Category: فن و ثقافت

یونس دہلوی نے اردو رسائل و جرائد کی دنیا میں معمّوں کی ابتدا کر کے ایک ماہرِ نفسیات کی طرح مالی بحران اور اقتصادی شکنجوں میں جکڑے ہوئے اردو داں طبقے پر ایک حربہ آزمایا اور معمے بھر کر آسانی کے ساتھ دولت حاصل کرنے کی عام انسانی خواہش کو جگا دیا۔

یہ بھارت میں اردو رسائل کے سب سے بڑے سلسلہ کے ناشر و مدیر یونس دہلوی کے بارے میں عظیم اختر کے مضمون کا ابتدائیہ ہے۔ اس اشاعتی کاروبار کی بنیاد تقسیمِ ہند سے قبل یوسف دہلوی نے رکھی تھی، جسے بعد میں‌ ان کے بیٹے یونس دہلوی نے نہایت کام یابی سے آگے بڑھایا۔ ان کے زیرِ انتظام شمع پبلشنگ ہاؤس کے تحت مقبولِ عام فلمی رسالہ شمع ہی نہیں کھلونا، بانو، شبستان جیسے رسائل کی اشاعت ہوتی رہی۔ یہ رسائل بھارت کے علاوہ پاکستان اور ریاست ہائے متحدہ امریکا میں بھی خریداروں تک پہنچتے تھے اور پڑھے جاتے تھے۔ رسالہ شمع لاکھوں کی تعداد میں‌ شایع ہوتا تھا اور ہر خاص و عام میں‌ مقبول تھا۔ بالی وڈ کی مشہور شخصیات جن میں دلیپ کمار، اشوک کمار، راج کمار، آشا پاریکھ، نوتن، نرگس، راج کمار، سنجیو کمار، محمد رفیع، ملکہ پکھراج اور فلمی دنیا کے کئی چہرے یونس دہلوی کے احباب میں‌ شامل تھے اور ان کے گھر بھی آنا جانا تھا۔

آج یونس دہلوی کا یومِ وفات ہے۔ وہ 2019ء میں اس دارِ‌ فانی سے رخصت ہوگئے تھے۔ یونس دہلوی کا کاروبار 1994ء تک نہایت کام یابی سے چلتا رہا، لیکن پھر خاندان میں اختلافات نے جنم لیا اور سب کچھ اس کی نذر ہوگیا۔ یونس دہلوی کو کئی اعزازات سے بھی نوازا گیا اور وہ بھارت اور اردو دنیا کی ایک مشہور ہستی تھے۔ عظیم اختر نے اپنی تحریر میں‌ یونس دہلوی کا تذکرہ کرتے ہوئے رسالہ شمع کی مقبولیت کا ایک راز بھی بتایا ہے، جو قارئین کی دل چسپی کا سبب بنے گا۔ ملاحظہ کیجیے۔

لفظوں کی سانپ سیڑھی کے اس کھیل میں خطیر رقموں کے انعامات کی پرکشش اور ترغیب دلانے والی پیش کش نے دیکھتے ہی دیکھتے ہزاروں لوگوں کو اپنے سحر میں جکڑ لیا اور شمع کا سرکولیشن چند ہی سالوں میں ایک لاکھ سے تجاوز کر گیا۔ یہ ماہنامہ "شمع” کے شباب کا دور تھا۔ شمع کے اسی دورِ شباب میں یونس دہلوی نے ماہنامہ "ساقی” کے مدیر جناب شاہد احمد دہلوی کی سنتوں کو تازہ کرتے ہوئے نہ صرف "شمع” میں شائع ہونے والی غزلوں، نظموں اور کہانیوں کے تخلیق کاروں کو بلکہ ‘شمع بک ڈپو’ کی طرف سے شائع ہونے والے ناولوں کے ناول نگاروں کو باقاعدہ رائلٹی دینے کا بھی سلسلہ شروع کیا جس کا اس زمانے میں تصور بھی ممکن نہیں تھا۔

ماہ نامہ شمع کی اس پذیرائی نے اس دور کے ہر چھوٹے بڑے اور معروف و غیر معروف شاعر اور افسانہ نگار کو شمع کے صفحات میں جگہ پانے کا خواہش مند بنا دیا تھا۔

تخلیقی کاوشوں پر رائلٹی اور کثیر الاشاعت رسالے میں چھپنے کی للک نے معمے بازی کی دعوت عام دینے والے ماہ نامہ شمع کو فلمی اور نیم ادبی پرچے کا روپ دے دیا تھا۔ معمے چوں کہ خالص یونس دہلوی کے ذہن کی اختراع تھے، اس لیے معمے کی شکل میں لفظوں کی سانپ سیڑھی کے اس کھیل کو مرتب کرنے کے علاوہ شمع میں چھپنے والی کہانیوں کا انتخاب بھی وہ بذاتِ خود کیا کرتے تھے۔ صرف شعری حصّے کی ترتیب کے لیے وہ ایک عرصہ تک ابّا جی مرحوم حضرت مولانا سلیم اختر مظفر نگری کی مدد لیتے رہے لیکن ان کے انتقال کے بعد شعری حصّے کے انتخاب کے لیے ان کی نگاہِ انتخاب جناب بسمل سعیدی ٹونکی جیسے استاد اور کہنہ مشق شاعر پر پڑی۔ یونس دہلوی بذاتِ خود ایک قلم کار اور ادیب نہیں تھے لیکن وہ فلمی ستاروں کی رومانی کہانیاں اور باہمی تعلقات کے لذّت آمیز قصے پڑھنے والوں اور معموں کے شوقین پروانوں کو ذہنی آسودگی پہنچانے والی کہانیوں کے ایک اچھے پارکھ تھے۔

معمے کی اختراع نے شمع کو چند ہی سالوں میں کہیں سے کہیں پہنچا دیا لیکن جب لوگوں کو دولت مند بنانے کی اس سہل سے نسخے پر "جوا ایکٹ” (Gamble Act) کی پرچھائیاں پڑیں تو قانونی مجبوریوں کے تحت معمہ بند کرنا پڑا جس کے نتیجے میں سرکولیشن بری طرح متاثر ہوئی۔ مالکان کو اس حقیقت کا ادراک ہوا کہ شمع کی تمام تر مقبولیت اور بڑھتی ہوئی سرکولیشن صرف معموں کی وجہ سے تھی اور معموں کے بغیر شمع اپنے پیروں پر کھڑا بھی نہیں رہ سکتا۔ چنانچہ معموں کے شائقین کو معمے بازی کی ڈور میں پرونے کے لیے ادبی معمّوں کا ڈول ڈالا گیا لیکن یہ ادبی معمّے شمع کے ان معمّوں کا بدل ثابت نہ ہو سکے جس کی وجہ سے شمع شہرت و مقبولیت کی تمام حدوں کو پھلانگ گیا تھا۔

