Category: کھیل

ورلڈ ماسٹرز اور ایشین ماسٹرز ویٹ لفٹنگ چیمپئن شپ کی میزبانی پاکستان کو مل گئی۔

اسلام آباد میں چیمپئن شپ کے انعقاد کے لیے حکومت نے گرین سگنل دے دیا جس کے بعد اسپورٹس بورڈ نے ویٹ لفٹنگ ایسوسی ایشن کو این او سی جاری رکدیا۔

صدر ایسوسی ایشن ارشدخان  نے ایونٹس بنیان مرصوص اور معرکہ حق کے نام کردیے۔

انہوں نے کہا کہ چیمپئن شپ میں پچاس ملکوں کے پانچ سو سے زائد مرد و خواتین ویٹ لفٹنر حصہ لیں گے، ایونٹس کی میزبانی پاکستان کے لیے اعزاز ہے۔

واضح رہے کہ پاکستان نے قطر میں ہونے والی ایشین ماسٹرز چیمپئن شپ میں 10 میڈلز حاصل کیے تھے۔

پاکستان ٹیم کے سابق کپتان محمد حفیظ کا کہنا ہے کہ بابر اعظم اور محمد رضوان اب اہم کھلاڑی نہیں رہے۔

مقامی یوٹیوب چینل سے گفتگو کرتے ہوئے محمد حفیظ نے کہا کہ اہم کھلاڑی وہ ہیں جو میچ جیتتے ہیں اور حالیہ برسوں میں رضوان اور بابر دونوں میچ جیتنے والی کارکردگی پیش کرنے میں ناکام رہے ہیں، سلمان علی آغا ٹیم کے لیے زیادہ مستحق اور اہم کھلاڑی ہیں۔

انہوں نے کہا کہ اگر ہم گزشتہ ڈیڑھ سے دو سال پر نظر ڈالیں تو مسلسل کارکردگی دکھانے والے کھلاڑی سلمان علی آغا، صائم ایوب اور حسن نواز ہیں، ہم ان کے بارے میں بات کیوں نہیں کر رہے، یہ پاکستان کے لیے میچ جیتنے والے موجودہ کھلاڑی ہیں۔

حفیظ نے ٹیم میں بابر اور رضوان کی جگہ پر بھی سوال اٹھاتے ہوئے کہا کہ انہیں بطور کھلاڑی اپنی جگہوں کو درست ثابت کرنے کی ضرورت ہے۔

یہ پڑھیں: ’پاکستانی کرکٹرز نام کے سپر اسٹار اور کام کے زیرو ہیں‘

انہوں نے کہا کہ میرے خیال میں بابر اور رضوان کو ٹیم میں اپنی پوزیشن کے بارے میں فکر مند ہونے کی ضرورت ہے، انہیں پہلے خود کو اچھے کھلاڑی ثابت کرنے کی ضرورت ہے، اہم کھلاڑی بعد میں آتے ہیں۔ دونوں ماضی میں اچھے تھے، لیکن اب وہ نتائج نہیں دے رہے۔

سابق کپتان نے دونوں کو دوبارہ فارم میں آنے کا مشورہ دیا اور نسیم شاہ اور شاہین شاہ آفریدی کی پرفارمنس پر بھی تنقید کی۔

ان کا مزید کہنا تھا کہ دونوں کو کھیل میں پوری طرح شامل ہونے کی ضرورت ہے، ورنہ نتائج نہیں آئیں گے۔ یہی مسئلہ نسیم شاہ اور شاہین شاہ آفریدی کا ہے، وہ بھی پاکستان کے لیے میچ وننگ پرفارمنس نہیں دے رہے ہیں۔

حفیظ نے زور دے کر کہا کہ پاکستان کرکٹ کو بڑے ناموں کی ضرورت نہیں بلکہ ایسے کھلاڑیوں کی ضرورت ہے جو اگلی دہائی تک مسلسل کارکردگی دکھا سکیں۔

آسٹریلیا نے جنوبی افریقا کو 2 وکٹوں سے شکست دے کر تین میچوں کی ٹی 20 سیریز 2-1 سے اپنے نام کرلی۔

تیسرے ٹی 20 میچ میں جنوبی افریقا نے پہلے بیٹنگ کرتے ہوئے 7 وکٹوں کے نقصان پر 172 رنز بنائے، آسٹریلیا نے 173 رنز کا ہدف ایک گیند قبل 8 وکٹوں کے نقصان پر حاصل کرلیا۔

گلین میکسویل نے میچ وننگ 62 رنز کی اننگز کھیلی، کپتان مچل مارش 54 رنز بنا کر نمایاں رہے، ٹریوس ہیڈ نے 19 اور ٹم ڈیوڈ نے 17 رنز بنائے۔

یہ پڑھیں: کوربن بوش کو وکٹ لینے کے بعد ڈگ آؤٹ کی جانب اشارہ کرنا مہنگا پڑ گیا

جنوبی افریقا کی جانب سے کوربن بوش نے تین کھلاڑیوں کو آؤٹ کیا، کوینا مفاکا اور کاگیسو ربادا نے دو، دو وکٹیں حاصل کیں۔

