ARYNews.tv | Urdu – Har Lamha Bakhabar

Category: پاکستان

پاکستان اردو نیوز

ملک پاکستان میں اے آر وائی نیوز کی جانب سے آنے والی تازہ ترین خبریں

Pakistan Urdu News- Daily Pak Urdu News

  • بھارتی ایجنسی را کیلئے کام کرنے والے ملزم کو عدالتی ریمانڈ پر جیل بھیج دیا گیا

    بھارتی ایجنسی را کیلئے کام کرنے والے ملزم کو عدالتی ریمانڈ پر جیل بھیج دیا گیا

    کراچی : بھارتی ایجنسی کیلئے کام کرنے والے ملزم ارسلان کو عدالتی ریمانڈ پر جیل بھیجتے ہوئے 9 ستمبر تک تفتیشی افسر کو چارج شیٹ پیش کرنے کا حکم دے دیا۔

    تفصیلات کے مطابق انسداد دہشت گردی کی عدالت میں بھارتی خفیہ ایجنسی "را” کے لیے کام کرنے والے ملزم ارسلان کو پیش کیا گیا،

    تفتیشی افسر نے بتایا کہ ملزم ارسلان نے دیگر گرفتار ملزمان کی سہولت کاری کی اور انہیں رقم بھی پہنچائی، اس نے قتل سے قبل اور بعد میں رقوم کی ترسیل بھی کی، استدعا ہے کہ ملزم سے مزید تفتیش کرنی ہے جسمانی ریمانڈ دیا جائے۔

    تفتیشی افسر کا کہنا تھا کہ ملزم عمیر نے جے آئی ٹی کے سامنے انکشاف کیا تھا کہ عبد الرحمان عرف رضا اللہ کا قتل سندھ کے شہر ماتلی میں کیا گیا، جس کے لیے اسلحہ کی فراہمی بھی عمیر نے کی۔

    مزید پڑھیں : دہشت گردی کا الزام ثابت، بھارتی جاسوس کو 20 سال قید کی سزا سنادی گئی

    تفتیشی رپورٹ کے مطابق قتل میں استعمال ہونے والا اسلحہ ملزم عمیر نے فراہم کیا جبکہ 33 لاکھ روپے محمد سلمان اور فہد نصیر کے اکاؤنٹس میں منتقل کیے گئے۔

    سی ٹی ڈی کے مطابق ملزمان کے خلاف قتل، اقدام قتل اور غیر قانونی اسلحہ رکھنے کے مقدمات درج کیے گئے ہیں، جبکہ مزید ساتھیوں کی گرفتاری کے لیے ملزمان سے مزید تفتیش درکار ہے۔

    عدالت نے ملزم کو عدالتی ریمانڈ پر جیل بھیجتے ہوئے 9 ستمبر تک تفتیشی افسر کو چارج شیٹ پیش کرنے کا حکم دے دیا۔

  • اقوام متحدہ نے پاکستان میں مائیگریشن نیٹ ورک قائم کردیا

    اقوام متحدہ نے پاکستان میں مائیگریشن نیٹ ورک قائم کردیا

    اسلام آباد: اقوام متحدہ نے پاکستان میں مائیگریشن نیٹ ورک قائم کردیا ، یو این این ایم کا قیام انسانی ہجرت اور تارکین وطن کی اسمگلنگ جیسی مشکلات سے نمٹنے کی طرف ایک اہم قدم ہے۔

    تفصیلات کے مطابق اقوام متحدہ نے پاکستان میں یونائیٹڈ نیشنز نیٹ ورک آن مائیگریشن قائم کردیا۔ اس حوالے سے اسلام آباد میں افتتاحی تقریب منعقد ہوئی جس میں مختلف وزارتوں کے حکام اور یو این نمائندوں نے شرکت کی۔