ان ادبی معمّوں کو جاری رکھنا مالكانِ ‘شمع’ کی کاروباری اور تجارتی مجبوری تھی۔ ہر ماہ غیر معمولی تعداد میں حاصل ہونے والی آمدنی کے قصۂ پارینہ بن جانے کی وجہ سے اخراجات میں کٹوتیوں کا دور شروع ہوا اور مسلسل نقصان کے نام پر آخر ایک دن اردو دنیا میں اپنے انمٹ اور خوب صورت چھاپ چھوڑ کر خاموشی سے "شمع” بند ہو گیا۔

ہندوستان، پاکستان کے اردو رسائل و جرائد کی دنیا میں ہر ماہ ڈیڑھ پونے دو لاکھ کی تعداد میں چھینے اور غیر معمولی شہرت و عوامی مقبولیت کے حامل "شمع” کو فلمی اساس کی وجہ سے صرف پاپولر میگزین کے زمرے میں رکھ کر اس کے شعری و نثری حصے سے ہمیشہ بے اعتنائی برتی گئی۔ حالانکہ یونس دہلوی نے اپنی تمام تر مدیرانہ صلاحیتوں کو بروئے کار لاکر ہمیشہ اچھی خوب صورت شعری و نثری کاوشوں کو شمع کے صفحات میں جگہ دی۔

شمع میں چھپنے والی بہت سی کہانیاں آج اردو ادب کی بہترین اور نمائندہ کہانیوں میں شامل کی جاتی ہیں۔ اسی طرح یونس دہلوی کی زیرِ ادارت شائع ہونے والا ہفت روزہ "آئینہ” اردو دنیا میں اپنی طرز کا پہلا ہفت روزہ تھا جو دیدہ زیب گیٹ اپ اور اپنے مشمولات کے اعتبار سے اردو میں حرفِ اوّل اور حرفِ آخر ثابت ہوا۔

یونس دہلوی نے اپنی نفاست پسندی اور ذوقِ سلیم کی وجہ سے شمع کے ادارے سے نکلنے والے دوسرے ماہ ناموں کو بھی خوب صورت بنانے میں کوئی کمی نہیں چھوڑی لیکن بنیادی طور پر چونکہ ایک تجارتی اور کاروباری ذہن رکھتے تھے، اس لیے معموں کے بند ہونے اور آمدنی کے ذرائع سکڑنے کی وجہ سے اس کاروبار کو خیر باد کہہ کر کاروبار کی ایک نئی دنیا آباد کر لی جہاں گم نامی کے علاوہ کچھ اور نہیں تھا۔

یونان سے دنیا کا عشق کبھی ختم نہیں ہوسکتا۔ جب تک روئے زمین پر زندگی جنم لیتی رہے گی، اس وقت تک۔

بے شک ہر دور میں بنی نوعِ انسان یونان کی ہزار ہا برس قدیم تاریخ میں دل چسپی لیتا رہے گا۔ یونانی تہذیب، تمدن اور اس کے بطن سے پھوٹنے والے نظام ہائے سیاست و سماج، عام زندگی اور یونانیوں کے حالات، فکر و نظریات اور اس کے نتیجے میں جنم لینے والے وہ انقلابات جن سے یورپ ہی نہیں‌ پوری دنیا متأثر ہوئی، آئندہ بھی انسانوں کے لیے قابلِ رشک اور موضوعِ بحث رہیں‌ گے۔

براعظم یورپ کی اس تہذیب اور معاشرت سے فکر و دانش کے جو سوتے پھوٹے اس نے جدید دنیا کو جمہوریت کا تحفہ بھی دیا اور فکر و فن کی وہ بلندیاں بھی جس نے کئی شاہ کار تخلیق کیے۔ اس خطّہ میں‌ آباد قوم نے ارتقائی مراحل طے کرتے ہوئے اپنے سب سے عظیم شہر ایتھنز میں افلاطون، ارسطو، سقراط، سکندر اور دیگر نابغۂ روزگار ہستیوں کو دیکھا اور ان کے نظریات کا گہرا اثر قبول کیا۔

موجودہ یونان کا دارالحکومت ایتھنز، ملک کا سب سے بڑا شہر ہے اور اسی کو جمہوریت کی جائے پیدائش کہا جاتا ہے۔ آج لاکھوں نفوس پر مشتمل ایتھنز اقتصادی، تجارتی، صنعتی، ثقافتی اور سیاسی سرگرمیوں کے لیے مشہور ہے۔ قدیم دور میں‌ اسی شہر کو آتھینا اور ایک طاقت وَر، مستحکم اور پائیدار ریاست کا مرکز کہا جاتا تھا۔ یہاں شہرۂ آفاق شخصیات نے درس گاہوں سے تعلیم مکمل کی اور علم و فنون، ایجاد و اختراع کے لیے آج بھی ان کا نام زندہ ہے۔

چوتھی اور پانچویں صدی قبلِ مسیح میں یورپ کی ریاستوں پر یونان کے گہرے ثقافتی اور سیاسی اثرات مرتب ہونا شروع ہوئے اور اسے سیکڑوں سال تک تہذیب کا گہوارہ سمجھا جاتا رہا۔ یہ شہر پارتھینون، ایکرو پولس (بلند شہر)، کیلی کریٹس اور فیڈیاس جیسے مشہورِ زمانہ تعمیراتی شاہ کاروں کے علاوہ فنِ تعمیر کے کئی قدیم نمونوں اور نادر آثار کا حامل ہے۔

قدیم یونان دراصل ایک تہذیب کا نام ہے، جس کا عرصۂ حیات اور عروج کے ادوار کو ماہرین نے صدیوں‌ کے لحاظ سے تقسیم کیا ہے جس میں کلاسیکی زمانہ اوپر بتایا جاچکا ہے۔ اس کے بعد جدید مغربی ثقافت کا دور شروع ہوا تھا۔

