لاہور : وزیراعلیٰ آفس پنجاب میں پلاسٹک کی اشیا کے استعمال پر پابندی عائد کردی گئی، نگراں وزیراعلیٰ نے کہا کہ ماحولیات کے عالمی دن پر پلاسٹک کی آلودگی کوشکست دینے کا عہد کرتے ہیں۔
تفصیلات کے مطابق ماحولیات کے عالمی دن کے موقع پر وزیراعلیٰ آفس میں پلاسٹک کی اشیا کے استعمال پر پابندی عائد کردی گئی، نگراں وزیراعلیٰ محسن نقوی نے عوام سے بھی پلاسٹک سے بنی اشیا کا استعمال ترک کرنے کی اپیل کردی۔
نگراں وزیراعلیٰ نے کہا کہ ماحولیات کے عالمی دن پر پلاسٹک کی آلودگی کوشکست دینے کا عہد کرتے ہیں، ماحولیاتی آلودگی میں مسلسل اضافہ تشویشناک ہے۔
محسن نقوی کا کہنا تھا کہ پلاسٹک بیگ نہ صرف انسان بلکہ جنگلی حیات اور جنگلات کیلئےبھی خطرہ بن چکے، انسانی زندگی کا دار و مدار اور بقاسازگار ماحولیات کا مرہون منت ہے۔
خیال رہے پاکستان سمیت دنیا بھر میں آج موحولیات کا دن منایا جارہا ہے، ‘زمین کو پلاسٹک کی آلودگی سے بچانا’ اس سال کا موضوع ہے۔