    وزارت داخلہ کے حکام سیپ جان نے تقریب سے خطاب کرتے ہوئے بتایا کہ حالیہ واقعات کے بعد حکومت نے غیر قانونی ہیومن ٹریفکرز اور اسمگلرز کے خلاف بڑے پیمانے پر کریک ڈاؤن کیا ہے۔ اب تک 1,550 انسانی اسمگلرز کو گرفتار کیا جاچکا ہے جبکہ 53 موسٹ وانٹڈ ٹریفکرز کو ریڈ نوٹس میں شامل کیا گیا ہے۔ ان اسمگلرز کے بینک اکاؤنٹس اور جائیدادیں بھی منجمد کردی گئی ہیں۔

    سیپ جان کا کہنا تھا کہ پاکستان انسانی اسمگلنگ کے خلاف مؤثر اقدامات کر رہا ہے اور صرف 2024 میں تقریباً 28 ہزار افراد کو آف لوڈ کیا گیا، یو این این ایم کا قیام انسانی ہجرت اور تارکین وطن کی اسمگلنگ جیسی مشکلات سے نمٹنے کی طرف ایک اہم قدم ہے۔

    اس موقع پر اقوام متحدہ کے ریزیڈنٹ کوآرڈینیٹر محمد یحیی نے کہا کہ نیٹ ورک کا قیام اجتماعی عزم کا مظہر ہے کہ انسانی ہجرت محفوظ اور منظم ہونی چاہیے، یہ نیٹ ورک ایسا پلیٹ فارم فراہم کرے گا جس کے ذریعے ہجرت کے بیانیے کو مثبت انداز میں بدلا جاسکے گا۔

    ان کا مزید کہنا تھا کہ اقوام متحدہ انسانی نقل و حرکت سے جڑی مشکلات کے حل اور تارکین وطن کے حقوق کے تحفظ کے لیے پرعزم ہے۔

    افتتاحی تقریب میں یو این مائیگریشن نیٹ ورک سیکرٹریٹ کے سربراہ جوناتھن پرینٹس کا ویڈیو پیغام بھی دکھایا گیا، تقریب میں وزارت خارجہ، وزارت داخلہ اور وزارت برائے سمندر پار پاکستانیوں کے نمائندوں نے بھی شرکت کی۔

  • پاکستان کی افغانستان کو تباہ کن زلزلے سے جانی اور مالی نقصان پر ہر ممکن امداد کی پیشکش

    پاکستان کی افغانستان کو تباہ کن زلزلے سے جانی اور مالی نقصان پر ہر ممکن امداد کی پیشکش

    اسلام آباد(یکم ستمبر 2025): وزیراعظم پاکستان نے افغانستان کو تباہ کن زلزلے سے جانی اور مالی نقصان پر ہر ممکن امداد کی پیشکش کردی۔

    تفصیلات کے مطابق وزیراعظم محمد شہباز شریف نے افغانستان میں تباہ کن زلزلے سے جانی و مالی نقصان پر اظہارِ افسوس کرتے ہوئے کہا ہے غم کی اس گھڑی میں افغان بہن بھائیوں کے ساتھ کھڑے ہیں۔

    وزیراعظم نے مشرقی افغانستان میں آنے والے تباہ کن زلزلے پر شدید رنج کا اظہار کیا اور کہا کہ سینکڑوں قیمتی انسانی زندگیوں کے نقصان اور درجنوں قصبوں کی تباہی پر متاثرین سے اظہارِ ہمدردی کرتے ہیں۔

    وزیراعظم محمد شہباز شریف نے کہا کہ حکومت پاکستان اور عوام کی جانب سے متاثرین کے ساتھ دلی اظہار یکجہتی کرتے ہیں۔

    دوسری جانب صدرِ پاکستان آصف علی زرداری نے افغان زلزلہ متاثرین سے دلی تعزیت کی ہے، افغانستان میں جاں بحق افراد کے اہل خانہ سے گہرے دکھ کا اظہار کیا اور کہا کہ مشکل کی اس گھڑی میں پاکستان افغان عوام کے ساتھ کھڑا ہے۔

