ARYNews.tv | Urdu – Har Lamha Bakhabar

Category: عالمی خبریں

International News عالمی خبریں

دنیا بھر سے اہم خبریں اردو زبان میں پڑھنے کے لئے یہاں کلک کریں

  • ٹریفک خلاف ورزیوں پر 7 ہزار 304 موٹر سائیکلیں ضبط کرلی گئی

    ٹریفک خلاف ورزیوں پر 7 ہزار 304 موٹر سائیکلیں ضبط کرلی گئی

    سعودی عرب میں محکمہ ٹریفک کی جانب سے متعدد خلاف ورزیوں پر مختلف شہروں سے 7 ہزار 304 موٹر سائیکلیں ضبط کرلی گئی ہیں

    سعودی خبر رساں ادارے کی رپورٹ کے مطابق 24 اگست 2025 سے 30 اگست 2025 تک مختلف شہروں سے ہزاروں موٹر سائیکلوں کو ضبط کیا گیا۔

    محکمہ ٹریفک کا کہنا ہے کہ سب سے زیادہ موٹر سائیکلیں ریاض ریجن میں ضبط ہوئی ہیں جن کی تعداد 3791 ہے۔

    جدہ ہے سے 2118 موٹر سائیکلیں ضبط کی گئیں جبکہ مشرقی ریجن سے 602 موٹر سائیکلیں ضبط کی گئیں۔

    محکمہ ٹریفک نے خبردار کیا ہے کہ ٹریفک قوانین کی خلاف ورزی پر موٹر سائیکل ضبط ہوگی اور یہ کسی بھی حال میں ناقابل واپسی ہے۔

    دوسری جانب سعودی عرب کی وزارت بلدیات اور ہاؤسنگ نے کھانے کے شعبے میں صحت اور حفاظت کے معیار کو سخت کرنے کے مقصد کے تحت نئے جرمانوں کا اعلان کیا ہے، جس میں فوڈ آؤٹ لیٹس میں سگریٹ نوشی پر 5,000 ریال کا جرمانہ بھی شامل ہے۔

    رپورٹ کے مطابق غیر صحت بخش طریقوں، دھوکہ دہی پر مبنی فروخت، اور فوڈ سیفٹی کے قوانین کی عدم تعمیل پر سخت اقدامات حفظان صحت اور صارفین کے تحفظ کو یقینی بنانے کے لئے اُٹھائے گئے ہیں۔

    سعودی عرب: مکہ اور مدینہ سے منشیات فروش غیر ملکی و شہری گرفتار

    کھانے کی تیاری کے جگہوں میں کارکنوں کو چہرے کے ماسک نہ پہننے پر 1,000 SR اور سر نہ ڈھانپنے پر 1,000 SR جرمانے کا سامنا کرنا پڑے گا، غیر مجاز علاقوں میں سگریٹ نوشی پر 5000 ریال کا سب سے زیادہ جرمانہ ہوگا۔

  • جوتے میں موجود سانپ نے سافٹ ویئر انجینئر کی جان لے لی

    جوتے میں موجود سانپ نے سافٹ ویئر انجینئر کی جان لے لی

    بھارت کے بنگلورو میں جوتے میں چھپے سانپ کے ڈسنے سے 41 سالہ سافٹ ویئر انجینئر منجو پرکاش جان کی بازی ہار گیا۔

    بھارتی میڈیا کا اس حوالے سے کہنا ہے کہ سافٹ ویئر انجینئر منجو پرکاش کے جوتے، ’کرُوکس‘ گھر کے دروازے کے باہر رکھے ہوئے تھے، جب وہ گھر سے قریب ایک دکان سے کچھ سامان خریدنے کے لیے باہر گیا تو بغیر دیکھے جوتے پہن لیے، بدقسمتی سے اس وقت جوتوں میں زہریلا موجود تھا، جس نے اسے ڈس لیا۔

    منجو پرکاش کے اہلِ خانہ کے مطابق ان کا بیٹا پہلے بھی ایک حادثے کا شکار ہو چکا ہے جس کے باعث اس کی ٹانگ کی محسوس کرنے کی حِس ختم ہو چکی تھی۔

    اسی باعث منجو پرکاش کو سانپ کے کاٹنے کا احساس نہ ہوسکا اور وہ گھر آ کر آرام کرنے کی غرض سے کمرے میں لیٹ گیا، بعد ازاں گھر کے ایک ملازم نے چپل میں سانپ دیکھ کر منجو کے اہلِ خانہ کو اس حوالے سے آگاہ کیا۔

