لاہور: نگران وزیراعلیٰ محسن نقوی کی قیادت میں پنجاب حکومت نے ایک اور سنگ میل عبور کرلیا۔
تفصلات کے مطابق نگران وزیر اعلیٰ پنجاب محسن نقوی کی زیر صدارت اجلاس ہوا، اجلاس میں سیکرٹری زراعت نے کپاس کی کاشت، یوریا کی ڈیمانڈ اینڈ سپلائی پر رپورٹ پیش کی گئی۔
بریفنگ میں نگراں وزیراعلیٰ کو بتایا گیا کہ فیصل آباد، ساہیوال اور سرگودھا میں کپاس کی بوائی کا ہدف 100 فیصد حاصل کر لیا، پنجاب میں 46 لاکھ ایکڑ سے زائد رقبے پر کپاس کی کاشت ہوئی ہے۔
نگران وزیر اعلیٰ پنجاب محسن نقوی نے محکمہ زراعت اور فیلڈ اسٹاف کی کارکردگی کو سراہا اور کہا کہ کاشتکاروں کو یوریا کھاد کی فراہمی کیلئے ہر ممکن اقدام کریں گے۔
محسن نقوی نے کہا کہ یوریا کھاد کی فراہمی کیلئے ضروری فنڈز فراہم کیے جائیں گے،کپاس کے کاشتکار کے مفادات کا ہر صورت تحفظ کریں گے۔
نگران وزیر اعلیٰ محسن نقوی نے متعلقہ حکام کو کاشتکاروں کیلئے یوریا کی مطلوبہ فراہمی یقینی بنانے کی ہدایت کی اور کہا کہ کاشتکاروں کی محنت کی بدولت کپاس کی کاشت میں غیر معمولی اضافہ ہوا۔
نگران وزیر اعلیٰ پنجاب محسن نقوی نے مزید کہا کہ رواں برس کپاس کی بہتر فصل سے کاشتکار کو اچھا معاوضہ ملے گا۔