ماہرین کے مطابق کلاسیکی دور میں یونانی ثقافت نے تہذیبی ارتقاء کے ساتھ تعلیم کو بہت اہمیت دی۔ اسی دور کی تہذیب و ثقافت نے اگلی چند صدیوں میں سائنس، ریاضی، فلسفہ و منطق اور دیگر علوم میں ترقی کی کئی منازل طے کیں۔ فنونِ لطیفہ کی بات کی جائے تو یونان میں اس زمانے میں غیر معمولی ترقی پر دنیا حیران ہے۔ ملک میں اعلیٰ قسم کا سنگِ مرمر بکثرت پایا جاتا تھا جس کے سبب یہاں فنِ تعمیر اور مجسمہ سازی نے غیر معمولی ترقی کی۔

دوسری طرف یونان ہی وہ ریاست تھی جہاں جمہوریت کا تصوّر سب سے پہلے دیا گیا اور اسی خطّے سے یہ طرزِ حکومت دنیا میں‌ پھیلا۔ ایتھنز شہر کو یونانی دیو مالا کے کردار کی نسبت ایتھنے یا آتھینا کا نام دیا گیا تھا۔ یونان جنوب مشرقی یورپ میں جزیرہ نما بلقان کے نشیب میں واقع ہے۔ اس کے شمال میں البانیہ، مقدونیہ، بلغاریہ اور مشرق میں ترکی، جب کہ مغرب میں بحیرۂ ایونی اور جنوب میں بحیرۂ ایجین واقع ہیں۔

قدیم ایتھنز کو ایک طاقت ور ریاست مانا جاتا ہے جس میں پانچویں صدی قبل مسیح میں ماہر تاریخ نویس ہیروڈوٹس اور ساتویں صدی قبلِ مسیح کا عظیم شاعر ہومر بھی سانس لیتا رہا۔ اسی خطّے کے باشندے کئی لحاظ سے پستی اور اخلاقی گراوٹ کا بھی شکار تھے، جس کی نشان دہی کرنے والا عظیم دانش ور سقراط تھا اور وہاں کی اشرافیہ نے اس پر نوجوانوں کو گم راہ کرنے اور مقدّس دیوتاؤں کی توہین کے الزامات لگا کر موت کو گلے لگانے پر مجبور کر دیا تھا۔

محققین نے بتایا ہے کہ مشہورِ زمانہ فلسفی افلاطون اسی سقراط کا شاگرد تھا۔ اسی نے ایتھنز میں اوّلین تعلیمی درس گاہ قائم کی تھی جس سے بعد میں‌ ارسطو جیسے دانش ور نے بھی تحصیلِ علم کیا۔ ارسطو کو ایتھنز کا سب سے ذہین انسان اور ایک تخلیق کار مانا جاتا ہے۔

ہم کہہ چکے ہیں کہ دنیا اپنے انجام تک یونان کی تاریخ میں دل چسپی لیتی رہے گی اور وہ اس لیے بھی کہ یہیں تاریخِ عالم کے عظیم فاتح سکندرِ اعظم نے بھی تقریباً تین سال تک ارسطو سے تعلیم حاصل کی تھی۔ جب ارسطو کو ایتھنز میں سزائے موت سنائی گئی، تب سکندر وہاں سے چلا گیا تھا۔

محققین اور ماہرینِ‌ آثار قطعی طور پر یہ نہیں بتاسکے کہ اس عجوبۂ عالم شہر اور نادرِ روزگار ہستیوں کے جائے پیدائش یعنی ایتھنز کی بنیاد کب رکھی گئی، لیکن ایک اندازہ یہ ہے کہ پہلے ہزاریہ قبلِ مسیح میں ایتھنز یونانی تہذیب کا ابھرتا ہوا شہر تھا۔ بعد میں یہ دنیا کا ثقافتی و تعلیمی مرکز بنا۔

قدیم دور میں‌ بھی اس شہر نے جنگیں اور بڑے پیمانے پر قتل و غارت ضروری دیکھی تھی لیکن عیسوی زمانے میں اسے 13 ویں اور 15 ویں صدی میں زبردست نقصان پہنچا تھا، جب یونانی بازنطینیوں اور فرانسیسی و اطالوی صلیبیوں کے درمیان جنگ ہوئی۔ 1458ء میں سلطنتِ عثمانیہ کے سلطان محمد فاتح نے شہر کو فتح کر لیا تھا۔ 1821ء سے 1831ء کے دوران یونان نے جنگِ آزادی میں عثمانیوں کو کم زور کیا اور 1834ء میں ایتھنز کو آزاد یونان کا دارالحکومت قرار دے دیا گیا۔

اگلی چند دہائیوں میں جدید بنیادوں پر اس شہر کو تعمیر اور قدیم ورثہ کی حفاظت اور مرمت کا بھی اہتمام کیا گیا۔ 1896ء میں اس شہر نے پہلے گرمائی اولمپک گیمز کی میزبانی کی۔ شہر میں دوسری بڑی توسیع 1920ء کی دہائی میں اُس وقت ہوئی، جب ایشیائے کوچک کے یونانی مہاجرین کے لیے یہاں آبادیاں قائم کی گئیں۔ دوسری جنگِ عظیم کے دوران جرمنی نے ایتھنز پر قبضہ کر لیا تھا۔

آج کا ایتھنز جدید تعمیراتی ڈھانچے کے ساتھ عالمی معیار کے مطابق بنائی گئی عمارتوں‌ کا شہر ہے جس میں‌ یادگار و قدیم عمارتیں بھی سیاحوں کی توجہ کا مرکز ہیں۔

پاکستان اور بھارت کی طرح دہائیوں پہلے امریکا اور ہالی وڈ کی رومانٹک فلمیں شائقین کی توجہ کا مرکز تھیں‌ اور بڑے پردے پر زبردست کام یابیاں سمیٹنے والی اکثر فلموں کو کلاسیک کا درجہ حاصل ہے۔

