ARYNews.tv | Urdu – Har Lamha Bakhabar

Category: عالمی خبریں

International News عالمی خبریں

دنیا بھر سے اہم خبریں اردو زبان میں پڑھنے کے لئے یہاں کلک کریں

  • برطانیہ میں پولیس نے فلسطین ایکشن گروپ کی حمایت پر 5 افراد کو گرفتار کرلیا

    برطانیہ میں پولیس نے فلسطین ایکشن گروپ کی حمایت پر 5 افراد کو گرفتار کرلیا

    برطانیہ میں پولیس نے فلسطین ایکشن گروپ کی حمایت کرنے پر 5 افراد کو گرفتار کرلیا، گروپ خود کو غیرمتتشدد فلسطینی گروپ قرار دیتا ہے۔

    غیرملکی میڈیا رپورٹس کے مطابق برطانوی پولیس نے گرفتار افراد کی تفصیلات بتاتے ہوئے کہا کہ پانچوں گرفتار افراد ڈیفینڈ آور جیوریز گروپ کے اہم ترجمان ہیں، انھیں فلسطین ایکشن گروپ کی حمایت پر حراست میں لیا گیا ہے۔

    ڈیفینڈ آور جیوریز گروپ نے حکومت سے فلسطین ایکشن پرعائد پابندی ختم کرنے کا مطالبہ کیا تھا، جس کے بعد پولیس کی جانب سے یہ اقدام سانے آیا ہے۔

    یہ بھی پڑھیں: برطانیہ فلسطین ایکشن گروپ کو دہشت گرد تنظیم قرار نہ دے، یو این ماہرین نے متنبہ کر دیا

    خبرایجنسی نے بتایا کہ فلسطین ایکشن گرقپ خود کو ایک غیرمتشدد اور فلسطین کا حامی گروپ قرار دیتا ہے، برطانوی حکومت نے فلسطین ایکشن کو دہشت گرد تنظیموں کی فہرست میں شامل کیا ہے۔

    پابندی کے بعد فلسطین ایکشن گروپ کی حمایت کو فوجداری جرم قرار دیا گیا ہے، جولائی سے اب تک فلسطین ایکشن کی حمایت پر 700 سے زائد افراد گرفتار ہوچکے ہیں۔

    https://urdu.arynews.tv/uk-gaza-aid-31-aug-2025/

  • سعودی عرب اور عراق نے بھارت کو خام تیل کی فروخت بند کر دی

    سعودی عرب اور عراق نے بھارت کو خام تیل کی فروخت بند کر دی

    سفارتی تنہائی اور معاشی مشکلات میں مبتلا بھارت کو ایک اور بڑا دھچکا لگ گیا۔

    بین الاقوامی میڈیا رپورٹس کے مطابق سعودی عرب اور عراق نے بھارتی آئل ریفائنری کو خام تیل کی فروخت بند کر دی۔

    سعودی آرامکو نے بھارت کی نیارا انرجی کو تیل کی فراہمی روک دی ہے جب کہ عراقی کمپنی سومو نے بھی بھارت کی نیارا انرجی کو تیل دینا بند کر دیا ہے۔

    یورپ کی روسی حمایتی کمپنیوں پر پابندی کے بعد بھارت کو تیل فراہمی بند کی گئی ہے۔ بھارتی کمپنی نیارا اب صرف روس سے تیل خریداری پر انحصار کر رہی ہے۔

    روس سے تیل خریدنے پر امریکا نے سزا کے طور پر بھارت پر 50 فیصد ٹیرف عائد کیا ہے۔ امریکا کی جانب سے اضافی ٹیرف روس یوکرین جنگ میں بھارت کی جانب سے روس کی حمایت کے جواب میں لگایا گیا ہے۔

    امریکا کی جانب سے ٹیرف کے اطلاق کے بعد بھارتی اسٹاک مارکیٹوں میں بھونچال آگیا ہے اور بھارت کی کرنسی بھی گرگئی۔

