ARYNews.tv | Urdu – Har Lamha Bakhabar

Category: سعودی عرب

سعودی عرب سے آنے والی تازہ ترین خبریں اور معلومات۔ سعودی عرب اردو نیوز

سعودی عرب کی وزارت محنت کے مطابق، 2023 میں سعودی عرب میں 1.5 ملین سے زیادہ پاکستانیوں کو ورک ویزا جاری کیا گیا تھا۔

یہ اعداد و شمار بتاتے ہیں کہ سعودی عرب میں پاکستانیوں کی تعداد لاکھوں میں ہے۔ وہ سعودی معیشت میں ایک اہم کردار ادا کرتے ہیں

سعودی عرب سے آنے والی تازہ ترین خبریں اور معلومات۔ سعودی عرب اردو نیوز

  • ریاض: 25 سرکاری اسکولوں کو نجی اداروں کے حوالے کردیا گیا

    ریاض: 25 سرکاری اسکولوں کو نجی اداروں کے حوالے کردیا گیا

    ریاض : سعودی حکومت نے ملک کا تیل پر سے انحصار کم کرنے کے لیے قومی اداروں‌ کی نجکاری کا سلسلہ شروع کردیا، حکام نے پہلے مرحلے میں سرکار کے زیر انتظام چلنے والے 25 اسکولوں کو نجی اداروں کے حوالے کردیا.

    تفصیلات کے مطابق سعودی حکومت نے گذشتہ روز اعلان کیا ہے کہ وہ وفاقی حکومت کے زیر انتظام چلنے والے -25 اسکولوں کو نجی اداروں کے حوالے کر رہی ہے۔ سعودی عرب میں اداروں کی نجکاری کے منصوبے میں اسکولوں کا نمبر پہلا تھا۔

    سعودی حکام کا کہنا تھا کہ مذکورہ منصوبے کا مقصد سعودی مملکت کے خزانے پر تیل کی قیمتوں میں کمی کے باعث آنے والے پریشر کو کم کرنے کے لیے سنہ 2020 تک 11 ارب ڈالر کی خطیر رقم جمع کرنا ہے۔

    سعودی حکام کا کہنا ہے کہ قومی اداروں کی نجکاری منصوبوں کے تحت مستقبل میں صحت، نقل و حمل سمیت کئی شعبوں کو نجی اداروں کے حوالے کیا جائے گا۔

    واضح رہے کہ سعودی وزارت تعلیم نے رواں برس جنوری میں مکہ اور جدہ کے 60 سے زائد تعلیمی اداروں کے نقشے، اور تعمیرات کی بحالی کے لیے ٹینڈر کھولے گئے تھے۔

    خیال رہے کہ سعودی حکومت نے قومی دھارے میں آنے والے اسکولوں سے متعلق ایک نقشہ بنا رکھا تھا جو مکمل طور پر حکومتی خزانے پر چلتا تھا۔

    سنہ 2014 میں عالمی منڈی میں تیلوں کی قیمتوں میں کمی کے باعث قومی خزانے پر زور پڑنے کی وجہ سے حکومت نے قومی اداروں کو نجی سرمایہ کاروں کے حوالے کرنے کا سلسلہ شروع کردیا تھا۔

    سعودی عرب کے موجودہ حاکم سعودی کو متحدہ عرب امارات کی طرح تیل پر سے ملک کا انحصار کم کرنا چاہتے ہیں کیوں کہ ان کو خدشہ ہے کہ آئندہ برسوں میں سرکاری نوکریوں کی کوئی ضمانت نہیں ہوگی۔

    سعودی عوام کا کہنا تھاکہ سعودی عرب میں رہائشی پلاٹوں اور عمارتوں کی قیمتوں مسلسل اضافہ پہلے ہی عوام کی پریشانی کا باعث تھا، اب تعلیم اور صحت کے شعبوں میں نجکاری کی وجہ سے ان کی بھی قیمتوں میں اضافہ ہوجائے گا۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • سعودی عرب:‌ ماں بیٹی نے اکٹھے گریجویشن کر کے نئی مثال قائم کر دی