    منجو کے اہلِ خانہ نے بتایا کہ جب سانپ کو چپل سے نکالا تو وہ دباؤ میں آنے کے باعث مر چکا تھا۔

    چوہوں نے اسپتال میں نوزائیدہ بچوں کے بازو کاٹ لیے

    بعد ازاں منجو کے والد نے جا کر بیٹے کو دیکھا تو وہ بستر پر بیہوش پڑا تھا، اس کے منہ سے جھاگ نکل رہی تھی اور ٹانگ سے خون نکل رہا تھا۔

    بھارتی میڈیا کے مطابق منجو پرکاش کے اہلِ خانہ فوری طور پر اسے قریبی اسپتال لے گئے جہاں ڈاکٹروں نے اس کی موت کی تصدیق کردی۔

  • بیلجیئم کا اقوام متحدہ میں فلسطینی ریاست تسلیم کرنے کا اعلان

    بیلجیئم کا اقوام متحدہ میں فلسطینی ریاست تسلیم کرنے کا اعلان

    برسلز (02 ستمبر 2025): بیلجیئم نے اقوام متحدہ میں فلسطینی ریاست تسلیم کرنے کا اعلان کیا ہے۔

    تفصیلات کے مطابق فرانس، برطانیہ، آسٹریلیا اور کینیڈا کے بعد بیلجیئم نے بھی فلسطین کو بطور ریاست تسلیم کرنے کا فیصلہ کر لیا ہے۔

    بیلجیئم کے وزیر خارجہ میکسم پریوٹ نے اعلان کیا ہے کہ بیلجیئم اس ماہ کے آخر میں اقوام متحدہ کی جنرل اسمبلی (UNGA) میں ریاست فلسطین کو تسلیم کر لے گا۔

    انھوں نے اسرائیل پر سخت پابندیاں عائد کرنے کا بھی اعلان کیا، وزیر خارجہ نے منگل کو سوشل میڈیا پر لکھا کہ اسرائیل کے خلاف 12 سخت پابندیاں نافذ کی جا رہی ہیں، ان میں غیر قانونی اسرائیلی آبادکاریوں سے مصنوعات کی درآمد پر پابندی، اسرائیلی کمپنیوں کے ساتھ سرکاری معاہدوں کا دوبارہ جائزہ اور اسرائیلی پروازوں اور ٹرانزٹ پر پابندی سمیت دیگر شامل ہیں۔

    یہ اقدامات فلسطین خصوصاً غزہ میں جاری انسانی المیے اور اسرائیل کی جانب سے بین الاقوامی قوانین کی خلاف ورزیوں کے جواب میں اٹھائے گئے ہیں۔

    امریکا کا فلسطینی پاسپورٹ کے حامل تمام افراد کو ویزا دینے سے انکار

    تاہم، بیلجیئم کے وزیر خارجہ نے یہ بھی کہا کہ غزہ سے آخری یرغمالی کی رہائی کے بعد ہی فلسطینی ریاست کو تسلیم کیا جائے گا اور یہ طے ہونے کے بعد کہ اب حماس کا فلسطین کے انتظام میں کوئی کردار نہیں رہا ہے۔ یاد رہے کہ بیلجیئم کے وزیر اعظم بارٹ ڈی ویور نے گزشتہ ماہ کہا تھا کہ فلسطین کو تسلیم کرنے کا تعلق سخت شرائط سے ہونا چاہیے۔

    جولائی کے آخر میں فرانسیسی صدر ایمانوئل میکرون نے اعلان کیا تھا کہ جب عالمی رہنما اقوام متحدہ کی جنرل اسمبلی کے اجلاس میں شرکت کریں گے تو فرانس فلسطینی ریاست کو تسلیم کرے گا۔ فرانس اور سعودی عرب 22 ستمبر کو اقوام متحدہ کی جنرل اسمبلی کے دوران فلسطین کو تسلیم کرنے سے متعلق اجلاس کی مشترکہ میزبانی بھی کریں گے۔ آسٹریلیا، کینیڈا اور برطانیہ نے بھی کہا ہے کہ وہ اس ماہ فلسطین کو تسلیم کرنے کا ارادہ رکھتے ہیں لیکن بھی شرائط کے ساتھ۔

