پاکستان کی معروف ایکٹریس اور ماڈل سجل علی اور صبور علی کی والدہ انتقال کرگئیں‘ مرحومہ طویل عرصے سے علیل تھیں۔
تفصیلات کے مطابق کینسر جیسے موذی مرض کے خلاف برسرِ پیکار سجل علی کی والدہ کی طبعیت گزشتہ رات انتہائی ناساز ہوئی اور وہ رضائے الہی سے خالقِ حقیقی سے جا ملیں۔
اے آروائی نیوز کے مارننگ شو کے درمیان میزبان صنم بلوچ نے انتہائی رنج کا اظہار کرتے ہوئے اپنے ناظرین کو آگاہ کیا کہ سجل علی اورصبور علی کی والدہ راحت آپا انتقال کرگئیں ہیں‘ تاہم ان کی نمازِ جنازہ کے وقت کا اعلان فی الحال خاندان کی جانب سے نہیں کیا گیا۔
لاہور سے تعلق رکھنے والی بہنیں سجل اورصبور علی دونوں کا شمار پاکستان کی مشہور ماڈلز اوراداکاراؤں میں ہوتا ہے اور ان کے معصومانہ خدو خال اور پیشہ ورانہ قابلیت کے سبب انہیں پسند کیا جاتا ہے۔
گزشتہ رات سجل علی نے اپنی والدہ کے ہمراہ عمرے کے دوران لی گئی تصاویر سماجی رابطے کی ویب سائٹ انسٹا گرام پر شیئر کی تھیں اور اپنی والدہ کی صحت کے لیے اپنے مداحوں سے اپیل بھی کی تھی۔
یاد رہے کہ سجل علی رواں سال کے پہلے مہینے میں اپنے اہل خانہ کے ہمراہ عمرے کی سعادت حاصل کرنے مکہ مکرمہ گئی تھیں جہاں اپنی والدہ اور دیگر اہلِ خانہ کے ہمراہ لی گئی تصاویر کو سوشل میڈیا پر بے پناہ سراہا گیا تھا۔
کراچی : جامعہ بنوریہ کے مہتمم مفتی نعیم نے وینا ملک اور اسد خٹک کے درمیان صلح کرواتے ہوئے اسد خٹک کو تین ماہ کا وقت دیا ہے اس دوران اسد خٹک وینا ملک کو ماہانہ اخراجات دینے کے پابند ہوں گے۔
جامعہ بنوریہ میں پریس کانفرنس کرتے ہوئے مفتی نعیم نے بتایا کہ دونوں کی تفصیلی بات سنی ہے اوراس نتیجے پر پہنچا ہوں کہ سارے معاملے میں اسد خٹک قصور وار ہیں کیوں کہ انہوں نے بنیادی حق نان نفقہ ادا نہیں کیا اس لیے طے پایا ہے کہ ابتدائی طور پر اسد خٹک تین ماہ تک وینا ملک اور بچوں کا نان نفقہ دیں گےاور یہ خرچہ وہ جامعہ بنوریہ میں جمع کرائیں گے ۔
اے آر وائی نیوز کے پروگرام الیونتھ آور کے اینکرز وسیم بادامی نے اپنے پروگرام میں وینا ملک اور اسد خٹک کو مدعو کر کے مسئلہ حل کرنا چاہا جس کے لیے پروگرام میں ممتاز عالم دین طارق جمیل کو بھی ٹیلی فون پر لیا گیا جنہوں نے دونوں کے درمیان صلح کروادی تھی تاہم بعد میں خبریں آئیں کہ معاملہ پھر کھٹائی میں پڑ گیا ہے۔