    سعودی عرب:‌ ماں بیٹی نے اکٹھے گریجویشن کر کے نئی مثال قائم کر دی

    ابہا: سعودی عرب میں باہمت خاتون نے اپنی بیٹی کے ساتھ کنگ خالد یونی ورسٹی سے گریجویشن کرکے ایک شان دار مثال قائم کردی۔

    تفصیلات کے مطابق ابہا کی شہری صالحہ عسیری نے یونی ورسٹی کی سالانہ تقریب میں میڈیا اینڈ ٹیلی کمیونی کیشن کے شعبے میں جب کہ ان کی بیٹی مرام آل مناع نے بزنس ایڈمنسٹریشن میں فارغ التحصیل ہونے پر گریجویشن گاؤن زیب تن کیا۔

    صالحہ عسیری نے میڈیا سے گفتگو کرتے ہوئے کہا کہ ان کی شادی کم عمری میں ہوگئی تھی جس کی وجہ سے نویں جماعت میں تعلیم کا سلسلہ رک گیا تھا۔

    ان کا کہنا تھا کہ کئی برس بعد جب وہ اپنے شہر ابہا لوٹ آئیں تو ان کی بیٹی مرام نے سیکنڈری مرحلہ مکمل کرنے کے بعد انھیں بھی ہوم اسکولنگ سے اپنا تعلیمی سلسلہ پھر سے جوڑنے کے لیے اصرار کیا۔

    صالحہ کے مطابق انھوں نے انٹرمیڈیٹ سے لے کر یونی ورسٹی کے آخری دن تک تعلیمی سفر اپنی بیٹی کے ساتھ طے کیا۔ وہ یہ بتاتے ہوئے آب دیدہ ہوگئیں کہ ان کی والدہ انھیں گریجویٹ کے روپ میں دیکھنے کی تمنا لیے ایک سال قبل دنیا سے رخصت ہوگئیں۔

    سعودی خواتین کی ڈرائیونگ سے ٹریفک جام ہونے کا خدشہ مسترد

    ان کا کہنا تھا کہ اس تعلیمی سفر میں بہت سی مشکلات پیش آئیں لیکن انھوں نے ہمت نہیں ہاری۔ صالحہ کے مطابق اب وہ ملازمت کرکے اپنے بچوں کی مزید بہتر تعلیم و تربیت کا فریضہ ادا کرنا چاہتی ہیں۔

    واضح رہے کہ سعودی ولی عہد محمد بن سلمان کی طرف سے سلطنت میں اصلاحات کا سلسلہ شروع ہونے کے بعد خواتین کی زندگی میں واضح بدلاؤ آگیا ہے۔

     خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • رائل رمبل 2018، برون اسٹرومین نے جیت لیا

    رائل رمبل 2018، برون اسٹرومین نے جیت لیا

    جدہ: سعودی عرب کے شہر جدہ میں سنیما کی بحالی کے بعد ڈبلیو ڈبلیو کے ایونٹ رائل رمبل 2018 کا انعقاد ہوا، رائل رمبل کا ٹائٹل برون اسٹرومین نے اپنے نام کرلیا۔

    تفصیلات کے مطابق رائل رمبل ایونٹ میں 50 ریسلر رنگ میں اترے جن کو ایک دوسرے کو رنگ سے باہر پھینکنا تھا، آخر میں جو ریسلر رنگ میں موجود رہتا اسے رائل رمبل کا فاتح قرار دینا تھا۔

    50 ریسلرز میں برون اسٹرومین، ڈینئل برائن، کیون اوون، شین میکموہن، گریٹ کھلی، مارک ہنری سمیت دیگر رنگ میں اترے لیکن برون اسٹرومین نے رائل رمبل کا ٹائٹل اپنے نام کرلیا۔

    یونیورسل چیمپئن شپ کے میچ میں ریسل مینیا 34 کے بعد ایک بار پھر رومن رینز اور بروک لیسنر مدمقابل آئے، اسٹیل کیج میچ میں رومن رینز جیتتے ہوئے نظر آرہے تھے کہ لیکن جب رومن رینز نے اپنا اسپیئر بروک لیسنر کو مارا تو اسٹیل کیج ٹوٹ گیا بروک لیسنر اور رومن رینز دونوں ہی باہر جاگرے، بروک لیسنر پہلے باہر گرے اس وجہ سے جیت کا حقدار بروک کو قرار دے گیا گیا۔