    صدر مملکت نے جاری پیغام میں کہا کہ زخمیوں کی جلد صحتیابی اور متاثرہ خاندانوں کے حوصلے کے لیے دعاگو ہوں، الّلہ تعالیٰ جاں بحق افراد کو جنت میں جگہ دے اور لواحقین کو صبر عطا فرمائے۔

    افغانستان میں زلزلہ، 800 افراد جاں بحق

    اتوار اور پیر کی درمیانی شب شمالی افغانستان میں 6 شدت کا خوف ناک زلزلہ آیا ہے، جس کے نتیجے میں آٹھ سو افراد جاں بحق اور ترجمان افغان وزارت داخلہ کے مطابق 2500 سے زائد شہری زخمی ہیں۔

    امریکی جیولوجیکل سروے کے مطابق زلزلے کا مرکز صوبہ ننگرہار کے شہر جلال آباد کے قریب تھا اور اس کی گہرائی 8 کلو میٹر ریکارڈ کی گئی۔ زلزلے کے 20 منٹ بعد ہی 4.5 شدت کا ایک اور جھٹکا محسوس کیا گیا، جس کی گہرائی 10 کلو میٹر تھی۔

    ترجمان افغان طالبان ذبیح اللّٰہ مجاہد نے سوشل میڈیا پر جاری پیغام میں کہا کہ آج رات آنے والے زلزلے کے باعث جانی و مالی نقصان ہوا ہے، مقامی حکام اور امدادی ٹیمیں اور علاقہ مکین متاثرہ افراد کے ساتھ امدادی سرگرمیوں میں مصروف ہیں، جو متاثرہ علاقوں میں ریسکیو اور بحالی کے کاموں میں حصہ لے رہی ہیں۔

  • کراچی : راشد منہاس روڈ پر ڈمپرز جلانے والے 16 ملزمان کی ضمانت منظور

    کراچی : راشد منہاس روڈ پر ڈمپرز جلانے والے 16 ملزمان کی ضمانت منظور

    کراچی : راشد منہاس روڈ ڈمپرز جلانے کے مقدمات میں 16 ملزمان کی ضمانت منظور کرلی گئی، عدالت نے 19 اگست کو تمام ملزمان کو جوڈیشل ریمانڈ پر جیل بھیجا تھا۔

    کراچی کی انسداد دہشت گردی عدالت میں راشد منہاس روڈ پر ڈمپرز جلانے کے مقدمات میں 16 ملزمان کی ضمانت کی درخواستوں پر سماعت ہوئی۔

    عدالت نے دونوں مقدمات میں تمام ملزمان کی ضمانت منظور کرلی اور یوسف پلازہ تھانے کے مقدمے میں گرفتار 9 ملزمان کو ایک، ایک لاکھ روپے کے مچلکے جمع کرانے کا حکم دیا، جبکہ ایف بی انڈسٹریل ایریا کے مقدمے میں گرفتار 7 ملزمان کو بھی ایک، ایک لاکھ روپے کے مچلکے جمع کرانے کی ہدایت کی گئی۔

    یاد رہے کہ عدالت نے 19 اگست کو تمام ملزمان کو جوڈیشل ریمانڈ پر جیل بھیجا تھا۔

    پولیس کے مطابق واقعہ اس وقت پیش آیا تھا جب راشد منہاس روڈ پر ڈمپر کی ٹکر سے ایک بہن بھائی جاں بحق ہوگئے تھے۔

    افسوسناک حادثے کے بعد مشتعل افراد نے ڈمپرز کو آگ لگا دی تھی، جس پر انسداد دہشت گردی کی دفعات کے تحت مقدمہ درج کیا گیا تھا۔

    بعد ازاں راشد منہاس روڈ پر ڈمپر اور موٹر سائیکل کے خوفناک حادثے کے بعد شر پسندوں کی جانب سے سات ڈمپرز کو اگ لگانے کے واقعے کی تحقیقات کے لئے ایڈیشنل آئی جی کراچی نے چار رکنی تحقیقاتی ٹیم تشکیل دی تھی۔

