مردان : ڈی آئی جی مردان عالم شنواری نے کہا ہے کہ مشال کیس میں تمام ملزمان کو حراست میں لے لیا ہے تاہم ایک ملزم کے بارے میں خدشہ ہے کہ وہ افغانستان فرار ہو گیا ہے۔
ڈی آئی جی مردان عالم شنواری نے میڈیا سے بات کرتے ہوئے کہا کہ ایک کے علاوہ تمام ملزمان کو گرفتار کرلیا ہے جس کے بارے میں خدشہ ہے کہ وہ افغانستان فرار نہ ہو گیا ہو جب کہ کیس کا چا لان آئندہ ہفتے تک عدالت میں پیش کرائے جانے کا امکان ہے۔
انہوں نے کہا کہ پرو وائس چانسلر کے تقررتک یونیورسٹی بند رہے گی اور موجودہ انتظامیہ کے ہوتے ہوئے یونیورسٹی کھولنے کا خطرہ مول نہیں لے سکتے۔
ایک سوال کے جواب میں ڈی آئی جی مردان نے کہا کہ اس پورے واقعہ میں اگر کوئی پولیس کا اہلکار یا افسر کسی بھی قسم کی کوتاہی میں ملوث پایا گیا تو اس کے خلاف بھی محکمہ جاتی کارروائی عمل میں لائی جائے گی۔
ڈی آئی جی عالم شنواری نے کہا کہ مرکزی ملزم عارف کے بارے میں متضاد اطلاعات سامنے آ رہی ہیں پہلے کہاں گیا کہ وہ ملائیشیا چلا گیا ہے تاہم اس کا پاسپورٹ زائد المیعاد ہو گیا ہے اس لیے ایسا ممکن نہیں البتہ افغانستان چلے جانے کے امکان کو رد نہیں کیا جا سکتا۔
پشاور: خیبرپختونخواہ کے دارالحکومت پشاور میں پولیس موبائل کےقریب دھماکےکے نتیجےمیں3اہلکاروں سمیت4افراد زخمی ہوگئے۔
تفصیلات کےمطابق پشاور میں سڑک کنارے نصب بم پھٹنے کےنتیجے میں 3سیکیورٹی اہلکاراور 1راہگیرزخمی ہوگئےجبکہ ایک اسکول کےباہر نصب بم کو ناکارہ بنادیا گیا۔
ترجمان خیبرپختونخوا پولیس کے مطابق پشاور میں شمشتو کے نواحی علاقے خٹک پل کے نزدیک محکمہ انسداد دہشت گردی کی گاڑی کو سڑک کنارے نصب بم کا نشانہ بنایا گیا جس میں 3 سیکیورٹی اہلکاراور1راہگیر زخمی ہوئے۔
دھماکے کے بعد علاقے کو کلیئر کرالیا گیا جبکہ سرچ آپریشن کا عمل جاری ہے۔
اسکول کے باہر نصب بم ناکارہ بنادیا گیا
دوسری جانب صبح سویرے پشاور کےعلاقےارمڑ میں واقع ایک پرائمری اسکول کی عمارت کےقریب تین کلو وزنی بارودی مواد برآمد ہواتھا۔
خیبرپختونخوا پولیس کے ترجمان کے مطابق بارودی مواد کی نشاندہی پر بم ڈسپوزل اسکواڈ کو طلب کیا گیا۔
ترجمان کا مزید کہنا تھا کہ بم کو بغیر کسی جانی نقصان کے ناکارہ بنادیا گیا تاہم اس عمل میں اسکول کی عمارت کا کچھ حصہ متاثر ہوا۔
واضح رہےکہ رواں سال فروری میں پشاور میں ججز کی گاڑی پر خودکش حملے کے نتیجے میں ڈرائیور جاں بحق جبکہ 4 افراد زخمی ہوگئے تھے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں
پشاور: امیر جماعت اسلامی سراج الحق نے کہا ہے کہ پانامااسکینڈ ل میں کسی مولوی صاحب کا نام نہیں ہے،پاناما کیس میں ان لوگوں کانام ہےجو اپنے آپ کوتہذیب یافتہ کہتےہیں۔
ان خیالات کا اظہار انہوں نے پشاور میں علماء و مشائخ کانفرنس سے خطاب کرتے ہوئے کیا، امیرجماعت اسلامی کا کہنا تھا کہ ہمارے وزیراعظم مودی سے دوستی بنارہے ہیں اور بھارت سرحد پار سے پاکستان پر حملے کر رہا ہے۔
