نئی دہلی: بھارتی کرکٹ بورڈ نے خواتین کے خلاف نازیبا کلمات ادا کرنے والے دو کرکٹر پر عائد ہونے والی پابندی ختم کردی۔
تفصیلات کے مطابق ہردیک پانڈیا اور لوکیش راہول نے گزشتہ دنوں بھارتی ٹی وی شو ’کافی ود کرن‘ میں ہوسٹ کرن جوہر کے سوال پر خواتین کے خلاف نازیبا کلمات ادا کیے تھے۔
شائقین اور خواتین کے بھرپور احتجاج کے بعد بی سی سی آئی نے دونوں کھلاڑیوں کے خلاف ایکشن لیتے ہوئے اُن کی رکنیت معطل کی اور جواب طلب کیا تھا۔
بھارتی کرکٹ بورڈ نے معاملے کی تفتیش کے لیے کمیٹی تشکیل دی جس کے سامنے پیش ہوکر دنوں کرکٹرز نے اپنا اپنا مؤقف پیش کیا۔ میڈیا رپورٹس کے مطابق ہردیک اور راہول نے اپنی غلطی پر معافی مانگی اور آئندہ ایسا نہ کرنے کی یقین دہانی بھی کروائی۔
مزید پڑھیں: خواتین کے خلاف نازیبا کلمات، پانڈیا اور لوکیش راہول معطل
کھلاڑیوں کا مؤقف سننے کے بعد کمیٹی کے چیئرمین نریشما نے اعلان کیا کہ ہردیک اور راہول پر سے پابندی اٹھا لی گئی البتہ دونوں کے خلاف تفتیش جاری رہے گی۔
یاد رہے کہ سپریم کورٹ آف بھارت نے واقعے پر نوٹس لیتے ہوئے بی سی سی آئی کو شفاف تحقیقات کر کے پانچ فروری تک رپورٹ جمع کرانے کا حکم جاری کیا ہے۔
کمیٹی کے چیئرمین نریشما کا کہنا تھا کہ ’دونوں کھلاڑیوں پر 11 جنوری 2019 کو پابندی عائد کی گئی تھی جسے اب ختم کیا جارہا ہے‘۔
بھارتی کرکٹ بورڈ کی جانب سے پابندی ہٹائے جانے کے بعد ہردیک پانڈیا نیوزی لینڈ کے خلاف کھیلی جانے والی سیریز میں حصہ لیں گے جبکہ راہول بھی ڈومیسٹک میچز کے لیے انگلینڈ روانہ ہوجائیں گے۔
یہ بھی پڑھیں: بھارتی کرکٹر کی اہلیہ کا شوہر پر سنگین الزام
بھارتی کرکٹ بورڈ نے تمام فارمیٹ میں کھیلنے والے کھلاڑیوں کو خبردار کیا ہے کہ وہ اپنا رویہ درست رکھیں کیونکہ اس کی وجہ سے ملک کی بدنامی ہوتی ہے۔