اسلام آباد: پاکستان تحریک انصاف کے چیئرمین عمران خان عدالت سے باہر نکلے تو مزدور ان کے پیروں میں گرگیا اور مطالبہ کیا کہ پنجاب بھر میں غلام بنے ہوئے 50 لاکھ بھٹہ مزدوروں کو نجات دلائی جائے، پنجاب حکومت عدالتی حکم پر عمل نہیں کررہی خان صاحب آواز بلند کریں۔
نمائندہ اے آر وائی نیوز عبدالقادر کے مطابق جیسے ہی عمران خان پاناما کیس کی سماعت کے بعد عدالت سے باہر نکلے تو بھٹہ مزدور عمران خان کے پاس پہنچ گئے۔
عمران خان نے استفسار کیا تو مزدور بولے کہ خدا کے لیے خان صاحب ہماری جان چھڑائیں، سڑکوں پر نکلیں، 50 لاکھ بھٹہ مزدور غلامی کی زندگی کی گزارنے پر مجبورہیں،ہم بچوں سمیت غلام بنے ہوئے ہیں، بکے ہوئے ہیں، کوئی ہمارے پیچھے نہیں اس لیے ہمیں روندا جارہا ہے ، خدا کے لیے ہمارے لیے بھی آواز بلند کریں۔
بھٹہ مزدورکا مزید کہنا تھا کہ سپریم کورٹ واضح فیصلہ دے چکی ہے مگر پنجاب حکومت نے سپریم کورٹ کے احکامات ہوا میں اڑادیئےاور کسی فیصلے پر عمل نہیں ہورہا۔
عمران خان نے فوری طور بھٹہ مزدوروں کے مسائل اسمبلی اٹھانے کا کہتے ہوئے بھٹہ مزدوروں کو ہرممکن تعاون کی یقین دہانی کرائی۔
