پی ایس ایل میں لاہور قلندرز کے اوپنر بیٹر فخر زمان کا کہنا ہے کہ رضوان تیز بھاگتا ہے اس کو سائیڈ میں کردیں وہ تھکا دیتا ہے۔
اے اسپورٹس کے پروگرام ’کرکٹ کہانی‘ میں فخر زمان اور حارث رؤف نے شرکت کی اور میزبان شعیب ملک کی جانب سے پوچھے گئے دلچسپ سوالات کے جوابات دیے۔
شعیب ملک نے پوچھا کہ فخر آپ کو کس کے ساتھ بیٹنگ کرنے میں مزہ آتا ہے۔
فخر زمان نے کہا کہ ’میں نے امام الحق کے ساتھ کافی کرکٹ کھیلی ہے تو اس سے اچھی انڈر اسٹینڈنگ ہے لیکن بابر اعظم کے ساتھ بیٹنگ کرنا اچھا لگتا ہے لیکن رضوان رننگ میں تھکا دیتے ہیں انہیں سائیڈ میں کردیتے ہیں۔‘
اوپنر بیٹر نے کہا کہ بابر اعظم رننگ کے دوران اچھی کالنگ کرتے ہیں لیکن امام کا کبھی آپ کو پتا نہیں تھا وہ سن رہتا ہے۔‘
انہوں نے بتایا کہ ’جب امام الحق کو رننگ کے دوران کچھ کہو تو کہتا ہے فخری کال نہیں کی میں کہتا ہوں کال کی تھی تم نے سنا نہیں ہے۔‘
شعیب ملک نے حارث رؤف سے پوچھا کہ شاہین آفریدی کے علاوہ آپ کو بولنگ کرنے میں کس سے ساتھ مزہ آتا ہے؟
فاسٹ بولر نے کہا کہ شاہین کے انجرڈ ہونے کے بعد نسیم شاہ کے ساتھ بولنگ کرنا اچھا لگا کیونکہ پارٹنر ایسا ہونا چاہیے جو آپ کو بھی اعتماد دے۔
