اسلام آباد :   میں ڈاکٹر عافیہ صدیقی کیس کی سماعت کیلئے بننے والا نیا بینچ بھی ٹوٹ گیا، جس کے بعد معاملہ لارجر بینچ کو بھیج دیا گیا ہے۔

تفصیلات کے مطابق امریکی جیل میں قید ڈاکٹر عافیہ صدیقی کی صحت اور وطن واپسی کے حوالے سے دائر درخواست پر سماعت کے لیے تشکیل دیا گیا اسلام آباد ہائی کورٹ کا نیا بینچ ٹوٹ گیا۔

جسٹس انعام امین منہاس نے معاملہ لارجر بینچ کو بھجوا دیا ہے ، سماعت کے دوران درخواست گزار کی وکیل عمران شفیق ایڈوکیٹ نے مؤقف اختیار کیا کہ یہ کیس پیچیدہ ہو چکا ہے۔

جس پر جسٹس انعام امین منہاس نے کہا کہ معاملہ پیچیدہ نہیں، البتہ “ماسٹر آف روسٹر” کے حوالے سے مختلف آرا سامنے آئی ہیں، چیف جسٹس ماسٹر آف روسٹر ہیں جبکہ دوسری رائے اس کے برعکس ہے، اس لیے یہ معاملہ لارجر بینچ طے کرے گا۔

واضح رہے کہ اس سے قبل یہ کیس جسٹس سردار اعجاز اسحاق خان کی عدالت میں زیر سماعت تھا، جہاں وزیراعظم اور کابینہ کے ارکان کو عدالتی حکم عدولی پر توہین عدالت کے نوٹس جاری کیے گئے تھے۔

بعد ازاں جسٹس سردار اعجاز اسحاق سے تمام سنگل بینچ کیسز واپس لے لیے گئے اور انہیں ٹیکس کیسز کے لیے بنائے گئے اسپیشل ڈویژن بینچ میں شامل کر دیا گیا تھا، جبکہ ڈاکٹر عافیہ صدیقی کیس جسٹس انعام امین منہاس کو منتقل کیا گیا تھا۔

اب عدالت نے لارجر بینچ کی تشکیل کے لیے فائل چیف جسٹس کو ارسال کر دی ہے۔

سری نگر : شیر کشمیر حریت رہنما سید علی شاہ گیلانی کی چوتھی برسی کے موقع پر مقبوضہ وادی میں شٹرڈاؤن ہڑتال ہے۔

تفصیلات کے مطابق مقبوضہ کشمیر کے حریت رہنما سید علی شاہ گیلانی کی چوتھی برسی آج منائی جارہی ہے، اس موقع پر وادی بھر میں مکمل شٹر ڈاؤن ہڑتال ہے۔

مظفرآباد میں برہان وانی چوک پر حریت رہنما سید علی شاہ گیلانی کی برسی کی مرکزی تقریب منعقد ہوئی، جس میں مرحوم کی تحریکِ آزادی کشمیر کے لیے خدمات کو خراج عقیدت پیش کیا گیا۔

سید علی گیلانی 1929 میں ضلع بانڈی پورہ کے گاؤں زڑی منج میں پیدا ہوئے۔ ابتدائی تعلیم مسجد وزیر خان سے ملحقہ مدرسے میں حاصل کی جبکہ لاہور کے اورینٹل کالج سے بھی تعلیم حاصل کی, وہ اخبارات میں صحافت اور مختلف تعلیمی اداروں میں تدریسی فرائض بھی سرانجام دیتے رہے۔

سیاسی میدان میں وہ نیشنل کانفرنس، جماعت اسلامی اور تحریک حریت کے رکن رہے۔ 1972، 1977 اور 1987 میں مقبوضہ کشمیر کی قانون ساز اسمبلی کے رکن منتخب ہوئے۔ 1993 میں آل پارٹیز حریت کانفرنس کی بنیاد رکھی اور 1998 سے 2006 تک تین مرتبہ چیئرمین منتخب ہوئے۔ 2015 میں انہیں تاحیات چیئرمین بنایا گیا۔

سید علی گیلانی نے اپنی زندگی کے آخری گیارہ سال بھارتی حکومت کے حکم پر نظر بندی میں گزارے، ان کا پاسپورٹ 1981 سے ضبط رکھا گیا۔ یکم ستمبر 2021 کو وہ سرینگر کے علاقے حیدرپورہ میں وفات پا گئے۔ ان کی وفات کی خبر پر بھارتی حکومت نے وادی بھر میں کرفیو نافذ کر دیا اور انٹرنیٹ و ذرائع ابلاغ معطل کر دیے۔ ان کے جسد خاکی کو پاکستانی پرچم میں لپیٹ کر سپردِ خاک کیا گیا۔

سید علی گیلانی کشمیر کے پاکستان سے الحاق کے بڑے حامی تھے اور عمر بھر بھارتی فوج کے مظالم، انسانی حقوق کی خلاف ورزیوں اور تحریکِ آزادی کے لیے آواز بلند کرتے رہے۔ انہوں نے تحریکِ آزادی پر 21 سے زائد کتب تصنیف کیں جن میں رودادِ قفس، نوائے حریت، صدائے درد، ملتِ مظلوم اور پیام آخرین شامل ہیں۔

تحریکِ آزادی کشمیر میں ان کی گراں قدر خدمات کے اعتراف میں حکومتِ پاکستان نے انہیں اعلیٰ ترین سول اعزاز "نشانِ پاکستان” سے نوازا۔ قومی اسمبلی میں ان کی غائبانہ نمازِ جنازہ ادا کی گئی اور ملک بھر میں قومی پرچم سرنگوں کیا گیا۔

