اسلام آباد : اسلام آباد ہائی کورٹ میں ڈاکٹر عافیہ صدیقی کیس باضابطہ طور پر جسٹس راجہ انعام امین منہاس کی عدالت کو منتقل کر دیا گیا، کیس کی سماعت یکم ستمبر کو ہوگی۔

تفصیلات کے مطابق اسلام آباد ہائی کورٹ نے جسٹس سردار اعجاز اسحاق خان کا سنگل بینچ ختم ہونے پر زیر سماعت کیسز دوسری عدالتوں کو منتقل کر دیے ہیں، کیسز میں ڈاکٹر عافیہ صدیقی کی رہائی اور وطن واپسی سے متعلق درخواست بھی شامل ہے۔

عدالتی ذرائع نے بتایا کہ ڈاکٹر عافیہ صدیقی کیس باضابطہ طور پر جسٹس راجہ انعام امین منہاس کی عدالت کو منتقل کر دیا گیا ہے اور رجسٹرار آفس نے اس کیس کو یکم ستمبر کی کاز لسٹ میں شامل کر لیا ہے، جس کے تحت اب جسٹس راجہ انعام امین منہاس اس کیس کی سماعت کریں گے۔

یاد رہے کہ اس سے قبل یہ کیس جسٹس سردار اعجاز اسحاق خان سن رہے تھے۔ تاہم، نئے ججز روسٹر کے تحت ان کا سنگل بینچ ختم کر دیا گیا جس کے بعد تمام متعلقہ کیسز دوسری عدالتوں میں بھیج دیے گئے۔

ڈاکٹر عافیہ صدیقی کی رہائی اور وطن واپسی کے لیے ان کی بہن فوزیہ صدیقی نے 2015 میں اسلام آباد ہائی کورٹ میں درخواست دائر کر رکھی ہے، جو کئی برسوں سے زیر التوا ہے۔

مزید پڑھیں : ڈاکٹر عافیہ صدیقی کیس : وفاقی کابینہ کو توہین عدالت کا شوکاز نوٹس جاری

یاد رہے اسلام آباد ہائیکورٹ نے وفاقی کابینہ کو توہین عدالت کاشوکاز نوٹس جاری کیا تھا۔

اسلام آباد ہائی کورٹ کے جج کا کہنا تھا کہ ماضی میں ججز کا روسٹرمخصوص کیسزکے فیصلوں کیلئےاستعمال ہو چکا، فوزیہ صدیقی پاکستان کی بیٹی ہیں، اپیل سپریم کورٹ میں مقررہے، جج چھٹی کے دن عدالت میں انصاف مہیاکرنے کیلئے بیٹھنا چاہتا ہے لیکن ایک بار پھر ایڈمنسٹریٹو پاور کو جوڈیشل پاور کیلئے استعمال کیاگیا۔

جسٹس اعجاز نے مزید کہا  تھا کہ میں انصاف کو شکست کا سامنا نہیں کرنے دوں گا، ہائیکورٹ کی عزت برقرار رکھنے کیلئے اپنی جوڈیشل پاورز کا استعمال کروں گا، وفاقی کابینہ کے ہر ممبر کو توہین عدالت کا نوٹس جاری کرتا ہوں۔

لاہور: آن لائن جوا اور ٹریڈنگ ایپس کی تشہیر کے الزام کے الزام میں ڈکی بھائی کے بعد 4 معروف یوٹیوبرز بھی مشکل میں پھنس گئے۔

تفصیلات کے مطابق نیشنل سائبر کرائم انویسٹی گیشن ایجنسی (NCCIA) نے آن لائن جوا اور غیر قانونی ٹریڈنگ ایپس کو فروغ دینے کے الزام میں چار معروف یوٹیوبرز کو طلب کر لیا۔

ترجمان نے بتایا کہ اقرا کنول، مدثر حسن، حسنین شاہ اور انس علی کو 2 ستمبر کو ذاتی حیثیت میں پیش ہونے کی ہدایت کی گئی ہے۔

حکام کا کہنا ہے کہ مذکورہ یوٹیوبرز سوشل میڈیا پلیٹ فارمز کے ذریعے عوام کو غیر قانونی ایپس استعمال کرنے پر اکساتے اور گمراہ کن مواد کے ذریعے آن لائن ٹریڈنگ و جوا کھیلنے کی حوصلہ افزائی کرتے ہیں۔

این سی سی آئی اے کے مطابق اس معاملے کی مزید تحقیقات جاری ہیں اور اگر الزامات ثابت ہوئے تو سخت قانونی کارروائی عمل میں لائی جائے گی۔