گو کہ ممتاز عالم دین مفتی نعیم نے دونوں کے درمیان ایک بار پھر مشروط صلح تو کروا دی ہے لیکن دیکھنا یہ ہے کہ آیا اسد خٹک اپنے مزاج میں تبدیلی کے ساتھ تین ماہ تک نان نفقہ باقاعدگی سے دیں گے؟ اور کیا وینا ملک کا یہ فیصلہ حتمی ہے یا پھر کوئی نیایو ٹرن لیا جائے گا؟
وینا ملک اور اسد ملک کی بہ ظاہر خوشگوار ازدواجی زندگی میں اچانک آنے والا بھونچال اس وقت منظرِ عام پر آیا جب وینا ملک کے وکیل نے جوڑے کے درمیان خلع کی خبر میڈٍیا کو دی جس کے بعد یہ معاملہ زبان زد عام ہو گیا تاہم وینا ملک کے قریبی دوستوں اور حلقہ احباب نے اس پر حیرت کا اظہار کیا تھا۔
نئی دہلی : بھارتی ریاست آسام میں ایک مسلم علماء کے گروپ نے انڈین جونیئر آئیڈل میں حصہ لینے والی بھارتی گلوکارہ کیخلاف فتویٰ جاری کردیا ، علماء نے گلوکارہ کو اسٹیج پر گانے گانے سے روکنے کے حوالے سے فتویٰ جاری کیا۔
بھارتی میڈیا کے مطابق بھارتی ریاست آسام میں 43 مسلمان علماء نے 16 سالہ بھارتی گلوکارہ کیخلاف فتویٰ جاری کردیا، فتویٰ میں کہا گیا ہے کہ موسیقی کے کنسرٹس اور گانے گانا شریعت کیخلاف اور حرام ہے۔
میڈیا رپورٹس کے مطابق ناہید آفرین نے 25 مارچ کو آسام کے علاقے لنکا کے ایک کالج کے کنسرٹ میں پرفارم کرنا ہے، علماء نے اسی بات سے ناراض ہو کر ناہید آفرین اور منتظمین کے خلاف کل فتوی جاری کیا گیا کیونکہ علما کے مطابق کنسرٹ کے مقام پر مسجد اور قبرستان واقعہ ہے ، جس کی وجہ سے مقدس مقامات کا تقدس پامال ہوگا۔
بھارتی گلوکارہ ناہید آفریں کا کہنا تھا فتویٰ آنے کے بعد پہلے پہل تو مجھے بہت دکھ اور حیرانی ہوئی مگر پھر بہت سے مسلمان گلوکاروں نے مجھے میوزک انڈسٹری نہ چھوڑنے کے لیے حوصلہ دیا ۔
دھمکیوں سے ڈرنے والی نہیں اور کسی صور ت گلوکاری نہیں چھوڑو گی،ناہید آفریں
ناہید نے کہا کہ وہ دھمکیوں سے ڈرنے والی نہیں اور کسی صور ت گلوکاری نہیں چھوڑو گی۔
ناہید آفریں نے کہا کہ میری آواز قدرت کی طرف سے تحفہ ہے اور میرا یقین ہے کہ اسے صحیح طریقے سے استعمال کیا جانا چاہئیے کیونکہ ایسا نہ کر کے میں قدرت کی اس نعمت کی ناشکری کرونگی۔
پولیس نے فتوے کا نوٹس لیتے ہوئے اس پر تفتیش شروع کر دی ہے جبکہ آسام کے چیف نے ناہید کو مدد کی یقین دہانی اور بھرپور سیکیورٹی فراہم کرنے کی پیشکش کی ہے، پولیس حکام کا کہنا ہے کہ ناہید آفرین نے حال ہی میں دہشت گرد تنظیم داعش کیخلاف نغمے گائے تھے۔
خیال رہے کہ ناہید آفرین 2015ء کے انڈین جونیئر آئیڈل میں رنر اپ رہی تھیں جبکہ انہوں نے سوناکشی سنہا کی فلم اکیرا میں بھی اپنی گلوکاری کے جوہر دکھائے ہیں۔