    اس سال اپریل تک تقریباً 147 ممالک، جو اقوام متحدہ کے 75 فی صد ارکان کی نمائندگی کرتے ہیں، پہلے ہی فلسطینی ریاست کو تسلیم کر چکے ہیں۔

  • فوجی تربیت : اسپین کی شہزادی لیونور کا تاریخی اقدام

    فوجی تربیت : اسپین کی شہزادی لیونور کا تاریخی اقدام

    میڈرڈ : اسپین کے بادشاہ فلیپ ششم نے یورپی سوسائٹی آف کارڈیالوجی کے سالانہ کانگریس کے ایک اہم اجلاس میں شرکت کی جبکہ شہزادی لیونور نے بھی اسی روز اپنی فوجی تربیت کے آخری کورس کا آغاز کیا۔

    شاہی خاندان کی جانب سے انسٹاگرام پر جاری بیان کے مطابق بادشاہ فلیپ نے کانگریس کے "ہارٹ اینڈ سوسائٹی” سیشن میں شرکت کی، جس میں دنیا بھر سے ماہرین امراض قلب نے شرکت کی۔

    اس موقع پر بادشاہ فلیپ نے تقریب سے خطاب کرتے ہوئے ماہرین کی خدمات کو سراہتے ہوئے کہا کہ آپ نے مکالمے کی ایک بیش قیمت مثال پیش کی ہے۔

    casareal Spain

    انہوں نے کہا کہ قلبی صحت ایک عالمی مسئلہ ہے اور علم جب ترقی کے لیے استعمال ہو تو اس کی کوئی سرحد نہیں ہونی چاہیے۔

    دوسری جانب، اسی روز ولی عہد شہزادی لیونور نے جنرل ایئر اینڈ اسپیس اکیڈمی سان جاویر میں اپنی عسکری تربیت کے آخری مرحلے کا آغاز کیا۔

    Princess Leonor

    اس موقع پر شہزادی نے اکیڈمی کے مختلف حصے دیکھے، سمیولیٹر ایریا کا معائنہ کیا اور ایک جدید تربیتی طیارے کے کاک پٹ میں بیٹھ کر عملی مشق کا تجربہ بھی کیا۔

  • سائیکل چور فلمی انداز میں گرفتار : دلچسپ ویڈیو وائرل

    سائیکل چور فلمی انداز میں گرفتار : دلچسپ ویڈیو وائرل

    کیلیفورنیا : مونرویہ پولیس نے ایک مبینہ سائیکل چور کو تعاقب کے بعد فلمی انداز میں رنگے ہاتھوں گرفتار کرلیا جس کی ویڈیو سوشل میڈیا پر وائرل ہوگئی۔

    یہ واقعہ گزشتہ منگل کی شام کو پیش آیا واقعے کی ڈیش کیم ویڈیو بھی جاری کی گئی ہے، جس میں پولیس افسر کو ملزم کے پیچھے دوڑتے ہوئے دیکھا جا سکتا ہے۔

    اس حوالے سے پولیس حکام کا کہنا ہے کہ گزشتہ دنوں کچھ شہریوں کی جانب سے متعدد شکایات موصول ہوئیں کہ ایک لڑکا ہمارے گھروں کی باڑھیں پھلانگ کر گھروں میں گھسنے کی کوشش کررہا ہے، اطلاع ملتے ہی پولیس ٹیم جائے وقوعہ پر پہنچی۔

    بعد ازاں ملزم لڑکے نے ایک گھر سے سائیکل چرائی اور تیزی سے مونرویہ ہائی اسکول کے کیمپس میں داخل ہوگیا اس دوران پولیس اہلکار بھی پکڑنے کیلئے کا اس کا تعاقب جاری رکھے ہوئے تھے۔

    پولیس کو دیکھ کر سائیکل چور کے اوسان خطا ہوگئے تاہم اس نے سائیکل وہیں چھوڑ کر موقع سے فرار ہونے کی کوشش کی۔

    پولیس کی ڈیش کیم فوٹیج میں واضح نظر آرہا ہے کہ ایک پولیس افسر نے تیزی سے اس کا پیچھا کیا اور کچھ ہی دیر میں ملزم کو گرفتار کر لیا گیا۔ پولیس کے مطابق ملزم سے برآمد ہونے والی سائیکل اس کے اصل مالک کے حوالے کردی گئی ہے۔

