کراچی: ایم کیو ایم پی آئی بی کے ڈپٹی کنوینئر کامران ٹیسوری کا کہنا ہے کہ عامر لیاقت ایم کیو ایم میں واپس آئیں گے اور ممکنہ طور پر وہ 2018 کے انتخابات میں متحدہ کے امیدوار ہوں گے۔

اے آر وائی نیوز کے پروگرام الیونتھ آور میں میزبان وسیم بادامی کے ہمراہ گفتگو کرتے ہوئے کامران ٹیسوری کا کہنا تھا کہ آئندہ 24 گھنٹوں میں ایم کیو ایم کے حوالے سے اچھی خبر آسکتی ہیں۔ اُن کا کہنا تھا کہ ایم کیو ایم میں لیڈر شپ کا مسئلہ ہو یا نہ ہو مگر ووٹر متحد ہے، 2018 کا الیکشن ہم ساتھ مل کر ہی لڑیں گے۔

حیدرعباس رضوی کی وطن واپسی پر کامران ٹیسوری کا کہنا تھا کہ ’آئندہ 24 گھنٹوں بہت اہم ہیں، مجھے لگتا ہے عامر لیاقت الیکشن میں ایم کیو ایم کے امیدوار ہوں گے‘۔

مزید پڑھیں: عامرلیاقت حسین ٹکٹ نہ ملنے پرپی ٹی آئی سے ناراض

ایم کیو ایم کے ڈپٹی کنوینئر نے مزید کہا کہ عامر لیاقت کی پوزیشن ایسی ہے ماں کو چھوڑ کرجائے تو وہ واپس بھی آجاتاہے، اس لیے وہ جہاں بھی ہیں وہاں وہ سکون میں نہیں وہ ایک بار پھر جلد ایم کیو ایم کا حصہ ہوں گے۔

دوسری جانب تحریک انصاف کے رہنما فیصل واوڈا کا کہنا تھا کہ عامر لیاقت کو ٹکٹ دینے کے حوالے سے پارلیمانی اجلاس میں بات ہوئی، وہ جذباتی آدمی ہیں جو دل میں ہوتا ہے اسے زبان پر لے آتے ہیں۔

اُن کا کہنا تھا کہ عامر لیاقت پارٹی سے کہیں نہیں جارہے ہیں انہیں ہم جلدی منا بھی لیتے ہیں کیونکہ سیاست میں صبرو تحمل کے ساتھ معاملات کو دیکھتے ہوئے تنقید کو برداشت کرنا پڑتا ہے۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات  کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں

اسلام آباد : لاہور ہائی کورٹ کی جانب سے کاغذات نامزدگی میں ترامیم کالعدم ہونے کے بعد الیکشن کمیشن آف پاکستان کا اہم اجلاس جاری ہے۔

تفصیلات کے مطابق کاغذات نامزدگی میں ترمیم کے معاملے پرچیف الیکشن کمشنر سردار رضا خان کی زیرصدارت اجلاس جاری ہے جس میں میں الیکشن کمیشن کے چاروں ممبرزشریک ہیں۔

اجلاس میں لاہور ہائی کورٹ کی جانب سے کاغذات نامزدگی میں ترمیم کے فیصلے اور حلقہ بندیوں میں ترمیم کا جائزہ لیا جائے گا۔

الیکشن کمیشن آف پاکستان کا کہنا ہے کہ لاہور ہائی کورٹ کے حکم پرآج کاغذات نامزدگی سے متعلق ضروری فیصلے کیے جائیں گے۔

عدالتی حکم کے بعد الیکشن کمیشن نے کاغذات نامزدگی کی وصولی کا عمل روک دیا

خیال رہے کہ گزشتہ روز لاہور ہائی کورٹ نے کاغذات نامزدگی میں ترامیم کالعدم قرار دے کر الیکشن کمیشن کو نئے کاغذات نامزدگی تیار کرنے کا حکم دیا تھا۔

عدالت نے الیکشن کمیشن کو کاغذات نامزدگی کے فارم اے اور بی میں تمام خامیاں دور کرنے کی ہدایت کرتے ہوئے کہا تھا کہ پارلیمنٹ نے ترمیم کرکے قرضہ جات اور نادہندگی کے جو خانے نکالے ہیں وہ فارم میں موجود سمجھے جائیں گے۔

