Category: عالمی خبریں

International News عالمی خبریں

دنیا بھر سے اہم خبریں اردو زبان میں پڑھنے کے لئے یہاں کلک کریں

  • ماسکو:کار بم دھماکہ، 3افراد ہلاک

    ماسکو:کار بم دھماکہ، 3افراد ہلاک

    روس کے شمالی شہر پیٹیگورسک میں کار دھماکے سے اڑا دی گئی، کار میں سوار تین افراد مارے گئے۔

    غیر ملکی خبر رساں ادارے کے مطابق روس کے شمالی شہر پیٹیگورسک میں کار میں نصب بم زور دار دھاکے سے پھٹ گیا، جس سے کار میں سوار تین افراد موقع پر ہی ہلاک ہوگئے۔

    دھماکے سے گاڑی مکمل طور پر تباہ ہوگئی، پولیس نے موقع پر پہنچ کر علاقے کو گھیرے میں لے لیا ہے، دھماکہ اتنا ذور دار تھا کہ اردگرد سے گزرنے والی گاڑیوں کو بھی نقصان پہنچا ہے۔

  • نیروبی:صدر کی جنگ بندی کی اپیل،متحارب گروپس کو مذاکرات کی دعوت

    نیروبی:صدر کی جنگ بندی کی اپیل،متحارب گروپس کو مذاکرات کی دعوت

    کینیا کے صدر اوہورہ کینیاٹا نے جنوبی سوڈان میں متحارب گروپوں سے اپیل کی ہے کہ جنگ بندی ختم کرکے مذاکرات کے ذریعے مسائل حل کئے جائیں۔

    کینیا کے دارالحکومت نیروبی میں ہونے والی افریقن یونین کے اجلاس میں کینیا کے صدر نے جنوبی سوڈان کے رہ نماؤں سے اپیل کی کہ جنگ بندی کے باعث ایک لاکھ بیس ہزار افراد بے گھر ہوچکے ہیں جبکہ سینکڑوں افراد اپنی جان سے ہاتھ دھو چکے ہیں، لہذا جو بھی مسائل ہیں، انہیں مذاکرات کے ذریعے حل کیا جائے۔

  • صنعا:فوجی ٹینک کی شیلنگ 16افراد ہلاک،صورتحال گمبھیر

    صنعا:فوجی ٹینک کی شیلنگ 16افراد ہلاک،صورتحال گمبھیر

    یمن میں امن و امان کی صورتحال بدستور کشیدہ فوجی ٹینک کی شیلنگ سے تین بچوں سمیت سولہ افراد ہلاک درجنوں زخمی ہوگئے۔

    یمنی فوج کی جانب سے شیلنگ سیکورٹی فورسز کے ساتھ جھڑپ میں ہلاک ہونے والے افراد کے تعزیتی کیمپ پر کی گئی، فوجی حکام کا کہنا ہے کہ علیحدگی پسند گروپ کی جانب سے کیمپ کی اطلاع پر کاروائی کی گئی۔

    جنوبی یمن میں علیحدگی پسند گروپوں کی کاروائیاں جاری ہیں، اس سے قبل باغیوں کی جانب سے گورنر ہاوس پر حملے میں پولیس افسر سمیت تین افراد ہلاک ہوئے تھے۔

    جس کے بعد یمنی فوج نے کاروائیاں تیز کردی ہیں۔تاہم فوج کی شیلنگ سے سولہ بے گناہ شہریوں کی ہلاکت کے بعد صورتحال مزید پیچیدہ ہونے کا امکان ہے

  • واشنگٹن:فون کالزکی نگرانی غیر قانونی نہیں،امریکی عدالت

    واشنگٹن:فون کالزکی نگرانی غیر قانونی نہیں،امریکی عدالت

    امریکہ کی وفاقی عدالت نے جاسوسی پروگرام کا فیصلہ سناتے ہوئے کہا ہے کہ شہریوں کی فون کالز کی نگرانی قانون کی خلاف ورزی نہیں ہے۔

    امریکہ کے خفیہ ادارے کی جانب سے امریکی عوام کی فون کالز کی نگرانی پرسول لیبرٹی یونین نے خفیہ ادارے کے سربراہ جیمس کلیپر کے خلاف مقدمہ دائر کیا تھا۔

