Category: خیبر پختونخواہ

دوہزار چودہ کے آغاز ہی میں دنیا بھر میں پولیو کے چار کیسز سامنے آگئے، چاروں کا تعلق پاکستان کے قبائلی علاقے سے ہے، خیبرپختونخواہ نے آج سے شروع ہونے والی انسداد پولیو مہم موخر کردی۔

سال نو کے آغاز ہی میں دنیا میں پولیو کے چار مزید کیس سامنے آگئے اور ان چاروں کیسز کا تعلق شمالی وزیرستان کے علاقے میر علی سے ہے، قومی ادارہ صحت کے مطابق قبائلی علاقوں میں ساٹھ ہزار سے زائد بچے پولیو سے بچاؤ کے قطرے پینے سے محروم ہیں۔

سیکیورٹی خدشات کے باعث خیبر پختونخوا حکومت نے آج سے پشاور میں شروع ہونے والی انسداد پولیو مہم موخر کردی، وزیراعلی سیل برائے انسداد پولیوکے مطابق سیکیورٹی اور دیگر انتطامات کو یقینی بنانے کے بعد انسداد پولیو مہم چھبیس جنوری سے شروع کی جائے گی تاکہ اس مہم کو کامیاب بنایا جاسکے۔

بلوچستان کے ضلع جعفر آباد میں آج سے انسداد پولیم مہم شروع کی جائے گی، ڈی ایچ اور ہیلتھ کے مطابق ڈیرہ اللہ یار، صحبت پور اور اوستا محمد میں تین روز کے دوران ایک لاکھ بہتر ہزار بچوں کو پولیو سے بچاؤ کے قطرے پلائے جائیں گے۔
   

پشاورکےتبلیغی مرکزمیں ہونےوالےبم دھماکےکی فرانزک رپورٹ جاری کردی گئی۔رپورٹ کے مطابق دھماکے کے لئے منصوبہ بندی کے تحت جمعرات کاانتخاب کیاگیا ،ناکارہ کیےگئےبم پھٹ جاتے توجانی نقصان زیادہ ہوتا۔

پشاور کے تبلیغی مرکز میں دھماکے کی فرانزک رپورٹ جاری کردی گئی ہے ۔رپورٹ کے مطابق تبلیغی مرکز میں رکھے گئے تینوں بم ایک ہی ساخت کے تھےجنہیں موبائل سےمنسلک کرکے آپریٹ کیاگیا تاہم دو بم بیٹری ہلنےکے باعث پھٹ نہیں سکے۔

تینوں بموں میں پرائم کارڈ اور بال بیرنگ کا استعمال کیاگیا تھا۔۔۔بموں کو گھی کے ڈبوں میں رکھا گیاتھا ۔۔۔بم موبائل سئ منسلک ہونے پر کسی بھی جگہ سے باآسانی آپریٹ کئے جاسکتے تھے ۔۔رپورٹ کے مطابق دھماکے کے لئے منصوبہ بندی کے تحت جمعرات کا انتخاب کیا گیا تھا ۔

ناکارہ کیے گئے بم اگرپھٹ جاتے توجانی نقصان زیادہ ہوتا۔۔۔ ناکارہ بنائے جانے والے بموں کے ساتھ منسلک موبائل فون کا ڈیٹا بھی حاصل کیا جائے گا ۔۔۔ فرانزک رپورٹ آئی جی خیبر پختونخوااوروفاقی وزارت داخلہ کو ارسال کر دی گئی۔

پشاور کے صرافہ بازار میں آگ لگ گئی، جس کے باعث اسی سے زائد دکانیں جل کر خاکستر ہوگئیں۔

ریسکیو ذرائع کے مطابق پشاور کے صرافہ بازار میں علیٰ الصبح آگ بھڑک اٹھی، جس نے دیکھتے ہی دیکھتے سو سے زائد دکانوں کو اپنی لپیٹ میں لے لیا، جس کے بعد اسی سے زائد دکانیں ملبے کے ڈھیر میں تبدیل ہوگئیں۔

ریسکیو ذرائع کے مطابق تنگ گلیاں ہونے کے باعث امدادی کارروائیوں میں مشکلات کا سامنا کرنا پڑا، تاہم کوششوں کے بعد آگ پر قابو پالیا گیا۔

دوسری جانب صرافہ مارکیٹ ایسوسی ایشن کے مطابق دکانوں میں کروڑوں روپے کا سونا موجود ہے اور جس سے دکانداروں کو بڑے مالی نقصان کا سامنا ہے۔
   

:      عالمی ادارہ صحت نے پشاور کو دنیا بھر میں پولیو وائرس کا مرکز قرار دے دیا۔

عالمی ادارہ صحت کے اعلامیہ کے مطابق پاکستان بھر میں پائے جانے والے نوے فیصد پولیو کیسز کا جینیاتی تعلق پشاور سے جاملتا ہے، پاکستان دنیا کا واحد ملک ہے جہاں دو ہزار بارہ کے برعکس دو ہزار تیرہ میں پولیو کیسز کی تعداد میں اضافہ ہوا ہے۔

پولیو وائرس کے حوالے سے قائم علاقائی ریفرنس لیبارٹری کے نتائج کے مطابق پاکستان میں سامنے آنے والے اکیانوے کیسوں میں تراسی کا جینیاتی تعلق پشاور سے ملتا ہے۔

