کراچی (31 اگست 2025): وزیر اعلیٰ سندھ مراد علی شاہ نے صوبے میں سُپر فلڈ (سیلاب) کے خطرے کے پیشِ نظر محکمہ آبپاشی کو تیار رہنے کی ہدایت کر دی۔

وزیر اعلیٰ سندھ ممکنہ سیلاب اور تیاریوں کا جائزہ لینے کیلیے گڈو بیراج پہنچ گئے جہاں مقامی انتظامیہ نے مراد علی شاہ کو ممکنہ سیلاب سے متعلق بریفنگ دی۔

اس موقع پر میڈیا سے گفتگو کرتے ہوئے مراد علی شاہ نے کہا کہ پنجاب کے چاروں دریا میں ایک ساتھ پانی آیا اور اب یہ پانی دریائے سندھ میں گڈو بیراج پر آئے گا، اس سال گڈو بیراج سے ساڑھے 5 لاکھ کیوسک پانی گزار چکا ہے جبکہ این ڈی ایم اے رپورٹ کے مطابق 8 سے 11 لاکھ کیوسک تک پانی آ سکتا ہے۔

یہ بھی پڑھیں: دریائے سندھ میں گڈو بیراج پر نچلے درجے کا سیلاب، پانی کی سطح مزید بلند ہونے کا امکان

وزیر اعلیٰ نے کہا کہ گڈو اور سکھر بیراج پر 9 لاکھ کیوسک سے پانی تجاوز کر جائے تو اسے سپر فلڈ کہتے ہیں، 9 لاکھ سے زیادہ کیوسک پانی آیا تو سارا کچے کا علاقہ ڈوب جائے گا لہٰذا ہر گاؤں کی ورکنگ مکمل کر کے ضلعی انتظامیہ کو دے دیں، پاک فوج کی ٹیمیں اسٹینڈ بائے ہیں ضرورت پڑنے پر پہنچ جائیں گی، یہی کوشش ہوگی کہ انسانی جان اور مویشیوں کو نقصان نہ ہو۔

انہوں نے کہا کہ گڈو سے سکھر بیراج تک 6 پوائنٹس پر خطرہ ہے ماضی میں بریج ہو چکے ہیں، کے کے بند کاپورشن دائیں جانب سے خطرناک ہے، 8، 9 لاکھ کیوسک پانی آیا تو شینگ بند نہیں بچ سکے گا، پہلی کوشش ہے شینگ بند کو ہرحال میں بچایا جائے، اس وقت 3 لاکھ 61 ہزار کیوسک پانی ہے، لوگوں سے درخواست ہے انتظامیہ سے تعاون کریں تاکہ نقصان نہ ہو۔

ان کا کہنا تھا کہ سیلاب میں سانپ بھی نکل آتے ہیں اور اس کے کاٹنے کے بھی کیسز آتے ہیں، کیسز کیلیے ویکسی نیشن کی ہدایت کر دی ہے۔

مراد علی شاہ نے مزید کہا کہ پانی اتنا زیادہ نہیں آیا تو لوگوں کی فصلیں بچ جائیں گی، فصلوں کا نقصان ہوا بھی تو حکومت دیکھے گی، پوری کوشش ہوگی سپر فلڈ کو کم از کم نقصان سے گزار کر سمندر تک پہنچائیں، جہاں خامیاں ہوں ضرور نشاندہی کریں لیکن خوف وہراس نہ پھیلائیں، حکومت پر چھوڑیں کہ وہ صورتحال سے متعلق اعلانات کرے۔

کشمور (31 اگست 2025): دریائے سندھ میں گڈو بیراج کے مقام پر ایک بار پھر نچلے درجے کا سیلاب ڈکلیئر کر دیا گیا۔

دریائے سندھ میں گڈو بیراج کے مقام پر پانی کی سطح میں اتار چڑھاؤ کا سلسلہ برقرار ہے۔ اس وقت پانی کی آمد 3 لاکھ 22 ہزار 819 کیوسک جبکہ اخراج 3 لاکھ 7 ہزار 956 کیوسک ریکارڈ کیا گیا۔

گزشتہ 24 گھنٹوں کے دوران گڈو بیراج کے مقام 66 ہزار 479 کیوسک پانی کی سطح کم ہوئی۔ آئندہ 24 گھنٹوں کے دوران پانی کی سطح میں اضافہ ہونے کا امکان ہے۔