اسلام آباد : بھارت کیخلاف شاندار فتح کی یاد میں ’’معرکہ حق ‘‘یادگار کی تعمیر کا آغاز کردیا گیا، یادگار کا تھیم قرآن پاک کی آیت "بنیان مرصوص” سے لیا گیا ہے۔

تفصیلات کے مطابق بھارت کے خلاف شاندار فتح کی یاد میں اسلام آباد کے سیکٹر ایچ-8 میں قومی یادگار ’’معرکہ حق‘‘ کی تعمیر کا آغاز کر دیا گیا۔ یہ یادگار زیرِ استعمال پارک میں تعمیر کی جارہی ہے جسے جدید اور پرکشش عوامی مقام میں تبدیل کیا جائے گا۔

یادگار کا تھیم قرآن پاک کی آیت "بنیان مرصوص” سے لیا گیا ہے جس کا مفہوم "سیسہ پلائی ہوئی دیوار” ہے۔ یہ علامت قوم کے اجتماعی غیر متزلزل عزم اور اتحاد کو ظاہر کرتی ہے۔

منصوبے کے ڈیزائن اور تعمیر کی ذمہ داری فرنٹیئر ورکس آرگنائزیشن (ایف ڈبلیو او) کو سونپی گئی ہے جبکہ کیپیٹل ڈویلپمنٹ اتھارٹی (سی ڈی اے) نے یادگار کے لیے مختص جگہ ایف ڈبلیو او کو فراہم کر دی ہے۔ وزیراعظم کی خصوصی ہدایت اور حکومتی مالی معاونت سے منصوبے پر عملی کام شروع کر دیا گیا ہے۔

وزیراعظم نے 13 اور 14 اگست کی درمیانی شب اس یادگار کے ڈیزائن کی نقاب کشائی کی تھی، منصوبے پر تیزی سے عمل درآمد جاری ہے جبکہ تعمیر میں عالمی معیار کے مٹیریل اور اعلیٰ بین الاقوامی تعمیراتی تقاضوں کو مدنظر رکھا جا رہا ہے۔

’’معرکہ حق‘‘ یادگار کا مقصد قومی اتحاد و یکجہتی کو خراجِ تحسین پیش کرنا ہے، جو عوامی شعور، فخر اور اجتماعی قربانیوں کی علامت کے طور پر سامنے آئے گی۔ یہ یادگار اسلام آباد کے منظرنامے میں باوقار قومی اضافہ اور قوم کے اتحاد کا مظہر ہوگی۔

تیانجن : ایران کے صدر مسعود پزشکیان نے وزیراعظم شہباز شریف سے ملاقات میں پاکستان میں سیلاب سے قیمتی جانی ومالی نقصانات پر گہرے افسوس کا اظہار کیا۔

تفصیلات کے مطابق وزیراعظم شہباز شریف نے چین کے شہر تیانجن میں ایرانی صدر مسعود پزشکیان سے ملاقات کی، جس میں نائب وزیراعظم اسحاق ڈار، فیلڈ مارشل سید عاصم منیر اور وفاقی وزرا بھی موجود تھے۔

ملاقات کے دوران دونوں رہنماؤں نے مختلف شعبوں میں دوطرفہ تعاون کا جائزہ لیا اور تعلقات میں مثبت پیش رفت پر اطمینان کا اظہار کیا۔

وزیراعظم شہباز شریف نے کہا کہ ایرانی صدر کا اگست میں پاکستان کا دورہ تعلقات کو مزید بہتر اور مضبوط بنانے میں سنگ میل ثابت ہوا، پاکستانی عوام ایرانی صدر کے حالیہ دورے پر بے حد خوش تھے۔

انہوں نے سیاسی اور اقتصادی تعلقات کو مزید مضبوط بنانے پر زور دیا اور ایران کے عوام و حکومت سے پاکستان کی غیرمتزلزل یکجہتی کا اعادہ کیا۔

وزیراعظم نے علاقائی امن کے لیے پاکستان کے عزم کو دہراتے ہوئے کہا کہ مذاکرات اور سفارت کاری ہی تناؤ میں کمی اور استحکام کی واحد قابلِ عمل راہ ہیں۔

ایرانی صدر مسعود پزشکیان نے پاکستان کی جانب سے ایران کی مسلسل حمایت کو سراہا اور دوطرفہ تعاون کو مزید فروغ دینے کے عزم کا اعادہ کیا۔

انہوں نے پاکستان میں حالیہ سیلاب کے باعث قیمتی جانی و مالی نقصانات پر گہرے افسوس کا اظہار کیا اور کہا کہ ایران مشکل کی اس گھڑی میں پاکستان کے ساتھ کھڑا ہے۔

خیال رہے وزیراعظم شہباز شریف نے تیانجن میں دیگر عالمی رہنماؤں سے بھی ملاقاتیں کیں، جن میں ترک صدر رجب طیب ایردوان، روس، ملائشیا، بیلاروس، آذربائیجان، تاجکستان، ترکمانستان، کرغستان اور مالدیپ کے صدور شامل ہیں۔ اس کے علاوہ وزیراعظم نے اقوام متحدہ کے سیکریٹری جنرل سے بھی غیر رسمی ملاقات کی۔

وزیراعظم شہباز شریف اپنی تیانجن مصروفیات کے بعد بیجنگ روانہ ہوں گے، جہاں وہ چین کے یومِ فتح کی تقریبات میں شرکت کریں گے۔