شوبز انڈسٹری کی ابھرتی ہوئی اداکارہ فائزہ خان اور اداکار جنید جمشید نیازی کی ویڈیو سوشل میڈیا پر وائرل ہوگئی۔
فیس بک پر اداکارہ فائزہ خان نے ساتھی اداکار جنید جمشید نیازی کے ساتھ ویڈیو شیئر کی جسے مداحوں کی جانب سے خوب سراہا جارہا ہے۔
فائزہ خان نے ویڈیو شیئر کرتے ہوئے کیپشن میں لکھا کہ ’فائنلی رامین نے فیصلہ کرلیا ہے۔
اداکارہ ساتھی اداکار سے ویڈیو میں کہتی ہیں کہ ’میرے پاس اس کے لیے توانائی نہیں ہے، میں اس کھیل کا مزید حصہ نہیں بن سکتی۔‘
اداکارہ کی پوسٹ دیکھ کر مداح یہ سمجھ رہے ہیں کہ وہ ڈرامہ سیریل ’بے بی باجی‘ سے الگ ہورہی ہیں اور مداح انہیں نہ جانے کا مشورہ بھی دے رہے ہیں جبکہ اداکارہ نے مزاحیہ ویڈیو شیئر کی ہے۔
واضح رہے کہ فائزہ خان سوشل میڈیا پر کافی متحرک رہتی ہیں اور اکثر اپنی ویڈیو، تصاویر شیئر کرتی رہتی ہیں جسے ان کے مداح بھی پسند کرتے ہیں۔
ڈرامہ سیریل ’بے بی باجی‘ میں فائزہ خان ’رامین‘ کا کردار نبھا رہی ہیں جنہیں یونیورسٹی کے دوست جنید جمشید نیازی (واصف) سے محبت ہوتی ہے لیکن واصف گھر والوں کی مرضی سے فرحت سے شادی کرلیتے ہیں جس پر رامین خودکشی کی کوشش کرتی ہیں۔
’بےبی باجی‘ کی دیگر کاسٹ میں سینئر اداکار ثمینہ احمد، منور سعید، سعود قاسمی، جویریہ سعود، حسن احمد، سنیتا مارشل، سیدہ طوبیٰ انور، فضل حسین، عینا آصف ودیگر شامل ہیں۔
ڈرامے کی کہانی منصور احمد خان نے لکھی ہے جبکہ اس کی ہدایت کاری کے فرائض تحسین خان نے انجام دیے ہیں۔