Category: پاکستان

لاہور : امیر بالاج ٹیپو قتل کیس کی تحقیقات کرنے والی جے آئی ٹی کی رپورٹ میں قتل کی منصوبہ بندی سے متعلق اہم انکشافات سامنے آئے۔

تفصیلات کے مطابق امیر بالاج ٹیپو قتل کیس کی تحقیقات کرنے والی جے آئی ٹی نے اہم پیش رفت کرتے ہوئے گوگی بٹ کو قصور وار قرار دے دیا ہے۔

ذرائع نے بتایا کہ جے آئی ٹی کی رپورٹ میں کہا گیا ہے کہ گوگی بٹ نے امیر بالاج کے قتل کی منصوبہ بندی کی اور اس سلسلے میں مرکزی ملزم طیفی بٹ کے ساتھ مسلسل رابطے میں رہا۔

ذرائع کا کہنا ہے کہ گوگی بٹ ماضی میں بھی ٹیپو خاندان کے قتل کیسز میں نامزد رہا ہے، جبکہ امیر بالاج کے قتل کے بعد وہ موقع سے فرار ہوگیا تھا۔

جے آئی ٹی نے مزید انکشاف کیا ہے کہ کیس کی اگلی پیشی پر گوگی بٹ کی ضمانت منسوخ کرنے کی استدعا عدالت میں کی جائے گی۔

دوسری جانب، قتل کیس میں مرکزی ملزم طیفی بٹ تاحال اشتہاری قرار دیا گیا ہے۔

یاد رہے امیر بالاج ٹیپو ٹھوکر نیاز بیگ کے قریب ایک نجی ہاؤسنگ سوسائٹی میں سابق ڈی ایس پی اکبر اقبال کے بیٹے کی شادی کی تقریب میں شریک تھا، شادی کی تقریب کے دوران وہاں موجود ایک حملہ آور نے فائرنگ کردی جس سے امیر بالاج ٹیپو سمیت تین افراد زخمی ہوگئے جنہیں اسپتال منتقل کیا گیا تاہم زخموں کی تاب نہ لاتے ہوئے دم توڑ گیا تھا۔

بعد ازاں قتل کیس میں اس کا دوست احسن شاہ ملوث نکلا تھا، پولیس نے احسن سمیت 2 ملزمان کو گرفتار کرلیا تھا۔

بونیر: خیبر پختونخوا کے ضلع بونیر میں آسمانی بجلی گرنے سے ایک بچہ جاں بحق اور چار افراد زخمی ہوگئے تاہم زخمیوں کواسپتال منتقل کر دیا گیا ہے۔

تفصیلات کے مطابق خیبر پختونخوا کے ضلع بونیر میں شدید بارشوں اور کلاؤڈ برسٹ نے تباہی مچا دی۔ گیرو بگڑا میں آسمانی بجلی گرنے سے ایک بچہ جاں بحق جبکہ چار افراد زخمی ہوگئے، جنہیں ڈسٹرکٹ ہسپتال ڈگر منتقل کر دیا گیا ہے۔

پولیس نے بتایا کہ گزشتہ رات ہونے والی طوفانی بارش کے باعث پیربابا میں سیلابی ریلے گھروں اور دکانوں میں داخل ہوگئے، جبکہ قادر نگر اور ٹانثابٹئی سمیت متعدد علاقوں میں پانی کا تیز بہاؤ جاری ہے، پیربابا بازار اور ملحقہ علاقے سب سے زیادہ متاثر ہوئے۔

ضلعی انتظامیہ کا کہنا تھا کہ غازی خانہ اور سلطان وس کے مقام سے گزرنے والے ریلے کے بعد سڑک ٹریفک کے لیے کھول دی گئی ہے، تاہم چغرزی بامے روڈ پر لینڈ سلائیڈنگ کے باعث آمدورفت متاثر ہوئی۔

ڈپٹی کمشنر کاشف قیوم نے بتایا کہ ضلع بھر میں مسلسل بارشوں کے بعد ہائی الرٹ جاری ہے، پیربابا کھوڑ میں پانی کی سطح بلند ہو کر مرکزی بازار کے عقب اور سڑک تک پہنچ گئی ہے جبکہ مساجد اور لاؤڈ اسپیکرز کے ذریعے محفوظ مقامات پر منتقل ہونے کے اعلانات جاری ہیں۔

