ایشیا کپ سے متعلق اچھی خبر ہے کہ ایونٹ کا انعقاد پاکستان میں ہی کروائے جانے کا امکان ہے۔
غیرملکی میڈیا کی رپورٹ کے مطابق ایشیا کپ میں بھارت کے میچز نیوٹرل وینیو پر کھیلے جائیں گے تاہم نیوٹرل وینیو کا فیصلہ ابھی تک نہیں کیا جاسکا ہے۔
یو اے ای، عمان، سری لنکا یا پھر انگلینڈ میں بھارت کے میچز ہوسکتے ہیں۔
واضح رہے کہ ایشیا کپ مقابلوں کا آغاز رواں برس ستمبر میں ہوگا جس میں چھ ٹیمیں حصہ لیں گی۔ ایشیا کپ 2023 میں پاکستان اور بھارت کی ٹیمیں ایک ہی گروپ میں شامل ہیں۔
واضح رہے کہ گزشتہ دنوں بھارتی وزیر کھیل انوراگ ٹھاکر نے اپنے مؤقف کو تبدیل کرتے ہوئے اس معاملے کو بھارتی کرکٹ بورڈ (بی سی سی آئی) کے فیصلے سے منسلک کردیا۔
انوراگ ٹھاکر کا کہنا تھا کہ بھارتی کرکٹ بورڈ کو ایشیا کپ میں شرکت کے حوالے سے فیصلہ کرنے دیں اس کے بعد وزارت داخلہ فیصلہ کرے گی۔
واضح رہے کہ پاکستان کو رواں سال ایشیا کپ کرکٹ ٹورنامنٹ کی میزبانی کرنی ہے جب کہ بھارت نے پاکستان میں ٹیم بھیجنے سے انکار کیا ہوا ہے،اس کا مؤقف ہے کہ ایشیا کپ پاکستان سے کسی دوسرے ملک شفٹ کیا جائے۔
بھارت کی جانب سے ایشیا کپ میں شرکت نہ کرنے کے اعلان پر پاکستان نے بھی رواں سال بھارت میں ہونے والے ورلڈکپ سے دستبردار ہونے کا کہہ دیا ہے۔
