Category: عالمی خبریں

روس سے پندرہ بلین ڈالر کی وصولی کیلئے یوکرائن کے وزیراعظم میکولا آزروف روس روانہ ہوگئے، دارالحکومت میں مظاہرے تاحال جاری ہیں۔

یوکرائنی وزیراعظم میکولا آزروف دونوں ممالک کے درمیان ہونے والے معاہدے کے تحت پندرہ ارب ڈالر کے معاہدے کی پہلی قسط وصول کرینگے جبکہ دوسری جانب دارالحکومت کیف میں جاری مظاہرے تاحال جاری ہیں، مظاہرین نے آزادی اسکوائر پر وزیراعظم کی روانگی کے خلاف ریلی کا اہتمام کیا اور ان کے دورے کے خلاف احتجاج کیا۔

ادھر مظاہرین کے احتجاج، دھرنوں کے بعد غیر مصدقہ ذرائع کے مطابق صدر ویکٹرنیا کووچ نے وزیراعظم میکولا آزروف اور تمام حکومتی ارکان کا استعفیٰ منظورکرلیا تاہم تمام وزراء نئی حکومت کے قیام تک عارضی طور پر اپنی ذمہ داریاں ادا کرتے رہیں گے۔

خلا میں موجود امریکی خلانوردوں نے بھی کرسمس منائی، اس موقع پر انہوں نے خلا میں چہل قدمی کی اور شٹل کی مرمت بھی کی۔

دنیا بھر میں عیسائی برادری اپنا مذہبی تہوار کرسمس نہایت جوش و جذبے سے منا رہی ہے، اس موقع کو منفرد اور یادگار بنانے کے لیے امریکی خلا بازوں نے خلا میں کرسمس منائی۔

خلائی ادارے ناسا کی جاری کردہ ویڈیو میں دکھایا گیا ہے کہ خلابازوں نے خلا میں چہل قدمی کی اور وہاں موجود اسٹیشن کے کچھ پرزوں کی مرمت بھی کی۔

خلائی شٹل میں خلاء بازوں کا کہنا تھا کہ یہ کرسمس ہمیں زندگی بھر یاد رہے گی، چہل قدمی کے دوران خلاء بازوں نے ہیلمٹ پہن رکھی تھیں، جن میں مائیکروفون نصب تھے، جن کے ذریعے اسٹیشن کے اندر موجود لوگوں سے ان کا رابطہ تھا۔
   

غزہ پر اسرائیلی طیاروں کے حملے کے نتیجے میں بچی سمیت دو افراد جاں بحق اور دس سے زائد افراد زخمی ہوگئے۔

اسرائیلی فضائی اور زمینی افواج نے منگل کے روز غزہ پر کئی فضائی حملے کئے، جس سے کئی عمارتیں ملبے کا ڈھیر بن گئیں اور دو افراد جان کی بازی ہار گئے۔

مرنے والوں میں ایک کمسن لڑکی بھی شامل ہے، زخمی ہونے والوں میں ایک ہی خاندان کے سات افراد شامل ہیں، یہ حملے اس واقعے کے بعد کئے گئے ہیں جس میں ایک فلسطینی اسنائپر کی جانب سے فائرنگ کی گئی تھی، جس میں ایک اسرائیلی باشندہ ہلاک ہوگیا تھا۔

شام میں سرکاری فوج کی وحشیانہ بمباری سے دس روز میں ستاسی بچوں سمیت تین سو اسی افراد جاں بحق اور متعدد زخمی ہوگئے۔

غیرملکی خبررساں ادارے کے مطابق شام کے شہر حلب میں سیکیورٹی فورسز کیجانب سے مسلسل دس روز سے بمباری کی جارہی ہے۔ کئی روز کی بمباری سے حلب شہر کھنڈرات کا منظر پیش کرنے لگا ہے۔

