ARYNews.tv | Urdu – Har Lamha Bakhabar

Category: سعودی عرب

سعودی عرب سے آنے والی تازہ ترین خبریں اور معلومات۔ سعودی عرب اردو نیوز

سعودی عرب کی وزارت محنت کے مطابق، 2023 میں سعودی عرب میں 1.5 ملین سے زیادہ پاکستانیوں کو ورک ویزا جاری کیا گیا تھا۔

یہ اعداد و شمار بتاتے ہیں کہ سعودی عرب میں پاکستانیوں کی تعداد لاکھوں میں ہے۔ وہ سعودی معیشت میں ایک اہم کردار ادا کرتے ہیں

سعودی عرب سے آنے والی تازہ ترین خبریں اور معلومات۔ سعودی عرب اردو نیوز

  • سعودی اتحادی افواج کا یمن میں آپریشن فیصلہ کن مراحل میں داخل ہوگیا

    سعودی اتحادی افواج کا یمن میں آپریشن فیصلہ کن مراحل میں داخل ہوگیا

    ریاض: سعودی اتحادی افواج کی جانب سے یمن کی مرکزی بندرگاہ الحدیدہ میں جاری آپریشن اب فیصلہ کن مراحل میں داخل ہوگیا۔

    تفصیلات کے مطابق سعودی اتحادی افواج کی جانب سے یمن کی مشہور بندرگاہ الحدیدہ پر حوثی باغیوں کے انخلا کے لیے ایک بڑا فوجی آپریشن جاری ہے جو اب فیصلہ کن مراحل داخل ہوچکا ہے۔

    عرب میڈیا کے مطابق فوجی آپریشن کو اپنے منطقی انجام تک پہنچانے کے لیے سعودی اتحادی افواج اور یمن کی سرکاری فوج نے کمر کس لی اور فیصلہ کن اقدامات کیے جارہے ہیں۔

    الحدیدہ کو ایران نواز حوثی باغیوں سے آزاد کرانے کے لیے فیصلہ کُن آپریشن کی تیاریاں جاری ہیں، اس سلسلے میں سرکاری فوج کو تازہ دم دستے اور مزید دفاعی کمک پہنچانے کا عمل بھی جاری ہے۔

    یمن: سعودی اتحادی افواج کا آپریشن، 145 حوثی باغی ہلاک

    علاوہ ازیں سعودی اتحادی افواج نے یمن کے مختلف علاقوں میں بھی بڑی کامیابی حاصل کی ہے اور متعدد مقامات پر اپنا کنٹرول بھی سنبھال لیا ہے۔

    خیال رہے کہ یمن میں سعودی عرب کے اتحادی افواج کی جانب سے جاری آپریشن میں اب تک 145 حوثی باغی ہلاک جبکہ متعدد گرفتار ہوچکے ہیں، ہلاک حوثی باغیوں کی لاشیں مقامی اسپتال کے سرد خانے میں موجود ہیں۔

    یاد رہے کہ یمن کی سرکاری فوج نے سعودی اتحادی افواج کے تعاون سے گذشتہ روز حبل بندرگاہ پر اہم کارروائی کی تھی جس کے باعث ایران نواز باغی بندرگاہ چھوڑ کر فرار ہوگئے تھے جبکہ متعدد کو گرفتار بھی کیا گیا تھا۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • سعودی ایوی ایشن میں پہلی بار خواتین ہوا بازوں کی تربیت

    سعودی ایوی ایشن میں پہلی بار خواتین ہوا بازوں کی تربیت

    دمام: سعودی عرب میں خواتین کو ڈرائیونگ کی اجازت ملنے کے بعد اب سعودی ایوی ایشن اکیڈمی میں پہلی مرتبہ سعودی خواتین پائلٹوں کو طیارے اُڑانے کی تربیت دی جائے گی۔