کشمیر کے مسلمان آزادی کیلئے لڑرہے ہیں، پاک افغان سرحد پر بھی صورت حال کشیدہ ہے لیکن اسلام آباد میں بیٹھا حکمران ٹولہ سو رہا ہے۔
سراج الحق نے کہا کہ پاکستان کامستقل اسلامی نظام میں ہے، ڈونلڈ ٹرمپ کی غلامی میں نہیں، ہمیں امریکااوراس کےیاروں سےنہیں ڈرناچاہئے۔
انہوں نے کہا کہ پانامامیں ان لوگوں کا نام ہے جو اپنےآپ کو تہذیب یافتہ دکھاتے ہیں، اسکینڈل میں کسی مولوی کا نام نہیں ہے۔
سراج الحق نے کہا کہ پاناما لیکس میں قوم کا پیسہ لوٹنے والوں اور ان کے بچوں کا نام آیا، جب تک ملک سے اسٹیٹس کا خاتمہ نہیں ہوتا اس وقت تک نواز شریف اور زرداری جیسے حکمران پیدا ہوتے رہیں گے۔
ان کا کہنا تھا کہ آپ کا مستقبل روشن ہے کیونکہ آپ حق پر ہیں، جماعت اسلامی کرپشن کے خلاف جنگ لڑ رہی ہے جو اس فرسودہ نظام کے خاتمے تک جاری رہے گی۔
لوئردیر:خیبرپختونخوا کےضلع لوئردیر میں پیپلزپارٹی آج عوامی طاقت کا مظاہرہ کرےگی تاہم جلسے میں سابق صدر آصف علی زرداری شرکت نہیں کریں گے۔
تفصیلات کےمطابق پیپلزپارٹی خیبرپختونخواہ کےضلع لوئردیر میں سیاسی قوت کا مظاہرہ کرے گی۔شریک چیئرمین آصف زرداری کی جلسے میں شرکت کو سکیورٹی کلیئرنس نےملنےکی وجہ سےمنسوخ کردیاگیا ہے۔
سابق صدر آصف زرداری کی جگہ اب جلسے کی نمائندگی سابق وزیراعظم یوسف رضا گیلانی کریں گے۔جلسے کی تیاریاں مکمل کرلی گئی ہیں جبکہ پی پی کی مقامی قیادت بھی جلسے سے خطاب کرے گی۔
یاد رہے کہ دو روز قبل پیپلز پارٹی کی جانب سے بجلی کی لوڈشیڈنگ کے خلاف لاہور میں احتجاجی کیمپ لگایا گیاتھا جیالےہاتھ کے پنکھے لے کرنعرے بازی کرتے رہے۔
ناصر باغ میں لگائےگئے کیمپ میں وزیراعلیٰ پنجاب شہباز شریف کے نئے نام کے لئے ووٹنگ بھی کی گئی تھی، جس میں عوام کی جانب سے نادم اعلیٰ، کاذب اعلیٰ، شوبازشریف، گاڈ فادر شریف جیسے نام تجویز کیے گئےتھے۔
واضح رہےکہ پاکستان پیپلزپارٹی کے لوڈ شیڈنگ کے خلاف احتجاجی کیمپ میں خطاب کرتے ہوئے خورشید شاہ کاکہناتھاکہ پیپلزپارٹی جمہوری نظام کی بالا دستی چاہتی ہے اور جمہوریت کے لیے ہی ذوالفقار بھٹو سولی پر چڑھ گئے جبکہ اسی پیپلز پارٹی نے 2014 کے دھرنے میں جمہوریت کو بچایا تھا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
ایبٹ آباد : خیبر پختونخواہ کے صوبائی وزیر خوراک قلندر خان کے انتخابی حلقے کے لوگوں نے انہیں راستے میں روک تشدد کا نشانہ بنانے کی کوشش کی اور گاڑی کو نقصان پہنچایا۔
تفصیلات کے مطابق صوبائی وزیر خوراک قلندر خان تین سال مین پہلی مرتبہ اپنے انتخابی حلقے گئے تو احتجاج کے لیے پہلے سے موجود لوگوں نے گاڑی کا گھیراؤ کیا پتھراور ڈنڈے برسائے جس کے باعث صوبائی وزیر معمولی زخمی بھی ہو گئے۔
پولیس اور مقامی لوگوں نے صوبائی وزیر خوراک قلندر خان کی گاڑی کو مشتعل افراد کے گھیراؤ سے با مشکل نکالا جس کے بعد صوبائی وزیر کا قافلہ جلسے کے لیے روانہ ہو گیا ۔