شہر کی کئی عمارتیں ملبے کا ڈھیر بن گئیں ہیں، سرکاری فوج کی جانب سے رہائشی علاقوں میں برسائے گئے بیرل بموں سے ستاسی بچوں سمیت تین سو اسی افراد لقمہ اجل بن گئے، حملوں کے بعد اسپتال زخمیوں سے بھرگئے ہیں جبکہ ملبے تلے دبے درجنوں افراد کے مارے جانے کی بھی اطلاعات ہیں، جن سے ہلاکتوں میں اضافے کا خدشہ ظاہر کیا جارہا ہے۔
   

امریکی خفیہ ایجنسی کے سابق اہلکار ایڈورڈ اسنوڈن نےکہا ہے کہ انہوں نے ذاتی نوعیت کی معلومات جمع کرنے والے امریکی جاسوسی کے نظام کو دنیا پر اخفاکرکے مطلوبہ نتائج حاصل کرلئے ہیں۔

روس میں سیاسی پناہ حاصل کرنے والے امریکی خفیہ ادارے نیشنل سیکیورٹی ایجنسی کے سابق اہلکار ایڈورڈ اسنوڈن نے ایک غیر ملکی اخبار کو طویل انٹرویو کے دوران بتایا کہ انہیں اس بات کا اطمینان ہے کہ انہوں نے معاشرے کی بہتری کے لئے کام کیا اور جن مقاصد کے لئے انہوں نے قربانی دی وہ مقصد پایہ تکمیل تک پہنچ گیا ہے۔

ان کا مزید کہنا تھا کہ مخالفین ان پر روس اور چین کا ایجنٹ ہونے کے الزامات لگا رہے ہیں جو کہ سراسر غلط ہیں، ان کا کہنا تھا کہ نہ ہی وہ کسی ملک کے ایجنٹ ہیں اور نہ ان کے کسی ملک کے ساتھ خفیہ روابط ہیں۔
   

نیویارک میں والدین کے درمیان تین سالہ بچے کی سپردگی کے تنازعہ کی وجہ سے بچے کے والد نے اسےکئی منزلہ عمارت سے نیچے پھینک دیا اور خود بھی بلڈنگ سے کود کر جان دیدی۔

سن دو ہزار نو میں ہونے والی سویتلانا کناریکوف اور دیمتری کناریکوف کی شادی اگست دوہزار تیرہ میں ختم ہوگئی تھی لیکن تین سالہ بچے کی سپردگی کے معاملے پر دونوں میں تنازعہ چل رہا تھا۔

تاہم ہفتے میں ایک دن تین گھنٹے تک بچے کو والد سے ملنے کی اجازت مل گئی تھی، پولیس کے مطابق آخری ملاقات میں بچے کے والد سویتلانا کناریکوف بچے کو لے کر باون ویں منزل پر چلا گیا، جہاں سے بچے کو نیچے دھکا دینے کے بعد خود بھی کود کر جان دیدی۔
   

ایران امریکہ اور دیگر مغربی ممالک کے ساتھ دو طرفہ تعلقات کو بہتر بنانے کا خواشمند ہے۔

جرمن جریدے کو دیئے گئے انٹرویو میں ایرانی صدر حسن روحانی کا کہنا تھا کہ انہوں نے اقتدار سنبھالنے کے بعد سے اب تک امریکہ کے تعلقات کے حوالے سے بات کرنے سے گریز کیا ہے۔

ان کا کہنا تھا کہ ایران امریکہ سمیت تمام مغربی ممالک کے ساتھ سفارتی تعلقات کو بہتر بنانا چاہتا ہے، ایرانی صدر کا مزید کہنا تھا کہ ہم امریکہ سے کشیدگی کو دور کرنے اور مستقبل میں بہتر تعلقات کے قیام کے خواہاں ہیں۔

ستمبر میں اقوام متحدہ کی جنرل اسمبلی کے اجلاس سے قبل امریکی صدر براک اوباما کے ساتھ ٹیلی فون پر ہونے والی بات چیت کو انہوں نے تین دہائیوں میں امریکہ اور ایران کے درمیان ایک تاریخی موڑ قرار دیا۔

بنگلہ دیش کی سابق وزیراعظم اور بنگہ دیش نیشنلسٹ پارٹی کی سربراہ خالدہ ضیا کا کہنا ہے کہ عبدالقادرملا کی پھانسی پرپاکستان کی قرارداد کے بعد شیخ حسینہ واجد کی حکومت نے گھٹیا سیاست کی۔

