جلد کے مسائل کسی بھی عمر میں ہو سکتے ہیں، چاہے عمر چھوٹی ہی کیوں نہ ہو، بچوں کی اسکن جتنی نرم و ملائم ہوتی ہے تو اتنی ہی حساس بھی ہوتی ہے جس کی حفاظت کرنا بہت ضروری ہے۔
موسم کے اتار چڑھاؤ کی وجہ سے بچوں کی اسکن پر اس کے اثرات مرتب ہوتے ہیں، اس کے علاوہ اسکول جانے اور کھیل کود کی مختلف سرگرمیوں کے باعث ان کی جلد کی رنگت خراب ہوجاتی ہے۔
ایک ماں کی ذمہ داری ہوتی ہے اور اس کیلیے یہ سمجھنا بھی ضروری ہے کہ بچے کی اسکن کے مسائل کو کیسے حل کیا جائے۔
اے آر وائی ڈیجیٹل کے پروگرام گڈ مارننگ پاکستان میں پاکستان شوبز کی معروف اداکارہ سعدیہ امام نے اس مسئلے کا حل بیان کیا اور ماؤں کو بہترین مشورے دیئے۔
انہوں نے بتایا کہ میری بیٹی سوئمنگ کیلئے یا اسکول کی سرگرمیوں میں کہیں جاتی ہے تو میں ایک کام لازمی کرتی ہوں کہ اس کی اسکن پر دودھ یا ٹماٹر کاٹ کر مل دیتی ہوں اس کے ساتھ میں بچوں کی جلد پر سن بلاک ہر صورت میں لازمی لگاتی ہوں۔
انہوں نے کہا کہ اسکول جانے والے بچوں کو متوازن اور صحت مند غذا دی جائے کیونکہ یہ بڑھنے کی عمر ہوتی ہے اور بچے چیزوں کو تیزی سے سیکھتے ہیں۔
انہوں نے کہا کہ خصوصاً خواتین چہرے کی جلد کو نرم و ملائم اور تازہ رکھنے کیلیے گلاب کا عرق، گلیسرین اور لیموں کا رس، ان تینوں چیزوں کو ملا کر ایک بوتل میں ڈال کر رکھ لیں۔ اس کو لگانے سے چہرے اور ہاتھوں کی جلد صاف اور چکمدار ہوجائے گی۔
پروگرامیں گفتگو کرتے ہوئے اداکارہ عروبہ مرزا نے بتایا کہ میں دہی اور شہد کے اندر گلاب کے پھول کی خشک پتیوں کو پیس کر اس میں ملا کر ایک پیسٹ بناتی ہوں اس کے لگانے سے چہرے کی جلد گلو کرتی ہے۔ اس پیسٹ کو پورے جسم پر بھی لگایا جاسکتا ہے۔
اس کے علاوہ بچوں کی جلد کی حفاظت کے لیے انہیں سورج کی شعاعوں سے بچانا، حفاظتی لباس پہنانا، اور سن اسکرین کا استعمال کرنا ضروری ہے۔
سردیوں میں جلد کو سردی سے بچانا، ٹھنڈی ہوا میں جانے سے گریز کرنا، اور گرمی میں نمی برقرار رکھنا اہم ہے۔ بچے کی نازک جلد کی حفاظت کے لیے انہیں سائے میں رکھنا اور دھوپ سے بچانے والے کپڑے پہنانا شامل ہے۔
