International News عالمی خبریں
دنیا بھر سے اہم خبریں اردو زبان میں پڑھنے کے لئے یہاں کلک کریں
امریکی سیکریٹری دفاع چیک ہیگل نےکہا ہےکہ جنوبی چین کے سمندر کے بارے میں چین کا رویہ قابل اعتراض اور غیر ذمہ دارانہ ہے۔
چین کیجانب سے جنوبی کوریا کے کچھ علاقوں میں نو فلائی زون کے قیام کےمعاملے پرامریکہ اور چین کے درمیان ان دنوں تعلقات نازک موڑ پر آ گئے ہیں۔
چین نےالزام عائد کیا ہے کہ معمول کی گشت کرنے والے چینی بحریہ کے جہاز کے عملے کو امریکی نیوی کے جہاز پر موجود نیوی اہلکاروں نے مشتعل کیا، جس کے باعث فائرنگ کا واقعہ پیش آیا، دوسری طرف امریکن فوجیوں نے اس واقعےکو الگ انداز میں پیش کیا ہے۔
سعودی عرب حکام کا تارکین وطن کے خلاف کریک ڈاؤن جاری ہے، ایک لاکھ سے زائد ایتھوپین باشندے وطن واپس پہنچ گئے۔
سعودی حکام کی جانب سے ویزا پالیسی میں سختی کے بعد تارکین وطن کے خلاف کریک ڈاؤن میں لاکھوں باشندے اپنے ممالک جانے پر مجبور ہوگئے، وزارت خارجہ کے مطابق ایک لاکھ چالیس ہزار سے زائد ایتھوپین باشندوں کو ڈی پورٹ کیا جاچکا ہے اور ایک اندازے کے مطابق تعداد ایک لاکھ پچاس ہزار تک پہنچ جائے گی۔
حکام کا کہنا ہے کہ ڈی پورٹ افراد نے لیبر اور امیگریشن قوانین کی پاسداری نہیں کی، جسکے باعث انہیں یہ اقدام اٹھانا پڑا، سعودی عرب کے اس اقدام پر خلیجی ممالک میں عوامی سطح پر احتجاج کیا گیا۔
یوکرائن میں حکومت کے خلاف مظاہروں کا سلسلہ جاری ہے، یوکرائن کی پارلیمنٹ نے حکومت مخالف مظاہروں کے دوران گرفتار مظاہرین کی سزا معاف کرنے پر اتفاق کرلیا ہے۔
مظاہرین نے یورپی یونین سے آزاد تجارتی معاہدہ نہ کرنے بعد حکومت کے خلاف مظاہرے کا آغاز کیا اورمظاہرین صدر وکٹر یانوکووچ کے استعفی کا بھی مطالبہ کر رہے ہیں۔
حکومت نے نومبر کے آخر میں حکومت مخالف مظاہرین کی بڑی تعداد کو گرفتار کیا، جس پر بین الاقوامی رہنماؤں نے حکومت کے اس اقدام کی سخت مذمت کرتے ہوئے تمام مسئلے بات چیت کے زریعے حل کرنے پر زور دیا تھا۔
یوکرائنی پارلیمنٹ نے حکومت مخالف مظاہروں کے دوران پولیس کے ساتھ جھڑپوں کے بعد گرفتار مظاہرین کی سزا معاف کرنے پر اتفاق کیا ہے، تاہم یہ معلوم نہیں ہوسکا ہے کہ گرفتار کئے گئے مظاہرین کی رہائی کب تک عمل میں آئے گی۔
تھائی لینڈ میں حکومت کے خلاف احتجاج جاری ہے، اپوزیشن کی قیادت میں مظاہرین تھائی لینڈ کی سڑکوں پرنکل آئے۔
