بابا گرونانک کے جنم دن کی تقریبات، یاتریوں کی آمد کا شیڈول جاری

لاہور : باباگرونانک کے جنم دن کی تقریبات میں شرکت کے لئےسکھ یاتریوں کی آمد5نومبرسےشروع ہوگی، سکھ یاتریوں کو سخت سیکورٹی میں ننکانہ صاحب جنم استھان لےجایا جائے گا۔

تفصیلات کے مطابق باباگرونانک کے جنم دن کی تقریبات میں شرکت کے لئے یاتریوں کی آمد کا شیڈول جاری کردیا گیا ، ترجمان متروکہ وقف املاک کا کہنا ہے کہ سکھ یاتریوں کی آمد5 نومبر سے شروع ہوگی، بھارت سے سکھ یاتری خصوصی ٹرین سےپاکستان پہنچیں گے۔

ترجمان کا کہنا ہے کہ سکھ یاتریوں کو سخت سیکورٹی میں ننکانہ صاحب جنم استھان لے جایا جائے گا۔

دوسری جانب گورنر پنجاب چوہدری سرور نے گردوارہ دربارصاحب کرتارپور کا دورہ کیا اور تیاریوں کا جائزہ لیا، گورنر پنجاب نے کہا کم وقت میں چیزیں مکمل کرنا بڑا چیلنج تھا، وزیراعظم9 نومبر کو کرتارپور راہداری کا افتتاح کریں گے۔

مزید پڑھیں :  وزیراعظم کی کرتارپور راہداری ریکارڈ مدت میں مکمل کرنے پر مبارکباد

چوہدری سرور کا کہنا تھا کہ اندرون وبیرون ممالک سے آنیوالے یاتریوں کو ویلکم کہتے ہیں، روزانہ10ہزاریاتری آسکتے ہیں، انتظامات موجود ہیں۔

یاد رہے حکومت کی جانب سے باباگرو نانک کی 550ویں سالگرہ پر یادگاری ٹکٹ کا اجرا کردیا گیا ہے، ملک بھرمیں یادگاری ٹکٹ کرتارپورراہداری کھلنے کے دن سے دستیاب ہوں گے۔

گذشتہ روز وزیراعظم عمران خان نے کرتارپور راہداری ریکارڈ مدت میں مکمل کرنے پر حکومت کو مبارکباد دیتے ہوئے کہا تھا کہ کرتارپور سکھ یاتریوں کے خیرمقدم کے لیے تیار ہے۔

واضح رہے کہ حکومت پاکستان بابا گرونانک کے 550ویں یوم پیدائش کے موقع پر نومبر میں کرتارپور راہداری کھولنے کے لیے پُرعزم ہے جس کا باضابطہ افتتاح 9 نومبر کو وزیراعظم عمران خان کریں گے۔