اے آر وائی نیوز کے خصوصی نمائندے اشفاق احمد خان نے واقعہ کی تفصیلات بتاتے ہوئے کہا کہ صوبائی وزیر خوراک کو جلسے میں شرکت کے لیے ایبٹ آباد کے نواعی علاقے سے گذرنا تھا جس کی اطلاع پاکر علاقہ مکینوں کی بڑی تعداد وہاں پر جمع ہو گئی اور جیسے وزیر موصوف کیا گاڑی پہنچی مظاہرین نے گاڑی کو روک لیا۔
اے آر وائی نیوز کے رپورٹرز نے مزید بتایا کہ مظاہرین نے صوبائی وزیر کی گاڑی پر پتھراؤ کیا اور لاتیں ماریں جس کی وجہ سے قلندر خان معمولی زخمی ہوگئے تاہم ایس ایس پی ایبٹ آباد نے موقع پر پہنچ کر حالات پر قابو پالیا اور وزیر کو جلسے کے لیے روانہ کردیا۔
صوبائی وزیر قلندر خان نے اے آر وائی رہورٹرز اشفاق خان سے بات کرتے ہوئے بتایا کہ وہ مکمل خیریت سے ہیں اور احتجاج کرنا عوام کا بنیادی حق ہے تاہم اسے تشدد سے پاک ہونا چاہیے۔
واضح رہےکہ رواں سال جنوری میں آزاد کشمیر میں ہجیرہ کے مقام پر مسافر بس گہری کھائی میں گرنے سے خاتون اور بچی سمیت 5 افراد جاں بحق اور متعدد زخمی ہو گئےتھے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
نوشہرہ: پاکستان تحریک انصاف کے چیئرمین عمران خان نے کہا ہے کہ نواز شریف سے ذاتی دشمنی نہیں، نواز شریف کرپٹ نہ ہوتے تو ان سے اچھی دوستی ہوتی، میرا خواب ہے کہ پاکستانی اسلامی فلاحی ریاست بنے لیکن اس کی راہ میں نواز شریف رکاوٹ ہیں، جب تک نواز شریف جیسے سیاست دان موجود ہیں ملک ترقی نہیں کرسکتا۔
یہ بات انہوں نے خیبر پختون خوا کے شہر نوشہرہ میں پی ٹی آئی کے جلسہ عام سے خطاب کرتے ہوئے کہی۔ جلسے میں رہنماؤں جہانگیر ترین، پرویز خٹک، شاہ محمود قریشی اور عوامی مسلم لیگ کے سربراہ شیخ رشید نے بھی خطاب کیا۔
عمران خان نے کہا کہ جس انسان کا خواب بڑا ہوتا ہے وہ بڑے کام کرتا ہے،میرا خواب تھا پاکستان کو کرکٹ کا ورلڈ چیمپئن بناؤں اور بنایا،ایسا اسپتال چاہتا تھا جہاں کسی کو فکر نہ ہو کہ اس کے پاس پیسے نہیں اور میرا خواب تھا پاکستان اسلامی فلاحی ریاست بنے۔
نواز شریف جیسے سیاستدان کے ہوتے ہوئے یہ ملک ترقی نہیں کرسکتا
انہوں نے کہا کہ اقبال اور قائدا عظم کے پاکستان کے لیے جدوجہد کررہا ہوں،میری جدوجہد وزیراعظم بننے کے لیے نہیں اور نواز شریف سے میری کوئی ذاتی دشمنی نہیں، جب تک نواز شریف جیسے سیاستدان موجود ہیں یہ ملک ترقی نہیں کرسکتا۔
انہوں نے کہا کہ پاکستان چین جیسا تب بنے گا جب ملک سے کرپشن ختم ہوگی،میرا خواب ہے پاکستان میں ایسا دن آئے جب زکوة لینے والا کوئی نہ ملےلیکن نواز شریف میرے خواب کی تعبیر میں رکاوٹ ہے۔
عمران کا کہنا تھا کہ ایسا ملک چاہتے ہیں کہ ہمارے پاسپورٹ کی دنیا بھر میں عزت ہو،کرپشن نے ملک کو کھوکھلا کردیا ہے،سن لو پاکستانیو! بھیک مانگنے والوں کی عزت نہیں ہوتی،ملک سے پیسہ چوری ہو کر باہر جاتا ہے، قوم کو قرضے لینے پڑتے ہیں، 10 ارب کی پاکستان میں روز منی لانڈرنگ ہوتی ہے۔