انتظامیہ کے مطابق ریسکیو 1122، سول ڈیفنس، پولیس اور دیگر ادارے فیلڈ میں متحرک ہیں جبکہ سرکاری رہائش گاہوں کو ہنگامی پناہ گاہوں میں تبدیل کر دیا گیا ہے، عوام سے اپیل کی گئی ہے کہ غیر ضروری طور پر گھروں سے باہر نہ نکلیں۔

اسلام آباد : پاکستان تحریک انصاف نے قومی اسمبلی اجلاس سے بائیکاٹ کردیا اور قائمہ کمیٹیوں سے بھی علیحدگی اختیار کرنے کا اعلان کردیا۔

تفصیلات کے مطابق قومی اسمبلی کے اجلاس کے دوران سیلابی صورتحال پر بحث کے دوران پاکستان تحریک انصاف کے حمایت یافتہ ارکان نے ایوان سے واک آؤٹ کر دیا۔

اسد قیصر نے واک آؤٹ کا اعلان کرتے ہوئے کہا کہ مشکل کی اس گھڑی میں وہ پنجاب کے عوام کے ساتھ ہیں لیکن انہیں ایوان میں آئینی اور قانونی حقوق حاصل نہیں۔

ان کا کہنا تھا کہ اسی ناانصافی کے باعث ہم نے نہ صرف اجلاس کا بائیکاٹ کیا ہے بلکہ ہم نے قائمہ کمیٹیوں سےبھی علیحدگی اختیار کرلی ہے۔

اسپیکر ایاز صادق نے واک آؤٹ کرنے والے ارکان کو مخاطب کرتے ہوئے کہا کہ سیلاب پر بحث جاری تھی، جن ارکان کے علاقے ڈوبے ہوئے ہیں انہیں اس میں بات کرنی چاہیے تھی۔

انہوں نے اقبال آفریدی کو مخاطب کرتے ہوئے کہا کہ آپ کا اپنا علاقہ زیرِ آب ہے، آپ اس پر اظہارِ خیال کریں۔

اسپیکر نے افسوس کا اظہار کیا کہ واک آؤٹ کرنے والے ارکان کم از کم سیلابی صورتحال پر بحث میں تو شریک ہو سکتے تھے۔

قومی اسمبلی کے اجلاس سے خطاب کرتے ہوئے اسلم گھمن نے کہا کہ وزیراعلیٰ خیبرپختونخوا نے کالا باغ ڈیم کی تعمیر کا مطالبہ کیا ہے، ان کا حلقہ سیلاب سے متاثر ہوا لیکن کوئی حکومتی رکن وہاں نہیں پہنچا۔

جس پر انتظار حیدری نے کہا کہ ملک کو بانی پی ٹی آئی جیسے ایماندار قیادت کی ضرورت ہے۔

یاد رہے سابق اپوزیشن لیڈر عمر ایوب اور شبلی فراز کو مئی 9 واقعات سے متعلق مقدمات میں سزا کے بعد نااہل قرار دیا جا چکا ہے، جس سے پی ٹی آئی کو قانونی مشکلات کا مزید سامنا ہے۔

دوسری جانب اسپیکر قومی اسمبلی ایاز صادق نے پی ٹی آئی کے حمایت یافتہ سنی اتحاد کونسل (ایس آئی سی) ارکان کے قائمہ کمیٹیوں سے استعفوں پر افسوس کا اظہار کیا تھا اور ایوان کی بزنس ایڈوائزری کمیٹی کے اجلاس کی صدارت کرتے ہوئے انہوں نے کہا تھا کہ وہ چاہتے ہیں کہ یہ ارکان قائمہ کمیٹیوں کا حصہ رہیں تاکہ پارلیمانی عمل کو بہتر انداز میں آگے بڑھایا جا سکے۔

کراچی : انسداد دہشت گردی عدالت نے تشدد اور دھمکانے کے کیس میں صوبائی وزیر سعید غنی کے بھائی  ٹاؤن چیئرمین فرحان غنی کو عمرہ ادائیگی کیلئے بیرون ملک جانے کی اجازت دے دی۔

تفصیلات کے مطابق کراچی کی انسداد دہشت گردی منتظم عدالت میں ٹاؤن چیئرمین فرحان غنی اور دیگر کے خلاف تشدد اور دھمکانے کے کیس کی سماعت ہوئی۔ سماعت کے دوران تفتیشی افسر محمد وسیم، ملزم فرحان غنی اور دیگر عدالت میں پیش ہوئے۔

عدالت نے ریمارکس دیے کہ اے ٹی اے کی دفعہ حذف کرنے کی درخواست دی گئی ہے تو پھر یہ دفعہ لگائی ہی کیوں گئی؟ عدالت نے کہا کہ دفعہ انسداد دہشت گردی کی بجائے سیدھا مجسٹریٹ کے پاس بھیجی جانی چاہیے تھی۔