اس سے قبل جنوبی افریقا نے 7 وکٹوں کے نقصان پر 172 رنز بنائے تھے، ڈیوڈ بریوس کی 53 رنز کی اننگز رائیگاں گئی، وین ڈر ڈوسن نے 38 اور ٹرسٹن اسٹبس نے 25 رنز بنائے۔

آسٹریلیا کی جانب سے نیتھن ایلس نے تین کھلاڑیوں کو آؤٹ کیا، جوش ہیزل ووڈ اور ایڈم زمپا نے دو، دو وکٹیں حاصل کیں۔

گلین میکسویل کو میچ کا بہترین کھلاڑی قرار دیا گیا جبکہ ٹم ڈیوڈ کو مین آف دی سیریز قرار دیا گیا۔

کرکٹ کی دنیا میں کچھ واقعات ایسے ہوتے ہیں جس کا کوئی سوچ بھی نہیں سکتا ایسی ہی ایک ویڈیو سوشل میڈیا کی زینت بن رہی ہیں جسے دیکھ کر لوگ قہقہ لگانے پر مجبور ہوگئے۔

آئی سی سی پینل میں شامل امپائر رچرڈ کیٹل بورو نے ویڈیو ایکس اکاؤنٹ پر شیئر کی جو وائرل ہوگئی اور اب تک اسے ہزاروں لوگ دیکھ چکے ہیں۔

انہوں نے کیپشن میں لکھا کرکٹ کی تاریخ میں پہلی بار ایسا ہوا ہے، آپ اگلے 100 سال تک کرکٹ میں ایسا رن آؤٹ دوبارہ نہیں دیکھ سکیں گے، اس ویڈیو کو لازمی دیکھیں۔

یہ پڑھیں: وائرل ویڈیو: ایک ہاتھ سے ناقابل فراموش کیچ لینے والا تماشائی کون؟ پرکشش آفر بھی مل گئی

ویڈیو میں دیکھا جاسکتا ہے کہ بولر کے گیند کروانے کے بعد بیٹر گیند کو روکتے ہی رن بنانے کے لیے بھاگتا ہے اور نان اسٹرائیکر اینڈ پر کھڑا کھلاڑی بھی رن مکمل کرلیتا ہے۔

اس دوران کور پر کھڑا فیلڈر کیپر کی جانب تھرو کرتا ہے جسے وہ پکڑنے میں ناکام رہتا ہے۔

کیپر نے ڈائیو لگائی لیکن حیران کن طور پر گیند اس کے ہاتھوں سے نکل نان اسٹائیکر اینڈ کی جانب وکٹوں پر جالگی اور دوسرا رن لینے کی کوشش کرنے والا کھلاڑی آؤٹ ہوگیا۔

ملتان: پی سی بی نے 2025-26 کے لیے ویمنز کرکٹ ٹیلنٹ ہنٹ پروگرام کا اعلان کردیا۔

انڈر 19 ایمرجنگ خواتین کھلاڑیوں کے ٹرائلز 21 اگست سے کراچی میں ہوں گے، پروگرام کے تحت 3 ستمبر تک ملک بھر میں ٹرائلز ہوں گے۔

لاہور، کراچی، راولپنڈی، پشاور، مردان، کوئٹہ، ملتان اور بہاولپور میں ٹرائلز ہوں گے۔

ٹرائلز میں انڈر 19 کھلاڑیوں کے لیے کم سے کم عمر 12 سال رکھی گئی ہے، منتخب کھلاڑیوں کو نیشنل انڈر 19 ٹورنامنٹ کھیلنے کا موقع ملے گا۔

ٹرائلز 21 اگست کو کراچی کے حنیف محمد ہائی پرفارمنس سینٹر میں شروع ہوں گے اور اس کے بعد پیر 25 اگست کو لاہور کے ایل سی سی اے گراؤنڈ میں ٹرائلز ہوں گے۔ ٹرائلز بالترتیب 26 اور 27 اگست کو راولپنڈی اور پشاور میں ہوں گے۔

28 اگست کو مردان اور کوئٹہ میں بیک وقت ٹرائلز ہوں گے جبکہ ملتان اور بہاولپور میں انڈر 19 اور ایمرجنگ ویمنز کرکٹرز بالترتیب 2 اور 3 ستمبر کو ٹرائلز میں شرکت کر سکتی ہیں۔

پاکستان کی سابق خواتین کھلاڑی بتول فاطمہ اور سابق ٹیسٹ کرکٹر اسد شفیق پر مشتمل قومی خواتین کی سلیکشن کمیٹی متعلقہ ریجنل کوچز کے تعاون سے تمام شہروں میں ٹرائلز کا انعقاد کرے گی۔

ٹرائلز میں حصہ لینے والے کھلاڑی کو عمر کی تصدیق کے لیے ب فارم یا CNIC یا نادرا سے جاری کردہ پیدائش کا سرٹیفکیٹ لانا ہوگا۔