ہالی ووڈ کی بعض رومانٹک فلموں سے متاثر ہو کر بعد میں ہندوستان اور پاکستان میں بھی فلمیں بنائی گئیں جو کام یاب ثابت ہوئیں۔ محبّت کے جذبے پر بنائی گئی ہالی وڈ کی فلموں میں بھی ہیرو، ہیروئن اور ایک ولن یا ظالم سماج کے ساتھ قربتیں، فاصلے، جذباتی کشمکش اور طربیہ یا المیہ انجام ہی دکھایا جاتا رہا ہے، لیکن وہاں جدید تکنیکی وسائل کے علاوہ پیشکش کا انداز اور کہانی پر توجہ ایسی فلموں کو زیادہ پُراثر اور جان دار بناتی ہیں۔

امریکا میں بھی ایک نسل جو اب بڑھاپے کی دہلیز پر قدم رکھ چکی ہے، وہ اسے فلموں کا سنہری دور تصوّر کرتی ہے اور اپنے زمانے کی فلموں کو شان دار یادگار قرار دیتی ہے۔ 1939ء کی فلم گون ود دی ونڈ (gone with the wind)، 1942ء میں بنائی گئی کاسا بلانکا (Casablanca)، 1957ء کی شاہ کار فلم افیئر ٹو ریمبر (an affair to remember) اور کئی دوسری فلموں کو شائقینِ سنیما نے زبردست پذیرائی اور سندِ قبولیت بخشی۔ یہاں ہم ہالی ووڈ کی چار رومانٹک فلموں کا تذکرہ کررہے ہیں جو اُس دور کی یادگار فلمیں‌ ہیں۔

’’سابرینا‘‘(Sabrina)
’’سابرینا‘‘(Sabrina) نے 1954ء میں ریلیز کے ساتھ ہی شائقین کو اپنی جانب متوجہ کرلیا تھا۔ اس فلم کے ہدایت کار بلی وائلڈر تھے اور وہی اس کے مصنّف بھی۔ یہ ان کے کیریئر کی ایک کام یاب فلم تھی۔ ہدایت کار کے کمالِ فن کے علاوہ اداکاروں کی پرفارمنس کو بھی کسی فلم کی کام یابی اور پذیرائی میں بنیادی دخل ہوتا ہے۔ اس فلم کی ہیروئن ہالی ووڈ کی مشہور اداکارہ آڈرے ہیپ برن تھیں۔

جذبۂ محبّت پر مبنی اس فلم میں ہیروئن یعنی سابرینا ایک لکھ پتی آدمی کے بیٹے کے پیار میں دیوانی ہوجاتی ہے۔ اس کا نام ڈیوڈ تھا اور اسے معلوم ہوتا ہے کہ ڈیوڈ کی منگنی ہوچکی ہے۔ یہ منگنی اس نے اپنے باپ کے اصرار پر ایک اور امیر کبیر آدمی کی بیٹی سے کی تھی۔ یہ ایک قسم کی کاروباری منگنی تھی اور دونوں کے والدین اس رشتے میں‌ اپنا اپنا مالی فائدہ اور کاروباری مفاد دیکھ رہے تھے۔ اس قسم کی فلمیں‌ پاک و ہند میں بھی بہت بنا کرتی تھیں۔ کبھی ایک غریب اور ایک مال دار گھرانا دکھایا جاتا تو کہیں دونوں خاندان نہایت امیر کبیر اور بااثر ہوتے تھے جس میں محبّت ہر رکاوٹ پار کرلیتی اور انجام طربیہ ہوتا اور کہیں نہایت درد ناک انجام دکھایا جاتا۔ فلم سابرینا میں محبّت کو اس وقت مشکل سے دوچار ہونا پڑتا ہے جب ڈیوڈ کے والدین اسی کے چھوٹے بھائی کو سابرینا کی توجہ ڈیوڈ کی طرف سے ہٹا کر اپنی طرف مبذول کرانے کے لیے اس سے مراسم بڑھانے کو بھیجتے ہیں۔ یہ موضوع اس وقت بھی بہت عام بلکہ پائمال بھی تھا، لیکن اسکرین پلے بہت شان دار طریقے سے لکھا گیا تھا، جب کہ ہدایت کاری اور اداکاروں کی پرفارمنس نے اسے خاص بنا دیا تھا۔ یہ اپنے وقت کی ایک شان دار رومانوی فلم تھی۔

’’لو افیئر‘‘
1939ء میں فلم ’’لو افیئر‘‘ بڑے پردے پر سجائی گی تھی جو بہت خوب صورت اور ایک پُرتأثر فلم تھی۔ یہ اس لحاظ سے بھی ایک قابلِ‌ ذکر فلم ہے کیوں کہ اس کی کہانی کو کئی بار فلمایا گیا اور نئے انداز سے پیش کر کے شائقین کی توجہ حاصل کی گئی۔ اس رومانٹک فلم کی کہانی نے نئے ٹائٹل کے ساتھ ہر بار شائقین کو متأثر کیا اور یہ ان کے دلوں میں اُتر گئی۔ مون کے نام معروف اداکار و ہدایت کار وارن بیٹی نے اس فلم کو بڑے پردے پر پیش کیا تھا۔ اس میں‌ فرانس کے مشہور اداکار چارلس بوائر اور آئرین ڈو کو انھوں نے بطور ہیرو اور ہیروئن آزمایا تھا۔

اس فلم کی کہانی دو اجنبیوں کی اتفاقیہ ملاقات سے شروع ہوتی ہے جو رفتہ رفتہ ایک دوسرے کی محبت میں گرفتار ہوجاتے ہیں لیکن اس ملاقات سے پہلے وہ دونوں ہی منگنی کر چکے تھے۔ فلم دیکھنے سے معلوم ہوتا ہے کہ مغرب میں‌ بھی لڑکا اور لڑکی کے مابین نسبت ٹھہر جانے یا شادی طے ہوجانے کو اہمیت دی جاتی تھی۔ اور اب یہ منگنی ان کے لیے مسئلہ بن گئی تھی۔ وہ دونوں ایک بحری جہاز میں سفر کے دوران اس محبّت میں‌ گرفتار ہوئے تھے۔