    ڈی آئی جی ویسٹ زون عرفان علی بلوچ کی سربراہی میں تحقیقاتی ٹیم تشکیل دی گئی جس میں ایس ایس پی سینٹرل ذیشان شفیق صدیقی، ایس ایس پی ویسٹ طارق الٰہی مستوئی اور ایس پی انویسٹی گیشن ویسٹ ون انعم تجمل شامل تھے۔

    ٹیم کو ملزمان کی شناخت، گرفتاری اور ٹھوس شواہد جمع کرنے کی ہدایت کی گئی ہے اور تحقیقات کی پیش رفت کی رپورٹ روزانہ کی بنیاد پر پیش کرنے کا حکم دیا گیا تھا۔

  • بھارت نے پاکستان کو ستلج میں 2 مقامات پر سیلاب سے متعلق آگاہ کردیا

    بھارت نے پاکستان کو ستلج میں 2 مقامات پر سیلاب سے متعلق آگاہ کردیا

    لاہور : بھارت نے پاکستان کو ستلج میں دو مقامات پر سیلاب سے متعلق آگاہ کردیا ، جس کے بعد پی ڈی ایم اے نے اضلاع کو الرٹ جاری کردیا۔

    تفصیلات کے مطابق بھارتی ہائی کمیشن نے دریائے ستلج میں دو مقامات پر سیلابی صورتحال سے متعلق پاکستان کو آگاہ کیا ہے، ہریک اور فیروزپور سے نیچے ہائی فلڈ کی اطلاع موصول ہونے پر وزارت آبی وسائل نے فوری طور پر چاروں صوبوں کے چیف سیکرٹریز کو آگاہ کردیا ہے۔

    دوسری جانب پی ڈی ایم اے کی جانب سے کہا گیا کہ دریائے ستلج ہریکے کے مقام پر پانی کے بہاؤ میں نمایاں اضافہ ہوا ہے، جس کے باعث ڈاؤن اسٹریم پر اونچے درجے کے سیلاب کی وارننگ جاری کردی گئی ہے۔

    ترجمان کا کہنا تھا کہ دریائے ستلج اور اس سے ملحقہ ندی نالوں میں پانی کے بہاؤ میں مزید اضافہ متوقع ہے۔

    پی ڈی ایم اے پنجاب نے متعلقہ اضلاع کے ڈپٹی کمشنرز کو ہائی الرٹ رہنے کی ہدایت کردی ہے، لاہور، ساہیوال، ملتان، بہاولپور اور ڈیرہ غازی خان کے کمشنرز سمیت قصور، اوکاڑہ، پاکپتن، وہاڑی، بہاولنگر، لودھراں اور مظفرگڑھ کے ڈپٹی کمشنرز کو بھی الرٹ جاری کردیا گیا ہے۔

    مزید برآں، لوکل گورنمنٹ، محکمہ زراعت، آبپاشی، صحت، جنگلات، لائیو اسٹاک اور ٹرانسپورٹ سمیت تمام متعلقہ اداروں کو بھی ہائی الرٹ پر رہنے کی ہدایت کی گئی ہے۔

    ڈی جی پی ڈی ایم اے نے کہا کہ ہنگامی صورتحال سے نمٹنے کے لیے ریسکیو ٹیموں کو حساس مقامات پر تعینات کیا جائے، موسلا دھار بارشوں کی صورت میں شہریوں کو پیشگی آگاہ کیا جائے۔

    ڈی جی پی ڈی ایم اے نے شہریوں سے اپیل کی گئی ہے کہ وہ ضلعی انتظامیہ اور ریسکیو اداروں کے ساتھ مکمل تعاون کریں۔

  • پاک فوج کا ایم آئی 17 ہیلی کاپٹر گر کر تباہ ، پائلٹس اور عملے سمیت 5 اہلکار شہید

