اسلام آباد : نگران وزیرخزانہ ششماد اختر نے ایف بی آر حکام کو محصولات ہدف حاصل کرنے کی ہدایت کرتے ہوئے پلان مانگ لیا۔
تفصیلات کے مطابق نگراں وزیرخزانہ ڈاکٹر شمشاد اختر نے ایف بی آر ہیڈکوارٹر کا دورہ کیا ، جہاں حکام نے ان کا استقبال کیا، اس موقع پر چیئرمین ایف بی آر اور بورڈ ممبران کی نگران وزیرخزانہ کو محصولات ہدف پر بریفنگ دی۔
نگران وزیرخزانہ نے ایف بی آر سے محصولات ہدف حاصل کرنے کا پلان مانگ لیا اور ہدایت کی 9400ارب کاہدف حاصل کرنے کیلئے تمام صلاحیتیوں کو بروئے کار لایا جائے۔
ڈاکٹر شمشاد اختر نے ایف بی آر کارکردگی بہتر بنانے کیلئے مکمل تعاون کی حمایت کرتے ہوئے کہا کہ ان لینڈ ریونیو، کسٹم، سیلز ٹیکس کے شعبوں میں بہتری کی گنجائش ہے، جدید ٹیکنالوجی کو استعمال میں لا کر اصلاحات لائی جائیں گی۔
وزیرخزانہ کا کہنا تھا کہ ٹیکس محصولات بڑھانے کیلئے ایف بی آر میں اصلاحات ناگزیر ہیں، آئی ایم ایف شرائط پر عملدرآمد کرکےٹیکس محصولات بڑھائی جائیں گی۔
ڈاکٹر شمشاد اختر نے ایف بی آر میں اصلاحات کیلئے عالمی اداروں کے ساتھ شراکت داری بڑھانے کی ہدایت کردی۔
نگران وزیرخزانہ نے آئی ایم ایف کے ساتھ ٹیکس شرائط پر بھی حکام سے بریفنگ لی۔