    امریکی ہوم لینڈ سیکیورٹی کی جانب سے جاری نوٹیفکیشن کے مطابق بھارت سے درآمد ہونے والی یا کسٹم ویئر ہاؤس سے نکلنے والی تمام مصنوعات پر نیا ٹیرف لاگو ہوگیا ہے۔

    جون 2025 میں بھارت کی روسی تیل درآمدات میں 17.4 فیصد ماہانہ اضافہ ریکارڈ کیا گیا جس میں بھارت نے روس سے 20 لاکھ بیرل یومیہ تیل درآمد کیا۔

    2025کی پہلی ششماہی میں بھارت کی نجی ریفائنریز نے 60 فیصد روسی تیل خریدا ہے۔ بعض بھارتی نجی ریفائنریز نے روس کے ساتھ سالانہ معاہدے کر رکھے ہیں۔

    بھارت نے 3 سال میں روس سے 102 ارب ڈالر کا خام تیل خریدا اور پھر سستا تیل خرید کر 12 سے 15 ارب ڈالر کی بچت کی۔

    بھارت نے درآمدی روسی تیل سے عالمی منڈی میں مصنوعات برآمد کیں۔ بھارت نے روسی تیل کی مصنوعات سے 144 ارب ڈالر کا ریونیو حاصل کیا۔

    بھارت نے سستے روسی تیل اور ایکسپورٹ سے 52 ارب ڈالر کا خالص منافع حاصل کیا۔

  • یواےای: اس حرکت پر 10 ہزار درہم تک جرمانہ ہوگا

    یواےای: اس حرکت پر 10 ہزار درہم تک جرمانہ ہوگا

    متحدہ عرب امارات میں جے واک (مخصوص جگہ کے بغیر) سڑک پار کرنے پر 10,000 درہم تک جرمانہ ہو سکتا ہے۔

    جنوری 2024 میں، دبئی میں تقریباً 44,000 افراد جے واک کرتے ہوئے پکڑے گئے اور بھاگنے کے واقعات میں آٹھ افراد اپنی جان سے ہاتھ دھو بیٹھے۔

    اگرچہ مخصوص جگہوں سے باہر سڑکیں عبور کرنا تیز اور آسان معلوم ہو سکتا ہے لیکن اس کے نتیجے میں شدید، اور بعض اوقات جان لیوا، حادثات ہو سکتے ہیں۔

    اس مسئلے کو حل کرنے کے لیے، متحدہ عرب امارات نے ایک نیا ٹریفک قانون متعارف کرایا ہے جو 29 مارچ سے نافذ العمل ہے، جس کا مقصد جے واکنگ کو روکنے کے لیے سخت ضوابط ہیں۔

    تازہ ترین قانون کے تحت لوگوں پر زیادہ جرمانے، ممکنہ جیل کی سزائیں ہو سکتی ہیں۔

    https://urdu.arynews.tv/dh1000-fine-in-uae/

    موجودہ قانون کے تحت، پیدل چلنے والوں کو جو غیر متعین جگہوں سے سڑکیں عبور کرتے ہیں 400 درہم جرمانہ کیا جاتا ہے تاہم، ٹریفک کے ضوابط پر 2024 کے نئے نافذ کردہ وفاقی حکم نامے قانون نمبر 14 نے مزید سخت سزائیں متعارف کرائی ہیں، خاص طور پر ایسے معاملات میں جہاں جے واکنگ کے نتیجے میں ٹریفک حادثہ ہوتا ہے۔

    جے واکنگ کے بڑھتے ہوئے واقعات کو کم کرنے کی کوشش میں، حکومت نے جرمانے میں خاطر خواہ اضافہ کیا ہے:

    اگر کوئی شخص کسی نامعلوم مقام سے سڑک کراس کرتا ہے اور ٹریفک حادثے کا سبب بنتا ہے تو اسے قید اور درہم 5,000 سے 10,000 درہم تک جرمانے کا سامنا کرنا پڑ سکتا ہے۔

    اس طرح کے تیز رفتار علاقوں میں، خلاف ورزی کرنے والوں کو کم از کم تین ماہ کی قید اور کم از کم درہم 10,000 جرمانے یا دونوں کا سامنا کرنا پڑ سکتا ہے۔

  • چین میں ویزا فری انٹری سے متعلق اہم خبر

    چین میں ویزا فری انٹری سے متعلق اہم خبر

    چین نے روسی شہریوں کو آزمائشی بنیادوں پر ویزا فری داخلے کی اجازت دینے کا اعلان کیا ہے۔

    بین الاقوامی خبر رساں ادارے کی رپورٹ کے مطابق چینی وزارتِ خارجہ کا اس حوالے سے کہنا ہے کہ یہ سہولت 15 ستمبر سے عام پاسپورٹ رکھنے والے روسی شہریوں کے لیے مؤثر ہوگی۔

    چینی وزارتِ خارجہ کا کہنا ہے کہ ویزا فری سہولت ایک سال کے لیے دی جا رہی ہے جس کے تحت روسی شہری زیادہ سے زیادہ 30 دن تک چین میں قیام کر سکیں گے۔

    اس سے قبل چین نے سیاحت کو فروغ دینے کیلیے 70 سے زائد ممالک کے شہریوں کیلیے ویزا فری انٹری کا اعلان کیا تھا۔

    چین میں ویزا پالیسی میں نرمی کے بعد دنیا بھر سے سیاح ملک میں سیاحتی مقامات کا رُخ کر رہے ہیں۔

    نئی پالیسی کے مطابق 74 ممالک کے شہری بغیر ویزا چین میں 30 دن تک قیام کر سکتے ہیں۔ دراصل چینی حکومت سیاحت، معیشت اور اپنی طاقت کو فروغ دینے کیلیے ویزا فری انٹری کو مسلسل بڑھا رہی ہے۔

    ملک کی نیشنل امیگریشن ایڈمنسٹریشن کے مطابق 2024 میں 20 ملین سے زائد غیر ملکی سیاح بغیر ویزا داخل ہوئے۔

    کم جونگ اُن بذریعہ ٹرین چین روانہ ہوگئے

    اگرچہ زیادہ تر سیاحتی مقامات اب بھی غیر ملکیوں سیاحوں سے بھرے ہوئے ہیں لیکن ٹریول کمپنیاں اور ٹور گائیڈ اب موسم گرما کی تعطیلات کیلیے چین آنے والوں کی توقع میں بڑی آمد کیلیے تیار ہیں۔

    واضح رہے کہ دسمبر 2023 میں چین نے فرانس، جرمنی، اٹلی، ہالینڈ، اسپین اور ملائیشیا کے شہریوں کیلیے ویزا فری داخلے کا اعلان کیا تھا، لیکن اس کے بعد سے تقریباً پورا یورپ نئی ویزا پالیسی میں شامل ہو چکا ہے۔

  • کم جونگ اُن بذریعہ ٹرین چین روانہ ہوگئے

    کم جونگ اُن بذریعہ ٹرین چین روانہ ہوگئے

    شمالی کوریا کے سربراہ کم جونگ اُن ٹرین کے ذریعے چین کے دورے پر روانہ ہوگئے۔

    بین الاقوامی خبر رساں ادارے کی رپورٹ کے مطابق شمالی کوریا کے سربراہ کم جونگ اُن چین میں اس وکٹری پریڈ میں شریک ہوں گے جو دوسری جنگِ عظیم کے خاتمے پر جاپان کے سرنڈر کی یاد میں، 80 سال مکمل ہونے پر خصوصی طور پر منعقد کی جا رہی ہے۔

    رپورٹس کے مطابق شمالی کوریا کے سربراہ کے علاوہ 25 دوسرے سربراہان مملکت بھی اس پریڈ میں شرکت کے لئے پہنچ رہے ہیں۔

    ایسا پہلی بار ہوگا کہ چینی صدر شی جن پینگ، شمالی کورین سربراہ کم جونگ ان اور روسی صدر ولادیمیر پیوٹن کسی ایک مقام پر ایک ساتھ موجود ہونگے۔

    واضح رہے کہ شمالی کوریا کے سربراہ ستمبر 2023ء کے دورہ روس کے لیے بھی خصوصی ٹرین کا استعمال کرچکے ہیں، یہ ٹرین بکتربند خصوصیات کی حامل ہے۔

    دوسری جانب شمالی کوریا کے رہنما کم جونگ اُن نے ایٹمی ہتھیاروں کے پروگرام کو تیز تر کرنے کا اعلان کر دیا ہے۔

    شمالی کوریا کے رہنما کم جونگ اُن کا ایٹمی ہتھیاروں کے حوالے سے اہم اعلان

    کم جونگ نے کہا ہے کہ اُن کے ملک کو ایٹمی طاقت میں تیزی سے اضافہ کرنے کی ضرورت ہے۔

    انھوں نے امریکا اور جنوبی کوریا کی مشترکہ فوجی مشقوں کو ”جنگ بھڑکانے کے ارادے کا واضح اظہار“ قرار دیا۔ جنوبی کوریا اور اس کا اتحادی امریکا رواں ہفتے مشترکہ فوجی مشقیں کر رہے ہیں، ان مشقوں میں شمالی کوریا کی جوہری دھمکیوں کے پیش نظر ایک بہتر دفاعی ردعمل کی مشقیں بھی شامل ہیں۔

  • اسرائیل کا حماس کے 2 سینئر کمانڈرز کو شہید کرنے کا دعویٰ

    اسرائیل کا حماس کے 2 سینئر کمانڈرز کو شہید کرنے کا دعویٰ

    غزہ (2 ستمبر 2025): اسرائیل نے غزہ میں حالیہ حملے کے دوران مزاحمتی تنظیم حماس کے دو سینئر کمانڈرز کو شہید کرنے کا دعویٰ کر دیا۔

    قطری نشریاتی ادارے الجزیرہ کی رپورٹ کے مطابق اسرائیلی فوج نے جاری کیے گئے اپنے بیان میں دعویٰ کیا کہ اس نے شمالی اور وسطی غزہ میں حماس کے خلاف کارروائیوں میں کمانڈر اور ڈپٹی کمانڈر کو شہید کیا۔

    اسرائیلی فوج نے دعویٰ کیا کہ اس کی 99ویں ڈویژن اور شن بیٹ کی مشترکہ کارروائی میں احمد ابو ضیف کو شہید کر دیا گیا جو ان کے مطابق 2024 سے زیتون بٹالین کے ڈپٹی کمانڈر کے طور پر کام کر رہے تھے۔

    بیان میں کہا گیا کہ احمد ابو ضیف نے اسرائیلی فوجیوں کے خلاف درجنوں حملوں اور گھات لگانے کی منصوبہ بندی کی تھی۔

    صیہونی فوج نے طالب صدیقی طالب ابو عطیوی کو بھی شہید کرنے کا دعویٰ کیا ہے جو کہ حماس کے عسکری ونگ میں نخبہ میں کمانڈر ہیں۔

    واضح رہے کہ اسرائیل نے حماس کے عسکری ونگ القسام بریگیڈز کے ترجمان ابو عبیدہ کو بھی شہید کرنے کا دعویٰ کر رکھا ہے تاہم حماس نے اس کی تصدیق نہیں کی۔

