واشنگٹن: امریکی صدر ڈونلڈ ٹرمپ نے کہا ہے کہ سعودی عرب سے تیل کی پیداوار بڑھانے کی درخواست کی ہے تاکہ عالمی منڈی میں تیل کی کمی کو پورا کیا جاسکے۔
ان خیالات کا اظہار انہوں نے سماجی رابطے کی ویب سائٹ ٹوئٹر پر جاری اپنے پیغام میں کیا، ڈونلڈ ٹرمپ کا کہنا تھا کہ سعودی عرب نے ان کی درخواست پر تیل کی پیداوار میں اضافہ کرنے پر اتفاق کر لیا ہے۔
انہوں نے کہا کہ ایران اور وینزویلا کی صورت حال کے سبب عالمی منڈی میں تیل کی کمی ہو گئی تھی جس کے باعث انہوں نے سعودی فرمانرواں شاہ سلمان سے تیل کی پیداوار بڑھانے کی درخواست کی۔
سعودی حکومت کا تیل کی پیداوار میں کمی کا اعلان
امریکی صدر کا مزید کہنا تھا کہ سعودی عرب تیل کی پیداوار میں تقریباً دو ملین بیرل اضافہ کرے گا، سعودی فرمانرواں شاہ سلمان نے اس بات پر اتفاق کیا ہے کہ موجودہ تیل کی قیمتیں بہت زیادہ ہیں۔
خیال رہے کہ امریکی صدر نے اس بات کی وضاحت نہیں کی کہ سعودی عرب کی جانب سے آیا دو ملین بیرل تیل کی پیداوار میں اضافہ ماہانہ ہوگا یا روزانہ کی بنیاد پر البتہ گذشتہ ہفتے اوپیک ممالک کے اجلاس میں بھی تیل کی پیداوار بڑھانے کا فیصلہ کیا گیا تھا۔
سعودی حکومت کا تیل مہنگا،رعایت ختم، نئے ٹیکس عائد کرنے کا ارادہ
دوسری جانب سعودی خبر رساں ایجنسی کا کہنا تھا کہ امریکی صدر اور شاہ سلمان کے درمیان ٹیلی فونک رابطہ بھی ہوا جس میں دونوں رہنماؤں نے عالمی منڈی میں تیل کی قیمت سمیت ملکی معیشت پر بھی تبادلہ خیال کیا ہے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