  • ہوٹل میں کھانے کے دوران سالن میں مرا ہوا چوہا نکل آیا، ویڈیو وائرل

    ہوٹل میں کھانے کے دوران سالن میں مرا ہوا چوہا نکل آیا، ویڈیو وائرل

    ہوٹل میں کھانے کے دوران سالن میں مردہ چوہا نکل آیا، واقعے کے کریہہ ویڈیو نے سوشل میڈیا صارفین میں غم و غصے کی لہر دوڑا دی۔

    بھارتی ریاست اتر پردیش میں سڑک کے کنارے ایک ڈھابے پر کھانا کھانے والے دو آدمیوں کے لیے ایک سادہ کھانا ڈراؤنے خواب میں تبدیل ہو گیا، جب ان کے پنیر کی ڈش میں ایک مردہ چوہا نکل آیا، یہ واقعہ پیر کو بلسی قصبے کے انمول نامی ڈھابہ میں پیش آیا۔

    چونکا دینے والے واقعے کی ویڈیو سوشل میڈیا پر تیزی سے وائرل ہورہی ہے جس میں دکھایا گیا ہے کہ کھانا کھانے والے ایک شخص نے ڈش میں سالن کو ہٹانے کے لیے چمچ کا استعمال کیا۔

    تاہم اس نے جیسے ہی جمچ چلایا تو سالن کے نیچے چھپے ہوا مرا ہوا چوہا سامنے ظاہر ہوگیا، جسے دیکھ کر وہ دونوں ششدر رہ گئے۔

    مہیشوری نامی شخص جو یہ کھانا کھا رہا تھا اس نے بتایا کہ’’میں نے فوری طور پر ڈھابہ کے منتظم سے شکایت کی اور اسے مطلع کیا کہ میں پولیس میں شکایت درج کرواؤں گا۔‘‘

    بلسی کے سب ڈویژنل مجسٹریٹ (ایس ڈی ایم) پریم پال سنگھ نے تصدیق کی کہ انھوں نے بھی ویڈیو دیکھی تھی، انھوں نے بتای کہ "ہمیں ابھی تک کوئی تحریری شکایت نہیں ملی ہے، لیکن ویڈیو کی جانچ کی جا رہی ہے، تفصیلی تحقیقات کی جائیں گی۔

  • دورانِ پرواز یورپی سربراہ کے طیارے کا جی پی ایس بند کر دیا گیا

    دورانِ پرواز یورپی سربراہ کے طیارے کا جی پی ایس بند کر دیا گیا

    یورپی یونین کی رہنما ارسولا وان ڈیر لیین کے طیارے کا لینڈنگ کے دوران نیویگیشن جام ہو گیا۔

    یوروپی کمیشن کی سربراہ ارسولا وان ڈیر لیین کو لے جانے والا ایک طیارہ بلغاریہ میں اترنے کی تیاری کے دوران جی پی ایس جیمنگ کی زد میں آگیا۔

    حکام نے روس پر اس عمل کو انجام دینے کا الزام لگایا ہے۔

    کمیشن کی ترجمان اریانا پوڈیسٹا نے کہا کہ GPS سیٹلائٹ سگنل جو کہ وون ڈیر لیین کے چارٹرڈ جیٹ کو معلومات پہنچاتا ہے، اس وقت جام ہو گیا جب وہ جنوبی بلغاریہ کے پلوودیو بین الاقوامی ہوائی اڈے کے قریب پہنچا۔

    پوڈیسٹا نے پیر کو کہا کہ ہم واقعی اس بات کی تصدیق کر سکتے ہیں کہ جی پی ایس جیمنگ تھا، لیکن طیارہ بلغاریہ میں بحفاظت لینڈ کر گیا ہمیں بلغاریہ کے حکام سے معلومات ملی ہیں کہ انہیں شبہ ہے کہ ایسا روس کی کھلم کھلا مداخلت کی وجہ سے ہوا۔

    بلغاریہ نے ایک بیان جاری کرتے ہوئے کہا کہ ملک کی سول ایوی ایشن اتھارٹی نے پائلٹوں کو محفوظ طریقے سے لینڈنگ کے متبادل طریقہ کے طور پر "ٹیریسٹریل نیویگیشن ٹولز” کا سہارا لینے کی ہدایت کی۔

    فنانشل ٹائمز اخبار جس نے سب سے پہلے واقعے کی اطلاع دی، کہا کہ طیارے کو "کاغذی نقشوں” کا استعمال کرتے ہوئے زبردستی لینڈنگ کی گئی۔

