پشاور: امیر جماعت اسلامی سراج الحق نے کہا ہے کہ سیاسی جماعتوں نے عوام کو سبز باغ دکھاکر گمراہ کیا ہے لیکن اب یقین سے کہہ سکتا ہوں کہ ملک کا مستقبل جماعت اسلامی ہے۔

وہ پشاور میں ایک بڑے اجتماع سے خطاب کر رہے تھے انہوں نے کہا کہ جماعت اسلامی نے کرپشن فری مہم شروع کی ہے جس میں ہمارا نعرہ یہی ہے کہ سب کا احتساب ہونا چاہیئے اور یہ احتساب بلا امتیاز، غیر سیاسی اور سخت ہونا چاہیے۔

انہوں نے کہا کہ وزیراعظم نے پاناما لیکس پر تین بار قوم کے سامنے تقریر کی اور ہر بار خود کو احتساب کے لیے پیش کرنے کا اعلان کیا اس لیے اب وزیراعظم نواز شریف کی اخلاقی ذمہ داری بنتی ہے کہ وہ اپنے اوپر لگے ہر الزامات کا جواب دیں اور قوم سے کیا گیا وعدہ پورا کریں۔

امیر جماعت اسلامی نے وزیراعظم نواز شریف کو مخاطب کرتے ہوئے کہا کہ ملک تو ترقی نہیں کر رہا لیکن آپ کی پراپرٹی اور بینک اکاؤنٹس میں روز بہ روز اضافہ کیسے ہورہا ہے؟ یہ ایسا سوال ہے جس کا جواب آپ کو دینا ہوگا اور عدالت کا سامنا کرنا ہوگا۔

سراج الحق کا مزید کہنا تھا کہ وزیراعظم کی جانب سے عدالت میں جواب جمع کروایا گیا ہے کہ اہل خانہ نے ایک دوسرے کو 52 کروڑ کے تحائف دیئے میں حیران ہوں کہ حلال کمائی سے کوئی باپ اپنے بیٹے کو یا بیٹا اپنے باپ کو اتنے مہنگے تحائف بھی دے سکتے ہیں۔

راولپنڈی : آرمی چیف جنرل قمر جاوید باجوہ کی ہدایت پر چترال میں برفباری سے متاثرہ علاقے میں امدادی کام کمانڈنٹ چترال اسکاؤٹس کرنل نظام کی نگرانی میں جاری ہے۔

پاک فوج کے تعلقات عامہ کے ادارے آئی ایس پی آر کے ڈائریکٹر جنرل آصف غفور نے کہا ہے کہ چترال میں برف باری سے متاثرہ افراد کی امداد کے لیے پاک فوج کی جانب سے ریسکیو آپریشن جاری ہے اور ہیلی کاپٹر کی مدد سے ڈاکٹرز کی ٹیم ، ادویات اور ضروری سامان ارسال پہنچادیا گیا ہے۔

*چترال میں برفانی تودہ گرگیا ‘9افراد جاں بحق

ڈی جی آئی ایس پی آر کے مطابق چترال میں برفانی طوفان سے جاں بحق ہونے والے چار افراد کے ورثاء کو ہیلی کاپٹرسےچترال پہنچادیا گیا ہے جب کہ جاں بحق خاتون کی لاش کو آبائی علاقےمنتقل کردیا گیا ہے۔

واضح رہے دو روز قبل چترال میں برفانی طوفان اور گزشتہ روز برفانی تودہ گرنے کے باعث متعدد افراد بے گھر اور جاں بحق ہوگئے تھے جب کہ اس علاقے سے زمینی رابطہ بھی منقطع ہو گیا ہے جس کے باعث امدادی کاموں میں رکاوٹوں اور مشکلات کا سامنا تھا تاہم پاک فوج کے ہیلی کاپٹرز کے ذریعے امدادی کاموں سے علاقہ مکینوں کو ریلیف میئسر آیا ہے۔

اسلام آباد : تحریک انصاف کا کہنا ہے کہ شفاف انتخابات کے لیے الیکشن کمیشن کو حکومتی اثرات سے مکمل پاک کرنا ہوگا جس کے اصلاحات لا رہے ہیں۔

تفصیلات کے مطابق تحریک انصاف کے مرکزی رہنما جہانگیر ترین کی زیر صدارت پارٹی کے اہم اجلاس میں انتخابی اصلاحات کے ایجنڈے پر غور کیا گیا اور اس حوالے سے اہم تجاویز مرتب کی گئیں، اس اہم اجلاس میں اسد عمر، شیریں مزاری، عارف علوی، شفقت محمود، فواد چوہدری ،اعظم سواتی، شبلی فراز، غلام سرورخان اورعلیم خان نے شرکت کی۔