یاد رہے کہ پاکستان کے معروف یوٹیوبر سعد الرحمان المعروف ڈکی بھائی کو امیگریشن حکام نے ہفتہ اور اتوار کی درمیانی شب اس وقت لاہور ایئرپورٹ سے گرفتار کیا، جب وہ اپنا نام پی این آئی ایل فہرست میں شامل ہونے کے باوجود بیرون ملک جا رہے تھے تاہم حکام نے گرفتاری کے بعد نیشنل سائبر کرائم انویسٹی گیشن ایجنسی (این سی سی آئی اے) کے حوالے کر دیا تھا۔

مزید پڑھیں : ڈکی بھائی کیس میں اب تک کیا کچھ ہوا؟

گرفتاری کے بعد این سی سی آئی اے نے ڈکی بھائی کے خلاف مقدمہ درج کر لیا اور بتایا کہ ملزم کا نام پی این آئی ایل فہرست میں شامل ہے اور وہ بیرون ملک فرار ہونے کی کوشش میں پکڑا گیا۔

ان کے خلاف درج مقدمہ میں یوٹیوبر پر آن لائن جوا کھیلنے والی ایپس کے ذریعہ منی لانڈرنگ، سوشل میڈیا پلیٹ فارم پر جوا کھیلنے والی ایپس کو فروغ دینے، عوام کو جوئے اور غیر قانونی سرمایہ کاری میں ملوث کرنے جیسے الزامات عائد کیے گئے۔

Ducky Bhai- All Updates

پشاور: طلبا کے لئے نیا تعلیمی کیلنڈر جاری کردیا گیا ، جس میں دو سمسٹرز رکھے گئے ہیں ، پہلا سمسٹر ستمبر سے دسمبر تک اور دوسرا جنوری سے مئی تک جاری رہے گا۔

تفصیلات کے مطابق خیبرپختونخوا محکمہ ابتدائی و ثانوی تعلیم نے نیا تعلیمی کیلنڈر جاری کردیا ہے، جس کے تحت طلبہ کی فلاح و بہبود کو مدنظر رکھتے ہوئے سمر اور ونٹر زون کے اسکولوں کے لیے الگ الگ تعلیمی سال مقرر کیے گئے ہیں۔

محکمہ تعلیم کے نوٹیفکیشن میں کہا گیا کہ سمر زون کے اسکولوں میں تعلیمی سال یکم ستمبر سے اگست تک ہوگا۔ اس دوران پہلا سمسٹر ستمبر سے دسمبر تک اور دوسرا جنوری سے مئی تک جاری رہے گا، جبکہ جون سے اگست تک موسم گرما کی تعطیلات ہوں گی۔

دوسری جانب ونٹر زون کے اسکولوں میں تعلیمی سال یکم مارچ سے دسمبر تک ہوگا، اس زون میں پہلا سمسٹر مارچ سے جون اور دوسرا اگست سے دسمبر تک جاری رہے گا، جبکہ دسمبر سے فروری تک موسم سرما کی تعطیلات دی جائیں گی۔

محکمہ تعلیم کے مطابق نیا تعلیمی کیلنڈر طلبہ کے بہتر تعلیمی ماحول اور موسمی حالات کو مدنظر رکھتے ہوئے ترتیب دیا گیا ہے۔

مزید پڑھیں : تعلیمی سال کو 2 سیمسٹر میں تقسیم کرنے کا فیصلہ

یاد رہے وزیر اعلیٰ خیبر پختونخوا علی امین گنڈاپور کی ہدایت پر تعلیمی نظام میں اصلاحات کی گئی ہیں اور صوبے کے تعلیمی سال کو سمر اور ونٹر زونز میں تقسیم کر کے ’اسپرنگ‘ اور ’فال سیمسٹر‘ کے طور پر نافذ کرنے کا فیصلہ کیا گیا تھا۔

ابتدائی طور پر یہ نظام نرسری سے جماعت ہشتم تک کے طلباء و طالبات پر لاگو ہوگا۔

ہر سیمسٹر کے لیے علیحدہ امتحانات ہوں گے اور حتمی نتائج کی تیاری میں دونوں سیمسٹر کے امتحانات کی برابر اہمیت ہوگی۔

سمر اور ونٹر زونز میں چھٹیوں کا شیڈول معمولی ردوبدل کے ساتھ برقرار رہے گا۔

وزیراعلیٰ سیکریٹریٹ کے مطابق اس اقدام سے سرکاری وسائل کا بہتر اور مؤثر استعمال یقینی بنایا جا سکے گا اور تعلیمی معیار میں بہتری آئے گی۔