تھائی لینڈ میں حکومت مخالف مظاہرے جاری ہیں، اپوزیشن کی قیادت میں مظاہرین نے بنکاک کی سڑکوں پر مارچ کیا، مظاہرین تھائی لینڈ کی نگراں وزیراعظم کی برطرفی کے خلاف مظاہرے کر رہے تھے۔
مظاہرین کا کہنا تھا کہ جب تک نگراں وزیراعظم مستعفی نہیں ہونگے، وہ ان کیخلاف احتجاج جاری رکھیں گے، اس قبل وزیراعظم ینگ لک شناواترا نے گذشتہ ہفتے پارلمینٹ تحلیل کردی تھی اور فروری میں انتخابات کا اعلان کیا تھا مظاہرے میں ہزاروں افراد نے شرکت کی۔
روسی صدر ولادیمیر پوٹن نے امریکی بل کے حوالے سے وائٹ ہاؤس کی جانب سے جاری بیان کا خیرمقدم کرتے ہوئے کہا ہے کہ پرامن جوہری پروگرام ایران کا حق ہے۔
ماسکو میں ایک نیوز کانفرنس سے خطاب کرتے ہوئے روسی صدرکا کہنا تھا کہ ایران کے خلاف نئی پابندیاں عائد کرنے سے ایران اورعالمی طاقتوں کے درمیان ہونے والے معاہدے کو نقصان پہنچ سکتا ہے، صدر ولادیمیر پوٹن کا کہنا تھا کہ پرامن جوہری پروگرام ایران کا حق ہے، جسے عالمی برادری کو تسلیم کرنا چاہیے۔
عیسائیوں کے مذہبی اور روحانی مرکز ویٹی کن سٹی کے سینٹ پیٹرز برگ اسکوائر میں ایک شخص نے خودسوزی کرلی۔
خود سوزی کرنے والے باون سالہ شخص کا دھڑ آگ لگنے کی وجہ سے شدید زخمی ہوگیا، ویٹی کن کے مذہبی پیشواؤں کا کہنا ہے کہ ریسکیو سروس کے پہنچنے سے قبل انہوں نے اس شخص کے جسم پر لگی آگ کو بجھانے کی کوشش کی تھی تاہم وہ اسے بچانے میں ناکام رہے، خود سوزی کرنیوالے شخص کی شناخت اور خود سوزی کی وجہ تا حال نہیں ہوسکی۔
امریکی خاتون اول مشل اوباما نے بچوں کے لئے کھلونے جمع کرنے کی مہم حصہ لیا۔
امریکی خاتون اول مشل اوباما نے اینا کوسٹیا بولنگ بیس کا دورہ کیا، جہاں انہوں نے ننھے بچوں کے لئےکھلونے نامی مہم میں حصہ لیا، اپنے دورے میں وہ امریکی فوجی اہلکاروں کے بچوں سے بھی ملیں۔
اس موقع پر خطاب کرتے ہوئے ان کا کہنا تھا کہ جن بچوں کا بچپن غربت کی لکیر کے نیچے کہیں کھو جاتا ہے، ان بچوں کے لئے تحائف اور کھلونے جمع کرنے سے انہیں بہت خوشی حاصل ہورہی ہے۔
یاد رہے کہ ننھے بچوں کے لئے کھلونے نامی یہ مہم انیس سو سینتالیس سے مسلسل ہرسال امریکا میں منائی جاتی ہے۔
اقوام متحدہ کی جنرل اسمبلی نے ڈرون حملوں کے خلاف قرارداد متفقہ طور پر منظور کر لی ہے، قرارداد میں مطالبہ کیا گیا ہے کہ ڈرون حملوں کے استعمال کو بین الاقوامی قوانین کے مطابق بنایا جائے پہلی مرتبہ اقوام متحدہ میں ڈرون حملوں کے خلاف قرارداد پیش کی گئی ہے جسے متفقہ طور پر منظور کرلیا گیا ہے۔