عالمی ادارہ صحت نے بتایا کہ گذشتہ چار سالوں کے دوران پشاور کے مختلف علاقوں سے جمع کیے گئے سیوریج کے چھیاسی نمونوں میں سے بہتر مہلک پولیو وائرس کے نمونے پائے گئے۔

گذشتہ چھ ماہ میں پشاور کے مختلف علاقوں سے جمع کیے گئے سیوریج کے تمام نمونوں میں پولیو وائرس پائے گئے، پشاور میں گذشتہ پانچ سالوں کے دوران پولیو کے پینتالیس کیس سامنے آئے ہیں۔

پشاور اور قبائلی علاقوں میں پولیو وائرس کے تباہ کن پھیلاوٴ کے باعث قبائلی علاقوں میں گذشتہ برس پینسٹھ بچے معذور ہوگئے تھے، عالمی ادارہ صحت نے اس صورتحال کے پیش نظر متواتر بہترین معیار کی پولیو ویکسین مہم چلانے کی ضرورت پر زور دیا ہے، جس کی سخت مانیٹرنگ کی تجویز بھی دی گئی ہے۔

پشاور پولیس نے چارسدہ روڈ پر بم دھماکے کا نشانہ بننے والے تبلیغی مرکز کی سیکورٹی سنبھال لی ہے، مرکزی دروازے پر واک تھرو گیٹ لگا دیا گیا ہے، نماز جمعہ معمول کے مطابق ادا کی جائے گی۔

پشاور میں چارسدہ روڈ کے تبلیغی مرکز میں نماز مغرب کے دوران آخری صف میں دھماکا ہوا اور مسجد میں خون ہی خون پھیل گیا، دھماکے میں دس افراد جاں بحق اور متعدد زخمی ہوئے۔

دھماکے کے بعد جائے وقوعہ پر بھگدڑ مچ گئی، دھماکا سنتے ہی اہل علاقہ نے زخمیوں کو اسپتال منتقل کیا، دھماکا اس قدر شدید تھا کہ شہر کے کئی علاقوں میں سنا گیا۔

دھماکے کے بعد نمازیوں نے صفیں ایک مرتبہ پھر ترتیب دیں اور نماز مغرب ادا کی جبکہ عشاء کی نماز میں بھی بڑی تعداد میں لوگ شریک تھے، اے آئی جی شفقت محمود کے مطابق تبلیغی مرکز میں تلاشی کے دوران مزید دو بم ملے، پانچ پانچ کلو کے دونوں بم گھی کے ڈبوں میں نصب تھے،جنھیں روبوٹ کے ذریعے باہر نکالا اور ناکارہ بنایا گیا۔

 دھماکے کے بعد پشاور کے لیڈی ریڈنگ اسپتال سمیت تمام اسپتالوں میں ایمرجنسی نافذ کر دی گئی اور زخمیوں کو طبی امداد دی گئی ، اس دوران پشاور بھر میں ریڈ الرٹ کردیا گیا۔

تبلیغی مرکز کو خالی کروا کے علاقے کو سیل کردیا گیا، تبلیغی مرکز کو مکمل تلاشی کے بعد کھولا دیا گیا، بم دھماکے کا مقدمہ تھانہ مچمی میں نامعلوم افراد کیخلاف درج کرلیا گیا ہے۔
   

پشاور میں تبلیغی مرکز دھماکے کا مقدمہ تھانہ مچمی میں نامعلوم افراد کیخلاف درج کرلیا گیا جبکہ علاقہ کو کلئیر قرار دے دیا گیا۔

پشاور پولیس کے مطابق پولیس اور بم ڈسپوزل اسکواڈ نے علاقہ کی مکمل تلاشی کے بعد تبلیغی مرکز کو کلئیر قرار دیدیا جبکہ پولیس کی جانب سے واقعہ کا مقدمہ تھانہ مچمی میں نامعلوم افراد کے خلاف درج کرلیا گیا ہے۔

پولیس ذرائع کے مطابق تبلیغی مرکز کی انتظامیہ خود مرکز پر سیکیورٹی کے فرائض انجام دیتی تھی، اب تبلیغی مرکز کو سیکورٹی بھی فراہم کر دی جائے گی۔

پشاور ہائیکورٹ میں لاپتہ افراد کو حراست میں لینے میں ملوث اہلکاروں کیخلاف کارروائی کا حکم دیا ہے۔

پشاور ہائیکورٹ میں چار سو تیرہ لاپتہ افراد سے متعلق کیس کی سماعت جسٹس فصیح الملک اور جسٹس ارشاد قیصر پر مشتمل دو رکنی بینچ نے کیس کی سماعت کی۔

محکمہ داخلہ کی جانب سے ڈپٹی سیکیریٹری عثمان زمان عدالت میں پیش ہوئے، سماعت کے دوران ڈپٹی اٹارنی جنرل مزمل شاہ کا کہنا تھا کہ اٹھارہ لاپتہ افراد کو حراستی مراکز میں منتقل کردیا گیا ہے۔

پشاور ہائیکورٹ نے آئی جی خیبرپختونخوا کو ہدایت کی کہ لاپتہ افراد کو اٹھانے میں ملوث پولیس اہلکاروں کے خلاف کاروائی کی جائے، ڈپٹی اٹارنی جنرل نے عدالت کو تفصیلی رپورٹ جمع کرانے کے لئے ایک ماہ کی مہلت مانگی۔

جس پر عدالت نے کیس کی سماعت چھبیس فروری تک ملتوی کرتے ہوئے آئندہ سماعت پر تفصیلی رپورٹ جمع کرانے کا حکم دیا۔