ناسا کی کیپلر دوربین نے نظامِ شمسی سے باہر زمین کی جسامت کے 100 سے زیادہ سیارے دریافت کیے ہیں۔
غیر ملکی نشریاتی ادارے کے مطابق ان میں سے نو سیارے ایسے ہیں جو اپنے ستاروں کے گرد اتنے فاصلے پر گردش کر رہے ہیں جنھیں قابلِ رہائش علاقہ کہا جاتا ہے۔یہ دریافتیں ان 1284 نئے سیاروں کا حصہ ہیں جنھیں کیپلر نے دریافت کر کے نظامِ شمسی سے باہر اب تک دریافت شدہ سیاروں کی تعداد دگنی کر دی ہے۔
کیپلر کی مشن سائنسدان ڈاکٹر نیٹلی بیٹیلا نے کہا ہے کہ حساب کتاب سے معلوم ہوتا ہے کہ ہماری کہکشاں میں 10 ارب کے قریب سیارے قابلِ رہائش مداروں میں گردش کر رہے ہیں۔انھوں نے کہاکہ تقریباً 24 فیصد ستارے ممکنہ طور پر قابلِ رہائش سیاروں کے حامل ہیں اور جو زمین کی جسامت سے 1.6 گنا سے چھوٹے ہیں۔
ان کا کہنا ہے کہ یہ دو نئے سیارے قابلِ رہائش سیاروں کی تلاش میں اچھا ہدف ثابت ہو سکتے ہیں۔انھوں نے کہا کہ کیپلر مشن کا بڑا ہدف زمین سے باہر زندگی کا سراغ لگانا، اور یہ جاننا ہے کہ آیا ہم اکیلے ہیں یا نہیں، اور یہ کہ زندگی ہماری کہکشاں میں کیسے پنپتی ہے اور اس میں کس قسم کا تنوع پایا جاتا ہے۔