    کریملن کے ترجمان دمتری پیسکوف نے فنانشل ٹائمز کو دیئے گئے تبصروں میں روس کے خلاف الزامات کو مسترد کرتے ہوئے کہا کہ "آپ کی معلومات غلط ہیں”۔

  • چوہوں نے اسپتال میں نوزائیدہ بچوں کے بازو کاٹ لیے

    چوہوں نے اسپتال میں نوزائیدہ بچوں کے بازو کاٹ لیے

    بھارت میں چوہوں نے اسپتال میں نوزائیدہ بچوں کے بازو کاٹ لیے۔

    بھارتی میڈیا رپورٹ کے مطابق اندور کے مہاراجا یشونت راؤ اسپتال (ایم وائی ایچ) میں چوہوں نے مبینہ طور پر دو نوزائیدہ بچوں کے بازو کاٹ لیے۔

    بچوں کی پیدائش تین دن پہلے ہوئی تھی اور انہیں اسپتال کے انتہائی نگہداشت یونٹ (این آئی سی یو) میں داخل کرایا گیا تھا۔ اسپتال کی نرسنگ ٹیم نے جب نومولود کے زخمی بازو دیکھے تو اسپتال انتظامیہ کو اطلاع دی۔

    اس کے بعد یونٹ میں نصب سی سی ٹی وی کیمروں کو اسکین کیا گیا اور چوہے نومولود بچوں کے قریب جھولے میں کودتے ہوئے دیکھے گئے۔ اتوار کو پہلا واقعہ سامنے آنے کے بعد ڈاکٹروں نے فوری طور پر نومولود کا علاج شروع کر دیا جبکہ آج بھی ایسا ہی ایک واقعہ سامنے آیا۔

    یہ پڑھیں: ویڈیو: چوہے نے نومولود بچی کو چہرے پر کاٹ کر لہو لہان کر دیا

    اسپتال کے این آئی سی یو میں چوہا دیکھا گیا جس نے انتظامیہ کو حیران کردیا۔

    شعبہ اطفال کے سربراہ ڈاکٹر برجیش لاہوتی نے اسپتال کے سپرنٹنڈنٹ ڈاکٹر اشوک یادو کو اس معاملے سے آگاہ کیا۔ ڈاکٹر لاہوتی نے کہا کہ اسپتال چوہوں سے متاثر ہے اس معاملے سے فوری طور پر نمٹا جائے۔

    ڈاکٹر یادو نے کہا کہ اسپتال میں کیڑوں پر قابو پانے کا کام پانچ سال پہلے کیا گیا تھا لیکن چوہوں کی تعداد پھر بڑھ گئی ہے کیونکہ مریض کے رشتہ دار اسپتال میں کھانا لاتے ہیں۔

    واضح رہے کہ جنوری 2023 میں ساگر ضلع اسپتال کے مردہ خانے میں رکھی دو لاشوں سے چوہوں نے ایک ایک آنکھ کاٹ لی تھی۔

    سول سرجن اور اسپتال کے تین ڈاکٹروں کو شوکاز نوٹس جاری کر دیا گیا تھا جون 2023 میں چوہوں نے ودیشہ کے ضلع اسپتال کے مردہ خانے میں رکھے ہوئے ایک بزرگ شخص کی ناک اور آنکھوں کو کاٹ لیا تھا۔

  • ہزاروں آسٹریلوی شہری بھارتی تارکین وطن کیخلاف سڑکوں پر نکل آئے

    ہزاروں آسٹریلوی شہری بھارتی تارکین وطن کیخلاف سڑکوں پر نکل آئے

    آسٹریلیا کے ہزاروں شہری اپنے ملک میں موجود بھارتی تارکین وطن کیخلاف سڑکوں پر نکل آئے، "مارچ فار آسٹریلیا” ریلیوں نے بھارتی نژاد باشندوں کو نشانہ بنایا۔

    اتوار کو آسٹریلیا میں امیگریشن مخالف ریلیاں نکالی گئیں، مظاہروں کے لیے پروموشنل مواد کے ساتھ بھارتی تارکین وطن کو نشانہ بنایا گیا، تاہم آسٹریلوی حکومت نے ان واقعات کو نفرت پھیلانے اور نئے نازی یعنی نو نازیوں سے منسلک قرار دیتے ہوئے ان کی مذمت کی ہے۔

    بھارتی ذرائع ابلاغ کے مطابق "مارچ فار آسٹریلیا” سے منسوب ریلیوں میں خاص طور پر بھارتی نژاد باشندوں کو نشانہ بنایا گیا، جو اب آبادی کا تین فیصد سے زیادہ ہوچکے ہیں۔

