شاہد خاقان عباسی اسلام آباد پہنچ گئے، جس کے بعد وہ نیب راولپنڈی کے دفتر میں پیش ہوئے، نیب نے ایل این جی اسیکنڈل میں سابق وزیر اعظم کو آج طلب کیا تھا۔

سابق وزیراعظم شاہدخاقان سے نیب کمبائنڈانویسٹی گیشن ٹیم کی تفتیش شروع ہوگئی ہے ، نیب کےایڈیشنل ڈائریکٹرکی سربراہی میں ٹیم تحقیقات کررہی ہے جبکہ ایل این جی اسکینڈل سےمتعلق سوالنامہ شاہدخاقان کے حوالے کردیا گیا ہے۔

اس موقع پر صحافی نےشاہد خاقان عباسی سے سوال کیا کہیں آپ کوعلیم خان کی طرح گرفتار نہ کر لیا جائے ، جس پر انھوں نے جواب دیا کہ کبھی نہیں ، کوئی ڈر خوف نہیں۔

[bs-quote quote=” کوئی ڈر خوف نہیں” style=”style-7″ align=”left” author_name=”شاہد خاقان عباسی "][/bs-quote]

نیب نے سابق وزیر اعظم سے پوچھ گچھ کیلئے سوالنامہ تیار کر رکھا ہے ، ایل این جی اسیکنڈل سے متعلق 85سوالات پوچھیں جائیں گے، جس میں خلاف ضابطہ ایل این جی معاہدہ کرنے ، معاہدہ کرنے کیلئے اختیارات سے تجاوز کرنا اور قطر سےایل این جی معاہدے کی ضرورت سےمتعلق سوال شامل ہیں۔

نیب ذرائع کا کہنا ہے کہ شاہد خاقان عباسی سے قطر سےایل این جی معاہدے کی ضرورت ، ایل این جی معاہدے کی شرائط کی منظوری ، وزیر اعظم ہونے کے باوجود پیٹرولیم کی وزارت اپنے پاس رکھنے اور ایل این جی معاہدے کےلیےقطر کےدوروں سے متعلق پوچھا جائے گا۔

سابق وزیراعظم شاہد خاقان عباسی پر فراڈ، دھوکہ بازی، بددیانتی، اختیارات کا غلط استعمال اور قومی خزانے کو نقصان پہنچانے کا الزام ہے۔

اس سے قبل نیب راولپنڈی نے شاہد خاقان عباسی کو 8 فروری کو طلب کیا تھا ، جس پر شاہدخاقان عباسی نے نیب میں پیش ہونے سے معذرت کرتے ہوئے کہا تھا کہ 18 فروری کووطن واپسی پر نیب میں پیش ہوجاؤں گا۔

مزید پڑھیں : 18 فروری کووطن واپسی پر نیب میں پیش ہوجاؤں گا، شاہد خاقان عباسی

جس کے بعد نیب راولپنڈی نے ایل این جی معاہدے کا ریکارڈ لانے کی ہدایت کرتے ہوئے کہا تھا شاہد خاقان عباسی 19 فروری صبح 10 بجے پیش ہوں۔

خیال رہے 12 جنوری کو ایل این جی اسکینڈل کی تحقیقات کے سلسلے میں سابق وزیرِ خزانہ مفتاح اسماعیل قومی احتساب بیورو (نیب) کے سامنے پیش ہوئے تھے، جن سے ڈیڑھ گھنٹے پوچھ گچھ کی گئی تھی۔

یاد رہے اکتوبر 2018 میں قومی احتساب بیورو (نیب) نے ایل این جی اسکینڈل کیس دوبارہ کھولنے اور سابق وزیراعظم شاہد خاقان عباسی کو طلب کرنے کا فیصلہ کیا تھا جبکہ نیب کی جانب سے وزارت پٹرولیم کو خط لکھ گیا تھا، جس میں متعلقہ وزارتوں سے ریکارڈ طلب کیا تھا۔

جون 2018 میں من پسند کمپنی کو ایل این جی ٹرمینل کا ٹھیکہ دینے کے الزام پر چیئرمین نیب جسٹس (ر) جاوید اقبال نے سابق وزرائے اعظم و دیگر کے خلاف تحقیقات کی منظوری دی تھی، ترجمان نیب کے مطابق ملزمان پر من پسند کمپنی کو ایل این جی ٹرمینل کا 15 سال کے لئے ٹھیکے دینے، مبینہ طور پر ملکی خزانے کو اربوں روپے کا نقصان پہنچانے کا الزام ہے۔