بچوں اور بڑوں میں یکساں مقبول اینی میٹڈ سیزیر منینز کے چوتھے حصہ ڈسپیک ایبل می 3 کا ایک اور ٹریلر جاری کردیا گیا ہے۔ فلم میں گرو کا جڑواں بھائی دکھایا گیا ہے لیکن یہ گرو کے برعکس نہایت خوبصورت بالوں کا مالک ہے۔
منینز کا پہلا حصہ ڈسپیک ایبل می سنہ 2010 جبکہ دوسرا حصہ 2103 میں پیش کیا گیا تھا۔ فلم کا تیسرا حصہ منینز کے نام سے 2015 میں پیش کیا گیا جو دراصل ڈسپیک ایبل می کا پریکوئل تھا۔ اس میں یہ زرد کردار اپنے مالک کی تلاش میں سرگرداں نظر آئے۔
اب چوتھے حصے کے ٹریلر سے معلوم ہوتا ہے کہ اپنے زمانے کا مشہور چور گرو جرائم سے تائب ہو کر اپنی اہلیہ لوسی کے ساتھ جرائم کے خاتمے کے لیے کوشاں ہے۔
ان کا سامنا ایک انوکھے چور سے ہے جو عالمی شہرت یافتہ آنجہانی گلوکار مائیکل جیکسن کا بے حد مداح ہے اور اس کی طرح رقص کرتے ہوئے اپنا کام دکھا جاتا ہے۔ اس کا ہتھیار ببل گم ہے جس کے ذریعے یہ سب کو بے بس کردیتا ہے۔
فلم کا ایک اور پہلو گرو کا جڑواں بھائی ڈرو ہے جو طویل عرصے بعد گرو سے ملنے آتا ہے۔ اس کے خوبصورت بالوں کو دیکھ کر گرو کا اپنے بالوں سے محرومی کا احساس بڑھ جاتا ہے۔
دونوں بھائی مل کر ببل گم کے ذریعے چوری کرنے والے چور کو پکڑنے چل پڑتے ہیں۔
فلم ڈسپیک ایبل می 3 اگلے سال 30 جون کو ریلیز کردی جائے گی۔
لندن : معروف ہالی وڈ اداکارہ اور اقوام متحدہ کی پناہ گزین ایجنسی کی سفیر انجلینا جولی پروفیسر بن گئی ہیں، وہ لندن اسکول آف اکنامکس میں پروفیسر کے فرائض سرانجام دیں گی۔
تفصیلات کے مطابق ہالی وڈ کی صف اول کی اداکارہ انجلینا جولی کی صرف اداکاری ہی پہچان نہیں بلکہ وہ دنیا بھر میں رفاعی کاموں، اقوام متحدہ کی تنظیم برائے مہاجرین کی سفیر کے طور پر بھی مقبولیت رکھتی ہیں۔
ہالی ووڈ کی معروف اداکارہ انجلینا جولی نے لندن سکول آف اکنامکس میں اپنا پہلا لیکچر دیا، اس موقع پر انہوں نے اقوام متحدہ کی خصوصی سفیر کی حیثیت سے اپنی خدمات اور تجربات سے طلباء کو آگاہ کیا اور طلباء کے سوالات کے جوابات دیئے۔
یونیورسٹی کی جانب سے مذکورہ خبر کی تصدیق کی گئی اور اس بات کا اعلان کیا گیا کہ اداکارہ دیگر چار ویزیٹنگ پروفیسرز کے ہمراہ خواتین، سلامتی اور امن جیسے موضوعات پر لیکچر دیں گی، یہ ماسٹرز پروگرام یونیورسٹی کے ویمن، پیس اینڈ سیکورٹی سینٹر کے تحت شروع کیا گیا ہے، جس کا مقصد صنفی برابری اور جنگ زدہ علاقوں میں متاثرہ خواتین کی مدد کرنا ہے۔