    ڈبلیو ڈبلیو ای چیمپئن شپ کے میچ میں اے جے اسٹائلز اور ناکامورا رنگ میں اترے، اے جے اسٹائلز نے ناکامورا کو شکست دے دی اور اپنے ٹائٹل کا کامیاب دفاع کیا۔

    یونائیٹڈ اسٹیٹس چیمپئن شپ کے میچ میں جیف ہارڈی نے بھارتی ریسلر جندر مہل کو ہرا کر یونائیٹڈ اسٹیٹس چیمپئن شپ کا ٹائٹل اپنے نام کرلیا، ریسل مینیا 34 میں جندر مہل یونائیٹڈ اسٹیٹس چیمپئن شپ کا ٹائٹل اپنے نام کیا تھا۔

    ریسل مینیا 33 میں رومن کے ہاتھوں شکست سے دوچار ہوکر ریٹائر ہونے والے ڈیڈ مین انڈر ٹیکر کی ریسل مینیا 34 میں واپسی ہوئی تھی، انڈر ٹیکر نے جان سینا کو چند منٹوں میں شکست دی تھی۔

    رائل رمبل میں انڈر ٹیکر کا مقابلہ روسیو سے ہوا، میچ میں ہارنے والے کو رنگ سے باہر رکھے گئے تابوت میں بند کرنا تھا، انڈر ٹیکر سے لڑنے والے روسیو زیادہ دیر تک رنگ میں نہ ٹک پائے اور صرف 15 منٹ میں ہی تابوت میں‌ بند ہو کر شکست کھا گئے۔

    ایک اور میچ میں جان سینا اور ٹرپل ایچ رنگ میں اترے، جان سینا جو ریسل مینیا 34 میں انڈر ٹیکر کے ہاتھوں ہار گئے تھے، رائل رمبل میں ٹرپل ایچ کو باآسانی شکست دے دی۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • حوثی باغیوں کا بیلسٹک میزائل سے حملہ، سعودی فورسز نے ناکام بنا دیا

    حوثی باغیوں کا بیلسٹک میزائل سے حملہ، سعودی فورسز نے ناکام بنا دیا

    ریاض: یمن میں برسرِپیکار حوثی باغیوں کی جانب سے سعودی عرب میں داغا گیا میزائل سعودی فورسز نے بروقت کارروائی کرتے ہوئے فضا میں ہی تباہ کر دیا۔

    تفصیلات کے مطابق حوثی ملیشیا نے افغان کے ساحلی شہر جازان کو نشانہ بنانے کی کوشش کی اور ایک بیلسٹک میزائل داغا تاہم سعودی ایئر ڈیفنس کے فورسز نے فوری جوابی کارروائی کرتے ہوئے میزائل فضا میں ہی تباہ کر دیا۔

    واقعے سے متعلق سکیورٹی حکام کا کہنا ہے کہ شہر کے اطراف اور فضا کی بھرپور نگرانی جاری تھی کہ اچانک میزائل حملے کی اطلاع ملی جسے ایئر ڈیفنس نظام کے تحت یمن کے حوثی باغیوں کا داغا گیا بیلسٹک میزائل فضا میں ہی ناکام بنا دیا۔

    سعودی عرب نے حوثی باغیوں کا میزائل حملہ ناکام بنا دیا

    مقامی میڈیا کا کہنا تھا کہ فورسز کی جانب سے تباہ کیا گیا میزائل کا ملبہ زمین پر گرا تاہم اس میں کسی قسم کا کوئی جانی یا مالی نقصان نہیں ہوا جبکہ سیکورٹی حکام نے علاقے کو بھی کلیئر قرار دے دیا ہے۔

    خیال رہے کہ گذشتہ دونوں سعودی عسکری اتحاد کی جانب سے ایک فضائی حملہ کیا گیا تھا جس کے نتیجے میں یمن کے حوثی باغیوں کا اہم ترین لیڈر صالح صمد کی ہلاکت سامنے آئی تھی، وہ حوثی ملیشیا کے سپریم پولیٹیکل کونسل کے صدر کے طور پر جانے جاتے تھے۔