واضح رہے سابق وزیراعظم نوازشریف کے دور حکومت میں سابق وزیرپٹرولیم شاہد خاقان عباسی نے قطرکے ساتھ ایل این جی درآمد کے معاہدے پردستخط کیے تھے، جس کے تحت پاکستان ہرسال قطر سے 3.75 ملین ٹن ایل این جی خریدے گا جو کہ پاکستان کی قومی ضرورت کا کل 20 فیصد ہے۔

فروری 19, 2019
آمدن سے زائد اثاثہ جات کیس ، شہبازشریف کے بیرون ملک جانے پر پابندی عائد

اسلام آباد اپوزیشن لیڈر قومی اسمبلی شہباز شریف کے بیرون ملک جانے پر پابندی عائد کردی گئی جبکہ وزارت داخلہ نےشہبازشریف کانام ای سی ایل پر ڈالنے کیلئے سمری تیارکرلی ہے۔

تفصیلات کے مطابق آمدن سے زائد اثاثہ جات کیس میں اپوزیشن لیڈر قومی اسمبلی شہبازشریف پر بیرون ملک جانے پر پابندی عائد کردی گئی اور وزیر داخلہ کی ہدایت پر شہباز شریف کا نام عبوری قومی شناختی فہرست میں شامل کرلیاگیا ہے، فہرست میں شامل افراد کے 30 دن کیلئے بیرون ملک جانے پر پابندی ہوتی ہے۔

[bs-quote quote=” شہبازشریف کانام عبوری قومی شناختی فہرست میں شامل” style=”style-8″ align=”left”][/bs-quote]

ذرائع کا کہنا ہے کہ وزارت داخلہ نے شہباز شریف کا نام ای سی ایل پر ڈالنے کیلئے سمری تیار کرلی ہے، ان کا نام ای سی ایل پر ڈالنے کیلئے سمری وفاقی کابینہ کو بھیجی جائے گی، شہباز شریف کا نام ای سی ایل پر ڈالنے تک عبوری قومی شناختی فہرست میں رہےگا۔

گذشتہ روز قومی احتساب بیورو (نیب) نے سابق وزیرِ اعلیٰ پنجاب شہباز شریف کا نام ای سی ایل میں ڈالنے کی سفارش کرتے ہوئے مراسلہ بھیج دیا تھا، مراسلے میں مؤقف اختیار کیا گیا تھا کہ شہباز شریف کا نام آمدن سے زائد اثاثہ جات کیس پر ای سی ایل میں ڈالا جائے۔

یاد رہے کہ اثاثہ جات کیس میں شہباز شریف کے بیٹوں حمزہ شہباز اور سلمان شہباز کے خلاف بھی تحقیقات جاری ہیں۔

واضح رہے کہ قومی احتساب بیورو (نیب) نے آشیانہ اقبال ہاؤسنگ اسکینڈل میں شہباز شریف کو 5 اکتوبر 2018 کو گرفتار کیا، جس کے بعد 14 فروری کو لاہور ہائی کورٹ شہباز شریف کی درخواست ضمانت منظور کرتے ہوئے رہا کرنے کا حکم جاری کیا تھا۔

مزید پڑھیں: شہباز شریف اور حمزہ شہباز کے خلاف رمضان شوگرملز ریفرنس دائر

خیال رہےآشیانہ ہاؤسنگ کیس میں شہباز شریف اور فواد حسن فواد سمیت 10 ملزمان پر فردِ جرم عائد کر دی گئی جبکہ نیب نے شہباز شریف اور حمزہ شہباز کے خلاف رمضان شوگر ملز ریفرنس دائر کر دیا ہے۔

نیب ریفرنس میں کہا گیا شہباز شریف نے بہ طور وزیرِ اعلیٰ اختیارات کا نا جائز استعمال کیا، رمضان شوگر ملز کے لیے دس کلو میٹر طویل نالہ بنوایا، جس سے قومی خزانے کو کروڑوں کا نقصان پہنچا۔