    وفاقی عدالت کے جج کا کہنا تھا کہ ادارے کی طرف سےعوام کا ٹیلی فون ریکارڈ کسی غیر قانونی کاروائی میں استعمال ہونے کے شواہد نہیں ملے ہیں۔

    ٹیلی فون نگرانی کا مقصد تفشیشی عمل میں مدد اور ممکنہ دہشت گردی کے حملوں سے بچاؤ ہے، جس کی بنا پروگرام کو قانونی قرار نہیں دیا جاسکتا، مقدمہ دائر کرنے والی تنظیم نےعدالتی فیصلے پرمایوسی کا اظہار کیا ہے۔
       

  • استنبول:لاکھوں افراد کا حکومت کے خلاف مظاہرہ

    استنبول:لاکھوں افراد کا حکومت کے خلاف مظاہرہ

    ترکی میں کرپشن کے الزامات میں وفاقی وزراء کے ملوث اور مستعفی ہونے کے بعد پیدا ہونے والے سیاسی بحران میں شدت آرہی ہے، استنبول میں لاکھوں افراد حکومت کے خلاف مظاہرے کر رہے ہیں اور مستعفی ہونے کا مطالبہ کر رہے ہیں۔

    ترکی میں سیاسی بحران اس وقت سامنے آیا تھا جب کرپشن کے الزامات میں ملوث ہونے پر تین وفاقی وزراء مستعفی ہوگئے تھے، دوسری جانب ترک عوام کا وزیراعظم اردگان سے استعفے کا مطالبہ زور پکڑتا جارہاہے۔

    استنبول کے لاکھوں شہریوں نے ہونے والے حکومت مخالف مظاہرے میں بڑی تعداد میں شرکت کی اور وزیراعظم سے استعفی کا مطالبہ کیا، تاہم وزیراعظم کا کہنا ہے کہ جبتک عوام انکے ساتھ ہیں وہ اقتدار کی کرسی پر براجمان رہیں گے۔

  • بیروت میں دھماکہ، سابق وزیرسمیت 4افراد ہلاک

    بیروت میں دھماکہ، سابق وزیرسمیت 4افراد ہلاک

    لبنان کے دارالحکومت بیروت میں ہونے والے دھماکے میں سابق وزیر محمد شطح سمیت چار افراد ہلاک ہو گئے، غیرملکی خبرایجنسی کے مطابق دھماکہ پارلیمنٹ کی عمارت سے چند سو کلومیٹر کے فاصلے پر ہوا۔جس کے بعد پورے علاقے میں دھوئیں کے گہرے بادل چھا گئے۔

    لاشوں اور زخمیوں کو اسپتال منتقل کردیا گیا، کسی تنظیم نے واقعےکی ذمہ داری قبول نہیں کی، دھماکے میں سابق وزیراعظم سعد الحریری کے مشیر اور حزب اختلاف کے رہنما محمدشطح بھی ہلاک ہو گئے۔ پولیس نے واقعے کی تحقیقات شروع کردیں۔
       

  • بینکاک:انتخابات میں تاخیرنہ کئےجانے پراپوزیشن کاشدید احتجاج

    بینکاک:انتخابات میں تاخیرنہ کئےجانے پراپوزیشن کاشدید احتجاج

    تھائی لینڈ میں حکومت کیجانب سے انتخابات میں تاخیر نہ کئے جانے پر اپوزیشن کی جانب سے شدید احتجاج جاری ہے۔

    تھائی لینڈ میں دو فروری کو ہونے والے عام انتخابات میں تاخیر کے لئے الیکشن کمیشن کی جانب سے اپیل کی گئی تاہم وزیراعظم ینگ لک شیناوترا نے کسی بھی قسم کی تاخیر کے امکان کو مسترد کرتے ہوئے کہا ہے کہ ملک بھر میں انتخابات اپنے وقت پر ہی ہوں گے۔

    وزیراعظم کے اس اعلان کے بعد دارالحکومت بنکاک سمیت ملک بھر میں اپوزیشن کی جانب سے پر تشدد مظاہرے شروع ہوگئے تاہم اس سے قبل ہونے والے مظاہروں میں تشدد کا عنصر شامل ہے۔
       

  • بینکاک:مسافربس حادثے کا شکار،29افراد ہلاک،4شدید زخمی

    بینکاک:مسافربس حادثے کا شکار،29افراد ہلاک،4شدید زخمی

    تھائی لینڈ میں ڈرائیورکی نیند نے انتیس مسافروں کو ابدی نیند سلا دیا، چار زخمیوں کی حالت تشویشناک بتائی جاتی ہے۔