    پاک فوج کا ایم آئی 17 ہیلی کاپٹر گر کر تباہ ، پائلٹس اور عملے سمیت 5 اہلکار شہید

    راولپنڈی :پاک فوج کا ایم آئی 17 ہیلی کاپٹر گر کر تباہ ہوگیا ، جس کے نتیجے میں پائلٹس اور عملے سمیت 5 اہلکار شہید ہوگئے۔

    تفصیلات کے مطابق پاک فوج کے شعبہ تعلقات عامہ ( آئی ایس پی آر) کی جانب سے بیان میں کہا گیا ہے کہ پاک فوج کا ایم آئی 17 ہیلی کاپٹر ہوڈور کے قریب حادثے کا شکار ہوگیا، حادثے میں پائلٹس اور عملے سمیت 5 اہلکار شہید ہوگئے۔

    آئی ایس پی آر کا کہنا تھا کہ شہداء میں پائلٹ میجر عاطف، کو پائلٹ میجر فیصل، نائب صوبیدار مقبول، حوالدار جہانگیر اور نائیک عامر شامل ہیں تاہم حادثے کی وجوہات جاننے کے لیے تحقیقات جاری ہیں۔

    واقعے کی اطلاع ملتے ہی ضلعی انتظامیہ، ریسکیو ادارے اور متعلقہ حکام جائے وقوعہ پر پہنچ گئے، کمانڈر ایف سی این، ڈی جی گلگت بلتستان اسکاؤٹس اور کمشنر دیامر بھی موقع پر موجود ہیں جبکہ مقامی افراد کی بڑی تعداد بھی جائے وقوعہ پر جمع ہوگئی۔

    وزیر اعلیٰ گلگت بلتستان نے حادثے پر افسوس کا اظہار کرتے ہوئے فوری طور پر امدادی سرگرمیاں تیز کرنے اور متعلقہ حکام کو ہدایت کی ہے کہ وہ صورتحال پر قریبی نظر رکھیں۔

    وفاقی وزیرداخلہ محسن نقوی نے کوہ ڈور کے قریب آرمی ایوی ایشن کے ہیلی کاپٹر کی کریش لینڈنگ اور حادثے میں افسران و جوانوں کی شہادت پر گہرے دکھ اور افسوس کا اظہار کیا ہے۔

    محسن نقوی نے شہید پائلٹ میجر عاطف، میجر فیصل سمیت عملے کے پانچوں شہداء کو خراجِ عقیدت پیش کرتے ہوئے نائب صوبیدار مقبول، حوالدار جہانگیر اور نائیک عامر کی قربانیوں کو بھی سلام پیش کیا۔

    وفاقی وزیر داخلہ نے شہداء کے لواحقین سے اظہار تعزیت کرتے ہوئے کہا کہ شہداء نے فرض کی ادائیگی کے دوران اپنی جانوں کا نذرانہ پیش کیا، پوری قوم ان کی قربانی پر فخر کرتی ہے۔

    ان کا مزید کہنا تھا کہ حکومت اور عوام اس دکھ کی گھڑی میں سوگوار خاندانوں کے ساتھ کھڑے ہیں، اللہ تعالیٰ شہداء کے درجات بلند کرے اور اہل خانہ کو صبر جمیل عطا فرمائے۔

  • پی ٹی آئی کا قومی اسمبلی کے ضمنی انتخابات کے بعد سینیٹ الیکشن کے بائیکاٹ کا اعلان

    پی ٹی آئی کا قومی اسمبلی کے ضمنی انتخابات کے بعد سینیٹ الیکشن کے بائیکاٹ کا اعلان

    اسلام آباد : پاکستان تحریک انصاف (پی ٹی آئی) نے قومی اسمبلی کے ضمنی انتخابات کے بعد سینیٹ کے الیکشن کے بائیکاٹ کا اعلان کردیا۔