    عرب میڈیا کے مطابق آکسفورڈ ایوی ایشن اکیڈمی کی مشرقی شہر دمام میں واقع برانچ میں سیکڑوں خواتین نے ہوا بازی کی تربیت لینے کے لیے درخواستیں جمع کرادی ہیں، توقع کی جارہی ہے کہ ستمبر کے پہلے ہفتے میں تربیت دینے کا آغاز کردیا جائے گا۔

    ایک سول پائلٹ بننے کی خواہش مند خاتون کا کہنا ہے کہ پہلے لوگ بیرون ملک شہری ہوا بازی کی تربیت کے لیے جانے کے عادی ہوچکے تھے لیکن بیرون ملک خواتین کے لیے شہری ہوا بازی کی تربیت مردوں کی بہ نسبت بہت مشکل تھی۔

    انہوں نے کہا کہ ہم ایک ایسے دور میں نہیں رہ رہے ہیں جہاں خواتین کو صرف محدود شعبوں میں کام کرنے کی اجازت ہو، اب خواتین کے لیے تمام اُفق کھلے ہیں، اگر آپ میں کوئی کام کرنے کی لگن ہے تو پھر آپ اس کام کو بخوبی انجام دے سکتے ہیں۔

    واضح رہے کہ آکسفورڈ ایوی ایشن اکیڈمی 30 کروڑ ڈالرز کے ایک منصوبے کا حصہ ہے، اس میں طیاروں کی تربیت کے لیے ایک اسکول بھی شامل ہے، اس کے علاوہ ہوائی اڈے پر طیاروں کو پرواز میں مدد دینے کے لیے ایک بین الاقوامی مرکز بھی قائم کیا گیا ہے۔

    اکیڈمی کے ایگزیکٹو ڈائریکٹر عثمان الموطیری کے مطابق ان کے یہاں طلبا کو تین سال کی تدریسی اور عملی تربیت دی جاتی ہے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • دنیا بھر میں یتیم بچوں کی کفالت کرنے والا سعودی شہری

    دنیا بھر میں یتیم بچوں کی کفالت کرنے والا سعودی شہری

    ریاض: مال و دولت خدا کی نعمت ہوتی ہے، کچھ لوگ اسے اپنی ذات پر خرچ کرتے ہیں لیکن کچھ ایسے بھی ہوتے ہیں جو اپنے مال ومتاع لوگوں کی خدمت میں لٹا دیتے ہیں۔

    تفصیلات کے مطابق سعودی عرب سے تعلق رکھنے والا ’علی‘ وہ مخیر شخص ہے جو دنیا بھر میں خصوصاً یتیموں کی مدد کے لیے سفر کرتا ہے اور ان کی ضروریات کو پورا کرنے کے لیے رقوم کا بندوبست کرتا ہے۔

    عرب میڈیا کے مطابق سعودی شہری علی سترہ سال کی عمر سے یتیموں کی مدد کے لیے اس کار خیر میں کوشاں ہیں، اور اب تک درجنوں پسماندہ ممالک کا دورہ کرتے ہوئے ہزاروں یتیموں کی مدد کر چکے ہیں۔

    انہوں نے عرب میڈیا کو انٹرویو دیتے ہوئے کہا کہ جب میں نے اپنی جوانی میں بعض افریقی ممالک کے سفر کیے تو وہاں غُربت کی بلند شرح اور لوگوں کا پست معیار زندگی دیکھ کر ہکا بکا رہ گیا، انھیں نہ صرف زندگی کی بنیادی سہولتیں دستیاب نہیں تھیں بلکہ وہ تعلیم بھی حاصل نہیں کرسکتے تھے۔

    سعودی شہری کا کہنا تھا ہم اس وقت دنیا بھر میں اکیس یتیم خانوں میں سات ہزار یتیم اور دو ہزار حاجت مند خاندانوں کی مدد کررہے ہیں لیکن ہمیں اس نیک کام میں کسی سرکاری ادارے کی جانب سے کوئی مدد مہیا نہیں کی گئی۔