انجلینا جولی کا کہنا تھا کہ وہ اس ماسٹر پروگرام سے بے حد متاثر ہوئیں ہیں یہی وجہ ہے کہ انھوں نے خواتین کے حقوق کے حوالے اپنے خیالات کا اظہار کرنے کیلئے لیکچر دینے کی حامی بھری ہے۔
اداکارہ نے امید ظاہر کی انکے اس ابتدائی عمل کی دیکھا دیکھی لازماً ملک کے دیگر تعلیمی ادارے بھی اس قسم کے پروگرامز کا انعقاد کریں گے۔
واضح رہے اداکارہ انجلینا جولی اوربریڈ پٹ میں اختلاف کے باعث انجلینا جولی نے شوہر سے طلاق لے لی تھی ، جس کے بعد وہ اپنے بچوں اور پناہ گزینوں کی مدد کے ساتھ خواتین کو جنسی طور پر ہراساں کیے جانے کے حوالے سے بھی مہم جوئی میں مصروف ہیں تاکہ خواتین کا تحفظ یقینی بنایا جا سکے۔
ممبئی: بھارتی فلم تارے زمین پر سے شہرت پانے والے ایشان (درشیل سفارے) ایک بار پھر فلم نگری میں اپنا رنگ جمانے کے لیے تیار ہیں۔
تفصیلات کے مطابق فلم ’تارے زمین پر‘ میں مرکزی کردار ادا کرنے والے ننھے اداکار کی نئی فلم کا پوسٹر جاری کردیا گیا جس میں چائلڈ اسٹار ایک خوبصورت نوجوان کی صورت میں نظر آرہے ہیں۔
فلم میکر پردیپ الوتری نے فیس بک پر پوسٹر جاری کیا جس میں اُن کے مطابق درشیل محبت کرنے والے نوجوان کا مرکزی کردار ادا کرتے نظر آئیں گے، ننھے اداکار کی نئی تصویر میں انہیں پہنچاننا مشکل ہی نہیں ناممکن بھی ہے۔
انہوں نے کہا کہ ’’دوستوں تارے زمین فلم کو ریلیز ہوئے 10 برس کا عرصہ گزر چکا ہے اس لیے اب ننھا اداکار خوبصورت نوجوان کی صورت میں آپ کے سامنے آئے گا‘‘۔
درشیل سفارے جنہوں نے اپنی پہلی فلم عامر خان کے ساتھ کیا اور اُس میں اداکاری سے مداحوں کے دل موہ لیے تھے، درشیل کا فلمی نام ایشان تھا جس میں وہ ایک ایسے بچے کا کردار ادا کررہے تھے کہ جس کو پڑھائی لکھائی کا کوئی شوق نہیں تھا اور وہ کچھ الگ کرنا چاہتا تھا۔
بالی ووڈ اداکار عامر خان اس فلم میں ایشان کے ٹیچر بننے اور انہوں نے اپنے اسٹوڈنٹ کے اندر چھپی صلاحیتوں کو باہر نکالا اور اُس میں اعتماد پیدا کیا تھا۔ ایشان نے اپنی اداکاری کے سبب فلم فیئر ایوارڈ اپنے نام کیا تھا۔
آپ کو کوک اسٹوڈیو کا گانا ’آفریں آفریں‘ تو ضرور یاد ہوگا جس نے نو آموز گلوکارہ مومنہ مستحسن کو بے پناہ شہرت دلا دی۔ اس گانے کو جہاں بڑے پیمانے پر پذیرائی ملی وہیں اسے تنقید کا نشانہ بھی بنایا گیا۔
تاہم اس گانے کی مقبولیت صرف پاکستان یا بھارت تک ہی محدود نہیں رہی بلکہ ترکی کے افراد بھی اس گانے سے متاثر نظر آئے۔