فروری 19, 2019
جعلی بینک اکاؤنٹس کیس کی تحقیقات، نیب کی کمبائنڈ انویسٹی گیشن ٹیمیں کراچی روانہ

اسلام آباد : جعلی بینک اکاؤنٹس کیس کی تحقیقات کیلئے نیب کی کمبائنڈ انویسٹی گیشن ٹیمیں کراچی روانہ ہوگئیں، چارٹیمیں ایف بی آر، ایکسائز اور اسٹیٹ بینک سے ریکارڈ جمع کریں گی،جس کے بعد طلبی کےنوٹس جاری کیےجائیں گے۔

تفصیلات کے مطابق جعلی بینک اکاؤنٹس کیس میں اہم پیش رفت ہوئی ، نیب کی کمبائنڈ انویسٹی گیشن ٹیمیں تحقیقات کے لئے کراچی روانہ ہوگئیں ، چار ٹیموں کی سربراہی ڈی جی نیب عرفان منگی کررہے ہیں۔

نیب راولپنڈی سےمحمد یونس اورگل آفریدی سی آئی ٹی کی سربراہی جبکہ ڈپٹی ڈائریکٹر محبوب عالم اور محسن علی راولپنڈی کی ٹیم کی سربراہی کررہے ہیں۔

نیب کی چار ٹیمیں ایف بی آر، ایکسائز، اسٹیٹ بینک سے ریکارڈ جمع کریں گی اور انورمجید کی تمام ملز سے متعلق بھی ریکارڈ حاصل کیا جائےگا، ریکارڈ کے بعد طلبی کے نوٹس جاری کیے جائیں گے۔

ذرائع نے بتایا ڈیڑھ ارب روپے سے زائد کک بیکس کی رقم منتقلی پرافسران سے بھی پوچھ گچھ ہوگیم اور تمام ٹیمیں ڈی جی نیب عرفان منگی کوتحقیقات سےآگاہ رکھیں گی۔

جعلی بینک اکاؤنٹس کیس، نیب نے سربمہر پیشرفت رپورٹ سپریم کورٹ میں جمع

دوسری جانب نیب نے سربمہر پیشرفت رپورٹ سپریم کورٹ میں جمع کرادی ہے ، رپورٹ میں بتایا گیا ہے کہ تحقیقات کیلئے 4 مزید مشترکہ تحقیقاتی ٹیمیں بنادی گئیں اور سیکریٹریٹ نیب کےپرانے دفتر میں قائم کردیاگیا۔

رپورٹ میں کہا گیا ہے کہتحقیقاتی ٹیموں کی سربراہی ڈی جی نیب راولپنڈی کررہےہیں، چیئرمین نیب تمام معاملے کی نگرانی خود کریں گے، عدالتی فیصلےپر مکمل عملدرآمدکیا جائے گا۔

مزید پڑھیں : چیئرمین نیب کی زیر صدارت اجلاس، جعلی اکاؤنٹس کیس سے متعلق مختلف ٹیمیں تشکیل

گذشتہ روز چیئرمین نیب جاوید اقبال کی زیر صدارت اجلاس میں جعلی اکاؤنٹس کیس سے متعلق نیب کی مختلف ٹیمیں تشکیل دی گئیں تھیں، چیئرمین نیب جاوید اقبال نے سپریم کورٹ کے فیصلے پر من و عن عمل کرنے اور تمام تر توانائیاں استعمال کرنے کی ہدایت کی تھی۔

نیب اعلامیہ کے مطابق نیب ٹیمیں اسلام آباد، کراچی میں شواہد کی بنیاد پر بیانات ریکارڈ کریں گی، جعلی اکاؤنٹس کیس میں سپریم کورٹ کے فیصلے پر مکمل عمل کیا جائے گا۔

فروری 8, 2019
کھمبے پرچڑھے شخص کو نیچے اتارنے کے لیے پولیس کا حیرت انگیزحربہ

اسلام آباد: وفاقی دارالحکومت میں ٹاور پر چڑھ کر خود کو وزیر اعظم بنوانے کا مطالبہ کرنے والے شخص کو پولیس نے صدا کار شفاعت علی کی مدد سے نیچے اتار لیا۔