    علی کا کہنا تھا کہ کبھی کبھی مجھ پر ایسا وقت بھی آتا کہ میرے پاس پیسے نہیں ہوتے، یتیم خانوں کو چلانے کے لیے قرض کی نوبت بھی آجاتی ہے لیکن میں حوصلہ کبھی نہیں ہارتا، مجھے اس قابل بنانے میں میری بیوی کا اہم کردار ہے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • یمن: شادی کی تقریب پر حوثیوں کا راکٹ حملہ، 5 افراد جاں بحق

    یمن: شادی کی تقریب پر حوثیوں کا راکٹ حملہ، 5 افراد جاں بحق

    ریاض: یمن کے شمال مشرقی صوبے الجوف میں شادی کی تقریب میں حوثی باغیوں کی جانب سے داغا جانے والا راکٹ گرنے کے نتیجے میں 5 افراد جاں بحق ہوگئے۔

    یمنی خبر رساں ایجنسی کے مطابق الجوف جنرل اسپتال میں پانچ خواتین اور بچوں کو مردہ حالت میں لایا گیا جبکہ متعدد زخمیوں کی حالت تشویشناک بتائی جاتی ہے۔

    عرب میڈیا کے مطابق حوثی باغیوں نے الجوف صوبے کے شہر الحزم میں ایک مکان پر راکٹ داغا، مکان میں شادی کی تقریب کے موقع پر خواتین جمع تھیں۔

    دوسری جانب ایک اور واقعے میں یمن کے حوثی باغیوں کی جانب سے داغے جانے والے ہتھیاروں کے ٹکڑے لگنے سے سعودی عرب کے صوبے جازان کے العارضہ ضلع میں تین افراد زخمی ہوگئے۔

    جازان صوبے میں شہری دفاع کے میڈیا ترجمان کے مطابق دو سعودی نوجوان شدید زخمی ہوئے جبکہ ایک دس سالہ بچہ بھی معمولی زخمی ہوا ہے۔

    ہتھیاروں کے ٹکڑے لگنے سے زخمی ہونے والے تینوں افراد کو اسپتال منتقل کردیا گیا ہے، شہری دفاع نے جائے وقوعہ کا دورہ کرکے حفاظتی اقدامات کا آغاز کردیا ہے۔

    واضح رہے کہ یمن میں جاری خانہ جنگی کے دوران حوثی باغیوں اور سعودی اتحادی افواج کے درمیان جھڑپوں میں متعدد افراد جاں بحق ہوچکے ہیں جبکہ سعودی حکام کا کہنا ہے کہ حوثی باغی کی جانب سے سرحدی علاقوں پر داغے گئے میزائل ایرانی ساختہ ہیں۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات  کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں

  • سعودی فورسز نے نجران پر حوثیوں کا ایک اور بیلسٹک میزائل حملہ ناکام بنادیا

    سعودی فورسز نے نجران پر حوثیوں کا ایک اور بیلسٹک میزائل حملہ ناکام بنادیا

    ریاض: سعودی فورسز نے جنوبی شہر نجران کی جانب یمن سے داغے گئے ایک اور بیلسٹک میزائل حملے کو ناکام بنادیا ہے۔

    سعودی عرب کے عسکری ذرائع کا کہنا ہے کہ ہفتے کے روز یمن سے حوثی ملیشیا نے یہ میزائل داغا تھا اور اس سے سرحدی شہر نجران کو نشانہ بنانے کی کوشش کی گئی تھی لیکن اس سے کوئی جانی نقصان نہیں ہوا ہے۔

    واضح رہے کہ سعودی عرب کی فضائی دفاعی فورسز نے حوثی باغیوں کے 6 جون 2015 کے بعد سے داغے گئے 120 سے زیادہ بلیسٹک میزائلوں کو ناکارہ بنایا ہے۔