یہ بھی پڑھیں: 2 یا 3 ستمبر کی رات سیلاب سندھ میں داخل ہوگا

حکام کے مطابق آئندہ 4 روز تک پنجند سے پانی کا ریلا گڈو بیراج کے مقام پر پہنچے گا جس کے بعد مزید سطح بلند ہونے کا امکان ہے، 4 سے 5 ستمبر کے درمیان بڑا ریلا پہنچے گا۔

قبل ازیں، سندھ کے سینئر وزیر شرجیل میمن نے بتایا کہ 2 یا 3 ستمبر کی رات سیلاب سندھ میں داخل ہوگا، صوبے میں 16 لاکھ افراد سیلاب سے متاثر ہو سکتے ہیں۔

شرجیل میمن کے مطابق سیلاب سے نمٹنے کیلیے تیاریاں کر لی گئی ہیں اور 102 حساس مقامات پر مشینری پہنچا دی گئی ہے، صدر مملکت آصف علی زرداری اور چیئرمین پیپلز پارٹی بلاول بھٹو زرداری خود صورت حال کی نگرانی کر رہے ہیں۔

انہوں نے بتایا کہ دریا کنارے آبادیوں سے نقل مکانی شروع ہو چکی ہے، کچے کے علاقے سے بڑی تعداد میں لوگوں کا انخلا ہو گیا، کوئی نہیں چاہتا کہ اپنے گھر چھوڑ کر امدادی کیمپوں میں رہیں، تاہم عوام سے اپیل ہے کہ سیلاب والے علاقوں سے نکل جائیں۔

ان کا کہنا تھا کہ انتظامیہ کی پوری توجہ انسانی جانوں کو بچانے پر ہے، گدو بیراج 12 لاکھ کیوسک تک ریلا برداشت کر سکتا ہے، توقع ہے اتنا ہی پانی آئے گا جتنا برداشت کر سکتے ہیں۔

لاہور (31 اگست 2025): پنجاب میں موسلادھار بارشوں اور دریاؤں میں سیلاب کے باعث 33 افراد جاں بحق، 2200 دیہات متاثر جبکہ 7 لاکھ لوگوں کا انخلا ہوا۔

ڈائریکٹر جنرل پرووینشیل ڈیزاسٹر مینجمنٹ اتھارٹی (پی ڈی ایم اے) پنجاب عرفان علی کاٹھیا نے میڈیا سے گفتگو میں بتایا کہ صوبے کے تینوں دریاؤں میں تاریخ کا سب سے بڑا سیلاب ہے تاہم دریائے ستلج میں قصور کے مقام پر پانی میں کمی آ رہی ہے۔

عرفان علی کاٹھیا نے بتایا کہ پاکپتن، بہاولنگر اور وہاڑی میں کل تک 1 لاکھ 35 ہزار کیوسک پانی پہنچے گا، دریاؤں کے اطراف دیہات سے لوگوں کی نقل مکانی کا سلسلہ جاری ہے، ریلہ بہاولنگر اور بہاولپور کو متاثر کرتے ہوئے گزرے گا، تریموں بیراج پر پانی کا بہاؤ 3 لاکھ 61 ہزار 633 کیوسک ہوگیا۔

یہ بھی پڑھیں: 2 یا 3 ستمبر کی رات سیلاب سندھ میں داخل ہوگا

انہوں نے بتایا کہ تریموں بیراج پر پانی میں ایک لاکھ کیوسک کا اضافہ ہوا، بریچنگ کے بارے میں مقامی اور صوبائی انتظامیہ کے فیصلوں پر عمل ہو رہا ہے۔

ڈی جی پی ڈی ایم اے پنجاب نے بتایا کہ اب تک صوبے کے 2200 دیہات سیلاب سے متاثر ہوئے، بیس لاکھ افراد سیلاب سے متاثر ہوئے ہیں، متاثرہ اضلاع میں بحالی اور ریلیف کی کارروائیاں جاری ہیں۔

انہوں نے بتایا کہ پنجاب میں سیلاب کے باعث 33 افراد جاں بحق ہوئے، متاثرہ علاقوں سے ساڑھے 7 لاکھ لوگوں کا انخلا کیا گیا، متاثرہ علاقوں سے لاکھوں جانوروں کا بھی انخلا کیا، مون سون کے 9ویں اسپیل نے بھی کافی تباہی مچائی ہے۔