بھارت کے سیمی فائنل کھیلنے سے انکار کے بعد پاکستان چیمپئنز نے ورلڈ چیمپئن شپ آف لیجنڈز 2025 کے فائنل کے لیے کوالیفائی کرلیا۔
ورلڈ چیمپئن شپ آف لیجنڈز کے منتظمین نے تصدیق کی ہے کہ پاکستان چیمپئنز نے ورلڈ چیمپئن شپ آف لیجنڈز کے فائنل کے لیے کوالیفائی کرلیا ہے جبکہ انڈیا چیمپئنز کی ٹیم سیمی فائنل سے دستبردار ہوگئی ہے۔
دفاعی چیمپئن انڈیا نے پہلے پاکستان چیمپئنز سے راؤنڈ کا میچ بھی کھیلنے سے انکار کردیا تھا۔
انڈیا چیمپئنز نے گزشتہ روز ویسٹ انڈیز چیمپئنز کو شکست دے کر سیمی فائنل کے لیے کوالیفائی کیا تھا اور نیٹ رن ریٹ میں انگلینڈ چیمپئنز کو پیچھے چھوڑ دیا تھا۔
ویسٹ انڈیز کو شکست دینے کے بعد پوائنٹس ٹیبل پر بھارت چیمپئنز چوتھے نمبر پر آئی اور ان کا سیمی فائنل ٹاپ پر موجود پاکستان چیمپئنز سے شیڈول تھا۔
کرکٹ لیگ نے بیان میں کہا ہے کہ ڈبلیو سی ایل میں ہم نے ہمیشہ کھیل پر یقین کیا ہے جو دنیا میں حوصلہ افزائی اور مثبت تبدیلی لاتا ہے۔
انتظامیہ کا کہنا ہے کہ عوامی جذبات کا ہمیشہ احترام کیا جانا چاہیے، آخرکار ہم جو کچھ بھی کرتے ہیں وہ ہمارے سامعین کے لیے ہوتا ہے۔
کرکٹ لیگ کا کہنا ہے کہ تمام عوامل کو مدنظر رکھتے ہوئے بھارت چیمپئنز اور پاکستان چیمپئنز کے درمیان میچ منسوخ کردیا گیا ہے اس کے نتیجے میں پاکستان چیمپئنز فائنل میں پہنچ جائے گی۔
