لاہور: نگراں وزیراعظم انوار الحق کاکڑ کو عہدے سے ہٹانے کی درخواست ناقابل سماعت قرار دے دی گئی۔
اے آر وائی نیوز کے مطابق لاہور ہائیکورٹ نے نگراں وزیراعظم کو عہدے سے ہٹانے کی درخواست ناقابل سماعت قرار دیتے ہوئے نمٹا دی ہے۔
جسٹس شاہد بلال حسن نے شہری مقسط سلیم کی درخواست پر محفوظ فیصلہ سنایا۔
واضح رہے کہ درخواست گزار کا کہنا تھا نگران وزیراعظم کی تقرری 90 روز مکمل ہونے کے بعد غیر مؤثر ہو چکی، آئینی طور پر انوار الحق کاکڑ نگران وزیراعظم نہیں رہے لہٰذا عدالت نگران وزیراعظم کو عہدے سے ہٹانے کے احکامات جاری کرے۔
دوسری جانب وفاقی حکومت کے وکیل نے درخواست کو ناقابل سماعت قرار دینے کی استدعا کرتے ہوئے کہا کہ اس نوعیت کا معاملہ سپریم کورٹ میں زیر سماعت ہے۔
لاہور ہائیکورٹ نے فریقین کے دلائل سننے کے بعد درخواست کے قابل سماعت ہونے یا نا ہونے پر فیصلہ محفوظ کر لیا تھا۔