بازار سے کھانے پکانے کی اشیاء خریدنا تو کوئی بڑی بات نہیں لیکن مینا بازاروں میں خواتین کی شاپنگ کو دیکھ کر لگتا ہے کہ دکاندار سے سودے بازی یا بھاؤ تاؤ (بارگننگ) کرنا واقعی ایک بڑا فن ہے۔
ویسے تو بازار جا کر شاپنگ کرنا لڑکیوں اور خواتین کا پسندیدہ مشغلہ بھی ہے جسے وہ پورا کرنے کی ہرممکن کوشش کرتی رہتی ہیں لیکن بات تب ہے کہ کسی بھی چیز کی قیمت اس کے معیار کے مطابق صحیح اور مناسب ادا کی جائے۔
اس حوالے سے اے آر وائی نیوز کے پروگرام گڈ مارننگ پاکستان میں پاکستان شوبز انڈسٹری سے تعلق رکھنے والی فنکار جوڑیوں نے شرکت کی اور ناظرین کو اپنی کامیاب خریداری کے گُر بتائے۔
اس موقع پر اداکارہ امبر اور ان کی بہن اداکارہ کرن اور سعدیہ فیصل اپنی دوست انعم کے ساتھ شریک ہوئیں جبکہ اداکارہ سعدیہ امام اور بیوٹیشن بینش پرویز نے اپنی شاپنگ کے حوالے سے تجربات شیئر کیے۔
سعدیہ فیصل نے بتایا کہ مجھے کسی چیز کی قیمت زیادہ کم کروانے میں جھجھک محسوس ہوتی ہے لیکن میری امی بالکل بھی لحاظ نہیں کرتی تھیں، انہوں نے بتایا کہ میری دوست انعم اس معاملے کو بہت اچھی طرح ڈیل کرتی ہے۔
بیوٹیشن بینش پرویز نے بتایا کہ سعدیہ امام چیز کے معیار کو بہتر طریقے سے سمجھتی ہیں جیسے کپڑے کی کوالٹی، رنگوں کا امتزاج وغیرہ لیکن دکاندار سے بھاؤ تاؤ نہیں کر پاتیں اس کیلئے مجھے آگے آنا پڑتا ہے۔
اداکارہ امبر کا کہنا تھا کہ کپڑے کی سلائی اور اس کی تیاری کے لیے میں کرن کی مدد کرتی ہوں کیونکہ درزی کو سمجھانا یا اس سے الجھنا اس کے بس کی بات نہیں۔ ان کی اس بات کی تائید کرن نے بھی کی۔