    حوثی باغی ستمبر 2014 میں یمن کی قانونی حکومت کے خلاف بغاوت برپا کرنے کے بعد سے سعودی عرب کے جنوب میں واقع سرحدی شہر نجران کی جانب لاتعداد راکٹ اور میزائل فائر کرچکے ہیں۔

    واضح رہے کہ چند ماہ قبل سعودی میں سیکیورٹی فورسز نے شاہی محل کے نزدیک ایک ڈرون کو بھی مار گرایا تھا، سعودی افسر کا کہنا تھا کہ واقعے کے وقت شاہ سلمان اپنے محل میں نہیں تھے بلکہ وہ دیریا میں واقعہ اپنے فارم میں موجود تھے۔

    یاد رہے کہ عرب میڈیا کا ایران پر الزام لگاتے ہوئے کہنا تھا کہ یمن میں ایران حوثی باٖغیوں کو سپورٹ کر رہا ہے اور انہیں میزائل بھی فراہم کرتا ہے، علاوہ ازیں ترجمان عرب اتحاد فوج ترکی المالکی نے بھی حملے کا برابر ذمہ دار ایران کو بھی ٹھہرایا تھا۔

    خیال رہے کہ ہفتوں قبل ترجمان عرب اتحاد ترکی المالکی نے اپنے جاری کردہ بیان میں کہا تھا کہ حوثی باغی ایک سوچے سمجھے منصوبے کے تحت سعودی عرب کی شہری آبادی کو بیلسٹک میزائلوں سے نشانہ بنا رہے ہیں، لیکن ہم ان کے ناپاک عزائم کبھی کامیاب نہیں ہونے دیں گے۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • عالمی طاقتیں کبھی ایران کو ایٹمی ہتھیار بنانے کی اجازت نہیں دیں گے، سعودی وزیر خارجہ

    عالمی طاقتیں کبھی ایران کو ایٹمی ہتھیار بنانے کی اجازت نہیں دیں گے، سعودی وزیر خارجہ

    ریاض : سعودی وزیر خارجہ عادل الجبیر نے یورپی پارلیمان سے ملاقات کے بعد کہا ہے کہ ایران کو اپنی جارحانہ پالیسی کو ترک کرنا ہوگا، ورنہ عالمی سطح پر مزید تنہا ہوجائے گا۔

    تفصیلات کے مطابق سعودی عرب کے موجودہ وزیر خارجہ عادل الجبیر نے بیلجیم کے دارالحکومت برسلز میں میڈیا سے گفتگو کرتے ہوئے کہا ہے کہ عالمی طاقتیں کبھی ایران کو جوہری ہتھیار بنانے کی اجازت نہیں دے گی اور اگر اس نے اپنی جارحانہ پالیسی ترک نہیں کی تو عالمی سطح پر مزید تنہا ہوجائے گا۔

    غیر ملکی خبر رساں ادارے سے گفتگو کرتے ہوئے کہنا تھا کہ ایران کو یہ بات تسلیم کرنی ہوگی ایران کی پالیسیاں جارحانہ ہیں، ایران کو اس بات کا ادراک ہونا چاہیئے، ورنہ اس پر دباؤ میں اضافہ ہوگا۔

    میڈیا نمائندگان سے گفتگو میں کہنا تھا کہ سعودی وزیر خارجہ کا کہنا تھا کہ ایران کے ساتھ ہونے والے جوہری معاہدے سے امریکا کے علیحدہ ہونے کے فیصلے پر سعودی عرب اس کی حمایت کرتا ہے۔

    عربی میڈیا کے مطابق عادل جبیر نے جمعے کے روز برسلز میں نیٹو ہیڈکوارٹرز میں یورپی پارلیمان کے متعدد ارکان سے ملاقاتیں تھیں، جبکہ داعش مخالف بین الااقوامی اتحاد کے وزارتی اجلاس میں شرکت بھی کی۔

    سعودی وزیر خارجہ عادل الجبیر نے سعودی سفیروں اور اراکین یورپی پارلیمنٹ کے مابین مسلسل روابط اور ابلاغ کی ضرورت پر بھی زور دیا۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں

  • امریکا: تاجروں کو لوٹنے والا جعلی سعودی شہزادہ گرفتار

    امریکا: تاجروں کو لوٹنے والا جعلی سعودی شہزادہ گرفتار

    میامی : پولیس نے سعودی شہزادہ سلطان بن خالد بن کر تاجروں سے کروڑوں روپے لوٹنے والے امریکی دھوکے باز کر گرفتار کرکے قیمتی گھڑیاں اور بھاری رقم برآمد کرلی۔

    تفصیلات کے مطابق امریکی پولیس نے کارروائی کرتے ہوئے گذشتہ تین برسوں سے سعودی شہزادہ بن کر لوگوں سے کروڑوں روپے لوٹنے والے ’امریکی شہری اینتھونی گیگ نیک‘ کو گرفتار کرکے گھر سے قیمتی سامان اور نقدی برآمد کرلی۔

    غیر ملکی خبر رساں ادارے کا کہنا تھا کہ امریکی دھوکے باز شخص سعودی شہزادے سلطان بن خالد کا روپ دھار کر دنیا بھر کے سادہ لوح کارباری شخصیات سے سرمایہ کاری کے نام پر کروڑوں روپے اینٹھ رہا تھا۔

    امریکی میڈیا رپورٹس کے مطابق کہ ایک کاروباری شخص جیفری سوفر نے اینتھونی گیگ نیک کو دعوت پر مدعو کیا تھا، جہاں اس نے سعودی شہزادے کا روپ دھارنے کے باوجود سور کا گوشت کھالیا۔

    میامی کا تاجر جیفری سوفر

    امریکی خبر رساں ادارے کا کہنا تھا کہ جیفری سوفر نے اینتھونی کو سور کا گوشت کھاتے دیکھا تو حیران ہوگیا کیوں کہ وہ جانتا تھا کہ ’مسلمان سور کا گوشت نہیں کھاتے‘ جس کے بعد جیفری نے مذکورہ دھوکے باز کی جاسوسی کرکے حقائق سے پردہ اٹھایا۔

    غیر ملکی خبر رساں ادارے کا کہنا تھا کہ امریکی پولیس نے جیفری کی جانب سے شکایت درج ہونے کے بعد جعلی سعودی شہزادے کو حراست میں لے کر دھوکے بازی، جعل سازی اور چوری کے مقدمات کے تحت فلوریڈا جیل منتقل کردیا تھا۔

    امریکی پولیس کا کہنا تھا کہ مذکورہ شخص کو لندن سے نیویارک جاتے ہوئے گرفتار کیا گیا تھا۔

    امریکی خبر رساں ادارے مطابق پولیس اہلکاروں نے دوران تفتیش مذکورہ شخص کے گھر سے جعلی کاغذات، ہیرے کی گھڑیاں، 80 لاکھ ڈالر سے زائد کی رقم اور دیگر بیش قیمتی سامان برآمد کرلیا۔

    اصلی سعودی شہزادہ سلطان بن خالد السعود

    فلوریڈا پولیس کے ترجمان کا کہنا تھا کہ اینتھونی نے اپنی گاڑی پر جعلی ڈپلومیٹک نمبر پلیٹ اور گھر پر سعودی شہزادہ سلطان بن خالد کے نام کی تختیاں لگا رکھی تھیں اور ساتھ ساتھ دھوکے باز امریکی شخص نے جزیرے پر عالی شان گھر بھی تعمیر کروایا، تاکہ لوگ اس پر شک نہ کریں۔

    پولیس کا کہنا تھا کہ مذکورہ شخص نے سنہ 2015 میں مرڈن ولیمز انٹرنیشنل کے نام سے جعلی سرمایہ کار کمپنی کھولی تھی جو دنیا بھر میں سرمایہ کاری کرتی تھی۔