    تفصیلات کے مطابق پاکستان تحریک انصاف (پی ٹی آئی) نے پارٹی کے بانی اور جیل میں قید چیئرمین عمران خان کی ہدایت پر آئندہ تمام ضمنی انتخابات کے بائیکاٹ کا اعلان کر دیا ہے، تاہم میاں اظہر کی خالی نشست پر انتخاب میں حصہ لیا جائے گا۔

    تحریک انصاف نے واضح کیا کہ سینیٹ میں اعجاز چوہدری کی خالی نشست کے انتخاب کا بھی بائیکاٹ کیا جائے گا، بانی نے کہا ہے کہ نو مئی کیسزمیں پی ٹی آئی ارکان کوناحق سزادی گئی، بنیادی حقوق پامال کیے گئے، یہ انتقامی کارروائی کی بدترین مثال ہے۔

    تحریک انصاف نے سینیٹ انتخابات کے بائیکاٹ کا اعلان کیا، عمران خان کی ہدایت پر اعجاز چوہدری کی نشست کے لیے ان کی اہلیہ سلمیٰ اعجاز کو نامزد کیا گیا تھا۔

    سلمیٰ اعجاز نے کہا جعلی انتخابات کا حصہ نہیں بنوں گی، پی ٹی آئی کا یہ فیصلہ دوٹوک پیغام ہے، پارٹی غیر منصفانہ انتخابی عمل کو تسلیم نہیں کرے گی۔

    مزید پڑھیں : پی ٹی آئی کے 18 ارکان قومی اسمبلی کی قائمہ کمیٹیوں سے مستعفی

    پارٹی کی جانب سے بیان میں کہا گیا کہ عمران خان اور پی ٹی آئی اس فیصلے کے ذریعے یہ واضح پیغام دینا چاہتے ہیں کہ وہ کسی بھی غیر منصفانہ انتخابی عمل کو قبول نہیں کریں گے۔

    دوسری جانب انسداد دہشت گردی کی عدالت (اے ٹی سی) نے عمران خان کی سات مقدمات میں بعد از گرفتاری ضمانت کی درخواستیں سماعت کے لیے منظور کر لی ہیں، یہ مقدمات تشدد، جلاؤ گھیراؤ، قتل کی سازش اور اشتعال انگیزی سے متعلق ہیں جو گزشتہ سال ستمبر اور نومبر میں مختلف تھانوں میں درج کیے گئے تھے۔

    وہ اس وقت اڈیالہ جیل میں جوڈیشل ریمانڈ پر ہیں، عدالت نے تمام فریقین کو نوٹس جاری کر دیے ہیں جبکہ ان درخواستوں پر سماعت یکم ستمبر کو راولپنڈی کی انسداد دہشت گردی عدالت میں ہوگی۔

  • ملک بھر کے 99 مخصوص اضلاع میں مرحلہ وار پولیو مہم کا آغاز

    ملک بھر کے 99 مخصوص اضلاع میں مرحلہ وار پولیو مہم کا آغاز

    اسلام آباد : ملک بھر کے 99 مخصوص اضلاع میں مرحلہ وار پولیو مہم کا آغاز کردیا گیا، جس میں 2 کروڑ 80 لاکھ سے زائد بچوں کو پولیو سے بچاؤ کے دو قطرے پلائے جائیں گے۔

    تفصیلات کے مطابق نیشنل ایمرجنسی آپریشنز سینٹر کے مطابق ملک بھر کے 99 مخصوص اضلاع میں مرحلہ وار انسدادِ پولیو مہم کا آغاز کر دیا گیا ہے، جس کے دوران 2 کروڑ 80 لاکھ سے زائد بچوں کو پولیو سے بچاؤ کے دو قطرے پلائے جائیں گے۔

    اس قومی مہم میں 2 لاکھ 40 ہزار سے زائد پولیو ورکرز ذمہ داریاں سرانجام دے رہے ہیں۔

    اعداد و شمار کے مطابق پنجاب کے 7 اضلاع میں 41 لاکھ سے زائد بچوں کو پولیو سے بچاؤ کے قطرے پلائے جائیں گے، تاہم صوبے کے 9 اضلاع میں حالیہ سیلابی صورتحال کے باعث مہم کو مؤخر کر دیا گیا ہے۔