    حوثی باغیوں کا نجران پر ایک اور میزائل حملہ سعودی فورسز نے ناکام بنادیا

    بعد ازاں حوثی باغیوں نے ردعمل کے طور پر سعودی عرب میں میزائل حملے تیز کر دیے ہیں جبکہ گذشتہ دنوں بھی عرب کے کنک خالد ایئر پورٹ کو نشانہ بنانے کی کوشش کی گئی تھی جسے سعودی فورسز نے ناکام بنا دیا تھا۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • سعودی عرب میں مٹی کا شدید طوفان، ویڈیوز وائرل

    سعودی عرب میں مٹی کا شدید طوفان، ویڈیوز وائرل

    ریاض: سعودی عرب کے دارالحکومت میں آنے والے غیر متوقع مٹی کے طوفان نے شہریوں کو خوفزدہ کردیا جس کی ویڈیوز اور تصاویر سوشل میڈیا پر وائرل ہوگئیں۔

    عرب میڈیا کے مطابق سعودی عرب کے دارلحکومت ریاض اور  مشرقی حصے کے مختلف علاقوں میں جمعرات کے روز اچانک مٹی کا طوفان آیا جس کے باعث شہری خوفزدہ ہوگئے۔

    شہر میں طوفان کی وجہ سے گردوغبار پھیل گیا جس کے باعث شہری گھروں میں محصور ہوئے اور شہر نے اچانک خاموشی کی چادر اوڑھ لی، کسی بھی ممکنہ حادثے کے پیش نظر پولیس نے موٹرویز پر گاڑیوں کی آمد و رفت بھی بند کردی۔

    سعودی محکمہ موسمیات نے خبردار کیا ہے کہ ریت کے طوفان کا زور دو روز تک جاری رہے گا اس لیے شہری بلاجواز گھروں سے باہر نہیں نکلیں اور اگر انہیں باحالت مجبوری کہیں جانا پڑے تو احتیاطی تدابیر استعمال کریں۔

    محکمہ موسمیات نے اس بات کا بھی خدشہ ظاہر کیا ہے کہ جمعرات کے روز مشرقی علاقوں میں بننے والا مٹی کا طوفان اب دیگر شہروں کی طرف بڑھ رہا ہے اور یہ آئندہ دنوں میں شدت اختیار کرے گا جس کے اثرات بچوں اور بڑی عمر کے لوگوں کو بہت زیادہ ہوں گے۔

    دوسری جانب محکمہ موسمیات کی پیش گوئی قدرتی معجزے کے آگے ناکارہ ثابت ہوئی کیونکہ طوفان کے مختلف شہروں میں تیز بارش بھی ہوئی جس کے بعد گرمی کا زور ٹوٹا اور موسم خوشگوار ہوا۔

    سوشل میڈیا پر وائرل ہونے والی ویڈیو اور تصاویر میں دیکھا جاسکتا ہے کہ شہر میں ہر طرف گرد و غبار ہے اور دو سے مٹی کا طوفان شہر کی جانب بڑھ رہا ہے۔

    سعودی عرب کے مقامی لوگوں نے جہاں مٹی کے طوفان کی ویڈیوز اور تصاویر سوشل میڈیا پر شیئر کیں وہیں بعد میں ہونے والی بارش اور موسمیاتی تبدیلی کے مناظر بھی انٹرنیٹ پر شیئر کیے۔

     خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • سعودی خواتین کی ڈرائیونگ سے ٹریفک جام ہونے کا خدشہ مسترد

    سعودی خواتین کی ڈرائیونگ سے ٹریفک جام ہونے کا خدشہ مسترد

    ریاض: سعودی عرب کی قومی کمیٹی برائے ڈرائیونگ کے سربراہ ڈاکٹر مخفور آل بشر نے سعودی خواتین کی ڈرائیونگ سے ٹریفک جام ہونے کا خدشہ مسترد کردیا۔

    تفصیلات کے مطابق قومی کمیٹی برائے ڈرائیونگ کے سربراہ کا کہنا تھا کہ یہ تاثر بالکل غلط ہے کہ خواتین کو ڈرائیونگ کی اجازت ملنے کے بعد شہروں میں گاڑیوں کا ہجوم بڑھ جائے گا اور ٹریفک مسائل بڑھیں گے۔