    غیر ملکی خبر رساں ادارے کے مطابق امریکی پولیس کا کہنا تھا کہ گیگ نیک سماجی رابطے کی ویب سایٹ پر نجی طیارے میں سفر کرنے کی تصاویر شائع کرتا رہتا تھا لیکن اپنا چہرہ نہیں دیکھاتا تھا۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں

  • امریکا کا سعودی طالب علموں کو خراج تحسین

    امریکا کا سعودی طالب علموں کو خراج تحسین

    واشنگٹن/ریاض : امریکا کی ہاروڈ یونیورسٹی نے دو بچوں کی جان بچاتے ہوئے ڈوب کر جاں بحق ہونے والے سعودی طالب علموں کو خراج تحسین پیش کرنے کے لیے رواں ہفتے سعودی عرب کا قومی پرچم لہرانے کا اعلان کردیا۔

    تفصیلات کے مطابق امریکا میں دو بچوں کو ڈوبنے سے بچاتے ہوئے اپنی جانیں قربان کرنے والے سعودی طالب علموں کے اعزاز میں امریکی ریاست کونیٹکی کٹ میں واقع یونیورسٹی آف ہاروڈ نے رواں ہفتے سعودی عرب کا قومی جھنڈا لہرانے کا اعلان کیا ہے۔

    سعودی خبر رساں ادارے کا کہنا تھا کہ ہاروڈ یونیورسٹی کی جانب سے جاری اعلامیے میں کہا ہے کہ یونیورسٹی میں 27 سالہ ذیب الیامی اور 25 سالہ جاسر الراکا گزشتہ پانچ برس سے اسکالر شپ پر سول انجینئرنگ کی تعلیم حاصل کررہے تھے اور آئندہ دو ہفتوں کے دوران ان کی تعلیم مکمل ہونے والی تھی۔

    غیر ملکی خبر رساں ادارے کے مطابق 6 جولائی جمعے کے روز دونوں طالب علم امریکی ریاست میسا چوسٹس میں دو مقامی بچوں کو ڈوبنے سے بچانے کی کوشش میں خود ڈوب کر جاں بحق ہوگئے۔

    دریائے شکوپی میں دو سعودی طلباء ڈوب کر جاں بحق

    غیر ملکی خبر رساں ادارے کا کہنا تھا کہ دونوں سعودی طالب علموں مقامی بچوں کی جانیں بچالیں، تاہم خود اپنی جان قربان کرکے عظیم انسانی خدمت کرگئے۔ جسے ہمیشہ یاد رکھا جائے گا۔

    سعودی خبر رساں ادارے کا کہنا تھا کہ دریا میں ڈوب کر جاں بحق ہونے والے دونوں سعودی طالب علموں کی میتیں سعودی عرب کے صوبے نجران پہنچا دی گئی ہیں۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں

  • سعودی عرب: سیکیورٹی چیک پوائنٹ پر حملہ، ذمہ داری داعش نے قبول کرلی

    سعودی عرب: سیکیورٹی چیک پوائنٹ پر حملہ، ذمہ داری داعش نے قبول کرلی

    ریاض: سعودی عرب کے ایک سیکیورٹی چیک پوائنٹ پر حملے کی ذمہ داری عالمی دہشت گرد تنظیم دولت اسلامیہ نے قبول کرلی۔

    تفصیلات کے مطابق گذشتہ ہفتے سعودی عرب کے صوبے قاسم میں قائم ایک سیکیورٹی چیک پوائنٹ پر عالمی شدت پسند گروہ داعش نے حملہ کیا تھا کے نتیجے میں دو افراد ہلاک ہوئے تھے۔

    عرب میڈیا کے مطابق مذکورہ حملے کی ذمہ داری داعش کی جانب سے قبول کرلی گئی ہے جبکہ اس حملے میں داعش کو بھی جانی نقصان کا سامنا کرنا پڑا تھا۔