انہوں نے کہا کہ نواز شریف اگر کرپٹ نہ ہوتے تو ان سے اچھی دوستی ہوتی،جب تک زندہ ہوں کرپشن کے خلاف جدوجہد جاری رکھوں گا،جو صادق اور امین نہ ہو وہ ملک کا سربراہ نہیں ہوسکتا،مغربی ممالک میں معمولی سے جھوٹ پر بھی استعفیٰ لیا جاتا ہے۔
نواز شریف آکر دیکھیں جلسہ ہے یا جلسی؟ شیخ رشید
جلسے سے خطاب کرتے ہوئے عوامی مسلم لیگ کے سربراہ شیخ رشید نےکہا کہ نواز شریف آکر دیکھیں یہ جلسی ہے یا جلسہ؟نواز شریف صاحب آپ کے ہاں جلسیاں ہوتی ہیں یہاں تو جلسے ہیں، نواز شریف ہم تو جلسہ کرتے ہیں وہ دھرنا بن جاتا ہے۔
انہوں نے کہا کہ نواز شریف نوشہرہ میں اعلان کرتا ہوں کہ آپ جارہے ہو اور ہم آرہے ہیں، عمران خان آرہا ہے۔
عمران خان اور نواز شریف کا چہرہ دیکھ لیں کیس کا فیصلہ سمجھ میں آجائے گا
پاناما کیس پر انہوں نے کہا کہ سپریم کورٹ جو بھی فیصلہ کرے گی وہ ہم قبول کریں گے، عمران خان اور نواز شریف کا چہرہ دیکھ لیں کیس کا فیصلہ سمجھ میں آجائے گا۔
انہوں نے مزید کہا کہ 92 ممالک میں 6 ہزار لوگوں پر پاناما لیکس کا کیس چل رہا ہے۔
ساٹھ دن مکمل ہوتے ہی نواز شریف چلے جائیں گے، جہانگیر ترین
پی ٹی آئی کے رہنما جہانگیر ترین نے کہا کہ 21 سال کے طویل سفر کے بعد عمران خان کو کامیابی ملی، عمران خان کا پیغام لوگوں کے دلوں تک پہنچ گیا ہے، ملک اس وقت بنےگا جب لوٹ مار اور کرپشن ختم ہوگی۔
انہوں نے کہا کہ انکوائری رپورٹ آئے گی اور ہم اس کی نگرانی کریں گے، 60 دن مکمل ہوں گے تو نواز شریف چلے جائیں گے، 60 دن بعد گو نواز گو ہوگا۔
تحریک انصاف سندھ اور بلوچستان میں داخل ہورہی ہے، شاہ محمود قریشی
تحریک انصاف کے رہنما شاہ محمود قریشی نے کہا کہ تحریک انصاف سندھ اور بلوچستان میں داخل ہورہی ہے،خیبر پختونخوا حکومت کو ترقیاتی منصوبوں پر مبارک باد دیتا ہوں،خیبر پختونخوا میں تعلیم اور پولیس کا نظام مثالی ہے، قوم پر سرمایہ کاری کی ضرورت ہے۔
پی ٹی آئی بیرون ملک پاکستانیوں کے لیے لڑ رہی ہے،قریشی
انہوں نے کہا کہ نواز شریف کے وکیل کو پیغام دینا چاہتا ہوں کہ اس وکیل نے بیرون ملک پاکستانیوں کی حب الوطنی پر سوال اٹھایا، بیرون ملک رہنے والے پاکستانیوں کو سلام پیش کرتے ہیں پی ٹی آئی بیرون ملک پاکستانیوں کے ووٹ کے لیے لڑ رہی ہے۔
انہوں نے مزید کہا کہ گو نواز گو آج ملک کی باشعور جماعتوں کا بھی نعرہ بن چکا ہے، وکلا بھی نواز شریف کے جانے کے اشارے دے رہے ہیں، وکلا، دانش وروں سے اپیل کرتا ہوں کہ ہمارے ساتھ چلیں۔
سیالکوٹ: پی ٹی آئی کو اتوار سات مئی کو سیالکوٹ میں جلسہ کرنے کی اجازت مل گئی تاہم انتظامیہ نے جلسہ گاہ کے اطراف سڑکیں کھود دیں، مٹی کے ڈھیر لگادیے اور تعاون سے گریز کرنے لگی۔
تفصیلات کے مطابق شہری انتظامیہ کی جانب سے سیالکوٹ کے جناح اسٹیڈیم کے اطراف کی سڑکیں کھود دی گئیں، ہیوی مشنری نے سڑکیں کھود کر مٹی کے ڈھیر لگادیے۔
اے آر وائی نیوز کے نمائندہ سیالکوٹ عامر جاوید بٹ کے مطابق پی ٹی آئی کی جانب سے 34 کنٹینر اسٹیج بنانے کے لیے پرسوں سے یہاں موجود ہیں، اسٹیج کا سارا سامان یہاں پڑا ہے جس میں لائٹس اور دیگر اشیا شامل ہیں لیکن جگہ نہ ملنے کے سب اسٹیج نہیں بن پارہا اور انتظامیہ کسی بھی قسم کا کوئی تعاون نہیں کررہی۔