  • سوڈان میں لینڈ سلائیڈنگ سے بڑی تباہی، 1000 سے زائد جان سے گئے

    سوڈان میں لینڈ سلائیڈنگ سے بڑی تباہی، 1000 سے زائد جان سے گئے

    افریقی ملک سوڈان میں لینڈ سلائڈنگ سے بڑے پیمانے پر تباہی کی اطلاعات سامنے آئی ہیں، سوڈان لبریشن موومنٹ نے اطلاع دی ہے کہ لینڈ سلائڈنگ سے کم سے کم 1000 افراد لقمہ اجل بن چکے ہیں۔

    بین الاقوامی خبر رساں ادارے کی رپورٹ کے مطابق مغربی سوڈان کے ماررا پہاڑی علاقے میں پورا گاؤں تباہ ہوگیا، یہ گاؤں دارفور کے علاقے میں آتا ہے، صرف ایک بچہ معجزاتی طور پر زندہ بچ سکا۔

    رپورٹس کے مطابق عبدالواحد محمد نور کی قیادت والے گروپ نے اپنے ایک بیان میں اطلاع دیتے وہئے کہا ہے کہ شدید بارشوں کے باعث لینڈ سلائڈ کا واقعہ پیش آیا، جس نے ایک پورے گاؤں کو صفحہ ہستی سے ملیا میٹ کردیا۔

    غیر ملکی میڈیا کے مطابق دارفور کے علاقے پر تحریک کار گروپ کا کنٹرول ہے، اس گروپ نے اقوام متحدہ اور بین الاقوامی امدادی ایجنسیوں سے امداد کی اپیل کی ہے، ہزاروں مرنے والوں میں مرد، خواتین اور بچے بھی شامل ہیں۔

    ایس ایل ایم کا اپنے بیان میں کہنا ہے کہ بہت سے افراد کی لاشیں ملبے میں دبی ہیں اور انہیں نکالنے کے لیے اقوام متحدہ اور دیگر بین الاقوامی ایجنسیوں کی مدد درکار ہے۔

    واضح رہے کہ سوڈان میں پہلے سے ہی جنگ کا ماحول ہے، عوام جنگ سے پیدا حالات سے نپٹنے کی کوششوں میں مصروف ہیں، اس قدرتی آفت نے انہیں اپنی زد میں لے لیا ہے۔

    غزہ میں اسرائیلی ظلم کی انتہاء، 100 سے زائد فلسطینی شہید

    رپورٹس کے مطابق متاثرہ افراد فاقہ کشی کا شکار ہورہے ہیں، سوڈانی آرمی اور ریپڈ سپورٹ فورسز کے درمیان خانہ جنگی کی صورتحال ہے، جنگ سے دارفور علاقہ پہلے سے ہی متاثر ہے۔

  • غزہ میں اسرائیلی ظلم کی انتہاء، 100 سے زائد فلسطینی شہید

    غزہ میں اسرائیلی ظلم کی انتہاء، 100 سے زائد فلسطینی شہید

    غزہ میں اسرائیلی فوج کی سفاکیت نے تمام حدیں پار کردیں، قابض فوج نے غزہ میں ایک اور حاملہ خاتون سمیت مزید 100 سے زائد فلسطینیوں کو شہید کردیا۔

    غیر ملکی ذرائع ابلاغ کے مطابق اسرائیلی فوج نے شاتی پناہ گزین کیمپ میں گھر پر راکٹ حملہ کیا، جس کے باعث گھر کا ایک حصہ تباہ ہوگیا جس کے باعث ایک حاملہ خاتون بھی شہید ہوگئی۔

    اسرائیلی فوج نے جس گھر کو نشانہ بنایا وہاں کمرے سے کھلونے اور بچوں کے کپڑے ملے جو غالباً خاتون نے اپنے ہونے والے بچے کے لیے تیار کئے تھے۔