    قومی کمیٹی کے چئیرمین نے ایک انٹرویو میں کہا کہ حکومت نے خواتین کی ڈرائیونگ کے سلسلے میں تمام معاملات پر غور کرلیا ہے اور تمام ضروری انتظامات بھی کرلیے ہیں، روڈ اور ٹریفک حکام کسی بھی رکاوٹ سے نمٹنے کے لیے پوری طرح تیار ہیں۔

    واضح رہے کہ ڈرائیونگ سے دل چسپی رکھنے والی سعودی خواتین کو باقاعدہ پیشہ ور تربیتی اداروں میں ٹریننگ دی جارہی ہے، اس سلسلے میں مخفور آل بشر کا کہنا تھا کہ خواتین کو دو ماہ پر  محیط ایک کورس بھی کرایا جائے گا جو ٹریفک سے متعلق تمام معلومات اور ضروری ہدایات پر مشتمل ہے۔

    سعودی عرب کے ولی عہد محمد بن سلمان کی شان دار اصلاحات کے بعد جہاں ایک طرف خواتین مختلف ڈرائیونگ انسٹی ٹیوٹس کا رخ کر رہی ہیں وہاں وہ یہ سوال بھی اٹھارہی ہیں کہ یونی ورسٹیاں کیوں ڈرائیونگ سکھانے کے کورسز آفر نہیں کر رہی ہیں؟ ان کا کہنا ہے کہ نجی اداروں میں انھیں زیادہ فیس ادا کرنی پڑتی ہے۔

    سعودی خواتین کا انقلابی فیصلہ، جدہ کی سڑکوں‌ پر جاگنگ

    واضح رہے کہ اس وقت سعودی عرب میں خواتین کے لیے مخصوص ڈرائیونگ اسکول موجود نہیں ہیں جس کی وجہ سے انھیں مردوں کے ڈرائیونگ اسکولوں میں تربیت حاصل کرنی پڑ رہی ہے، تاہم حکومت مستقبل میں ان کے لیے الگ اسکول قائم کرنے کا ارادہ رکھتی ہے۔

     خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • رائل رمبل، ڈبلیو ڈبلیو ای کے مشہور ریسلر سعودی عرب میں جوہر دکھائیں گے

    رائل رمبل، ڈبلیو ڈبلیو ای کے مشہور ریسلر سعودی عرب میں جوہر دکھائیں گے

    جدہ: عالمی شہرت یافتہ ڈبلیو ڈبلیو ای ریسلر جان سینا، انڈر ٹیکر، ٹرپل ایچ آج پہلی بار سعودی عرب میں پہلوانی کا مظاہرہ کرنے جارہے ہیں۔

    غیر ملکی خبر رساں ادارے کے مطابق سعودی عرب میں سنیما کی بحالی کے بعد اب ڈبلیو ڈبلیو ای کے معروف ریسلرز دو دو ہاتھ کرتے نظر آئیں گے، ریسلر کی دنیا میں شائقین کے دل جیتنے والے معروف ریسلر جان سینا، انڈر ٹیکر، ٹرپل ایچ، مارک ہنری سعودی عرب پہنچ گئے جہاں ڈبلیو ڈبلیو ای کا پہلا ایونٹ ہونے جارہا ہے۔

    ڈبلیو ڈبلیو رنگ میں 50 بڑے پہلوانوں کے درمیان 7 اعزازات کے لیے 10 مقابلے ہوں گے، رائل رمبل میں خواتین کو ریسلرز کو شامل نہیں کیا گیا ہے۔

    واضح رہے کہ سعودی عرب نے عالمی ریسلنگ انٹرٹینمنٹ ڈبلیو ڈبلیو ای سے آٗئندہ 10 سال کا معاہدہ کیا ہے، جس کے تحت کمپنی سعودیہ کے مختلف شہروں میں عالمی معیار کی ریسلنگ کا انعقاد کررہی ہے۔

    رائل رمبل کا بڑا مقابلہ یونیورسل چیمپئن بروک لیسنر اور انڈر ٹیکر کے درمیان ہوگا جسے اسٹیل کیج کا نام دیا گیا ہے، واضح رہے کہ ریسل مینیا 34 میں بروک لیسنر نے رومن رینز کو شکست دے کر ٹائٹل کا کامیاب دفاع کیا تھا۔