ان کا کہنا تھاکہ سامان جناح اسٹیڈیم کے باہر پڑا ہے اور دروازوں کو تالے لگے ہوئے ہیں۔
پی ٹی آئی کے ضلعی صدر عثمان ڈار نے کہا ہے کہ انتظامیہ کا یہ خیال ہے کہ ایسے اوچھے ہتھکنڈے کے ذریعے سونامی کی راہیں بند کرے گی تو یہ اس کی بھول ہے۔
پشاور : جمعیت علمائے اسلام کے سربراہ مولانا فضل الرحمن نے کہا ہے کہ ڈان لیکس کے حوالے سے پیدا شدہ صورت حال قانونی اورنہ ہی پیچیدہ ہے، حکومت نے اس حوالے سے جوقدم اٹھانا تھا اٹھا لیا، معاملات ٹوئٹس کے بجائے مشاورت سے حل کیے جائیں۔
ان خیالات کا اظہارانہوں نے پشاورمیں منعقدہ تقریب کے موقع پرمیڈیاسےبات چیت کرتے ہوئے کہی، انہوں نے کہا کہ ٹویٹس کے بجائے تمام معاملات مشاورت سے حل کیے جائیں تو بہتر ہے، ٹویٹس کی بنیاد پرکوئی طریقہ کارتبدیل نہیں ہوتا۔
مولانا فضل الرحمن نے بتایا کہ بہتری کے ایجنڈے کے بجائے ایک دوسرے پر کیچڑ اچھالنے کی روایت زور پکڑتی جارہی ہے الزامات کی روش ترک کرنی چاہئیے۔
ان کا کہنا تھا کہ ہماری جماعت نے کبھی عالمی طاقتوں کے بل پر پیسے لے کر چھلانگیں نہیں لگائیں، ہمیں ایک دوسرے کو چور کہنے کے بجائے اپنا مثبت کرداردنیا کے سامنے پیش کرنا چاہئیے۔
مولانا فضل الرحمن نے بتایا کہ حادثات کو جوازبنا کرتوہین رسالت قوانین میں ترامیم کی اجازت کسی کونہیں دی جاسکتی، ہم جذبات کی رو میں بہہ کر کبھی غلط قدم نہیں اٹھائیں گے اور نہ حادثات کو استعمال کرکے اسلامی قوانین کوختم کرنےکی اجازت دیں گے۔
انہوں نے کہا کہ ہم ظلم کو ظلم کہیں گے اوراسلام کیخلاف کوئی بات قبول نہیں کریں گے۔ مرے ہوئے سانپ پرلاٹھیاں برسانا محض وقت کا ضیاع ہے۔
دیر:خیبرپختونخواہ کےعلاقے لواری ٹاپ کے قریب مسافر بس کھائی میں گرنے سے 10افرادجاں بحق ا ور متعدد زخمی ہو گئے۔
تفصیلات کےمطابق خیبرپختونخواہ میں لواری ٹاپ کے قریب راولپنڈی سے چترال جانے والی مسافربس تیز رفتاری کےباعث بے قابو ہوکرکھائی میں جاگری۔حادثےمیں خواتین اوربچوں سمیت10افراد جان کی بازی ہارگئے۔
ریسکیو حکام کےمطابق حادثے میں زخمی ہونےو الے افراد کو قریبی اسپتال منتقل کردیاگیاہے جبکہ ڈی ایچ کیو اسپتال میں ایمرجنسی نافذ کردی گئی ہے۔
دوسری جانب لاہور کے علاقےشاد باغ میں ٹریکٹر اور رکشے میں تصادم کےنتیجے میں ڈرائیورتین بچوں سمیت جاں بحق جبکہ دو خواتین زخمی ہوگئیں۔
ریسکیو حکام کےمطابق حادثے میں بچوں کی والدہ اور خالہ شدید زخمی ہیں جنہیں تشویش ناک حالت میں میو اسپتال منتقل کر دیا گیا ہے۔
حادثے میں جاں بحق ہونے والےبچوں کی عمریں 4سے6سال کے درمیان ہیں جن کی لاشوں کو میو اسپتال منتقل کردیاگیاہے۔
واضح رہےکہ صوبہ خیبرپختونخواہ کےشہر حویلیاں کےقریب 6گاڑیاں آپس میں ٹکرانے سے 5افراد جان کی بازی ہارگئے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں
