ٹی 20 ورلڈ کپ میں اتوار کو ہونے والے پاک بھارت میچ کا انتظار کرنے والے شائقین کیلیے بری خبر ہے کہ میچ بارش سے متاثر ہوسکتا ہے۔
ماحولیاتی تبدیلی کے اثرات نے آسٹریلیا میں کھیلے جا رہے ٹی ٹوئنٹی ورلڈ کپ کو بھی اپنی لپیٹ میں لے لیا ہے اور پورا ٹورنامنٹ آسٹریلیا میں ہونے والی برساتوں سے متاثر ہوسکتا ہے جس کے میں راؤنڈ کا آغاز اتوار کو میلبرن میں پاکستان اور بھارت کے مابین میچ سے ہو رہا ہے۔
پاک بھارت میچ کسی بھی ایونٹ کا سب سے بڑا معرکہ کہلاتا ہے اور دنیا بھر کے شائقین کی نظریں اس پر ہوتی ہیں تاہم ان شائقین کے لیے یہ خبر کسی دھماکے سے کم نہیں ہے کہ لانینا نامی موسم نے مسلسل تیسرے برس آسٹریلیا کو اپنی لپیٹ میں لے لیا ہے جو بارشوں کا باعث بن گیا ہے اور بارشوں کا یہ سلسلہ دسمبر کے آخر تک جاری رہنے کا امکان ہے۔
میگا ایونٹ کے وارم اپ میچز کو بھی بارش نے متاثر کیا ہے، پاکستان اور افغانستان کے مابین وارم اپ میچ بارش کے باعث مکمل نہیں ہوسکا تھا۔ پاکستان اور بھارت کے درمیان 23 اکتوبر کو میلبورن میں شیڈول میچ کیلیے پہلے ہی موسم خراب کی وارننگ سامنے آچکی ہے۔
ورلڈ کپ میں صرف پاک بھارت ٹاکرا ہی نہیں بلکہ ایونٹ کے دیگر میچز کو بھی خراب موسم متاثر کرسکتا ہے جس کی وجہ سے مقابلوں کا دورانیہ محدود یا پھر مکمل طور پر بھی بارش کی نذر ہوسکتے ہیں۔
آئی سی سی کی جانب سے سیمی فائنلز اور فائنل کیلیے ریزرو ڈیز مختص کیے گئے مگر راؤنڈ روبن میچز میں ایسا کچھ نہیں ہے، جس کی وجہ سے بارش ہونے پر تاخیر سے آغاز اور مقابلے مکمل طور پر واش آؤٹ ہونے کا سامنا کرنا پڑے گا، اس صورت میں ٹیموں کو میدان میں کارکردگی سے زیادہ قسمت پر انحصار کرنا پڑسکتا ہے۔
واضح رہے کہ2020 میں آسٹریلیا میں کھیلے جانے والے ویمنز ورلڈ کپ کا انگلینڈ اور بھارت کے درمیان سیمی فائنل بارش کی نذر ہوگیا تھا، جس پر بلو شرٹس کو گروپ مرحلے میں زیادہ فتوحات کی بنا پر فائنل کھیلنے کا حقدار قرار دے دیا گیا تھا۔
موسم کی خرابی نے کرکٹ کے دلدادہ افراد میں بے چینی پھیلا دی ہے اور شائقین کرکٹ آئی سی سی سے میچز کو موسمی اثرات سے محفوظ بنانے کیلیے انڈور اسٹیڈیم بنانے کا مطالبہ کر رہے ہیں جب کہ کئی شائقین نے آئی سی سی سے درخواست ہے کہ ورلڈ کپ کے راؤنڈ میچز کو فیصلہ کن بنانے کیلیے اقدام کرے۔