چیئرمین پیپلز پارٹی بلاول بھٹو زرداری فلسطین کے سفارتخانے پہنچ گئے، فلسطینی سفارتکار سے غزہ کی صورتحال پر تشویش کا اظہار کیا۔
تفصیلات کے مطابق بلاول بھٹو کی پاکستان میں فلسطینی سفارتکار احمد جواد امین ربیعی سے ملاقات ہوئی۔ بلاول نے فلسطینی سفارتخانے کے دورے کے دوران سفارتکار سے غزہ کی صورتحال پر تشویش کا اظہار کیا اور اہلیانِ فلسطین کے لیے اظہار یکجہتی کا پیغام دیا۔
فلسطینی سفارتکار نے بلاول بھٹو کو فلسطینی مزاحمت کا علامتی رومال پہنایا۔ بلاول بھٹو نے فلسطینی سفارتخانے کی گیسٹ بُک میں تاثرات بھی قلمبند کیے۔
اس موقع پر بلاول زرداری کا کہنا تھا کہ پاکستان اس کٹھن وقت میں فلسطین کےعوام کیساتھ کھڑا ہے۔ پیپلزپارٹی نے فلسطینی لیڈرشپ کے ساتھ مل کر دنیا میں فلسطین کا مقدمہ لڑا۔
انھوں نے کہا کہ یاسر عرفات نے فلسطین کاز کیلئے جدوجہد پر بھٹو کو خراج عقیدت پیش کیا۔ یاسر عرفات نے گڑھی خدا بخش آکر ذوالفقار بھٹو کو خراجِ عقیدت پیش کیا۔ اسرائیلی حملوں میں سینکڑوں فلسطینی بچوں کی شہادت انسانیت کے ماتھے پر داغ ہے،
بلاول نے کہا کہ اسرائیل نے فلسطینی اسپتال پر بمباری کی، اسرائیل نے ثابت کردیا اس کا وجود دنیا کیلئے ایک سیکیورٹی رسک ہے۔
ان کا کہنا تھا کہ اسرائیلی جارحیت کو روکنے کیلئے عالمی برادری اپنا کردار ادا کرے۔ اس موقع پر سینیٹر شیری رحمان اور سابق وزیراعلیٰ سندھ مرادعلی شاہ بھی ہمراہ تھے۔