لڑکے اور لڑکی کے لیے ضروری تھا کہ وہ اپنی محبّت کو شادی کے تعلق میں بدلنے کے لیے اپنی نسبت کو ختم کرنے یا قائم رکھنے کا فیصلہ کریں۔ وہ ایک منصوبہ بناتے ہیں‌ اور آپس میں طے کرتے ہیں‌ کہ سفر ختم ہونے کے چھے ماہ بعد نیویارک کی ایمپائر اسٹیٹ بلڈنگ میں ملیں گے۔ اگر اس وقت تک ان کے دلوں میں ایک دوسرے کی محبّت اسی طرح قائم رہی تو وہ اپنی اپنی منگنی توڑنے کا اعلان کر دیں گے اور آپس میں‌ شادی کر لیں گے۔ لیکن فلم میں دکھایا گیا ہے کہ کس طرح اتفاقات اور حادثات کے سبب ان کا یہ منصوبہ ادھورا رہ جاتا ہے۔ اس فلم نے شائقین کو بہت محظوظ کیا اور کام یاب فلم ثابت ہوئی۔

’’این افیئر ٹو ریمببر‘‘
اسی کہانی کو ’’این افیئر ٹو ریمببر‘‘ میں بھی پیش کیا گیا تھا جو 1957ء میں نمائش کے لیے پیش کی گئی، اس میں مرکزی کردار کیری گرانٹ اور ڈیبوراکار نے نبھائے تھے۔ اس میں‌ بھی وہی بحری جہاز اور منگنی شدہ مسافر لڑکا لڑکی کو دکھایا گیا ہے جو نیویارک کے لیے روانہ ہوئے تھے۔ وہاں وہ اپنے اپنے منگیتروں سے ملنے جارہے تھے۔ لیکن جہاز میں ہونے والی ان کی یہ ملاقات انھیں ایک دوسرے کی محبّت میں باندھ دیتی ہے اور وہ یہ وعدہ کرتے ہیں کہ ایک مقرر وقت کے بعد وہ طے شدہ جگہ ملاقات کریں گے۔ اگر انھیں ایک دوسرے کی محبّت کی شدت محسوس ہوگی تو وہ منگنیاں توڑ کر آپس میں شادی کر لیں گے۔ فلم آگے بڑھتی ہے اور وہ وقت آتا ہے جب ہیرو یعنی کیری گرانٹ طے شدہ وقت پر اس جگہ پہنچ جاتا ہے، لیکن رات گئے تک انتظار کرنے کے باوجود لڑکی وہاں نہیں‌ آتی اور وہ مایوس ہو کر لوٹ جاتا ہے۔

وہ سمجھتا ہے کہ لڑکی کی محبّت سچّی نہیں تھی۔ اس نے اپنا قول و قرار فراموش کردیا ہے۔ کچھ عرصے بعد اچانک ان دونوں کا ایک جگہ آمنا سامنا ہوجاتا ہے۔ اس موقع پر ہیرو سرد مہری دکھاتا ہے اور لڑکی کو بے وفائی کا طعنہ دیتا ہے۔ بعد میں اس پر کُھلتا ہے کہ ہیروئن ایک حادثے کا شکار ہو کر ٹانگوں سے معذور ہوچکی تھی اور اسی لیے مقررہ وقت پر اس کے پاس نہیں‌ آسکی تھی۔ لیکن وہ اس سے اسی طرح‌ محبّت کرتی تھی جس کا اقرار اس نے اوّلین ملاقات کے بعد کیا تھا۔

’’لو اسٹوری‘‘
ستّر کی دہائی میں امریکا میں‌ بننے والی فلم ’’لو اسٹوری‘‘ کی کہانی ایک ناول پر مبنی تھی۔ اس وقت ہدایت کار آرتھر ہلر نے مرکزی کردار کے لیے نئے چہروں کو آزمایا تھا۔ کہانی میں نو عمر لڑکا اور لڑکی کو کالج فیلو دکھایا ہے۔ ہیروئن کا تعلق ایک غریب گھرانے سے جب کہ ہیرو کا باپ انتہائی دولت مند اور ایک مغرور شخص بھی ہے۔ وہ اپنے بیٹے کے لیے ایک غریب لڑکی کو قبول نہیں‌ کرسکتا تھا، تب لڑکا اپنے باپ کی مرضی کے خلاف شادی کے لیے لڑکی کو لے کر پادری کی تلاش میں نکلتا ہے۔ اس شادی کی صورت میں اسے باپ کی تمام دولت سے بھی محروم ہونا پڑتا لیکن اسے اس بات کی پروا نہ تھی۔ پادری کے پاس جاتے ہوئے کار کو حادثہ پیش آتا ہے۔ زخمی ہیرو کئی دن تک بے ہوش رہتا ہے جب کہ ہیروئن کا چہرہ جھلس کر مسخ ہو چلا تھا۔

لڑکا دولت مند باپ کی اکلوتی اولاد تھا اور حادثے کی اطلاع پاکر باپ کا دل پیسیج جاتا ہے۔ وہ اس کا علاج کروانے کے ساتھ اسپتال والوں کو رقم کا لالچ دے کر جھوٹ بولنے پر مجبور کردیتا ہے، ہوش آنے پر لڑکے کو بتایا جاتا ہے کہ لڑکی حادثے میں ہلاک ہو چکی ہے۔ ہیرو کا دل کسی طرح یہ ماننے کو تیار نہیں ہوتا۔ دوسری طرف دولت مند باپ اس لڑکی کو دھمکیوں اور لالچ دے کر اپنے بیٹے کی زندگی سے نکل جانے پر آمادہ کر لیتا ہے اور کافی روپیہ خرچ کرکے اس کے چہرے کی پلاسٹک سرجری بھی کروا دیتا ہے۔ یہ ایک طویل مگر سسپنس سے بھرپور کہانی ہے جس کے آخر میں لڑکا اپنی محبّت کو پا لیتا ہے۔

اردو میں آپ بیتیوں، سوانح، شخصی خاکوں اور رفقا یا ہم عصر اہلِ قلم کی یادداشتوں پر مبنی کتب میں ہمیں‌ مشاہیرِ ادب اور معروف ہستیوں کی زندگی اور ان کی شخصیت سے متعلق اکثر نہایت پُرلطف اور یادگار واقعات بھی پڑھنے کو ملتے ہیں۔ یہ شاعرِ‌ مشرق اور ان کا قرب پانے والے سرسیّد احمد خان کے پوتے سر راس مسعود سے متعلق ایسا ہی واقعہ ہے۔

ڈاکٹر صاحب کی شہرہ آفاق کتاب ’’بالِ جبریل‘‘ جب منظر عام پر آئی، تو انہوں نے سر راس مسعود کو ایک جلد پیش کی اور کتاب پر اپنے دستخط ثبت فرما دیے۔