حال ہی میں سماجی رابطوں کی ویب سائٹ فیس بک پر ایک ویڈیو گردش کرتی نظر آرہی ہے جس میں ترکی سے تعلق رکھنے والے دو افراد یہ گانا گاتے نظر آرہے ہیں۔
اجنبی زبان ہونے کے باوجود ان افراد نے نہایت صحیح تلفظات کے ساتھ یہ گانا گایا۔
لیکن اس ویڈیو کے مشہور ہونے کی ایک وجہ اور بھی ہے۔
وہ یہ ہے کہ ویڈیو میں موجود ایک شخص معروف پاکستانی اداکار فواد خان سے بے حد مشابہہ ہے۔
بالی وڈ کے معروف اداکارعامرخان آج اپنی 52 ویں سالگرہ منارہے ہیں‘ 33 سال پرمحیط فلمی کیرئیرمیں عامرخان نے کئی ریکارڈ بریکنگ فلمیں کی ہیں جن میں حال میں ریلیز ہونے والی فلم دنگل بھی شامل ہے۔ ان کی سالگرہ کے موقع پر ہم آپ کو دکھا رہے ہیں ان کی فلموں کے کچھ بہترین مناظر جو عامر خان کا حوالہ بن گئے ہیں۔
عامرخان ایک مشہور بھارتی اداکار فلمساز اور سکرپٹ رائٹرطاہرحسین کے گھر 14 مارچ 1965ء کوپیدا ہوئے۔ 1973ء میں اپنے چچا ناصر حسین کی فلم یادوں کی بارات میں بطور چائلڈ سٹار کے پہلی مرتبہ پردہ سکرین پر نمودار ہوئے۔
گیارہ سال بعد فلم "ہولی” میں کام کیا مگر انہیں فلمی دنیا میں کامیابی اور پذیرائی ان کے کزن منصور خان کی فلم قیامت سے قیامت سے ملی جو 1988ء میں ریلیز ہوئی۔ اس فلم میں انہیں بہترین ڈیبیو اداکار کا فلم فیئر ایوارڈ ملا۔
عامرخان کی 90 کی دہائی میں ان کی کئی مشہور فلمیں ریلیز ہوئیں جن میں راجہ ہندوستانی ، سرفروش ، بازی اور عشق وغیرہ شامل تھیں۔ 2000ء کے بعد ان کی اداکاری میں ایک بہت بڑی تبدیلی واقع ہوئی۔ جب انہوں نے لگان فلم میں کام کیا ۔ لگان فلم کو آسکر کے لیے بھی نامزد کیا گیا۔ لگان کے بعد انہوں نے کئی سپر ہٹ فلموں میں کام کیا جن کو بین الاقوامی سطح پر پذیرائی حاصل ہوئی ان فلموں میں منگل پانڈے ، تارے زمیں پر ، گجنی ، تھری ایڈیٹس‘ پی کے اوردنگل شامل ہیں۔
عامر خان نے ان فلموں میں حقیقی زندگی کی تصویریں پیش کرنے کی کوشش کی ۔ خاص طور پر تارے زمین پر اور تھری ایڈیئٹس تدریسی نظام میں موجود خرابیوں کی نشاندہی کے حوالے سے بہترین فلمیں تصور کی جاتی ہیں۔ ان کی فلمیں عام اور کمرشل موضوعات سے ہٹ کر ہوتی ہیں۔
معروف اداکار نے80 کے دہائی کے آخر میں رینا دت سے شادی کی۔ مگر ایک غیر مسلم کو ان کے خاندان نے بطور بہو تسلیم کرنے سے انکار کر دیا۔یوں ابتداء میں ان کی یہ شادی خفیہ رہی۔ رینا سے عامر خان کے دو بچے ہیں ایک بیٹا اور ایک بیٹی۔