    سندھ کے 25 مخصوص اضلاع میں 89 لاکھ، بلوچستان کے 26 اضلاع میں 21 لاکھ جبکہ خیبرپختونخوا کے 27 اضلاع میں 57 لاکھ سے زائد بچوں کو ویکسین پلائی جائے گی۔ جنوبی خیبرپختونخوا میں پولیو مہم کا آغاز 15 ستمبر سے ہوگا۔

    اسی طرح آزاد جموں و کشمیر اور گلگت بلتستان کے 2،2 اضلاع میں بھی بچوں کو پولیو سے بچاؤ کے قطرے پلائے جائیں گے جبکہ اسلام آباد میں 4 لاکھ 50 ہزار سے زائد بچوں کو عمر بھر کی معذوری سے محفوظ بنانے کے لیے ویکسین دی جائے گی۔

    نیشنل ایمرجنسی آپریشنز سینٹر نے والدین سے اپیل کی ہے کہ جب بھی پولیو ٹیم دروازے پر آئے تو ان کے ساتھ تعاون کریں اور اپنے پانچ سال سے کم عمر بچوں کو لازمی طور پر قطرے پلوائیں۔

    نیشنل ایمرجنسی آپریشنز سینٹر کی جانب سے والدین کو حفاظتی ٹیکہ جات کا کورس بھی بروقت مکمل کروانے کی تاکید کی گئی ہے تاکہ بچے پولیو سمیت دیگر بیماریوں سے محفوظ رہ سکیں۔

  • کراچی سے کالعدم ٹی ٹی پی اور القاعدہ برصغیر کے 5 دہشت گرد گرفتار

    کراچی سے کالعدم ٹی ٹی پی اور القاعدہ برصغیر کے 5 دہشت گرد گرفتار

    کراچی : محکمہ انسدادِ دہشت گردی (سی ٹی ڈی) نے کراچی سےکالعدم ٹی ٹی پی اور القاعدہ برصغیر کے 5 دہشت گردوں کو گرفتار کرلیا۔

    تفصیلات کے مطابق محکمہ انسدادِ دہشت گردی (سی ٹی ڈی) اور وفاقی حساس اداروں نے مشترکہ کارروائی کرتے ہوئے شہر میں دہشت گردی کا بڑا منصوبہ ناکام بنا دیا۔

    کارروائیاں منگھوپیر اور کشمیر روڈ کے علاقوں میں کی گئیں جن کے دوران کالعدم تنظیموں کے 5 دہشت گرد گرفتار کرلیے گئے۔

    سی ٹی ڈی نے بتایا کہ گرفتار ملزمان میں تحریک طالبان پاکستان (ٹی ٹی پی) کے اللہ نور اور سرفراز شامل ہیں، جبکہ القاعدہ برصغیر سے تعلق رکھنے والے سلیم، جہانزیب اور امداد اللہ کو بھی حراست میں لیا گیا۔

    ترجمان کا کہنا ہے کہ یہ تمام دہشت گرد فتنہ الخوارج اور القاعدہ برصغیر کے نیٹ ورک سے وابستہ تھے۔

    ترجمان نے مزید کہا کہ گرفتار دہشت گرد پڑوسی ملک میں عسکری تربیت حاصل کرچکے ہیں اور کراچی میں بڑی تخریبی کارروائیوں کی منصوبہ بندی کررہے تھے۔ ملزمان کے قبضے سے بھاری مقدار میں غیرقانونی اسلحہ بھی برآمد ہوا ہے۔

    ترجمان کے مطابق ملزمان کے خلاف غیرقانونی اسلحہ رکھنے اور دہشت گردی کے الزامات کے تحت تھانہ سی ٹی ڈی میں مقدمات درج کرلیے گئے ہیں۔ مزید تحقیقات جاری ہیں تاکہ سہولت کاروں اور نیٹ ورک کے دیگر کارندوں تک رسائی حاصل کی جا سکے۔

