ایچ بی ایل پاکستان سپر لیگ میں لاہور قلندرز نے اپنے اعزاز کا دفاع کیا دوبارہ چیمپئن بننے پر موجودہ اور سابق کرکٹرز نے اپنی رائے کا اظہار کیا۔
ایچ بی ایل پاکستان سپر لیگ 8 جس طرح پورے مہینے شائقین کرکٹ کے ذہن ودل پر چھایا رہا اسی طرح اے آر وائی نیوز پر پی سی ایل کا مقبول ترین پروگرام ہر لمحہ پُرجوش بھی خوب چھایا رہا۔ پروگرام میں پی ایس ایل 8 کے فائنل کا جشن بھی خوب منایا گیا جس میں شریک موجودہ اور سابق کرکٹرز نے بھی اظہار خیال کیا۔
شو کے مہمان بنے کبھی دھوکا نہ دینے والے سابق قومی کپتان سرفراز احمد جنہوں نے لاہور قلندرز کے کپتان شاہین شاہ آفریدی کی کارکردگی کو بہت سراہا۔
سرفراز احمد نے کہا کہ شاہین نے بہترین کپتانی کی۔ انہوں نے ایک اوورمیں دو اہم وکٹیں لینے کے ساتھ شاندار بیٹنگ بھی کی۔
چیمپئن کپتان یونس خان کا کہنا تھا کہ اگر اس میچ میں ایک رن اور ہو جاتا تو فائنل سپر اوور میں جاتا۔ سابق قومی وکٹ کیپر بلے باز کامران اکمل نے بھی فائنل میچ کو شاندار میچ قرار دیا اور قلندرز کے کپتان شاہین شاہ آفریدی کی بیٹنگ کی کھل کر تعریف کی۔
پروگرام میں جہاں کرکٹرز نے اپنی ماہرانہ رائے دی وہیں مصطفیٰ چوہدری اور عادی ایک بار پھر قہقہوں کا طوفان اپنے ہمراہ لائے۔
واضح رہے کہ گزشتہ شب دفاعی چیمپئن لاہور قلندرز نے قذافی اسٹیڈیم میں کھیلے گئے پی ایس ایل 8 کا فائنل سنسنی خیز مقابلے کے بعد ایک رنز سے جیت کا اپنے اعزاز کا کامیابی سے دفاع کیا۔
