چیئرمین پاکستان تحریک انصاف عمران خان کی جانب سے اسمبلیاں تحلیل کرنے کی تاریخ دینے کے اعلان کے فوراً بعد وفاقی وزرا نے صدر مملکت ڈاکٹر عارف علوی سے ملاقات کی۔
ذرائع کے مطابق صدر مملکت سے اہم ملاقات ایاز صادق اور اعظم نذیر تارڑ نے کی جس میں وفاقی وزرا نے عارف علوی کو ملکی معاملات پر کردار ادا کرنے کا مشورہ دیا۔
وزرا کا کہنا تھا کہ اسمبلیاں تحلیل کے بجائے نظام کا حصہ رہ کر ملک کو مسائل سے نکالا جائے۔ اس پر صدر مملکت نے تمام سیاسی جماعتوں کو بالغ نظری کا مظاہرہ کرنے کا مشورہ دیا۔
ملاقات میں وفاقی وزرا نے صدر عارف علوی کو حکومتی مؤقف سے آگاہ کر دیا۔
Federal Minister for Economic Affairs, Sardar Ayaz Sadiq and Federal Minister for Law, Senator Azam Nazeer Tarar called on President Dr. Arif Alvi, at Aiwan-e-Sadr. pic.twitter.com/5Dp3ewJkbi
— The President of Pakistan (@PresOfPakistan) December 14, 2022
خیال رہے کہ عمران خان نے آج اپنے خطاب میں بتایا کہ وہ 17 دسمبر کو پنجاب اور خیبر پختونخوا اسمبلی تحلیل کرنے کی تاریخ کا اعلان کر دیں گے جس کے بعد 70 فیصد پاکستان الیکشن کی حالت میں چلا جائے گا۔
عمران خان نے کہا کہ 70 فیصد ملک الیکشن موڈ میں جائے گا تو فیصلہ کرنا ہوگا کہ الیکشن کرانے ہیں یا نہیں۔
انہوں نے یہ بھی بتایا کہ ہمارے ایم این ایز قومی اسمبلی جا کر کہیں گے کہ ہمارے استعفے قبول کیے جائیں، موجودہ صورتِ حال میں الیکشن نہیں کرائے تو ملک میں انتشار بڑھے گا۔