دفتر خارجہ سے جاری بیان کے مطابق پاکستان نے ہم خیال ممالک کے ساتھ مل کر یہ قرارداد اقوام متحدہ کی جنرل اسمبلی میں پیش کی، قرارداد میں ممبر ممالک سے کہا گیا ہے کہ وہ اس بات کو یقینی بنائیں کہ انسداد دہشتگردی کے لیے استعمال کیے جانے والے ڈرونز بین الالقوامی قوانین، اقوام متحدہ کے چارٹر اور بین الاقوامی انسانی حقوق کے مطابق ہوں۔
قرارداد میں اس بات پر زور دیا گیا ہے کہ ڈرون حملوں کی قانونی حیثیت پر مختلف ممالک کے مابین معاہدے کیے جائیں، وزارت خارجہ کے مطابق اگلے برس مارچ میں اقوام متحدہ کی انسانی حقوق کونسل میں بحی ڈرون حملوں کا معاملہ اٹھایا جائے گا۔
امریکہ کے لئے خفیہ معلومات اکٹھی کرنے والے ادارے این ایس اے میں قانونی اصلاحات کے بعد بھی عالمی رہ نماؤں کی نشریاتی جاسوسی ترک نہیں کی، دوسری جانب اقوام متحدہ نے ذاتی معلومات جمع کرنے کوخلاف قانون قرار دے دیا۔
چھ ماہ قبل امریکی خفیہ ایجنسی کے اہلکار ایڈورڈ اسنوڈن کی جانب سے عالمی رہنماؤں کی جاسوسی کرنے میں امریکی مداخلت کے انکشافات کے بعد امریکہ کی جانب سے خفیہ معلومات اکٹھی کرنے والے ادارے نیشنل سیکیورٹی ایجنسی کے لئے ایک اصلاحاتی کمیشن بنا، تاہم چھ ماہ گزرنے کے بعد بھی امریکی خفیہ ادارہ عالمی رہنماؤں سمیت دنیا بھر کے کروڑوں شہریوں کی ذاتی نوعیت کی معلومات جمع کر رہا ہے، جس پر دنیا بھر میں تشویش پائی جاتی ہے۔
دوسری جانب اقوام متحدہ نے ذاتی معلومات کے حقوق کی قرارداد منظور کرتے ہوئے کہا ہے کہ دنیا کے کسی ادارے کو اس بات کا حق حاصل نہیں ہو گا کہ کسی فرد کی ذاتی نوعیت کی معلومات تک رسائی حاصل کرے، قرارداد جرمنی اور برازیل نے پیش کی، جرمنی اور برازیل حلیف ممالک کے باوجود امریکی خفیہ ایجنسی این ایس اے کی جانب سے جاسوسی کا شکار رہے ہیں۔
شامی باغیوں کی تنظیم النصرہ کے امیر شیخ محمد فاتح الجولانی نے دعوی کیا ہے کہ فتح کے قریب ہیں اور بیشتر علاقے انکے کنٹرول میں ہیں۔
غیرملکی نشریاتی ادارے کو انٹرویو دیتے ہوئے شامی مزاحمت کار تنظیم کے سربراہ کا کہنا تھا کہ شام میں باغیوں کی پیش رفت جاری ہے، ملک کاستر فیصد علاقہ ان کے کنٹرول میں ہےاور جلد ہی بڑے حصے پر قابض ہو جائیں گے۔
النصرہ کے سربراہ کا کہنا تھا کہ شام کے باغیوں کی فتح ناگزیرہو چکی ہے، انہوں نے کہا کہ ہم حزب اختلاف کی جماعتوں کے ساتھ قریبی رابطے میں ہیں اور شام کو جلد ایک پرامن ریاست میں تبدیل کردینگے۔
الجولانی کا کہنا تھا کہ اسد حکومت کو ہرانے کے بعد شام پر اکیلے حکومت کرنے کا کوئی پروگرام نہیں بلکہ اپوزیشن کو ساتھ لیکر لائحہ عمل طے کریں گے۔