دودھ کی چائے ہمارے معاشرے میں بہت زیادہ پیا جانے والے مشروب ہے جبکہ ماہرین صحت عام چائے کی نسبت کالی چائے کو پینے کی ترغیب دیتے ہیں۔
چائے کے بغیر کوئی محفل ہو یا تقریب ادھوری سی ہی محسوس ہوتی ہے، ہماری ہر صبح کا آغاز بھی اسی دودھ کی چائے سے ہوتا ہے حالانکہ طبی لحاظ سے دودھ کی جائے سے کالی چائے صحت بخش سمجھی جاتی ہے۔
اس حوالے سے ماہرین کا کہنا ہے کہ دودھ کی چائے کے صحت پر مضر اثرات مرتب ہوتے ہیں، تاہم کالی چائے کے کوئی مضر اثرات نہیں ہوتے لیکن پھر بھی اسے محدود حد تک استعمال کیا جائے تو ہی فائدہ ہوتا ہے۔ یہ چائے اینٹی آکسیڈنٹس، ٹینن، فائٹو کیمیکلز اور بہت سے غذائی اجزاء سے بھرپور ہوتی ہے۔
قوت مدافعت
انسان کی مضبوط قوت مدافعت اسے بدلتے موسم میں بیماریوں سے تحفظ فراہم کرتی ہے، اگر آپ آلودہ شہر میں رہتے ہیں تو صورت حال مزید خراب ہوسکتی ہے۔
بیماریوں سے بچنے کے لئے ہر ممکن طریقے سے اپنی قوت مدافعت کو مضبوط کرنا ہوگا، یہ چائے اینٹی آکسیڈنٹس سے بھرپور ہوتی ہے اسی لئے یہ جسم کے دفاعی نظام کو بڑھانے میں کارآمد ہوتی ہے۔
امراض قلب سے بچاؤ
چاہے آپ کو دل کے مسائل ہوں یا ہائی بلڈ پریشر یا ہائی کولسیٹرول ان تمام امراض میں اس چائے سے بہتر کچھ نہیں ہے۔ ان تمام امراض والے افراد کو اپنے دن کا آغاز کالی چائے سے ہی کرنا چاہئے کیونکہ کثیر مقدار میں موجود اینٹی آکسیڈنٹس دل کی صحت کے لئے مفید ہوتی ہے۔
ذیابیطس کے مریضوں کے لئے مفید
اگر کسی شخص کو شوگر کا مرض لاحق ہے تو اسے صبح خالی پیٹ ایک کپ کالی چائے ضرور پینی چاہیئے، اس میں موجود غذائی اجزا جسم میں بلڈ شوگر لیول کو کنٹرول کرکے ذیابیطس کو کنٹرول کرنے میں مدد دیتا ہے۔
دماغی صحت کی ضامن
کالی چائے کا استعمال ذہنی دباؤ اور پریشانی کو کم کرنے میں مدد دیتا ہے یہی نہیں اس کے استعمال سے انسان کے دماغی خلیوں کو پہنچنے والے نقصانات کو کم کیا جاسکتا ہے۔
نظام ہاضمہ کے لئے موزوں
بہت سے لوگوں کو دودھ کی چائے پینے سے پیٹ کے مسائل کا سامنا کرنا پڑتا ہے، لہٰذا یہ چائے ایسے لوگوں کے لئے بہترین علاج ہے، کالی چائے کی پتیوں میں کیٹیچن ہوتے ہیں جو آنتوں کی سوزش کی بیماری والے افراد کے لئے نہایت مفید ہے۔
یاد رکھیں !! کالی چائے کے کوئی مضر اثرات نہیں ہے تاہم طبی ماہرین کا ماننا ہے کہ اسے محدود مقدار میں استعمال کیا جائے تو ہی فائدہ ہوگا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نوٹ : مندرجہ بالا تحریر معالج کی عمومی رائے پر مبنی ہے، کسی بھی نسخے یا دوا کو ایک مستند معالج کے مشورے کا متبادل نہ سمجھا جائے۔
