اسلام آباد : وزیراعظم عمران خان سے ملاقات میں برطانوی ہائی کمشنر تھامس ڈریو نے شاہی جوڑے کے کامیاب دورے اور شانداراستقبال پر اظہار تشکر کیا اور باہمی دلچسپی کے امور اور مختلف شعبوں میں تعاون بڑھانے پر بات چیت کی۔
تفصیلات کے مطابق اسلام آباد میں وزیراعظم عمران خان کی برطانوی ہائی کمشنر تھامس ڈریو سے ملاقات ہوئی ، ملاقات میں خطے کی صورت حال سمیت دو طرفہ تعلقات پر تبادلہ خیال کیا گیا اور باہمی دلچسپی کے امور اور مختلف شعبوں میں تعاون بڑھانے پر بات چیت کی گئی۔
ملاقات میں برطانوی ہائی کمشنر نے شاہی جوڑے کے کامیاب دورے اور شانداراستقبال پر اظہار تشکر کیا۔
یاد رہے پانچ روزہ دورے میں شہزاد ولیم اور کیٹ مڈلٹن نے لاہوراسلام آباد اور چترال کا دورہ کیا، کیلاش کی ثقافت دیکھی اور بادشاہی مسجد بھی گئے جبکہ وزیراعظم عمران خان سے اور صدر عارف علوی سے بھی ملاقات کی۔
پرنس ولیم اور ان کی اہلیہ کیٹ مڈلٹن کی پاکستان آمد پر رائل وزٹ پاکستان کا ٹاپ ٹرینڈ نمبرون پررہا اور، عوام نے حسین شہزادی کیٹ مڈلٹن اور خوبرو شہزادے ولیم کا پاکستان آمد پرشکریہ ادا کیا۔
مزید پڑھیں : برطانوی شاہی جوڑے کا یادگار دورہ لاہور
برطانوی شاہی جوڑے شہزادے ولیم اور اُن کی اہلیہ کیٹ مڈلٹن نے پاکستانی ٹرک آرٹ سے مزین رکشے میں سفر کر کے سب کے دل جیت لیے تھے۔
آخری روز بھی شہزادہ ولیم اور شہزادی کیٹ میڈلٹن نے لاہور کے ایس او ایس ویلیج میں بچوں کے ساتھ وقت گزار، بچوں کے کمرے میں گئے اور خوب گپ شپ لگائی ، شاہی جوڑے نے اسلام آباد میں کے نائن سینٹر کا دورہ بھی کیا۔
برطانوی شاہی مہمان پانچ روزہ دورہ مکمل کرنے کے بعد برطانیہ روانہ ہوئے، دورہ کے آخری تقریب میں انہوں نے وفاقی دارالحکومت میں آرمی سینٹر کا بھی دورہ کیا اور خیبر رائفل ملٹری پوسٹ کے بارے میں بریفنگ حاصل کی۔