کراچی: سول ایوی ایشن اتھارٹی نے پروازوں میں تاخیر اور مسافروں کے حقوق کی خلاف ورزی پر سیرین ائیر اور ائیر بلیو کو شوکاز نوٹس جاری کر دیے۔
سول ایوی ایشن کے ترجمان کے مطابق پروازوں میں طویل تاخیر اور متعدد منسوخیوں نے بڑی تعداد میں مسافروں کو متاثر کیا، سیرین ایئر اور ایئر بلیو کو بالترتیب 2 جنوری اور 15 جنوری کو نوٹس جاری ہوئے۔
ترجمان نے بتایا کہ ائیر بلیو اور سیرین ائیر اپنے فلائٹ آپریشنز بروقت اور باقاعدگی سے انجام دینے میں ناکامی رہیں، دونوں آپریٹرز نے تسلیم شدہ ریگولیٹری قوانین کو نظر انداز کیا جس سے مسافروں کیلیے خاصی مشکلات پیدا ہوئیں۔
سول ایوی ایشن کے مطابق ائیر بلیو اور سیرین ائیر کو مالی جرمانے، لائسنس کی معطلی یا منسوخی جیسے اقدامات کا سامنا کرنا پڑ سکتا ہے، طے شدہ پروازوں کی تعداد کو کم کرنے جیسے اقدامات بھی عمل میں لائے جا سکتے ہیں۔
ترجمان نے کہا کہ دونوں آپریٹرز کو سات دن میں اپنے اپنے جوابات جمع کروانے کا کہا گیا، پی سی اے اے مسافروں کی آسانی، سکیورٹی اور سہولت کو برقرار رکھنے کا اعادہ کرتی ہے۔
