بائنینس کی جانب سے منعقدہ مقابلے میں پاکستانی کمیونٹی ابوکارٹل نے کرپٹو کنگ آف پاکستان کا اعزاز اپنے نام کرلیا، اس ایونٹ کے لیے 50 ہزار ڈالر سے زائد کا انعامی فنڈ رکھا گیا تھا۔

تفصیلات کے مطابق پاکستان کی کرپٹو مارکیٹ میں ایک اہم سنگ میل عبور کرلیا گیا، جہاں پاکستانی کرپٹو کمیونٹی ابو کارٹل نے عالمی شہرت یافتہ کرپٹو ایکسچینج بائنینس کے ملک گیر مقابلے میں نمایاں کامیابی حاصل کی۔

بائنینس کی جانب سے منعقدہ اس مقابلے میں ملک بھر سے 10 سے 15 ٹیموں نے حصہ لیا، تاہم دو ہزار ممبران پر مشتمل کمیونٹی ابو کارٹل نے سب کو پیچھے چھوڑتے ہوئے کامیابی اپنے نام کرلی۔

کمیونٹی نے صرف 14 دن کے قلیل عرصے میں 2 لاکھ ڈالر (تقریباً 10 کروڑ روپے) منافع کما کر نئی تاریخ رقم کی، اس شاندار کارکردگی پر ابو کارٹل کو "کرپٹو کنگ آف پاکستان” کا اعزاز بھی دیا گیا۔

بائنینس کی جانب سے اس ایونٹ کے لیے 50 ہزار ڈالر سے زائد کا انعامی فنڈ رکھا گیا تھا، جس میں کامیاب ٹیموں کو انعامات سے نوازا گیا۔

کرپٹو ماہرین کے مطابق اس کامیابی سے پاکستان میں ڈیجیٹل کرنسی اور کرپٹو ٹریڈنگ کے شعبے میں نئی راہیں کھلنے کا امکان ہے۔

راولپنڈی : خاتون کو بہانے سے ہوٹل لے جا کر زیادتی اور نازیبا ویڈیو بنانے والے ملزم کو گرفتار کرلیا گیا، واقعے کا مقدمہ دو روز قبل درج کیا گیا تھا۔

تفصیلات کے مطابق راولپنڈی میں تھانہ سٹی پولیس نے خاتون سے زیادتی اور نازیبا ویڈیو بنانے والے ملزم کو گرفتار کر کے مقدمہ درج کر لیا۔

پولیس نے بتایا کہ ملزم نے بہانے سے متاثرہ خاتون کو ہوٹل لے جا کر زیادتی کی اور نازیبا ویڈیو بنائی، ساتھ ہی جان سے مارنے کی دھمکیاں بھی دیں۔

پولیس کا کہنا تھا کہ واقعے کا مقدمہ دو روز قبل درج کیا گیا تھا۔

ایس پی راول سعد ارشد نے بتایا کہ تھانہ سٹی پولیس نے جدید وسائل بروئے کار لا کر ملزم کو گرفتار کیا، جب کہ میڈیکل پراسیس بھی مکمل کر لیا گیا ہے۔

پولیس نے کہا ہے کہ زیرِ حراست ملزم کے دوسرے ساتھی کو بھی جلد گرفتار کر لیا جائے گا۔

پولیس حکام نے مزید بتایا کہ ملزم کے خلاف ٹھوس شواہد اکٹھے کیے جا رہے ہیں، اور چالان عدالت میں پیش کر کے قرار واقعی سزا دلوائی جائے گی۔

کراچی: میئر کراچی بیرسٹر مرتضیٰ وہاب نے کے ایم سی ملازمین کو الیکٹرک بائیکس دینے کا اعلان کردیا اور کہا ہلے مرحلے میں ڈسپیچ رائیڈرز کو بائیکس دیں گے۔

تفصیلات کے مطابق میئر کراچی مرتضیٰ وہاب نے میڈیا سے گفتگو کرتے ہوئے کہا کہ بلدیہ عظمیٰ کراچی نے اخراجات کم کرنے اور ماحول دوست اقدامات کے تحت مرحلہ وار اپنی موٹربائیکس کو بجلی پر منتقل کرنے کا فیصلہ کیا ہے۔

انہوں نے بتایا کہ پہلے مرحلے میں ڈسپیچ رائیڈرز کو الیکٹرک بائیکس فراہم کی جائیں گی جبکہ خواتین ملازمین میں بھی یہ بائیکس تقسیم کی جائیں گی۔

میئر کراچی کا کہنا تھا کہ ایک بائیک کی قیمت 2 لاکھ 40 ہزار روپے تھی لیکن 2 لاکھ 15 ہزار روپے میں خریدی گئی ہے، پہلے مرحلے میں 20 الیکٹرک بائیکس خریدی گئی ہیں جو بلدیہ عظمیٰ کے ورکرز میں تقسیم ہوں گی۔

انھوں نے مزید بتایا کہ اس مقصد کے لیے بلدیہ عظمیٰ کی عمارت میں چارجنگ اسٹیشن بھی قائم کیا گیا ہے جبکہ مستقبل میں کراچی کے مختلف مقامات پر مزید چارجنگ اسٹیشنز بنانے کا منصوبہ ہے، ان اسٹیشنز کو موبائل ایپ کے ذریعے مانیٹر کیا جائے گا۔

انھوں نے کہا کہ یہ منصوبہ ماحول دوست، بچت اور اسمارٹ ٹیکنالوجی کی جانب ایک اہم قدم ہے، کے ایم سی پاکستان کی واحد کاؤنسل ہے جو مکمل طور پر سولر انرجی پر چل رہی ہے اور اخراجات کے ساتھ ساتھ کاربن فٹ پرنٹ کم کرنے کے لیے حکمت عملی اپنائی جا رہی ہے۔

انہوں نے بتایا کہ شارع فیصل، شاہراہ ایران اور شاہراہ غالب کو بھی شمسی توانائی پر منتقل کیا جا رہا ہے۔

بارشوں کے حوالے سے میئر کراچی نے کہا کہ 30 اگست سے 2 ستمبر تک بارشوں کی پیشگوئی ہے، اس دوران نکاسی آب کے لیے چوکنگ پوائنٹس پر مشینری موجود ہوگی جبکہ ٹریفک پولیس اور وارڈنز بھی سڑکوں پر تعینات ہوں گے اور مختلف مقامات پر کیمپس قائم کیے جائیں گے تاکہ اگر کوئی فیملی پھنس جائے تو انہیں فوری سہولت فراہم کی جا سکے۔

مرتضیٰ وہاب نے شہریوں سے اپیل کی کہ بارش کے دوران افراتفری سے گریز کریں کیونکہ ایسی صورتحال میں سڑکیں بلاک ہو جاتی ہیں۔

Nadra- CNIC, B-Form, FRC, NICOP and other Information