ورلڈ کپ میں پاکستان کرکٹ ٹیم کے کپتان بابر اعظم کی غیر متاثر کن کارکردگی نے ان کی ون ڈے فارمیٹ میں حکمرانی کو خطرے میں ڈال دیا ہے۔
پاکستان کرکٹ ٹیم کے کپتان بابر اعظم جو اپنی مستقبل مزاج بیٹنگ کی بدولت گزشتہ دو سال سے مسلسل آئی سی سی ون ڈے رینکنگ میں نمبر ایک بیٹر کے سنگھاسن پر براجمان ہیں تاہم بھارت میں جاری ورلڈ کپ میں ان کی تاحال غیر متاثر کن کارکردگی نے اب ان کی اس حکمرانی کو خطرے میں ڈال دیا ہے۔
بابر اعظم جو 5 میچز کھیل کر صرف دو نصف سنچریاں ہی بنا سکیں ہیں اب بھی آئی سی سی ون ڈے رینکنگ 829 پوائنٹس کے ساتھ نمبر ون بیٹر ہیں تاہم دوسرے نمبر پر موجود بھارتی اوپنر شبھمن گل سے ان کا فرق صرف 6 پوائنٹ رہ گیا ہے جو 823 پوائنٹ کے ساتھ دوسرے نمبر پر موجود ہیں۔
اگر بابر اعظم اگلے میچز میں بڑی اننگ کھیلنے میں ناکام رہتے ہیں اور شبھمن گل کا بیٹ رنز اگلتا ہے تو ان سے یہ اعزاز چھن سکتا ہے، تاہم صرف شبھمن گل ہی نہیں بلکہ رواں ورلڈ کپ میں تین سنچریاں بنانے والے جنوبی افریقی بیٹر کوئنٹن ڈی کاک بھی ان کی نمبر ون پوزیشن چھین سکتے ہیں جو تیسرے نمبر پر موجود ہیں۔
اسی حوالے سے آئی سی سی کے جاری ایک بیان میں کہا گیا ہے کہ ابھی تک کرکٹ ورلڈ کپ کے پانچ میچوں میں 157 رنز بنانے کے باوجود بابر اعظم 829 ریٹنگ پوائنٹس پر ہیں جب کہ بھارتی اوپنر شبھمن گِل نے ابھی تک تین میچوں میں انڈیا کے لیے 95 رنز بنائے ہیں، جس میں اُن کی پونے میں بنگلہ دیش کے خلاف 53 رنز کی اننگز بھی شامل ہے۔
آئی سی سی کا کہنا ہے کہ بابر اعظم کی پہلی پوزیشن پر آنے کے لیے صرف انڈین اوپنر (شبھمن گِل) ہی نہیں بلکہ جنوبی افریقہ کے اِن فارم بیٹر کوئنٹن ڈی کوک بھی ہیں جو رواں ورلڈ کپ میں تین سینچریاں اسکور کرنے کے بعد ترقی کر کے تیسرے نمبر پر آگئے ہیں۔
آئی سی سی کی تازہ ون ڈے رینکنگ کے مطابق بابر اعظم پہلے، شبھمن گل دوسرے، کوئنٹن ڈی کوک تیسرے، جنوبی افریقی بیٹر ہینرک کلاسین چوتھے، آسٹریلوی اوپنر ڈیوڈ وارنر پانچویں، ویرات کوہلی چھٹے، آئرلینڈ کے بیٹر ہیری ٹیکٹر ساتویں، بھارتی کپتان روہت شرما آٹھویں، جنوبی افریقی بلے باز رَسی فین ڈر ڈسن نویں اور پاکستانی اوپنر امام الحق دسویں نمبر پر موجود ہیں۔
پاکستان کا ٹاپ آرڈر ماڈرن کرکٹ کھیلنے میں سب سے پیچھے
اسی طرح ون ڈے فارمیٹ میں بولرز کی رینکنگ میں آسٹریلوی فاسٹ بولر جوش ہیزل وُڈ کا پہلا نمبر ہے جبکہ دوسرے نمبر پر انڈین بولر محمد سراج موجود ہیں۔ تیسرے نمبر پر جنوبی افریقی سپنر کیشوو مہاراج، چوتھے نمبر پر افغان لیگ سپنر راشد خان، پانچویں نمبر پر کیوی بولر ٹرینٹ بولٹ، چھٹے نمبر پر افغان آل راؤںڈر محمد نبی، ساتویں نمبر پر آسٹریلوی لیگ سپنر ایڈم زیمپا، آٹھویں نمبر پر کیوی بولر میٹ ہینری، نویں نمبر پر انڈین سپنر کلدیپ یادو اور دسویں نمبر پر پاکستانی پیسر شاہین شاہ آفریدی موجود ہیں۔