    قابض اسرائیلی فوج کے ہاتھوں ایک روز میں مزید 100 سے زائد فلسطینی جام شہادت نوش کرگئے، جس کے بعد غزہ میں شہدا کی مجموعی تعداد 63 ہزار 557 تک پہنچ گئی، جبکہ ایک لاکھ 60 ہزار 660 افراد زخمی ہوچکے ہیں۔

    رپورٹس کے مطابق غزہ میں قحط کی صورت حال ہے، بھوک کی شدت کے باعث مزید 9 فلسطینی شہید ہوگئے۔

    فلسطینی وزارت صحت کا کہنا ہے کہ اسرائیلی بمباری کے باعث اب بھی سڑکوں پر ملبے تلے کئی افراد دبے ہوئے ہیں اور اسرائیلی فوج کی جانب سے ریسکیو اہلکاروں کو ملبہ ہٹانے کی اجازت نہیں مل رہی۔

    دوسری جانب امریکا کی ٹرمپ انتظامیہ نے فلسطینی پاسپورٹ کے حامل تمام افراد کو ویزا دینے سے انکار کر دیا۔

    امریکا نے اقوامِ متحدہ کی جنرل اسمبلی کے اجلاس میں شرکت کے لیے فلسطینی رہنماؤں کی ویزا منسوخی کے بعد اب تقریباً تمام فلسطینی پاسپورٹ کے حامل افراد کے لیے ویزا پالیسی کو مزید سخت کردیا گیا ہے۔

    غزہ متاثرین کی امداد کے لیے امدادی قافلہ اسپین سے روانہ

    میڈیا رپورٹس میں کہا گیا ہے کہ ٹرمپ انتظامیہ نے نئی ویزا پالیسی کے تحت سفارت کاروں کو ہدایت کی ہے کہ فلسطینی پاسپورٹ کے حامل افراد کی ویزا منظوری روک دیں۔

    فلسطینی پاسپورٹ کے حامل افراد کے ویزا منسوخی کا مقصد یہ ہے کہ فلسطینیوں کو علاج کے لیے امریکا آنے، پڑھنے اور کاروباری سفر سے روکا جا سکے۔

  • مکہ ریجن سمیت مختلف علاقوں میں بارش کا الرٹ جاری

    مکہ ریجن سمیت مختلف علاقوں میں بارش کا الرٹ جاری

    سعودی عرب کے جنرل ڈائریکٹوریٹ آف سول ڈیفنس نے ملک کے کئی علاقوں میں آئندہ ہفتے تک مکہ ریجن سمیت مختلف علاقوں میں گرج چمک کے ساتھ بارش کا الرٹ جاری کردیا۔

    سعودی خبر رساں ادارے کی رپورٹ کے مطابق بیان میں کہا گیا ہے کہ مکہ مکرمہ ریجن درمیانے درجے سے شدید بارش کی زد میں رہے گا۔

    رپورٹس کے مطابق طائف، میسان، اضم، العرضیات، اللیث اور القنفذہ میں گرد آلود ہوائیں چلنے اور سیلاب کا امکان ہے، جازان، عسیر اور الباحہ کے علاقے درمیانے درجے سے شدید بارش سے متاثر ہوں گے۔

    ڈائریکٹوریٹ کے بیان کے مطابق شہریوں کو احتیاطی تدابیر کے ساتھ خود کو محفوظ مقامات تک محدود رکھنے کا مشورہ دیا گیا ہے۔

    سیلاب سے متاثرہ مقامات، وادیوں اور نشیبی مقامات سے دور رہیں۔ ایسے مقامات پر جہاں بارش کا پانی جمع ہو تیراکی سے گریز کیا جائے۔

    سرکاری چینلز اور سوشل میڈیا پلیٹ فارمز کے ذریعے اعلان کردہ شہری دفاع کی ہدایات پر عمل کیا جائے۔

    مدینہ منورہ میں موسلا دھار بارش، زائرین کی دعائیں (ویڈیو)