اجلاس میں فیصلہ کیا گیا کہ انتخابی اصلاحات کےمختلف پہلووٴں پرتحقیق کے لیے 3رکنی کمیٹی قائم کر دی گئی جس میں عارف علوی، غلام سرورخان اور شفقت محمود شامل ہوں گے۔

اجلاس کے شرکاء نے الیکٹرانک ووٹنگ کےنفاذ میں حکومت کی جانب سے تاخیری حربوں کی شدید مذمت کرتے ہوئے کہا کہ الیکٹرانک ووٹنگ ممکن ہے لیکن حکومت سنجیدہ نہیں۔

اجلاس کے شرکاء نے مطالبہ کیا کہ الیکشن کمیشن کوحکومتی اثرسےمکمل طور سے پاک کر کے الیکشن کمیشن کومکمل قانونی، مالیاتی اور انتظامی اختیارات دینا ہوں گے جب کہ بیرون ملک مقیم پاکستانیوں کو بھی ووٹ کا حق دیا جائے۔

بعد ازاں تحریک انصاف کے مرکزی رہنما جہانگیر ترین نےکہا کہ پی ٹی آئی نےانتخابی نظام کی شفافیت کے لیے تاریخی جدوجہد کی ہے چنانچہ انتخابی نظام کےذریعے پاناما کےثمرات کو ضائع نہیں ہونےدیں گے جس کے لیے ناقص انتخابی نظام کےبل بوتے پر مینڈیٹ چرانےکی روایت ختم کرنا ہوگی۔

انہوں نے اس عزم کا اعادہ کیا کہ تحریک انصاف نوازحکومت کی عدم دلچسپی کے باوجود انتخابی نظام کی اصلاح کریں گے اور آئندہ انتخابات میں حکومت کو بال ٹیمپرنگ اور امپائرز کو ساتھ ملا کر دھاندلی نہیں کرنےدیں گے۔

چترال: چترال کو ملک کے دیگر حصوں سے ملانے والا لواری ٹنل کا راستہ آج دوپہر ڈیڑھ بجے ٹریفک کے لیے کھول دیا گیا۔

نیشنل ہائی وے اتھارٹی کے پراجیکٹ ڈائریکٹر انجینیئر محمد ابراہیم مہمند نے آر وائی نیوز سے گفتگو کرتے ہوئے بتایا کہ شدید برف باری کی وجہ سے لواری سرنگ کا راستہ شیڈول کے مطابق جمعہ کے روز نہیں کھل سکا تاہم اس راستے کو ہفتے کے روز کھول دیا گیا۔

ٹنل بند ہنے کی وجہ سے 5 ہزار مسافروں کو دیر بالا میں 2 دن تک ٹہرنا پڑا۔

اس راستے سے سفر کرنے والے بعض مسافروں نے شکایت کی تھی کہ راستے کو صحیح طور پر صاف نہیں کیا گیا اور صرف ایک گاڑی اس سے گزر سکتی ہے۔ اگر غلطی سے گاڑی پھسل کر سڑک کے بیچ میں آجائے تو دوسری گاڑی کا یہاں سے گزرنا مشکل ہوگا۔

واضح رہے کہ اس وقت چترال اور مضافاتی علاقے میں بارش جبکہ بالائی علاقوں اور پہاڑوں کی چوٹیوں پر برف باری کا سلسلہ جاری ہے۔

یاد رہے کہ لواری ٹنل کے راستے پر ٹریفک پولیس کی ڈیوٹی نہ ہونے کے باعث عام دنوں میں بھی اکثر ٹریفک جام ہو جاتا ہے اور مسافروں کو کئی گھنٹوں تک انتظار کرنا پڑتا ہے۔

مقامی لوگوں کا مطالبہ ہے کہ لواری سرنگ کے دونوں جانب ٹریفک پولیس کو تعینات کیا جائے تاکہ وہ ٹریفک کو کنٹرول کریں۔

ٹریفک جام کی وجہ سے مسافروں کو 48 گھنٹوں تک بھی شدید سردی میں انتظار کرنا پڑتا ہے جبکہ یہاں قریب میں خواتین اور بچوں کے لیے بشری تقاضے پورے کرنے کی بھی کوئی سہولت میسر نہیں۔