جس پر وکیل صفائی نے عدالت سے استدعا کی کہ مجسٹریٹ کو آرڈر کیا جائے تاکہ وہ معاملے کو دیکھ سکے۔

سماعت کے دوران وکیل صفائی نے مؤقف اپنایا کہ ان کے موکل کو عمرہ کی ادائیگی کے لیے جانا ہے، اس لیے انہیں اجازت دی جائے، عدالت نے فرحان غنی سے پوچھا کہ وہ کب جا رہے ہیں اور کب واپس آئیں گے، جس پر ملزم نے بتایا کہ وہ کل صبح روانہ ہوں گے اور 19 ستمبر کو وطن واپس آ جائیں گے۔

عدالت نے اس پر ریمارکس دیے کہ آئندہ سماعت 20 ستمبر کو رکھی جاتی ہے، تاہم ملزم کی درخواست پر سماعت پیر 22 ستمبر تک ملتوی کر دی گئی۔

عدالت نے وکیل صفائی کی آئندہ سماعت پر ملزم کو حاضری سے استثنیٰ دینے کی زبانی استدعا مسترد کرتے ہوئے کہا کہ پولیس رپورٹس پر قانون کے مطابق فیصلہ آئندہ سماعت پر سنایا جائے گا۔

بیجنگ : وزیر اعظم شہباز شریف نے چین کے صدر شی جن پنگ کی قائدانہ صلاحیتوں کی تعریف کی اور کہا آپ نے دنیا بھر کے آٹھ سو ملین افراد کو غربت سے نکلنے میں رہنمائی کی۔

تفصیلات کے مطابق وزیراعظم شہباز شریف نے بیجنگ میں چین کے صدر شی جن پنگ سے اعلیٰ سطح کی ملاقات کی، ملاقات میں ملاقات میں آرمی چیف فیلڈ مارشل سید عاصم منیر، نائب وزیراعظم اسحاق ڈار، وفاقی وزرا احسن اقبال،عطا تارڑ، محسن نقوی بھی شریک تھے۔

ملاقات میں خطے کی صورتحال اور دوطرفہ امور پر تبادلہ خیال کیا گیا، وزیر اعظم شہباز شریف نے چین کے صدر شی جن پنگ کی قائدانہ صلاحیتوں کی تعریف کی اور کہا آپ نے دنیا بھر کے آٹھ سو ملین افراد کو غربت سے نکلنے میں رہنمائی کی۔

وزیراعظم نے صدر شی جن پنگ کو "طاقت اور استحکام کی علامت” قرار دیتے ہوئے کہا کہ پاک-چین اقتصادی راہداری (سی پیک) اور بیلٹ اینڈ روڈ انیشی ایٹو جیسے منصوبے دونوں ممالک کے درمیان ترقی اور تعاون کی مشترکہ مثال ہیں۔

انھوں نے کہا کہ ہم چین کے ساتھ اپنے تعلقات کو مزید مستحکم کریں گے۔۔ پاکستان کے بیس کروڑ سے زائد عوام چین کی دوستی کو اپنے دل کے قریب سمجھتے ہیں۔

خیال رہے وزیراعظم شہباز شریف اپنے دورۂ چین کے دوران روسی صدر ولادیمیر پیوٹن اور تاجک صدر امام علی رحمان سے بھی ملاقات کریں گے۔

اس کے علاوہ وہ فاشزم کے خلاف جدوجہد کی 80ویں سالگرہ کی تقریب میں شرکت اور پاک-چین بزنس ٹو بزنس کانفرنس سے خطاب بھی کریں گے تاکہ سرمایہ کاری اور دوطرفہ تعاون کو فروغ دیا جا سکے۔

یاد رہے گزشتہ روز وزیراعظم شہباز شریف نے تیانجن، چین میں ہونے والے شنگھائی تعاون تنظیم (ایس سی او) اجلاس سے خطاب کیا تھا۔

وزیراعظم نے اپنے خطاب میں کہا تھا کہ ایس سی او کے لیے تیانجن میں موجود ہونا میرے لیے باعثِ مسرت ہے۔ میں چینی صدر شی جن پنگ کا ان کی مہمان نوازی پر شکریہ ادا کرتا ہوں۔ انہوں نے ازبکستان اور کرغزستان کو ان کے قومی دن پر مبارکباد بھی پیش کی۔