بیگم مسعود اس وقت موجود تھیں، انہوں نے مسکراتے ہوئے کہا۔ ’’ڈاکٹر صاحب! آپ کا کلام ان سے بہتر میں سمجھتی ہوں اور کتاب آپ ان کو عنایت فرما رہے ہیں۔‘‘

ڈاکٹر صاحب اس فقرے سے بہت محظوظ ہوئے اور دونوں کو مخاطب کر کے کہا کہ میں اپنا شعر سناتا ہوں، تم میں سے جو کوئی اس کی زیادہ صحیح اور بہتر تشریح کرے گا وہی اس کتاب کا مستحق قرار پائے گا، اس کے بعد ڈاکٹر صاحب نے اپنا یہ شعر پڑھا؎

یہ مصرع لکھ دیا، کس شوخ نے محرابِ مسجد پر
یہ ناداں گِر گئے سجدے میں جب وقتِ قیام آیا

سر راس مسعود اور ان کی بیگم صاحبہ دونوں نے اپنے اپنے الفاظ میں اس شعر کا مفہوم بیان کیا، لیکن وقت کی بات کہ بیگم راس مسعود کی شرح و ترجمانی زیادہ بہتر اور شاعر کے مافی الضمیر سے قریب تر نکلی۔

چناں چہ ڈاکٹر صاحب نے ’’بالِ جبریل‘‘ کے سرورق پر راس مسعود کا لکھا ہوا نام کاٹ کر ’’بیگم راس مسعود‘‘ لکھ دیا اور کتاب ان کو دے دی۔

(شاعرِ مشرق سے چند ملاقاتوں کی یادداشت)

افسانے کا مستقبل تاریک ہے، اس لیے کہ دنیا میں درخت کم ہوتے چلے جا رہے ہیں اور آدمیوں کی بھیڑ بڑھتی چلی جا رہی ہے۔ ایسی دنیا میں جہاں آدمی ہی آدمی ہوں صحافت پیدا ہو سکتی ہے، شعر اور افسانہ پیدا نہیں ہو سکتے۔

صحافت اور خطابت خالص انسانی دنیا کے ذرائع اظہار ہیں۔ شعر اور افسانہ خالص انسانی ذریعۂ اظہار نہیں۔ انہوں نے انسان اور غیر انسان کے باہمی میل ملاپ سے جنم لیا ہے۔ افسانے نے اس زمانے میں جنم لیا تھا، جب اس دھرتی پر درخت بہت اور آدمی کم تھے۔ رات پڑتی تو الاؤ کے گرد مٹھی بھر آدمی، آگے اندھیرا ہی اندھیرا اور درخت ہی درخت۔ فطرت کی بنائی ہوئی چیز کا بدل فطرت کی بنائی ہوئی چیز ہی ہو سکتی ہے۔ جنگل نہیں ہے تو صحرا ہوا اور صحرا نہیں ہے تو اونچے پہاڑ ہوں، کسی پر شور سمندر کا ساحل ہو۔ گیان دھیان، تخیّل کی تربیت، تخلیقی عمل برگد کی چھاؤں میں بھی ہو سکتا ہے، پہاڑوں کی گپھاؤں میں بھی ہو سکتا ہے، صحرا کی وسعتوں میں بھی ہو سکتا ہے۔ مگر کارخانے کی دیوار کے سائے میں نہیں ہو سکتا اور فلک بوس عمارتیں فلک بوس پہاڑوں اور گھنے اونچے درختوں کا بدل نہیں بن سکتیں۔

فلک بوس عمارتوں، شور مچاتے کارخانوں، قطار اندر قطار کوارٹروں اور فلیٹوں سے اب مفر نہیں ہے۔ ارتگا جوزے نے آج سے چالیس برس پہلے انسانی بھیڑ کا جو نقشہ یورپ کے سیاق و سباق میں کھینچا تھا، اب وہ ہماری بستیوں میں بھی صنعتی عہد کی پرچھائیاں پڑنے کے ساتھ اُبھر رہا ہے۔ ٹریفک اتنا ہے کہ درخت کاٹ کاٹ کر سڑکیں پھیلائی جا رہی ہیں۔ بسیں آدمیوں سے بھری ہوتی ہیں، رکشاؤں اور ٹیکسیوں کے شور سے کان پڑی آواز سنائی نہیں دیتی۔ مگر سواری کا پھر بھی توڑا ہے۔ رہائش کا مسئلہ بھی اسی قدر سنگین ہے۔ مکان کم ہیں، مکین بہت ہیں۔ نئی آبادیاں بسائی جا رہی ہیں۔ جہاں کل جنگل تھے آج وہاں کوارٹروں اور فلیٹوں کا جنگل پھیلا ہوا ہے، اس کے باوجود مکان کا حصول ایک مسئلہ ہے۔ خالی مکان ماضی کا افسانہ ہیں، ایسے مکان جو برسوں خالی پڑے رہتے تھے حتیٰ کہ ان میں پڑے ہوئے تالوں پر زنگ جم جاتی تھی، اب کسی شہر میں نظر نہیں آتے۔ ایسے مکان پُر اسرار بن کر تخیل کی نشوو نما کرتے تھے اور قصہ کہانی کو جنم دیتے تھے۔ تخیل کی نشو و نما کچھ خالی پُر اسرار مکانوں کے ذمے تھی، کچھ گھنے پرانے درختوں کے ذمے، کچھ پرندوں اور دوسرے جانوروں کے ذمے تھی، یہ سب معاشرے کے فعال کردار تھے۔