    اس سے قبل بھی سعودی عرب میں محکمہ موسمیات کا اپنے بیان میں کہنا تھا کہ مکہ مکرمہ اور مدینہ منورہ سمیت نجران، جازان، عسیر اور الباحہ میں کہیں درمیانے درجے کی اور کہیں تیز رم جھم کا امکان موجود ہے۔

    محکمے کا کہنا تھا کہ تیز بارش کے ساتھ گرج چمک ہوگی جبکہ نشیبی علاقوں میں سیلابی ریلوں کا بھی خدشہ ہے۔

  • برطانیہ کا افغانستان کو ایک ملین پاؤنڈز کی امداد بھیجنے کا اعلان

    برطانیہ کا افغانستان کو ایک ملین پاؤنڈز کی امداد بھیجنے کا اعلان

    لندن (02 ستمبر 2025): برطانیہ نے افغانستان زلزلہ متاثرین کو ایک ملین پاؤنڈز کی امداد بھیجنے کا اعلان کیا ہے۔

    برطانیہ کی حکومت نے پیر کی شام افغانستان میں ہلاکت خیز زلزلے سے متاثرہ خاندانوں کی امداد کے لیے ایک ملین پاؤنڈ کے ہنگامی پیکج کا اعلان کیا ہے، تاکہ اقوام متحدہ کی پاپولیشن فنڈ (UNFPA) کی امدادی کوششوں کو سہارا فراہم کیا جا سکے، اس امداد میں موبائل ہیلتھ ٹیمیں، ایمرجنسی ہیلتھ کِٹس، اور بے گھر لوگوں کے لیے پناہ گاہیں شامل ہیں۔

    اقوام متحدہ کی ٹیمیں سب سے زیادہ متاثرہ صوبہ کنڑ میں موجودہ اسپتالوں اور کلینکس پر زچگی کی صحت کی دیکھ بھال اور نفسیاتی مدد بھی فراہم کریں گی۔

    افغانستان زلزلہ

    اتوار کی شب مشرقی افغانستان میں مہلک زلزلہ آیا، جس نے صوبہ کنڑ اور ننگرہار میں سیکڑوں افراد کی جان لے لی ہے، جب کہ ہزاروں زخمی اور بے گھر ہو گئے ہیں، طالبان حکومت کے مطابق زلزلے میں 800 سے زائد افراد کی زندگیاں تلف ہو گئی ہیں۔ حکومت نے اقوام عالم سے امداد کی اپیل بھی کی ہے۔

    افغانستان میں زلزلہ، 800 افراد جاں بحق

    زلزلے کے بعد بین الاقوامی تنظیموں اور انسانی امدادی اداروں نے فوری امداد کے لیے وسائل متحرک کر دیے ہیں، جن میں خوراک، صاف پانی، طبی سہولیات، اور عارضی رہائش شامل ہیں۔ دنیا بھر کے رہنماؤں اور ممالک نے متاثرین سے اظہارِ تعزیت کیا ہے، اور متعدد ممالک نے افغانستان کو اس آفت کے بعد سنبھلنے میں مدد دینے کے لیے اضافی انسانی امداد دینے کا وعدہ کیا ہے۔

    افغان حکومت کا کہنا ہے کہ زلزلے سے متعدد گاؤں مکمل تباہ ہو گئے ہیں، لینڈ سلائیڈنگ اور سڑکوں کی بندش کے باعث لوگوں کو ریسکیو کرنے میں مشکلات کا سامنا ہے۔ اقوام متحدہ کے سیکریٹری جنرل انتونیو گوتیرس نے زلزلہ متاثرین سے ہمدردی اور افغان عوام سے یکجہتی کا اظہار کرتے ہوئے کہا ہے کہ ادارہ مشکل کی اس گھڑی میں ان کے ساتھ ہے، اور ان کی 20 ٹیمیں مختلف علاقوں میں کام کر رہی ہیں۔