سنہ 2002ء میں عامر خان اور رینا کے درمیان طلاق ہوئی۔ 2005ء میں عامر خان نے کرن راؤ سے شادی کی جو بطور اسسٹنٹ ڈائریکٹر لگان میں کام کرچکی تھیں۔ عامر خان زیادہ تر اپنی فلموں پر توجہ دینے کے لیے مشہور ہیں۔ اس لیے اشتہارات اور ایوارڈ شوز زیادہ نظرنہیں آتے۔
2013ء میں ان کی فلم دھوم 3 نے ان کو اور بھی زیادہ مقولیت دے دی۔ دھوم 3 نے بالی وڈ کی ساری فلموں کے ریکارڈ توڑ دیے اور بالی وڈکی سب سے زیادہ بزنس کرنے والی فلم بن گئی۔ فلم میں ایک گانا بھی تیار کیا گیا ، جس پر تقریباً 5کروڑ لاگت آئی۔ اس گانے کا نام ملنگ ملنگ تھا۔یہ گانا بالی وڈ کا سب سے مہنگا گانا ریکارڈ ہوا۔
حال ہی میں ریلیز ہونے والی فلم دنگل بھی مقبولیت کے تمام تر ریکارڈز توڑ چکی ہے ‘ عامرخان نے اس فلم کے لیے کافی محنت کی تھی۔ پہلے انہوں نے اپنا وزن بڑھایا تاکہ عمر رسیدہ پہلوان لگ سکیں اور اس کے بعد واپس اپنا وزن کم کرکے پہلوان کا روپ دھارا۔
عامر خان کی سب سے خاص بات کردار میں ڈھل جانا ہے جس کی ناقدین بھی تعریف کرتے ہیں‘ وہ اپنی ہرفلم میں کردار کے مطابق خود کو تبدیل کرتے ہیں اور ویسی ہی شخصیت اپناتے ہیں جیسا کہ کردار ہوتا ہے اور یہی ان کی مقبولیت اور کامیابی کا راز ہے۔
نوٹ: اس پوسٹ کے بارے میں اپنی رائے کا اظہار نیچے کمنٹس میں کیجیئے
لندن: تیز رفتار جدید ٹیکنالوجی دنیا بھر میں نئے نئے انقلاب برپا کر رہی ہے۔ مختلف شعبہ جات میں روبوٹس سے کام لینا بھی پرانی بات بن چکی ہے، اور اب حال ہی میں ایک تھیٹر ڈرامے میں ایک روبوٹ نے اداکاری کے جوہر بھی دکھائے۔
لندن میں ہونے والے اسٹیج پلے اسپلیکن میں روبوٹ کی عمدہ کارکردگی نے شائقین کے دل موہ لیے۔ ہدایت کار جان ویلچ کے پیش کردہ ڈرامے کی کہانی ایک بیوہ عورت اور اس کے ساتھ رہنے والے روبوٹ کے گرد گھومتی ہے۔
یہ روبوٹ اس کے شوہر نے اس مقصد کے لیے بنایا ہوتا ہے کہ اس کے مرنے کے بعد وہ اس کی بیوی کے ساتھ رہے اور اس کا دل بہلاتا رہے۔
لوگوں نے ڈرامے کے اس عنصر کو فن، محبت اور جدید ٹیکنالوجی کا بہترین امتزاج قرار دیا۔
ڈرامے کے ہدایت کار جان ویلچ کا کہنا ہے کہ اسٹیج پر پیش کی جانے والی روبوٹ کی تمام پرفارمنس بشمول اس کی حرکات و سکنات اور ڈائیلاگز پہلے سے روبوٹ میں فیڈ کردیے گئے ہیں۔