    صوبہ قاسم کے علاقے بریدہ میں ہونے حملے میں سیکیورٹی فورسز کا ایک اہلکار سمیت ایک غیر ملکی باشندہ بھی مارا گیا تھا جبکہ جوابی کارروائی میں داعش کے تین شدت پسند ہلاک ہوئے تھے۔

    ترکی: داعش سے تعلقات کا الزام، 18 مشتبہ افراد گرفتار

    عرب میڈیا کا کہنا ہے کہ دولت اسلامیہ کی جانب سے باقاعدہ حملے کی ذمہ داری قبول کی گئی ہے تاہم انہوں نے ایسے کوئی شواہد پیش نہیں کیے جس سے اندازہ ہوسکے کہ واقعی یہ حملہ انہوں نے کیا تھا۔

    خیال رہے کہ گذشتہ دنوں چین، پاکستان، روس اور ایران کے انٹیلی جنس سربراہان کا مشترکہ اجلاس منعقد ہوا تھا جس میں‌ افغانستان سے داعش کے خاتمے کے لیے مشترکہ کوششوں پر اتفاق کیا گیا تھا۔

    داعش سے نمٹنے کے لیے چین، پاکستان، روس، ایران کا مشترکہ اجلاس

    علاوہ ازیں گذشتہ ماہ ترکی کی انسداد دہشت گردی کی پولیس نے دہشت گرد گروپ داعش کے ساتھ تعلق رکھنے کے شبے میں 18 مشتبہ افراد کو حراست میں لیا تھا جن سے پوچھ گچھ جاری ہے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • سعودی ولی عہد محمد بن سلمان کی کھرب پتی شہزادے سے دوستی

    سعودی ولی عہد محمد بن سلمان کی کھرب پتی شہزادے سے دوستی

    جدہ: سعودی ولی عہد محمد بن سلمان اور کھرب پتی شہزادے الولید بن طلال کے درمیان دوستی ہوگئی۔

    عرب میڈیا کے مطابق سعودی عرب میں ولی عہد محمد بن سلمان کے اقتدار میں آنے کے بعد ان کے حکم پر کرپشن کے الزام میں گرفتار کیے گئے کھرب پتی شہزادے الولید بن طلال اور سعودی ولی عہد کی دوستی ہوگئی ہے، دونوں شخصیات نے ملاقات بھی کی ہے۔

    عرب میڈیا کے مطابق دونوں شہزادوں نے ملاقات کی اور نجی شعبے کے مستقبل اور وژن 2030 کی کامیابی میں کردار ادا کرنے کے حوالے سے تبادلہ خیال کیا گیا۔

    شہزادہ الولید بن طلال نے سماجی رابطے کی ویب سائٹ ٹویٹر پر اپنے پیغام میں کہا ہے کہ یہ میرے لیے فخر کی بات ہے کہ میں نے سعودی ولی عہد محمد بن سلمان سے ملاقات کی اور نجی شعبے کے مستقبل سمیت کامیاب وژن 2030 پر بات چیت کی، انہوں نے کہا کہ میں وژن 2030 کے سب سے بڑے حامیوں میں سے ایک ہوں۔

    واضح رہے کہ گزشتہ برس نومبر میں سعودی ولی عہد شہزادہ محمد بن سلمان نے کرپشن کے خلاف بڑے پیمانے پر کریک ڈاؤن کرتے ہوئے 10 سے زائد شہزادوں اور درجنوں سابق اور موجودہ وزرا کو گرفتار کرلیا تھا جن میں شہزادہ الولید بن طلال بھی شامل تھے۔

    خیال رہے کہ یہ خبریں بھی سامنے آئی تھیں کہ سعودی شہزادے ولید بن طلال کو 6 ارب ڈالرز میں رہائی کی پیش کش کی گئی تھی، اس پیش کش کے بعد جنوری میں سعودی حکام کی جانب سے کرپشن کے الزام میں گرفتار امیر ترین شہزادے ولید بن طلال کو رہا کردیا گیا تھا۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک’پہنچانے کے لیے سوشل میڈیا پر شیئر کریں۔