لاہور ہائی کورٹ کا کہنا تھا کہ نئے کاغذات نامزدگی میں آئین کے آرٹیکل 62 اور 63 کے تقاضے دوبارہ شامل کیے جائیں۔

انتخابات وقت پر ہوں‌ گے، کسی ادارے نے نہیں‌ روکا، سیکریٹری الیکشن کمشین

واضح رہے کہ دو روز قبل سیکریٹری الیکشن کمیشن بابر یعقوب کا کہنا تھا کہ کسی ادارے نے انتخابی شیڈول جاری کرنے سے نہیں روکا، آئندہ عام انتخابات 25 جولائی 2018 کو ہی منعقد کیے جائیں گے۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

اسلام آباد: سیکریٹری الیکشن کمیشن بابر یعقوب نے کہا ہے کہ کسی ادارے نے انتخابی شیڈول جاری کرنے سے نہیں روکا، آئندہ عام انتخابات 25 جولائی 2018 کو ہی منعقد کیے جائیں گے۔

تفصیلات کے مطابق اسلام آباد میں میڈیا سے غیر رسمی گفتگو کرتے ہوئے بابر یعقوب کا کہنا تھا کہ پورے ملک کے لیے انتخابی شیڈول جاری کردیا، ای سی پی نے انتخابی تاریخ کا اعلان آئین کے تحت کیا۔

اُن کا کہنا تھا کہ عام انتخابات 25جولائی 2018کو ہی ہوں گے، یکم جون کوریٹرننگ افسران کو پبلک نوٹس جاری کیے جائیں گے،  اور 25 جولائی سے پہلے تمام معاملات مکمل ہوجائیں گے۔

سیکریٹری الیکشن کمیشن کا کہنا تھاکہ جون سے 6جون  تک امیدوار کاغذات نامزدگی جمع کراسکیں گے جبکہ7جون کو  امیدواروں کی فہرست جاری کی جائےگی اور 14جون  تک امیدواروں کی اسکروٹنی کی جائےگی۔

بابر یعقوب کا کہنا تھا کہ امیدوار آر او کے فیصلوں کے خلاف 19جون کواپیلیں دائرکرسکیں گے، الیکشن ٹریبونلز ریٹرننگ فیصلوں کے خلاف اپیلوں کی سماعت  26جون تک نمٹائیں گے جبکہ امیدواروں کی حتمی فہرست 27جون کوجاری کی جائےگی۔

اُن کا کہنا تھا کہ بیلٹ پیپرکاکاغذفرانس اوربرطانیہ سے منگوایا ہے جو آدھا کراچی اور آدھا اسلام آبادمیں آئے گا، انتخابات کے لیے فوج کی تعیناتی سےمتعلق تاحال کوئی فیصلہ نہیں ہوا۔

مزید پڑھیں: خدارا الیکشن ایک ماہ کے لیے ملتوی کردیں: وزیر اعلیٰ بلوچستان

بابر یعقوب کا کہنا تھا کہ نگراں حکومتیں آنےکے بعد ان سےمشاورت ہوگی، بیلٹ پیپرفوج کی نگرانی میں چھاپےجائیں گے اور انتخابات کے لیے میڈیا کو بھی ضابطہ اخلاق جاری کیاجائےگا۔

واضح رہے کہ الیکشن کمیشن کی جانب سے آئندہ عام انتخابات کے لیے 25 جولائی کا اعلان کیا گیا ہے مگر گزشتہ روز بلوچستان اسمبلی میں حکومت نے ایک قرار داد پاس کی جس میں الیکشن کو ایک ماہ کے لیے مؤخر  کرنے تجویز دی تھی۔

علاوہ ازیں حلقہ بندیوں کے حوالے سے بھی اسلام آباد ہائی کورٹ سمیت مختلف عدالتوں میں درخواستیں زیر سماعت ہیں اور کچھ حلقہ بندیوں کو متنازع قرار دیتے ہوئے کالعدم قرار دیا گیا۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