اسلام آباد: لاپتہ سابق پرنسپل سیکریٹری اعظم خان کا کوئی سراغ نہ مل سکا، عدالتی حکم پر ایس ایس پی آپریشنز جمیل ظفر اسلام آباد ہائیکورٹ میں پیش ہوئے، عدالت نے ایس ایس پی آپریشنز سمیت متعلقہ حکام کو مزید ایک ہفتے کی مہلت دے دی۔
اے آر وائی نیوز کے مطابق لاپتہ سابق پرنسپل سیکریٹری اعظم خان کے بازیابی کیس میں ایس ایس پی آپریشنز جمیل ظفر اسلام آباد ہائیکورٹ میں پیش ہوئے، انھوں نے اعظم خان کی بازیابی کے لیے مزید وقت دینے کی استدعا کی جسے عدالت نے منظور کر لیا۔
عدالت نے کہا کہ کوشش جاری رکھیں، فیملی کے ساتھ بھی رابطہ رکھیں، آئندہ سماعت پر پیش رفت سے آگاہ کریں، عدالت نے اعظم خان کی فیملی کو پولیس کے ساتھ تعاون کرنے کی ہدایت کی۔
اسلام آباد ہائیکورٹ کے چیف جسٹس عامر فاروق نے کیس کی سماعت کی، اس موقع پر وکیل قاسم ودود نے کہا کہ جب تک ہائی آفیشل کو نہیں بلائیں گے تحقیقات آگے نہیں بڑھیں گی۔
پولیس کی جانب سے پیش رفت رپورٹ اسلام آباد ہائیکورٹ میں جمع کرا دی گئی ہے، پولیس حکام کا کہنا ہے کہ اعظم خان کی تلاش کے لیے تمام وسائل بروئے کار لائے جارہے ہیں، ایس ایس پی آپریشنز نے کہا کہ معاملے کی خود نگرانی کر رہا ہوں۔
پولیس حکام کے مطابق اعظم خان جس گاڑی میں اپنے گھر سے نکلے تھے وہ گاڑی مبینہ طور پر رجسٹرڈ ہی نہیں، عدالت نے پولیس کو مزید مہلت دیتے ہوئے سماعت اگلے ہفتے تک ملتوی کر دی ہے۔