    ریلی میں بتایا گیا کہ "پانچ سالوں میں ہندوستانی تارکین وطن گزشتہ سو سالوں میں یونانیوں اور اطالوی تارکین وطن سے کہیں زیادہ آئے ہیں۔

    یہ کوئی معمولی ثقافتی تبدیلی نہیں ہے، یہ صرف ایک ملک سے ہے جس کے بارے میں ہم جانتے ہیں جبکہ ہجرت کا ثقافتی اثر ہوتا ہے، آسٹریلیا کوئی اقتصادی زون نہیں ہے جس کی بین الاقوامی مالیات سے فائدہ اٹھایا جائے”۔

    پروموشنل مواد پر مشتمل ایک پری ایونٹ فیس بک پوسٹ نے بتایا کہ مردم شماری کے اعداد و شمار کے مطابق بھارتیوں کی تعداد 2013 سے 2023 تک دگنی ہو کر تقریباً 845,800 تک پہنچ گئی ہے۔

    مارچ فار آسٹریلیا کی ویب سائٹ کا کہنا ہے کہ بڑے پیمانے پر ہجرت نے "ان بانڈز کو پھاڑ دیا ہے جس نے ہماری کمیونٹیز کو اکٹھا کیا تھا۔‘‘

    اس دوران پولیس کی مظاہرین کے ساتھ جھڑپیں ہوئیں، پولیس کو لاٹھی اورآنسو گیس وغیرہ کا استعمال کرنا پڑا، جبکہ پولیس نے چھ افراد کو گرفتار کیا ہے اور دو اہلکار زخمی ہوئےہیں۔

    آسٹریلیا کے شہروں سڈنی، میلبرن، کینبرا اور دیگر میں بڑی ریلیاں نکالی گئیں، سڈنی میں، 5,000 سے 8,000 کے قریب لوگ قومی جھنڈے اٹھائے ہوئے تھے،

  • بھارت نے ٹیرف صفر کرنے کی پیشکش کی لیکن اب بہت دیر ہو چکی، ٹرمپ

    بھارت نے ٹیرف صفر کرنے کی پیشکش کی لیکن اب بہت دیر ہو چکی، ٹرمپ

    امریکی صدر ڈونلڈ ٹرمپ نے ایک بار پھر بھارت کی جانب سے ٹیرف پر نظرثانی کی پیشکش مسترد کر دی۔

    سوشل میڈیا پر جاری بیان میں امریکی صدر نے کہا کہ بھارت نے ٹیرف صفر کرنے کی پیشکش کی لیکن اب بہت دیر ہو چکی ہے۔

    ٹرمپ نے یاد دلایا کہ امریکا بھارت سے کم لیکن بھارت امریکا سے بہت زیادہ بزنس کرتا ہے، بھارت نے امریکا پر سب سےزیادہ ٹیرف عائد کر رکھا تھا جس سےنقصان ہوا، کئی دہائیوں سے یکطرفہ تعلق امریکا کےلیے نقصان دہ رہا ہے۔

    امریکی صدر نے ایک بار پھر کہا کہ بھارت تیل اور دفاعی مصنوعات زیادہ تر روس سے خریدتا ہے امریکا سے نہیں۔

    واضح رہے کہ گزشتہ دنوں صدر ڈونلڈ ٹرمپ نے روس سے تیل کی خریداری کے حوالے سے بھارتی درآمدات پر 50 فیصد ٹیرف عائد کرنے کے بعد تجارتی مذاکرات کو مسترد کر دیا تھا۔

    نیویارک ٹائمز کی رپورٹ کے مطابق امریکی صدر ٹرمپ کو بھارت میں ہونے والی کواڈ سمٹ میں شرکت کرنا تھی لیکن اب انہوں نے دورہ منسوخ کردیا ہے۔بھارت اور امریکا کے درمیان تجارتی روابط اور ٹیرفس کے حوالے سے کافی دنوں سے مذاکرات جاری تھے اور نئی دہلی کا کہنا تھا کہ وہ بات چیت کے ذریعے ان تمام مسائل پر قابو پا لے گا۔

    امریکی صدر نے بھارت کے خلاف پچیس فیصد اضافی ٹیرفس کا اعلان کیا تھا اور اس طرح اب بھارتی اشیا پر مجموعی طور پر پچاس فیصد محصولات عائد ہیں۔