    ڈبلیو ڈبلیو ای چیمپئن شپ کے لیے اے جے اسٹائلز اپنے اعزاز کا دفاع کریں گے ان کا مقابلہ ناکامورا سے ہوگا، جان سینا اور ٹرپل ایچ بھی رنگ میں اترنے کے لیے تیار ہیں۔

    ڈیڈ مین کے نام سے مشہور ریسلر انڈر ٹیکر کا مقابلہ روسو سے ہوگا، واضح رہے کہ ریسل مینیا 33 میں انڈر ٹیکر کو بگ ڈوگ رومن رینز کے ہاتھوں شکست کا سامنا کرنا پڑا تھا، جبکہ ریسل مینیا 34 میں انڈر ٹیکر نے جان سینا کو باآسانی شکست سے دوچار کیا تھا۔


    انٹرکانٹی نینٹل چیمپئن شپ کے لیے سیتھ رولنز، دا مز، فن بیلر اور سموا جوئی کے درمیان مقابلہ ہوگا جبکہ دا مز اعزاز کا دفاع کریں گے۔
    یونائیٹڈ اسٹیٹس چیمپئن شپ کے لیے بھارتی ریسلر جندر مہل کا مقابلہ جیف ہارڈی سے ہوگا،

    مزید پڑھیں: رائل رمبل اورٹن کے نام، جان سینا ڈبلیو ڈبلیو ای چیمپئن بن گئے

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • یمن میں شادی کی تقریب پربمباری‘ 20 افراد ہلاک

    یمن میں شادی کی تقریب پربمباری‘ 20 افراد ہلاک

    صنعا: یمن کے شمالی علاقے میں شادی کی تقریب پرفضائی بمباری کے نتیجے میں دلہن سمیت 20 افراد ہلاک جبکہ 45 افراد زخمی ہوگئے۔

    تفصیلات کے مطابق یمن کے شمالی صوبے حجاح میں شادی کی تقریب پر فضائی بمباری کے نتیجے میں دلہن سمیت 20 افراد جان کی بازی ہار گئے۔

    مقامہ اسپتال الجمہوری کے سربراہ محمد الصومالی کے مطابق فضائی بمباری میں زخمی ہونے والے 45 افراد کو اسپتال لایا گیا جن میں دلہا بھی شامل ہے۔

    فضائی بمباری کے نتیجے میں زخمی ہونے والے افراد میں 30 بچے بھی شامل ہیں جن میں سے کئی کی حالت تشویش ناک ہے۔

    دوسری جانب حوثی باغیوں نے الزام عائد کیا ہے کہ شادی کی تقریب پرفضائی کارروائی سعودی فوجی اتحاد نے کی۔

    دوسری جانب سعودی اتحادی افواج کے ترجمان نے اس کی تردید کرتے ہوئے کہا کہ واقعے کی مکمل تحقیقات کی جائیں گی، اتحادی فورسز شہری آبادی کو نشانہ نہیں بناتی۔

    یمن میں فضائی کارروائی ‘5 افراد ہلاک

    خیال رہے کہ دو اکتوبر2017 کو یمن کے جنوبی علاقوں میں فضائی کارروائی کے نتیجے میں 5 افراد ہلاک جبکہ 8 افراد زخمی ہوگئے تھے۔

    یمن میں مسجد پر میزائل حملہ‘ 26افراد ہلاک

    یاد رہے کہ گزشتہ سال 18 مارچ کو یمن کے صوبے مارب میں باغیوں کی جانب سے حکومت کی حامی فورسز کے کوفیل کیمپ کی مسجد پرنمازجمعہ کے دوران میزائل حملے میں 26افراد ہلاک ہوگئے تھے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • حوثی باغیوں کا نجران پر ایک اور میزائل حملہ سعودی فورسز نے ناکام بنادیا

    حوثی باغیوں کا نجران پر ایک اور میزائل حملہ سعودی فورسز نے ناکام بنادیا

    ریاض: حوثی باغیوں نے نجران پر ایک اور بیلسٹک میزائل حملہ کردیا جسے سعودی ایئر ڈیفنس نے ناکام بنادیا ہے۔