تفصیلات کے مطابق اسلام آباد کے علاقے بلیو ایریا میں ایک شخص بلند و بالا ٹاور پر چڑھ کر مطالبہ کررہا تھا کہ اسے پاکستان کا وزیراعظم بنایا جائے، پولیس نے سمجھ داری کا مطالبہ کرتے ہوئے اسے نیچے اتار لیا۔

اس شخص کا دعویٰ تھا کہ وہ وزیراعظم بن کر ملک کی معیشت درست کرسکتا ہے لہذا اس کی عمران خان سے بات کرائی جائے ۔ پولیس نے پہلے اسے لفٹر سے نیچے اتارنے کی کوشش کی تاہم اس کوشش میں ناکامی ہوئی۔

اس کے بعد موقع پر موجود اسلام آباد پولیس کے ایس پی نے انوکھا فیصلہ کیا اور سوشل میڈیا کے معروف صدا کار شفاعت علی سے درخواست کی وہ وزیر اعظم کے لہجے میں اس شخص سے بات کریں۔

اس سلسلے میں اس شخص کے پاس لفٹر کے ذریعے موبائل فون بھی پہنچایا گیا جس کے بعد شفاعت علی نے اس سے بات کی۔ دونوں کے درمیان بات چیت پانچ منٹ تک جاری رہی جس کے بعد وہ شخص رضاکارانہ طور پر نیچے اتر آیا۔

اے آروائی نیوز سے خصوصی گفتگو کرتےہوئے صدا کار شفاعت علی نے بتایا کہ اس شخص کو گلہ تھا کہ ملک کی معیشت انتہائی نازک صورتحال سے گزررہی ہے اس لیے وزیراعظم اپنا منصب اسے سونپ دیں۔

انہوں نے مزید کہا کہ اس طرح کے افراد درحقیقت نفسیاتی مسائل کا شکار ہوتے ہیں اور اپنی انہی الجھنوں کے سبب ایسی حرکتیں کر بیٹھتے ہیں۔ انہوں نے خوشی کااظہار بھی کیا کہ ان کی صلاحیت کے سبب ایک معصوم آدمی کی جان بچ گئی۔

دسمبر 22, 2018
نیب کی راولپنڈی میں‌ بڑی کارروائی، خطیر رقم کی منی لانڈرنگ ناکام بنا دی

اسلام آباد: قومی احتساب بیورو ، راولپنڈی نے خطیر رقم منی لانڈرنگ کرنے کی کوشش ناکام بنا دی.

تفصیلات کے مطابق نیب راولپنڈی نے آج اہم کارروائی کی ہے، جس میں‌ ای پی آئی کے عہدے دار کے گھرچھاپا مارا، جس میں‌تقریباً 2 کروڑ مالیت کی کرنسی برآمد ہوئی.

نیب ذرائع کے مطابق برآمد رقم میں 9 ہزار ڈالر، 10 ہزار پاؤنڈ اور دیگرغیرملکی کرنسی شامل ہیں.

نیب نے یہ اہم کارروائی بچوں کے حفاظتی ٹیکوں کے پروگرام میں کرپشن کی شکایت پر کی، جس میں‌ خطیر رقم برآمد ہوئی، ملزم کو فی الحال گرفتار نہیں کیا گیا ہے، نیب ذرائع کی جانب سے ملزم کا نام بھی ظاہر نہیں کیا گیا۔

بچوں کا حفاظتی بچاؤ کے ٹیکوں کا یہ پروگرام اقوام متحدہ کی معاونت سے چل رہا ہے، جس میں‌ گھپلوں‌ کی اطلاعات تھیں.

مزید پڑھیں: دہشت گردی اور منی لانڈرنگ کے خلاف پاک ترک باہمی تعاون کا عزم

نیب ذرائع کے مطابق پیسےمنی لانڈرنگ کے ذریعے بیرون ملک بھجوائے جانے تھے،ای پی آئی کے عہدے دار کے گھرچھاپے میں برآمد ہونے والی رقم ایک فارماسیوٹیکل کمپنی سے کمیشن کے طور پر لی گئی تھی.

یاد رہے کہ گذشتہ دونوں‌ وزیر اعظم عمران خان نے منی لانڈرنگ کے خلاف قانون سازی کرتے ہوئے سخت اقدامات کا عندیہ دیا تھا.

دسمبر 19, 2018