  • ’’بھارت نے وفاقی حکومت کو ایک نئے سیلابی ریلے سے آگاہ کر دیا‘‘

    ’’بھارت نے وفاقی حکومت کو ایک نئے سیلابی ریلے سے آگاہ کر دیا‘‘

    لاہور (01 ستمبر 2025): وزیر اطلاعات پنجاب عظمیٰ بخاری نے کہا ہے کہ کچھ دیر قبل بھارت نے وفاقی حکومت کو ایک نئے سیلابی ریلے سے آگاہ کر دیا ہے۔

    عظمیٰ بخاری نے ایک نیوز کانفرنس میں بتایا کہ پنجاب اس وقت سپر فلڈ کی زد میں ہے، اس وقت راوی، ستلج اور چناب میں بیک وقت سیلاب ہے، پنجاب میں گزشتہ 3 ماہ سے مون سون کا سیزن جاری تھا، پھر بھارت کی جانب سے پانی چھوڑا گیا جس سے تباہی ہوئی۔

    عظمیٰ بخاری نے بتایا کہ بھارت نے وفاقی حکومت کو ایک نئے سیلابی ریلے سے آگاہ کیا ہے، آئندہ 48 گھنٹوں میں جھنگ، ساہیوال، ٹوبہ ٹیک سنگھ، اوکاڑہ اور بہاولپور ہائی الرٹ پر ہیں، وزیر اعلیٰ پنجاب جھنگ کے دورے پر ہیں جہاں وہ حفاظتی انتظامات کا جائزہ لے رہی ہیں۔

    سیلاب کا بڑا ریلا آج ملتان میں داخل ہونے کا امکان، انتظامیہ، فوج اور ریسکیو ادارے الرٹ

    صوبائی وزیر اطلاعات کا کہنا تھا کہ سیلاب سے 2200 سے 2500 گاؤں متاثر ہو چکے ہیں، ہم نے سیلاب آنے سے پہلے لوگوں کا انخلا یقینی بنا لیا تھا، پانی کا فلو اتنا تیز تھا کہ کسی انسان یا جانور کا بچنا ممکن نہیں تھا، لیکن انسانوں کے ساتھ ساتھ مویشیوں کو بھی بچایا جا رہا ہے۔ عظمیٰ بخاری نے کہا دریائے چناب میں سیلاب سے 16 لاکھ سے زیادہ لوگ متاثر ہوئے ہیں، 3 لاکھ 44 ہزار لوگوں کو محفوظ مقامات پر منتقل کیا گیا ہے۔

    ان کا کہنا تھا کہ ریسکیو فیز کے بعد پورے پنجاب کی رپورٹ تیار کی جائے گی، جس میں تعین کیا جائے گا کہ کون سے ریور بیلٹ پر آبادیاں بنائی گئی ہیں۔ انھوں نے یہ وضاحت بھی کی کہ مریم نواز کی زیر قیادت پنجاب حکومت میں کسی غیر قانونی سوسائٹی کو این او سی نہیں دیا گیا، نئی آبادیاں آرگنائز طریقے سے این او سی کے تحت بنائی جا رہی ہیں، روڈا کے سی ای او نے بھی کل کہا کہ کوئی بھی نئی این او سی نہیں دی گئی۔

    عظمیٰ بخاری نے کہا وزیر اعلیٰ نے مویشیوں کے لیے لوسٹ اینڈ فاؤنڈ ڈیپارٹمنٹ بنانے کی ہدایت کی ہے، تمام اضلاع میں اس کے سینٹرز قائم کر دیے گئے ہیں، کسی کے مویشی سیلابی ریلے میں بہہ گئے تو ان کی تلاش کی جا رہی ہے، ڈرونز کے ذریعے دیکھا جا رہا ہے کہ کوئی فیملی یا مویشی پھنسا ہوا ہے تو ریسکیو کرایا جائے۔