    سعودی ٹی وی کے مطابق ایک ہفتے کے دوران حوثی باغیوں کی جانب سے سعودی عرب کی جانب دوسرا میزائل حملہ کیا گیا جسے سعودی فورسز نے ناکام بنادیا ہے۔

    عرب میڈیا کے مطابق میزائل کا ملبہ گرنے سے کھیت میں آگ لگ گئی جبکہ بیلسٹک میزائل حملہ صعدہ کے علاقے سے فائر کیا گیا تھا، سعودی حکام کا کہنا ہے کہ رواں سال حوثی باغیوں کی جانب سے میزائل حملوں میں تیزی آئی ہے تاہم سعودی فضائیہ نے بھرپور دفاع کرتے ہوئے میزائل حملوں کو ناکام بنا کر شہریوں کو بڑے جانی و مالی نقصان سے بچا لیا ہے۔

    حوثی باغیوں کا دوسرا میزائل سعودی عرب کے صحرائی علاقے میں گرا جبکہ جمعے کو بھی سعودی فورسز نے حوثی باغیوں کا میزائل حملہ ناکام بنایا تھا، سعودی حکام کا کہنا ہے کہ نجران کی جانب داغے گئے میزائل کو فضا میں ہی ناکارہ بنایا گیا تھا۔

    مزید پڑھیں: سعودی سیکورٹی فورسز نےشاہی محل کےقریب مشتبہ ڈرون مارگرایا

    واضح رہے کہ چند روز قبل سعودی میں سیکیورٹی فورسز نے شاہی محل کے نزدیک ایک ڈرون کو بھی مار گرایا تھا، سعودی افسر کا کہنا تھا کہ واقعے کے وقت شاہ سلمان اپنے محل میں نہیں تھے بلکہ وہ دیریا میں واقعہ اپنے فارم میں موجود تھے۔

    خیال رہے کہ حوثی باغی 2014 میں حکومت کے خلاف بغاوت کے بعد سے یمن کی سرحد کے نزدیک واقع سعودی عرب کے جنوبی شہر نجران کی جانب کئی میزائل حملے کرچکے ہیں۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • سعودی عرب، بس اورآئل ٹینکرمیں تصادم، 4 برطانوی معتمرین جاں بحق

    سعودی عرب، بس اورآئل ٹینکرمیں تصادم، 4 برطانوی معتمرین جاں بحق

    مکہ مکرمہ: سعودی عرب میں بس اور آئل ٹینکر کے تصادم کے نتیجے میں 4 برطانوی معتمرین جاں بحق اور 12 زخمی ہوگئے۔

    برطانوی میڈیا رپورٹس کے مطابق برطانوی معتمرین عمرہ کی ادائیگی کے لیے سعودی عرب میں موجود تھے، حادثہ اس وقت پیش آیا ہے جب بس مدینہ سے مکہ جارہی تھی کہ آئل ٹینکر سے جاٹکرائی۔

    حادثہ مکہ کے قریب الاخلاص ٹاؤن میں پیش آیا جہاں معتمرین سے بھری بس سامنے سے آنے والے آئل ٹینکر سے ٹکرا گئی، ایندھن کی وجہ سے بس میں آگ بھڑک اٹھی۔

    حادثے میں جاں بحق اور زخمیوں کو فوری طور پر اسپتال منتقل کردیا گیا ہے، زخمیوں کی حالت تشویشناک بتائی جاتی ہے، جبکہ شناخت کا عمل جاری ہے۔

    برطانوی وزارت خارجہ نے حادثے کی تصدیق کرتے ہوئے کہا ہے کہ سعودی عرب میں عمرے کی ادائیگی کے لیے جانے والے چار برطانوی شہری ایک حادثے میں جان کی بازی ہار گئے ہیں، اس حوالے سے مزید تفصیلات حاصل کی جارہی ہیں۔

    بس میں سوار مسافروں کا تعلق برطانیہ کے مختلف علاقوں سے تھا جن میں برمنگھم، ایگرینگٹن، ولور ہیمپٹن، بلیک برن اور پرسٹن شامل ہیں۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