انسان دوستی برحق مگر تلسی، کبیر اور نظیر کی انسان دوستی خالی خولی انسانی حوالے سے نہیں تھی۔ وہ انسان اور غیرانسان کے اس پراسرار رشتے کے حوالے سے تھی جو ان زمانوں میں پروان چڑھنے والے معاشروں کی بنیاد تھا۔ مگر اب ہم اپنی فلک بوس عمارتوں، شور مچاتے کارخانوں اور بھاری بھرکم مشینوں کے ساتھ ایک نئے عہدِ بربریت میں داخل ہو رہے ہیں۔ اس تہذیب نما بربریت کی بدولت تجربے کا منطقہ سکڑتا جا رہا ہے اور اطلاعات و معلومات کا جنگل پھیلتا جا رہا ہے۔ آدمی کا جنگل سے رشتہ ٹوٹ رہا ہے اور آدمی جنگلی بنتا جا رہا ہے۔ اب ’بیتال پچیسی، نہیں لکھی جا سکتی۔ کیوں؟ اس لیے کہ بیتال نے یہ کہا تھا کہ ”راہ اچھی باتوں کی چرچا میں کٹے تو اچھا ہے۔ سو اے راجا جو میں کتھا کہتا ہوں، اسے سن۔ جو تو رستے میں بولے گا تو میں الٹا پھر جاؤں گا۔“ مگر اب ہم بولنے بہت لگے ہیں۔ تقریریں، اخباری بیانات، مذاکرے، مباحثے اور ہماری راہیں بہت پُرشور ہیں۔ ان راہوں پر چلتے ہوئے انسان اور غیر انسان کے درمیان مکالمہ ممکن نہیں رہا۔

مسلسل شور کے بیچ ہماری سماعت میں فرق آ گیا ہے۔ کچھ آوازیں تو اب ہم سن ہی نہیں سکتے۔

(اردو کے ممتاز فکشن نگار انتظار حسین کے مضمون سے اقتباس)

یہ تذکرہ ہے دو مشہور و معروف شخصیات کے مابین خط کتابت کا جن کا زمانہ تقسیمِ ہند سے قبل کا ہے۔ ایک تھے سر راس مسعود اور دوسرے جوش ملیح آبادی۔

قابل، باصلاحیت شخصیات، علمی و ادبی کام کرنے والوں کی قدر اور عزّت افزائی کے ساتھ اس زمانے میں اخلاق و مروّت اور لوگوں‌ میں مدد اور تعاون کا جذبہ بہت تھا۔ اس دور کی یاد تازہ کرتا یہ پارہ مشفق خواجہ کی منتخب تحریروں پر مشتمل کتاب سن تو سہی سے لیا گیا ہے۔

سَر راس مسعود کو ہندوستان میں ایک ماہر مدرّس اور منتظم کے طور پر پہچانا جاتا ہے۔ وہ سرسیّد احمد خان کے پوتے تھے۔ اس زمانے میں علّامہ اقبال کے دوستوں اور احباب کا حلقہ خاصا وسیع تھا، لیکن جن لوگوں سے اُنھیں ایک گہرا اور دلی تعلقِ خاطر تھا، ان میں سَر راس مسعود کا نام سرِ فہرست ہے۔ وہ نہایت قابل، فکر و نظریہ اور علم و فن کے رسیا تھے۔ دوسری طرف شاعرِ انقلاب کہلانے والے جوش صاحب تھے۔

مشفق خواجہ لکھتے ہیں، "یہ قاعدہ تھا کہ ان(سر راس مسعود) کے نام شاعروں ادیبوں کے جو خطوط آتے تھے، وہ انہیں محفوظ رکھتے تھے۔ جواب میں جو کچھ لکھتے تھے اس کی نقل بھی اپنے پاس رکھ لیتے تھے۔ راس مسعود کے ذاتی کاغذات کا بڑا حصہ جناب جلیل قدوائی کے پاس محفوظ ہے۔ ہماری درخواست پر قدوائی صاحب نے جوش صاحب کے اصل خطوط اور ان کے جوابات سے استفادہ کرنے کی اجازت دی، جس کے لیے ہم ان کے شکر گزار ہیں۔

اس مراسلت کا پس منظر یہ ہے کہ حیدرآباد دکن سے اخراج کے بعد جوش صاحب کے مالی حالات اچھے نہ رہے۔ سر راس مسعود اس زمانے میں ریاست بھوپال میں تھے، جوش صاحب نے انہیں مالی امداد کے لیے خط لکھا۔ راس مسعود نے اس خط کا حوصلہ افزا جواب دیا۔ جوش صاحب نے "جواب الجواب” 15 اکتوبر 1935ء کو لکھا، جب وہ مختصر قیام کے لیے ریاست دھول پور میں تشریف رکھتے تھے۔ اس خط میں جوش صاحب فرماتے ہیں:

"آپ کے مکتوبِ گرامی نے میرے دل سے وہی سلوک کیا ہے، جو مرہم زخم سے اور ابرِ برشگال پیاسی زمین سے کرتا ہے۔ نتیجہ خواہ کچھ ہو کہ نہ ہو، آپ میری دست گیری کی سعی میں کام یاب ہوں یا ناکام، مگر یہ کیا کم ہے کہ آپ نے میری بات تو پوچھی، امداد پر آمادگی تو ظاہر ہوئی، مشفقانہ لہجے میں خط کا جواب تو دیا۔ کیا میرے تاحیات احسان مند رہنے کے لیے یہ کافی نہیں ہے؟ اپنی حالت کیا عرض کروں، اگر تنہا ہوتا تو بڑی سے بڑی مصیبت کا حقارت آمیز تبسم سے خیر مقدم کرتا اور ہر عظیم سے عظیم بلا سے آنکھوں میں آنکھیں ڈال کر مضحکہ اڑاتا، مگر کیا کروں مجبور ہوں اہل و عیال سے۔ باپ نے، جب میں نو برس کا تھا، میرا نکاح کر دیا تھا۔ انہیں کیا معلوم تھا کہ ان کی آنکھیں بند ہوتے ہی تمام دولت و ثروت ان کے گھر سے چلی جائے گی۔ مجھے آج تک اپنے سہرے کی لڑیوں کی خوشبو یاد ہے، کتنی دلفریب تھی، مگر آج وہی ذریعہ بنی ہوئی ہے میری پریشاں خاطریوں کا۔

میرے محترم! مصیبت کبھی تنہا نہیں آتی۔ آبائی جائیداد تو پہلے ہی تلف ہو چکی تھی، اس کے بعد جیسا کہ آپ کو معلوم ہے، حیدرآباد میں جگہ مل گئی تھی، سو وہ بھی سازشوں کی نذر ہو گئی۔ اب میں ہوں اور بے کسی، میرے مریض اہل و عیال ہیں اور کسمپرسی۔ دھول پور میں اپنے ماموں کے وہاں پڑا ہوا ہوں۔ ماموں سوتیلے نہیں حقیقی ہیں۔ لیکن جس طرح جی رہا ہوں، اس سے موت بہتر ہے۔ واضح رہے کہ ماموں جان کی آمدنی ڈھائی ہزار روپے ماہوار ہے۔ کیا آ پ کو عبرت نہیں ہوگی؟ میں آپ کو زیادہ زحمت دینا نہیں چاہتا، صرف اس قدر درخواست کرتا ہوں کہ بھوپال وغیرہ سے میرے رسالے کے واسطے اتنی مدد کرا دیجیے کہ میں فراغت سے زندگی بسر کر سکوں۔ رسالے کے اخراجات پانچ سو روپے ماہوار سے کم نہیں ہیں۔ سر لیاقت حیات خان وزیر پٹیالہ نے پٹیالے سے ایک مستقل ماہانہ امداد کا وعدہ فرما لیا ہے۔ پنڈت کیلاش نرائن صاحب ہاکسر بھی گوالیار سے امداد دینے کا فیصلہ کر چکے ہیں۔ اگر بھوپال یا دو تین جگہیں اور ملا کر آپ ڈھائی سو روپے ماہوار کی مستقل ادبی امداد کا بندوبست کر دیں تو میرے مصائب کا خاتمہ ہو سکتا ہے۔ کیا آپ ایسا کرسکیں گے؟

میں ایک بار اور عرض کروں کہ میرے تمام عمر احسان مند رہنے کے واسطے آپ کی پرسش ہی بہت کافی ہے۔ کیا ایک محبت کی نگاہ، تمام دنیا کے خزانوں پر بھاری نہیں، اور کیا ایک مخلصانہ تبسم، تمام عالم کے زر و گوہر سے زیادہ گراں قیمت نہیں؟ خدا کرے آپ اچھے ہوں، میں اور میرے متعلقین میں سے کوئی بھی اچھا نہیں۔”

معتوبِ قدرت
جوش۔

سر راس مسعود نے 17 اکتوبر 1935ء کو اس خط کا جواب لکھا اور ہر ممکن امداد کا وعدہ کیا تھا۔

آخری مغل دور میں‌ انتظامی اداروں کی کم زوری اور امن و امان کی خراب صورتِ حال کے ساتھ جہاں ہندوستانی سماج میں انتشار اور ابتری بڑھی، وہیں عوام کو غربت اور بدحالی کا سامنا بھی تھا۔

ان حالات میں ایک طرف لوٹ مار، چوری چکاری کے عام واقعات میں اضافہ ہوا، اور دوسری طرف بازاروں، عبادت گاہوں اور مختلف پُرہجوم مقامات پر لوگوں کی جیبیں‌ بھی خالی ہونے لگی تھیں۔ انگریزوں نے جب مکمل طور پر شہروں کا انتظام سنبھالا تو اس وقت کئی جیب کترے بھی دہلی اور گرد و نواح میں سرگرم تھے۔ ان میں بعض نہایت چالاک، تیز طرّار اور جرم کی دنیا میں ‘کاری گر’ مشہور ہوئے۔ مسلسل مشق نے انھیں گویا ‘ہنرمند’ بنا دیا تھا۔

یہاں ہم وہ دل چسپ واقعہ نقل کررہے ہیں جس سے اس دور کے ایک جیب کترے کی ذہانت، چالاکی اور اس کی مشّاقی کا اندازہ لگایا جاسکتا ہے۔

"دہلی میں ایک جیب کترے تھے جن کا انگوٹھا قینچی کے پھل کی طرح دو دھارا تھا اور کلمے کی انگلی پتھر پر گھس گھس کر شیشے کی مانند سخت کر لی تھی۔ بس جہاں ان کی انگلی لگ جاتی تو قینچی کو پیچھے چھوڑ دیتی تھی۔”

"ایک صاحب کوئی باہر کے، خواجہ حسن نظامی کے ہاں آئے اور شکایت کی۔ ’’دہلی کے جیب کترے کی بڑی دھوم سنی تھی۔ آج ہمیں دہلی کے بازاروں میں پھرتے چار دن ہو گئے ہیں لیکن کسی کو مجال نہیں ہوئی کہ ہماری جیب کی طرف آنکھ اٹھا کر بھی دیکھ لے۔‘‘….”

"خواجہ صاحب نے اس چٹکی باز کو بلوایا اور ان صاحب سے اس چٹکی باز کا آمنا سامنا کرایا۔ اس ہنرمند نے مسکرا کر کہا۔”

’’خواجہ صاحب! میرے شاگردوں نے ان صاحب کا حلیہ بتایا تھا۔ چار دن سے انگرکھے کی اندر کی جیب میں پیتل کی آٹھ ماشیاں (آٹھ ماشا وزن کے سکّے) ڈالے گھوم رہے ہیں اور وہ بھی گنتی کے چار۔ اب آپ ہی بتائیے کہ کون جعلی سکّوں پر اپنی نیّت خراب کرے گا۔‘‘

یہ قصّہ اردو کے ممتاز ادیب، خاکہ نگار اور براڈ کاسٹر اخلاق احمد دہلوی کی مشہور تصنیف ’’پھر وہی بیان اپنا‘‘ میں مندرج ہے۔

ایک روز فیض صاحب نے صبح صبح مجھے آن پکڑا۔

کہا: ” ایک کام سے آیا ہوں۔ ایک تو یہ جاننا چاہتا ہوں کہ یورپ میں آج کل آرٹ کے کیا رجحانات ہیں۔ اور آرٹ پیپر کیا چیز ہوتی ہے؟ دوسرے میں واٹر کلر اور آئل پینٹنگ کا فرق معلوم کرنا چاہتا ہوں۔ ٹھمری اور دادرا کا فرق بھی چند لفظوں میں بیان کر دیں تو اچھا ہے۔”

میں نے چائے پیتے پیتے سب کچھ عرض کر دیا۔ اٹھتے اٹھتے پوچھنے لگے۔ "ایک اور سوال ہے۔ غالب کس زمانے کا شاعر تھا اور کس زبان میں لکھتا تھا؟” وہ بھی میں نے بتایا۔ اس کے کئی ماہ بعد تک ملاقات نہ ہوئی۔ ہاں اخبار میں پڑھا کہ لاہور میں آرٹ کونسل کے ڈائریکٹر ہوگئے ہیں۔ غالباً اس نوکری کے انٹرویو میں اس قسم کے سوال پوچھے جاتے ہوں گے۔

(ممتاز مزاح نگار، شاعر اور ادیب ابنِ انشاء کے قلم سے)