    تھائی لینڈ کے صوبے پیچ بن سے دوسرے شہر چینگ رائے جانیوالی مسافر بس ڈرائیور کی کوتاہی کے باعث دریا میں جاگری، جس کے نتیجے میں انتیس مسافر ہلاک جبکہ چار شدید زخمی ہوگئے ہیں۔

    پولیس حکام کا کہنا ہے کہ حادثہ ڈرائیور کی آنکھ لگ جانے کے باعث پیش آیا، واقعہ کی اطلاع ملتے ہی ریسکیو اداروں نے جائے وقوعہ پر پہنچ کر امدادی سرگرمیاں حصہ لیا اور ہلاک و زخمیوں کو دریا سے نکال کر قریبی اسپتال منتقل کیا۔

    پولیس کا کہنا ہے کہ بس میں چالیس مسافر سوار تھے، جن میں سے اٹھائیس افراد موقع پر ہلاک جبکہ ایک شخص نے اسپتال میں دم توڑ دیا، اسپتال انتظامیہ کے مطابق چارافراد کی حالت تشویشناک ہے۔
       

  • القاعدہ کی حراست میں قید امریکی کی صدر اوبامہ سے اپیل

    القاعدہ کی حراست میں قید امریکی کی صدر اوبامہ سے اپیل

    القاعدہ کی حراست میں دو سال سے قید و بند کی تکلیفیں برداشت کرنےوالے ایک امریکی نے اپنے صدر بارک اوبامہ سے درد مندانہ اپیل کی ہے کہ وہ اسکی رہائی کے لئے ذاتی طورپر کوشش کریں۔

    امریکی صدر کے نام اپنے ویڈیو پیغام میں امریکی شہری وارن وین اسٹائین کا کہنا ہے کہ وہ اپنی حکومت کی مدد کے لئے آیا تھا لیکن امریکی حکومت نے اسے بھلا دیا۔

    وارن وین اسٹائین کے مطابق اس کی عمر باہتر سال ہے اور وہ دل کا مریض ہے ، اسکی ایک بیوی , دو بیٹیاں اور انکےبچے بھی ہیں، وارن وین اسٹائین نے کہا کہ جناب صدر آپ کا بھی ایک خاندان ہے ، اور میں امید کرتا ہوں کہ امریکی صدر اس کی تنہائی اور اس کے مسائل کو سمجھ سکتے ہیں۔

    وارن وین اسٹائین نے کہا کہ اسے ایسا محسوس ہوتا ہے کہ امریکہ حکومت نہ صرف اس سے کنارہ کش بھی ہوگئی ہے بلکہ ا س کے بارے میں سوچنا بھی چھوڑ دیا ہے، اب امریکی صدر سے ہی امید ہے کہ وہ اس کی رہائی کے لئے کچھ کریںگے اور اسے اس کے خاندان اور وطن واپس لائیں گے۔
       

  • بینگوئی: 2 دن کی شدید لڑائی کے بعد حالات معمول پر

    بینگوئی: 2 دن کی شدید لڑائی کے بعد حالات معمول پر

    سینٹرل افریقن ری پبلک کے دارالحکومت بینگوئی میں دو دن کی شدید لڑائی کے بعد حالات معمول پر آرہے ہیں۔

    دو دن قبل عیسائی باغی گروہ اور سرکاری فوج میں شدید لڑائی میں چھ افراد جاں بحق ہوگئے تھے، چاڈ کے اینٹی بالاکا نامی باغی عیسائی گروہ نے سرکاری فوج پر مسلمانوں کی مدد کا الزام لگا کر بھاری ہتھیاروں سے حملہ کردیا تھا۔

    جس کے بعد فرانس سے تعلق رکھنے والے امن مشن کے اہلکاروں کی مداخلت پر باغی گروہ بھاگنے پر مجبور ہوگیا، سینٹرل افریقن ری پبلک سے تعلق رکھنے والے عیسائیوں اور مسلمان رہنماؤں نے اقوام متحدہ سے اپیل کی ہے کہ کسی بھی بڑے انسانی المیے سے بچنے کے لئے فوری طور پر بڑی تعداد میں امن مشن کے فوجی اہلکار تعینات کئے جائیں۔