ڈھاکا میں پریس کانفرنس میں خالدہ ضیا نے کہا کہ عوام پانچ جنوری کے ڈھونگ انتخابات کو ناکام بنانے اور حکومت پر دباؤ بڑھانے کیلئے ڈھاکہ کی طرف مارچ کریں۔

خالدہ ضیا نے خبردار کیا کہ جمہویت کی خاطر مارچ کے راستے میں حکومت کوئی رکاوٹ ڈالنے سے باز رہے، بصورت دیگرنتائج کی ذمہ دار وہ خود ہوگی، خالدہ ضیا جو اٹھارہ جماعتی اپوزیشن اتحاد کی قیادت کررہی ہیں، جس کا موقف ہے کہ آئندہ عام انتخابات غیرجانبدارانہ حکومت کے تحت کرائے جائیں۔

مصر کے شہر منصورہ میں پولیس ہیڈ کوارٹر کو دھماکے سے اڑا دیا گیا، ابتدائی اطلاعات کے مطابق چودہ افراد ہلاک اور ایک سو بیس سے زائد افراد زخمی ہوگئے، مصری وزیراعظم نے اخوان المسلمون کو دہشت گرد تنظیم قرار دے دیا ہے۔

غیر ملکی خبر رساں ادارے کے مطابق دھماکے سے پولیس ہیڈ کوارٹر کی پانچ منزلہ عمارت کے کئی حصے زمیں بوس ہوگئے اور ملبے تلے کئی افراد دب گئے ہیں، جس سے ہلاکتوں میں اضافے کا امکان ہے۔

دھماکے کی شدت اتنی زیادہ تھی کہ آس پاس کی عمارتوں کو شدید نقصان پہنچا ہے، دھماکے کے بعد قانون نافذ کرنے والے اداروں نے علاقے کو گھیرے میں لے لیا، مقامی انتظامیہ نے مارے جانے والے افراد کی لاشوں اور زخمیوں کو اسپتال پہنچانے کا کام شروع کردیا ہے۔

مصر کے عبوری وزیرِ اعظم حاظم الببلاوی نے اخوان المسلموں کو دہشت گردانہ سرگرمیوں میں ملوث قرار دے کر پابندی عائد کردی ہے، تنظیم کے ملک میں موجود تمام اثاثہ جات بھی ضبط کرنے کا حکم دے دیا ہے۔
   

ایران کو جوہری پروگرام کے تنازعے کے حل کے لیے خفیہ مذاکرات کے ذریعے میز پر لانے والے مرکزی کردار منظر عام پر آگیا۔

امریکی میڈیا نے انکشاف کیا ہے کہ سابق ڈپٹی چیف آف اسٹاف جیک سلوین نے ایران کے جوہری پروگرام کے معاہدے میں اہم کردار ادا کیا، میڈیا کے مطابق وہ وزیر خارجہ ہیلری کلنٹن کے اہم دست راست ہیں۔

سلوین گزشتہ سال پیرس میں ہیلری کلنٹن کے ساتھ دورے کے دوران لاپتہ ہوگئے تھے، اس دوران سلوین اومان میں ایرانی وفد سے خفیہ ملاقات کرتے ہوئے ایران کو جوہری پروگرام کے تنازعے حل کیلئے مذاکرات پر رضا مند کرنے کیلئے سرگرم رہے۔

اوبامہ انتظامیہ کیجانب سے ایران کے جوہری پروگرام کے حل کے لیے یہ پہلی پیشرفت تھی، تنازعے کے حل میں جیک سلوین کی جدوجہد پانچ خفیہ ادوار پر مشتمل تھی، جو ایران کو مذکرات کیلئے رضامند کرنے میں کامیاب رہی۔

سینتیس سالہ سلوین دیگرامریکی تجربہ کار رہنماؤں کے مقابلے میں خارجہ منصوبہ سازی میں مضبوط شخصیت کے حامل تصور کئے جاتے ہیں۔