پاکستان کے سابق کپتان اور پی ایس ایل کی فرنچائز پشاور زلمی کے مینٹور پی ایس ایل میں ایک بڑی تبدیلی دیکھنے کے خواہشمند ہیں اور اس کا مطالبہ کردیا ہے۔
پاکستان سپر لیگ 8 اب اپنے اختتام کی جانب گامزن ہے۔ پہلے مرحلے میں بلے بازوں نے کئی ریکارڈ بنائے۔ اب تک کے ایونٹ میں ریکارڈ 7 سنچریاں بن چکیں۔ کئی بار 200 سے زائد اسکور بنے۔ ایک میچ میں سب سے زیادہ رنز بننے کا عالمی ریکارڈ بھی قائم ہوا۔ ٹی 20 کی تاریخ کا دوسرا بڑا ہدف 243 رنز بھی حاصل کیا گیا تاہم ان تمام ریکارڈز کے باوجود دنیا بھر میں اپنی بلے بازی سے دھاک بٹھانے والے انضمام الحق ان سب سے خوش نہیں ہیں۔
انضمام الحق نے گزشتہ روز قذافی اسٹیڈیم گراونڈ میں ٹیم کی پریکٹس کے دوران میڈیا سے گفتگو کرتے ہوئے اپنی خواہش کا اظہار کردیا اور پاکستان سپر لیگ میں باؤنڈری کو بڑا کرنے کا مطالبہ کر دیا۔
سابق کپتان نے اپنے مطالبے کی توجیح پیش کرتے کہا کہ فاسٹ آوٹ فیلڈ اچھی چیز ہے اس سے رنز تیزی سے بنتے ہیں البتہ چھوٹی باؤنڈری ہوگی تو انٹرنیشنل کرکٹ میں بیٹرز کو مسائل کا سامنا ہوسکتا ہے جس کا نقصان پاکستانی ٹیم کو ہوگا۔ اس لیے پی ایس ایل میں باؤنڈریز کو بڑا کیا جائے کیونکہ بڑی باؤنڈریز میں بیٹنگ کرنے سے کھلاڑیوں اور قومی ٹیم کا فائدہ ہوگا۔
انضمام کا کہنا تھا کہ پشاور زلمی فارم میں ہے اور چاروں ٹیمیں محنت کرکے پلے آف میں پہنچی ہیں۔ مجھے امید ہے کہ پشاور زلمی فائنل تک رسائی حاصل کرے گی۔
انہوں نے پی ایس ایل کے بعد افغانستان کے خلاف تین ٹی 20 میچوں پر مشتمل سیریز کے حوالے سے کہا کہ افغانستان کو ٹی ٹونٹی سیریز میں ہرگز آسان حریف کے طور پر نہ لیا جائے۔افغانستان کے چھ سات کھلاڑی پوری دنیا کی لیگ کھیلتےہیں۔ انہیں زیر کرنے کے لیے ہمیں اچھی کرکٹ کھیلنی ہوگی۔
سابق قومی کپتان نے مزید کہا کہ نوجوانوں کھلاڑیوں کے لیے سنہری موقع ہے کہ جس طرح انہوں نے پی ایس ایل میں پرفارم کیا ہے۔ اسی تسلسل کو برقرار رکھتے ہوئے وہ انٹرنیشنل کرکٹ میں بھی خود کو منوانے میں کامیاب ہوں۔ صائم ایوب باصلاحیت ہیں اور امید ہے کہ وہ افغانستان کے خلاف بھی پُرفارم کریں گے۔
