فیس بک کی مالک کمپنی میٹا نے ایک نیا "لاما اے پی آئی” ماڈل متعارف کرایا ہے تاکہ کمپنیاں اور ڈویلپرز آسانی سے اپنے مصنوعی ذہانت (اے آئی) پروڈکٹس بنا سکیں۔
رپورٹ کے مطابق یہ اعلان میٹا نے اپنی پہلی اے آئی ڈویلپر کانفرنس میں کیا۔ میٹا چاہتی ہے کہ اے آئی ڈویلپرز اس کے لاما ماڈل کو استعمال کریں، اس لیے اس نے ایک آسان اے پی آئی متعارف کیا ہے۔
میٹا کا مقصد ہے کہ اس کے صارفین اے پی آئی کی مدد سے کم وقت اور کم خرچ میں اے آئی پروڈکٹس بنا سکیں، میٹا کا ماننا ہے کہ ’لاما اے پی آئی‘ آرٹیفیشل انٹیلی جینس کی دنیا میں مقابلے کے رجحانات اور نئے ماڈلز کی ترقی کو فروغ دے گی۔
لاما اے پی آئی کیا ہے؟
لاما ایک آرٹیفیشل انٹیلی جینس ماڈل ہے جو میٹا نے تیار کیا ہے، میٹا نے اس ماڈل کو ایک اے پی آئی (ایپلی کیشن پروگرامنگ انٹرفیس) کے ذریعے فراہم کیا ہے تاکہ سافٹ ویئر ڈویلپر صرف ایک لائن کوڈ سے اس ٹیکنالوجی کو اپنے ایپس یا سسٹمز میں شامل کرسکیں۔
میٹا کا مقصد ہے کہ زیادہ سے زیادہ کمپنیاں اور ڈویلپرز اس کے اے آئی ماڈلز کو استعمال کریں تاکہ وہ گوگل، اوپن اے آئی اور چین کی ڈیپ سیک جیسی کمپنیوں سے مقابلہ کرسکے۔
اس حوالے سے میٹا کے چیف پروڈکٹ آفیسر کرس کاکس کا کہنا ہے کہ اب آپ صرف ایک لائن کوڈ سے لاما کو استعمال کر سکتے ہیں۔
رپورٹ کے مطابق لاما اے پی آئی کے نئے ماڈل کی مدد سے کوئی بھی ڈویلپر پہلے سے موجود اے آئی ٹیکنالوجی کو اپنے سسٹم میں شامل کر سکتا ہے۔ یہی وجہ ہے کہ اوپن اے آئی کی آمدنی کا بڑا ذریعہ اس کی اے پی آئی ہے۔
مزید پڑھیں : چیٹ جی پی ٹی استعمال کرنے والوں کیلئے اہم خبر
میٹا ترجمان نے بتایا کہ لاما اے پی آئی ابھی محدود صارفین کے لیے دستیاب ہے اور اسے جلد ہی تمام صارفین کے لیے پیش کیا جائے گا، تاہم کمپنی کی جانب سے اس کی قیمت کے بارے میں فی الحال کچھ نہیں بتایا گیا۔
اے آئی اسسٹنٹ ایپ متعارف
علاوہ ازیں میٹا نے ایک نیا اے آئی اسسٹنٹ ایپ بھی متعارف کیا ہے۔ وہ اس سال کی دوسری سہ ماہی میں اپنے آرٹیفیشل انٹیلی جینس چیٹ بوٹ کے لیے ایک پیڈ سبسکرپشن (معاوضہ سروس) بھی ٹیسٹ کرے گی۔