روبوٹ کے سسٹم کو ایک لیپ ٹاپ سے منسلک کیا گیا ہے جو بیک اسٹیج بیٹھنے والے افراد کنٹرول کرتے ہیں۔ ان کا کام صرف اتنا ہے کہ وہ روبوٹ کی پرفارمنس پر نظر رکھیں کہ آیا وہ درست طریقے سے کام کر رہا ہے یا نہیں۔ اگر کوئی تکنیکی خرابی رونما ہوتی ہے تو فوری طور پر اسے ٹھیک کیا جائے۔
دوسری جانب روبوٹ کے ساتھ اداکاری کا مظاہرہ کرنے والی اداکارہ جوڈی نورمن کا کہنا ہے کہ روبوٹ کے ساتھ اداکاری کرنا عجیب تو ہے لیکن یہ ان کے لیے نہایت انوکھا تجربہ ہے۔
وہ بتاتی ہیں کہ ڈرامے کے دوران روبوٹ اور وہ ایک دوسرے کو دیکھتے ہیں، ایک دوسرے کو چھوتے ہیں اور باتیں کرتے ہیں۔ ’کسی انسان کی جگہ ایک مشین کی موجودگی بہت عجیب بات ہے لیکن بہرحال یہ ایک منفرد تجربہ ہے‘۔
ڈرامے میں روبوٹ کی موجودگی کی وجہ سے اس کی مقبولیت میں اضافہ ہوگیا ہے اور لوگ اسے دیکھنے کے لیے جوق در جوق یہاں کا رخ کر رہے ہیں۔
یہ اسٹیج ڈرامہ 19 مارچ تک لندن میں پیش کیا جائے گا، بعد ازاں اسے دوسرے شہروں میں بھی لے جایا جائے گا۔
ممبئی: بالی ووڈ کی خوبرو اداکارہ کنگنا رناوت کا کہناہےکہ میں کبھی بھی بالی ووڈ خانز کےساتھ کام کرنا نہیں چاہوں گی۔
تفصیلات کےمطابق بالی ووڈ کی بے باک اداکارہ کنگنا رناوت نےکہاہےکہ وہ بالی ووڈ کےبادشاہ شاہ رخ خان سمیت کسی بھی خان کےساتھ فلم میں کام کرنا نہیں چاہیں گی۔
بالی ووڈ میں’کوئین‘ کے نام سے مشہور اداکارہ کنگنا رناوت نے کہاکہ کسی بھی خان کے ساتھ فلم میں کام کر کے خود کو پیچھےچھپانا نہیں چاہتی بلکہ ہمیشہ اپنی قابلیت دکھانے پر یقین رکھتی ہوں۔
بالی ووڈ خانز کےساتھ کام کرنے سے متعلق سوال کےجواب میں کنگناکا کہناتھاکہ میں ایک مشہور اداکارہ ہوں اور میرے لاتعداد چاہنے والے ہیں خانز کے ساتھ کام کر کے ایسا کیا ملے گا جو میں نے ابھی تک اپنے کیریئر میں حاصل نہ کیا ہو۔
بالی ووڈ کوئین نےکہاکہ خانز کےمقابلے میں کسی اور کی فلم میں جا کرکام کروں گی تواس سے مجھے مداحوں کو اپنی اداکاری کےجوہردکھانے کا پورا موقع ملےگا۔
خیال رہےکہ اس سےقبل بالی ووڈاداکارہ کنگنا رناوت نےکہاتھا کہ وہ فلم انڈسٹری کی نمبر ون اداکارہ ہیں اور آج وہ جس مقام پر ہیں وہ ان کی انتھک محتنت کا نتیجہ ہے۔
یاد رہےکہ گزشتہ دنوں ’کافی ود کرن‘ میں کنگنا رناوت نے معروف ڈائریکٹر کرن جوہر کو اقرباء پروری کےذریعے بالی وڈ میں اجارہ داری قائم کرنے کا طعنہ دیا تھا۔
واضح رہے کہ بالی ووڈ اداکارہ کنگنا رناوت نے متعدد فلمی ایوارڈ اپنے نام کیے ہیں جس میں بھارت کا اعلی اعزاز’نیشنل فلم ایوارڈ‘بھی شامل ہے۔
